حب في الثانوية

chapitre 62

كملت ليلة كاملة وانا داخلة في حضنو بين يديه ، حاسة بالخوف ، هيا صح انا موالفة ساعات. نخاف كي نقعد وحدي ، بصح هاد المرة خفت بزاف سيرتو كي سمعت صوت ، وهداك الخيال لي مفهمتش حتى تاع واه مش تاع عبد ومش تاع حيوان ، غير تفكرت قلبي رجف بقيت نقرا في القرآن في قلبي حتى غفيت رقدت . فقت الصباح لقيت روحي وحدي ، بقيت متكسلة في الفراش حتى شفت آدم دخل قالي صباح الخير . قتلوا صباح النور وين كنت ، قالي كنت في الدوش ،علاه نوضتي زيدي ارقدي شوي . قتلو صاي شبعت نوم ، جا قعد بجنبي ضربتني ريحتوا عجبتني . قعدت وحطيت راسي في رقبتوا قتلوا ريحتك تهبل . ضحك و قالي يخي موالفة تقوليلي ريحتك تزعف ، قتلوا لا درك عجبتني ، بقيت نشم فيها من بعد بستوا على رقبتوا قتلوا دومي حبي راني سخفانة على الفراز ، قالي دوك نشري لعمري احلى فراز . قتلوا ايه وزيد جيبلي معاه نوتيلا ، قالي ايه دوك نروح نشريلك . بدل قشوا وخرج . وانا قعدت نستنى فيه يجي ، وعجوزتي تحاول فيا باه نفطر وانا نخمم غير وقتاه يجيب لفراز باه ناكلوا ، سخفانة عليه ميتة . وحد الساعة ودخل هاز الصشيات . دخلهم للكوزينة وعيطلي روحتلوا . قالي بطة راني جبتلك ، رحت نجري للصاشية ،فرغت هداك لفراز كامل في الصحن بعد ما غسلتوا وهزيت الباطة تاع النوتيلا . هزيتهم ورحت قعدت في الصالة في الارض قدام التيلي . بقيت ناكل فيهم ، لحقني آدم ، قعد معايا . قالي ماتكليش الفراز بزاف راه يديرلك الحساسية..قتلوا نورمال ،قالي مكاين حتى حاجة نورمال راكي حاطة قدامك زوج كيلو تاع فراز كون تكليه كامل تعاشي في السبيطار . كولي نص ومن بعد كولي نص. قتلوا خليني برك ، شفتوا استغفر وناض ، بقيت نخزر ونخمم علابالي بروحي بلي راني مكثرتلها هادو ليامات مع آدم بصح الله غالب ، حاسة روحي قلقانة وكارهة حابة غير نتعارك معاه ، تقول واحد قاعد في مخي يوسوس فيا . حبست الماكلة وهزيت الصحن ديتو الكوزينة لقيت آدم قاعد مع عجوزتي . حليت الفريجيدار وحطيت الصحن فيه ، سمعت صوت آدم قالي اريج . درتلوا قتلوا نعم عيطتلي . خزر معايا قالي لا معيطش . قتلوا سبحان الله ، راني سمعتك قتلي اريج . ضحكت عجوزتي وقاتلي يا بنتي واحد ما عيطتلك راح نكدبوا عليك حنا . بقيت نخزر معاهم سبحان الله سمعتوا عيطلي . رحت قعدت بجنبوا وحطيت راسي على كتفوا . قالي وشبيك تباني قلقانة ، قتلوا ايه حاسة روحي مخنوقة هنا في الدار ، قاتلي عجوزتي من لوحم برك . قالي خلاص لعشية نديك دوري شوي .قتلوا ايه حابة نخرج قلقت من الدار . كملنا تغدينا ، قالي هيا وجدي روحك باه نروحوا ، انا جيت طالعة لداري باه نوجد روحي سمعت لاصونات تاع الباب ، رحت فتحت لقيتها مرت عمو الصغير يمات كوثر جات غير هي وبنتها الصغيرة ، كوثر ماجاتش معاهم .علابالها كون تجي نسحتها نورمال .قدمت سلمت عليها فوق قلبي ، وهي تتحضن فيا وتبوس وتقولي وش راكي ومنا انا بقيت مكذبة فيها من وقتاه ولات تحبني هاد لمرا دخلتها للصالة جات عجوزتي قعدت معاها . قاتلي اريج بنتي وجدي القهوة . انا عرفتها ديراكت مافيهاش خرجة طاحلي المورال كنت حابة نخرج . دخلت للكوزينة لقيت آدم مزال قاعد قتلوا راهي جات مرت عمك. قالي شكون فيهم قتلوا يمات كوثر . قالي ايه وش راح نديرلها انا ، قتلوا وشبيك تعيط راني قتلك برك . بقا يخزر معايا قالي انا نخرج خير . قتلوا وين رايح . مرجعليش خرج وخلاني . هزيت لقهوة ورحت للصالة قعدت معاهم ، بقيت معاهم نتحاكاو ،بصح بقيت حايرة في يمات كوثر تقول مش نفس العبد ، تشكر فيا وبنتي وربي يهنيك . المهم قعدت حتى الخمسة تاع العشية وروحت . انا غير خرجت هي من الدار ، حكمني وحد الضغط حاسة روحي راني في قبر مش دار . بقيت غير ندور بلاصة ماحاملتها حابة نخرج برة . عجوزتي قاتلي وشبيك ياطفلة من قبيل وانتي دوري كي النحلة غير الخير .قتلها والوا بصح حابة نخرج برة داق خاطري هنا في الدار . قاتلي عيطي لراجلك يجي يخرجك . هزيت التلفون عيطتلوا هز عليا قالي وي . قتلوا دومي وينك . قالي راني بحدا الدار مع صحابي علاه تسقسي . قتلوا ارواح خرجني برة داق خاطري من الدار . قالي وجدي روحك دوك نجي . وجدت روحي لبست غوب درت الخمار لبست صباطي وقعدت نستنا فيه حتى جا ،شافني قالي راكي واجدة . قتلوا ايه . قالي نروحوا الحديقة لقدامنا برك خاطر منقدرش نسوق . قتلوا ايه نورمال . خرجنا من الدار لهوا يهبل برة ودنيا بدات تضلام . قتلوا ايه درك وين حسيت روحي تنفست ، كنت مخنوقة في الدار . بقينا نتمشاو حاكمين في يدين بعضانا وهو وين نعدو بحدا الرجال ولا نعدوا بحدا قهوة يقولي هبطي راسك ، ازربي ، امشي قدقد..كي وصلنا ، قتلوا بسيف هبلتني معاك مخلتنيش حتى نمشي كيما الناس طريق كامل وانتا هبطي راسك ، ازربي منعرف واش . قالي املا حابتني نخليك تمشي وتتكسلي ورجالة تتفرج فيك . ديجا مبقاتش تتعاود هادي تاع نخرجك بلا طموبيل . قتلوا علاه واش فيها ديجا واحد ما سامع بواحد انت برك موسوس . قالي يا سيدي راني موسوس منحبش مرتي تمشي قدام رجال هكدا سافا . قعدنا في الكراسة في الحديقة روعة لولاد يلعبو وناس قاعدة ، بقينا ساكتين خزرت معاه وقدمت حطيت راسي على كتفوا قتلوا دومي حبي تغششت مني . ضحك قالي علاه حتى نتغشش علابالي بيك لسانك أطول منك . ضحكت قتلوا يا انا لساني طويل . قالي ايه من اول نهار شفتك فيه وانتي لسانك أطول منك هههه. قتلوا يا تشفا اول نهار شفتك فيه قلت في قلبي هاد العبد مش سلعة تاع دزاير باين تركي ههههه.ضحك قالي والله .قتلوا ايه كنت نجي نقرا غير باه نشوفك ، حتى ماما فاقت بيا قاتلي علاه عدتي تحبي لقراية هههه. قعد يضحك قالي ايه، كملي احكيلي .قتلوا سيرتو كي نشوفك مع شهرة نهبل عقل ما يقعد في راسي كي ما نلقا ما ندير نولي نبكي ، ثلاث سنين دموعي نشفوا كل ليلة لازم نبكي و نهار لي سمعت بالخطبة تاعك وصلت حالة كنت نرقد غير بالدوا تاع النوم . قالي يا عمري على المدللة تاعي راكي تعدبتي اكثر مني . قتلوا ايه تعدب بزاف بصح مش خسارة فيك هههه . ضحك وقالي هاد الهدرة نورمالمو تقوليهالي في الدار باه نقدر نبوسك وراها . قتلو نورمال خبي البوسة كي نروحوا لدار اعطيهالي . كملنا قعدنا حتى لثمنية تاع اليل .وروحنا تعشينا عند عجوزتي وطلعنا للدار . تفرجنا على فيلم حتى لل12 ورقدنا ، بصح انا من نغمض عينيا نشوف خيال تاع مرا واقفة تخزر معايا وكي نفتح عينيا يروح . ونسمع في صوت تقول واحد قاعد يهدر في المخي ، نبقا غير نستغفر ولاصقة في أدم حتى يجي يتقلب ويدورلي بظهرو منخليهش ، فاق بيا مسحلي على شعري قالي وشبيها بنتي علاه راكي نايضة .خزرت معاه قتلوا خايفة . بقا حاير قالي من واه راكي خايفة .خفت لنقولوا على الصوت لي نسمع فيه ميصدقنيش .وليت قتلوا خايفة وخلاص . تحضني وقالي ارقدي خلاص راني معاك معندك علاه تخافي بقا يقرا عليا في القرآن حتي غفيت بين يديه . فقت كي بقا ينوض فيا فتحت عينيا قالي هيا نوضي نصلوا الفجر راه ادن صاي . انا سمعت كلمة صلاة لحمي تشوك . قتلوا خليني برك راني تعبانة مش قادرة نصلي . بقا يخزر معايا قالي من وقتاه تقولي راني تعبانة على الصلاة، هيا نوضي بلا تمسخير تاعك .قتلوا آدم خليني برك والله تعبانة مش قادرة . قالي نوضي صلي حتى بالقاعدة ، المهم متفوتيش الصلاة هيا . انا قلقت صح حاسة واحد قاعد يقولي كملي ارقدي خير معندك ماديري بالصلاة . قتلوا منوضش خليني نكمل رقادي . عيط عليا قالي تنوضي ولا نخلي السبتة تاكل لحمك يالله نوضي متقلقنيش على الصباح تاع ربي . خفت وقفت دخلت للدوش نتوضا ، قعدت كل ما نجي نتوضا ننسا حاجة ، تقول اول مرة نتوضا في حياتي بسيف باه توضيت خرجت لقيتو في الصالة يستنى فيا قاعد في السجادة هاز المصحف ، انا شفتوا تقول شفت شيطان قدامي تمنيت نروح نخنقو مفهمتش علاه .قالي هيا ارواحي نصلوا . بدينا الصلاة هو نسمع فيه يقرا نورمال ويصلي بصح انا حرف تاع قرآن ماقدرت نخرجوا من فمي نجي راح نقرا نحبس وحدي وحدي. كملنا دارلي قالي ارواحي نسبحوا شوي .قتلوا سبح وحدك انا راح نرجع نرقد . قالي وشبيك انتي يخي موالفين كل يوم نصلوا ونسبحو مع بعض حتى يطلع الضو .قتلوا انا ليوم تعبانة مش قادرة مفيها والوا . قالي روحي روحي من قدامي راكي بديتي تقلقيني انتي . خرجت رجعت للشمبرة وخليتوا دخلت في الفراش ، دورت راسي زيد شفت هداك الخيال عدى يجري في البالكوا جمدت في بلاصتي مقدرتش نتحرك غير نخزر فيه ، مستحيل يكون خيال تاع حيوان ومستحيل يكون تاع انسان ، وقفت بالعقل ورحت نمشي جيهة البالكوا حتى وصلت ، انا فتحت البالكوا وهو راح ، وانا دموعي طاحوا من الخوف ، دخل آدم لقاني واقفة في البالكوا ، قالي علاه واقفة ثم مسحت دموعي قتلوا والوا واقفة برك . قالي ارواحي هنا البرد عليك . دخلت بقا يخزر معايا قالي كنتي تبكي قتلوا لا راه غير من البرد برك . عاودت دخلت الفراش جسمي يرجف من الخوف .دخل معايا وجبدني لحضنو قالي وشبيها البطة تاعي ترجف بردانة . خزرت معاه نبكي قتلوا خايفة . قالي اريج من واه خايفة قولي . بقيت ساكتة طلعلي راسي مسحلي دوعي قالي هيا عمري قوليلي من واه خايفة راني معاك . انا جيت راح ننطق ونشوف الخيال تاع لمرا بين عينيا . سكتت وغمضت عينيا لصقت فيه نرجف قالي وشبيكي ترجفي هكدا ، قوليلي برك من وله خايفة هكدا راني معاك ، بقيت غير نبكي لاصقة فيه مغمضة عينيا نخاف نفتحهم نشوف لخيال هداك ، بقا يمسحلي على شعري ويقرا في القرآن ، من بعد قالي دقيقة نشعل التلي نديرلك القران راه غير الشيطان يوسوس فيك . انا سمعت كلمة قرآن جا لخيال بين عينيا ، زيد لصقت فيه اكثر نبكي قتلوا لا متخلنيش وحدي تعيش متروحش . مسحلي على شعري قالي خلاص راني هنا مش راح نروح متخافيش ، بسيف باه هديت شوي ورجعت رقدت .