حب في الثانوية

chapitre 55

رقدت وكل دقيقة نفطن مخلوعة بايتة نحلم بالشي لي صرالي .آدم بات معايا كل دقيقة يشوفني نفطن يبقا يسقسي فيا وشبيك ، علاه نوضتي . نقولوا والوا .نعاود نرجع نرقد في حضنوا . المرة لخرة حلمت بلي آدم شافنا وطلقني . وليت نعيط ونبكي ونقولوا لا متخلنيش . بقا آدم ينوض فيا قالي ششش خلاص حبي  راكي غير تحلمي . فطنت لقيت روحي نقطر بالعرق والدموع على خدي . مسحلي دموعي قالي وش كنتي تحلمي حتى راكي تبكي .خزرت معاه حابة نقولوا بصح خايفة  ، من بعد قتلوا نسيت . بقا يمسحلي في العرق وقالي اريج وش صرى حتى حالتك راهي هكدا . قتلوا ما صرى والوا .قالي راكي تتمسخري بيا شوفي حالتك كيفاه وتقوليلي ما صرى والوا . انا خفت غير لا يفيق قتلوا وشبيها حالتي راني لاباس بيا . قالي والله ،بايتة ليلة كاملة وانتي نايضة مخلوعة و  تقولي لاباس بيا . بقيت ساكتة قالي شوفي مراحش نبقى نسقسي فيك ، بصح كون نفيق بيك مخبية عليا حاجة الطلاق بيناتنا .وقف من السرير راح يخرج .انا بقيت مشوكية اول مرة آدم يهدر على الطلاق . نطقت قتلوا آدم وش قاعد تقول .قالي كيما سمعتي علابالي بلي كاينة حاجة صراتلك راني قاريك وحافظك حالتك تاع البارح وراها  حاجة يا تقوليلي انتي يا نعرف وحدي . بصح لاكان عرفت وحدي ورقة طلاق بيناتنا فهمتي . خرج وخلاني نخمم مستحيل نقولوا مانيش مستعدة نخسروا ، أصلا ميقدرش يتحمل الصدمة اي واحد في بلاصتو راح يثأثر ويتصدم . لازم نلقى حل بلى ما نقولوا .ادا قتلوا اديني لدارنا راح يشك  اكثر لازم نكمل السمانة هنا .  دخلت عجوزتي للشمبرة على خاطر كي شافت أدم بات معايا راحت رقدت مع النسا في الصالة ، قاتلي وش حوالك درك لاباس .قتلها ايه ، قاتلي والله غير عين صاباتك كنتي لاباس بيك ، مبقتيش  تزوقي روحك الناس راها متقولش الله يبارك راهم غير يحسدو .قلت في قلبي يا ريت حسدوني ومصراليش لي صرى لبارح . قاتلي هيا نوضي اهبطي معايا لتحت خير ماتقعديش راقدة يزيد عليك الحال قتلها ايه . وجدت روحي وهبطت معاها لتحت دخلنا الكوزينة . كانو كل لثم سلمت عليهم ، جيت راح نعاونهم . قاتلي عجوزتي اقعدي اريج راكي مزلتي مريضة . نطقتلها مرت عم آدم قالتلها غير الخير وشبيها اريج .قالتلها لبارح في الليل داخت . قالتلها بلاك طاحلها السكر من التعب . قالتلها عجوزتي ايه بلاك ديجا هيا راهي مريضة بالقلب على هديك متقدرش التعب بزاف .انا الحق معجبنيش الحال كي قالت مريضة بالقلب . علابالي بلي قالتها بنيتها بصح معجبنيش الحال كي قالت قدامهم . كل بقاو يهدرو وحدة تقولي ربي يجيبلك الشفا وحدة تقولي متبانش عليك مريضة . انا قلقت بصح حملتها وسكتت . بقيت قاعدة معاهم ، صونا التلفون تاع مرت عمو المتوسطة بقات تهدر. ونسمع فيها تقول روح برك شوف خدمتك آدم راه هنا .كي كملت سقساتها عجوزتي .. قالتها راه كريم لي عيط قالي بلي عندو خدمة لازم يسافر ميقدرش يقعد هنا حتى للعرس ..انا سمعتها قريب نوضت نزغرت من الفرحة الحمد لله يا ربي تهنيت منو على الأقل نكمل هاد نهارين متهنية . انا طلعلي المورال وبدات تعجبني القعدة وصل وقت لغدا حطو الشخشوخة معمرة باللحم والشوربة كيف كيف وسلاطة . انا كليت غير السلاطة برك على خاطر ما نوكلش اللحم . كملنا . انا الحق مزلت جيعانة وحشمت لا نقولهم زيدوني ، طلعت للشمبرة وعيطت لآدم .هز عليا وقالي وي . تفكرت بلي متغشش مني .قتلوا دومي ارواح نحتاجك قالي مانيش قاعد قولي وش تحتاجي . عرفتها مزال متغشش .قتلوا ارواح برك راني نستنى فيك فالشمبرة . كوبا عليا قعدت نستنى فيه . حتى دخل بقيت نشوف معاه كان لابس كلاسيك وحاط الحطة لي يشوفوا يقول   هو لعريس . قالي وش تحتاجي . قدمت عندو بستوا قتلوا الله يبارك على راجلي البوڨوص لي يشوفك يقول انت لعريس. . قالي اريج هيا قولي وش تحتاجي خليني خارج . مزال متغشش . قتلوا جيعانة . خزر معايا وقالي روحي تغداي. قتلوا تغديت بصح مزلت  جيعانة كليت غير السلاطة برك. قالي وش راح نديرلك انا.  قتلوا كيفاه وش راح ديرلي اشريلي حاجة ناكلها نصبر روحي حتى للعشاء. ...  تنهد وقالي  وش نشريلك .قتلوا اشريلي بيتزا مع الكوكا كولا وجيبلي شيكولا فضتلي. قالي ايه . رجع جابلي باطة تاع البيتزا ومونادا والشيكولا . قالي راني شريتكلك . حطهم فوق الطابلة وراح يخرج . قتلوا اقعد تغدا معايا . قالي شبعان .قتلوا دومي لوقتاه راح تقعد متغشش مني. . قالي حتى تقوليلي وش راكي مخبية عليا. .انا حلفت بالكدب قتلوا والله ماني مخبية عليك والوا. قالي المهم انا راني خارج .وليت نبكي قتلوا قول بلي من شفت حبيبتك القديمة كرهت مني ومبقيتش تحبني . خزر معايا وقالي علابالك كل ماتهدري نحب نجي نكويك بالنار  على فمك باه تعدلي هدرتك . قتلوا درك وليت ما نعرفش نهدر ، دورت وجهي عليه  نبكي   وقتلوا اخرج وهز  حوايجك معاك بطلت مش راح ناكل . تنهد وجا قعد بجنبي وجبدني لحضنو قالي علابالك والله تعبتيني معاك . قتلوا علاه تعبتك. قالي علاه جاية  مدللة بزاف هكدا ،  حاجة ما تعجبك .ضحكت وقتلوا كاينة حاجة تعجبني . قالي وش هاد الحاجة لي تعجبك  . خزرت في عينيه وقتلوا انت تعجبني . ضحك وقالي والله انا نحكي معاك سيريو وانتي تتمسخري .قتلوا علاه نتمسخر راني نحكي صح ، عمري ما توقعت نتزوج بواحد بوڨوص كيفك وزيد قاري وحنين ومتربي ويخاف ربي فيا ،نقعد عمري كامل نشكر في ربي لي عطاني راجل كيفك . باسني على فمي وقالي ياعمري على الكبيدة تاعي تحبيني ڨاع هكدا قتلوا ايه نموت عليك . قالي هيا تغداي قبل ما تبرد البيتزا ، فتحت الباطة وبديت ناكل فيها نسيت أصلا بلي آدم قاعد معايا غطست في الماكلة ، طاحت عليا وحد الشهية يعلم بيها غير ربي ، كملتها كاملة . ضحك آدم وقالي صحة عليك . ياك زعما عرضتيني باه نتغدا معاك ، كملتيها وحدك . قتلوا يا والله نسيت وزيد كنت جيعانة علاه محبستنيش . قالي راني نڨصر معاك بصحتك حبي  انا راني تغديت لتحت .بقيت نخزر معاه قالي وشبيك تخزري معايا .قتلوا آدم علاه وليت زينون هكدا. عاد يضحك بالصوت.  قالي انتي لي زينونة .  كملت قعدت معاه شوي حكينا من بعد قالي انا راني هابط عمي يستنى فيا ، باسني وخرج ، وانا بدلت قشي ومشطت شعري درت شوي ماكياج . وهبطت دخلت الكوزينة لقيت فيها غير كوثر قاعدة وفي يدها  صاشي تاع شيبس تاكل فيها . انا شفت الشيبس قلبي رجف عليها حابة غير ندوقها وبقيت نشوف فيها كيفاه تهز حبة وتحطها في فمها ، سخفت متت عليها . حبيت نطلبها من بعد قلت عيب وزيد علابالي بيها تكرهني ومش راح تمدلي ، رحت قعدت في الصالة وانا نتخيل في طعمت هديك الشيبس الدمعة جاتني من السخفة ، شفتها هك شوي وجات حتى هيا قعدت ، خرجت الكوزينة نحوس على ساشي تاع الشيبس .حتي لقيتها مرمية في البوبال ، جبدتها من لابوبال وصورتها بعثتها لآدم في المسنجر ، قتلوا اشريلي الشيبس هادي . قالي من بعد نجيبلك درك راني بعيد .عيطتلوا . قتلوا أدم ازرب جيبهالي والله راني سخفانة ميتة عليها ، قالي ياك قتلك راني بعيد من بعد كي نروح نجيبلك معايا . قتلوا دبر راسك جبهالي درك ولا نخرج نشريها وحدي. قالي تخرجي نكسرلك رجلك . قتلوا ميهمنيش يا تجبهالي درك ،يا نخرج نشري وحدي . قالي والله ما راني جايبهالك وتخرجي تشوفي وش ندير فيك وكوبا عليا . وليت نبكي مفهمتش علاه حابة ندوق هديك الشيبس درك . جاتني عجوزتي قاتلي اريج وشبيك علاه راكي تبكي . قتلها والوا هكدا برك .قاتلي متعاركة مع آدم قتلها لا بصح قتلوا جيبلي شيبس محبش .ناضت تضحك قاتلي تبكي على الشيبس والله ضحكتيني ، حسبتها حاجة كبيرة .قتلها بصح راني سخفانة عليها . قاتلي خلاص دوك نشوف كاش طفل صغير يشريلك . خرجت بقات تفركت على دراري  ما لقات حتى واحد . جاتني قاتلي ما لقيت حتى واحد اصبري حتى لمبعد . قعدت معاهم في الصالة وانا نستنا غير كاش طفل يشريلي رايحة نموت عليها .
عند ادم لي كان يسوق في الطموبيل مع عمو يشري في القضيان تاع العرس ، صونا التلفون تاعو لقاها يماه هز عليها قالها الوا يما لباس . قاتلو لاباس ، وين راك .قالها راني مع عمي نشري في القضيان تاع العرس .قاتلوا جيب وش وصاتك مرتك  ومن بعد ارجع كمل شغلك . ضحك وقالها ديجا جات تشكيلك. قاتلوا ما شكاتلي ما والوا الطفلة من قبيل وهي تبكي عليها .قالها تحكي صح هداك لي قعد تبكيلي على الشيبس ، قالها قوليلها  كي نجي راني نجيبلك . قاتلوا الطفلة حابة تاكلها درك جيبهالها وارجع كمل شغلك . قالها يما راهي غير تدلل راني نعرفها من بعد نجيبلها. قاتلوا مش قاعدة تدلل الطفلة شاهيتها قلبها يرجف عليها متخليهاش في قلبها  يرضى عليك يا ولدي راه مش مليح  ليها . قالها خلاص يما نشريها ونجي.

كنت قاعدة في الصالة حتى نسمع في أدم يعيط ريجاا . حطيت الخمار على راسي وخرجتلوا لقيتوا واقف بحدا الباب. . روحتلوا قتلوا نعم . خزر معايا قالي وشبيه وجهك  اصفر هكدا مريضة حط يدو على جبيني يقيسلي في السخانة . قتلوا لا منيش مريضة . قالي  مالا علاه وجهك اصفر هكدا .قتلوا معلاباليش ، جبتلي وش وصيتك . قالي وش وصيتيني نسيت . قتلوا تحكي صح . قالي ايه  نحكي  صح نسيت.  خليتوا وجيت رايحة حكملي يدي قالي وين رايحة . وليت نبكي قتلوا خليني ماتهدرش معايا. بقا يخزر معايا حاير .قالي بصحك راكي تبكي على شيبس . درتلوا براسي ايه . وقتلوا سخفانة ميتة عليها   حابة غير ناكلها . قالي يا عمري  على المدللة تاعي راني غير نضحك معاك  برك راني جبتلك وحطيتها في الشمبرة . قتلوا صح قالي ايه صح روحي كوليها . طلعت نجري في الدروج دخلت للشمبرة لقيت ساشي محطوط فوق الطابلة فتحتها لقيت في ربعة ساشيات تاع الشيبس . دخل آدم وقفل الباب قالي هيا كولي  الشيبس لي كنتي تبكي عليها كيف لولاد الصغار . قعدت في الأرض وفتحت وحدة هزيت منها حبة مع  دخلتها لفمي و كليتها  تقول جمرة كانت شاعلة  في قلبي وطفات . تنهدت  وقتلوا كان قلبي راح يحبس عليها . قالي بعيد الشر عليك . بقيت ناكل فيهم حتى خلصتهم في ربعة . قعد بجنبي وجبدني لحضنو قالي مكنتش علابالي بلي راكي سخفانة عليها هكدا si non راني جبتهالك في الدقيقة . قتلوا حتى انا مكنتش سخفانة غير كي شفت كوثر توكل فيها قلبي رجف عليها . قالي خلاص عمري وعد الحاجة لي تسخفي عليها تلقايها عند في دقيقتها .