حب في الثانوية

111

ضحك قالي  هدا تقدري تسميه كلش غير طاجين حلو  . عرفتوا ماعجبوش. بصح ما حبش يقول . قتلوا ذوق الشربة بلاك تعجبك . ذاقها قالي مليحة بقا ياكل فيها مع البوراك ، انا شربت غير لبن مع زلابية تغلقتلي لابيتي من الصيام والتعب  . كي شافني منيش ناكل قالي كولي وشبيك من قبيل غير تشربي في اللبن .قتلوا منيش قادرة ناكل تعبت ليوم .قالي يا حصرا من نهار لول صاي تعبتي ومقدرتيش  وحرقتي يدك  ربي يستر من ليام لي  جايين . قتلوا دوك نوالف غير نهار لول برك تعبني .  قالي كولي متبقايش بالجوع . كلينا كملنا ، هو ناض راح للصالة وانا لميت لماعن برك قلت ادا حبست عليا يدي شوي نغسلهم . سمعتوا يعيطلي بطة  جيبيلي فنجان قهوة .طيبت القهوة وحطيت شوي مكسرات وحلاوات . ديتلوا قعدت بجنبوا  طبس باسني على رقبتي. قالي من الصباح وانا حاكمها .  تبسمت قتلوا  زعما  .  هز شرب لقهوة . قالي نصلي التراويح ونجي نسهر مع عمري . قتلوا اوكي راني نستنى . راح وجد روحوا وخرج راح يصلي . بقيت وحدي في الدار تكسلت نتفرج في التلفزيون ونكونكتي  . حتى سمعت الباب يطبطب ، حرت شكون راح يطبطب عليا وعلابالي آدم هاز المفتاح معاه .كنت راح نفتح من بعد تفكرت كي وصاني على الباب ، عيطتلوا شحال من مرة  مهزش  يكون يصلي . محبيتش نفتح بصح محبسوش من الطبطيب وليت تكلت على ربي وقلت شكون سمعت صوت مرا قاتلي راني جارتك افتحي . فتحت عليها لقيتها مرا تكون في بداية  ثلاثينات معاها طفلة صغيرة بيبي . قاتلي اهلا راني جارتك نسكن في دار لي مقابلاتك . سلمت عليها وقلتلها متشرفين . قاتلي اسمحيلي جيتك هكدا بلا عرضة بصح كي شفتك المرة لي فاتت مع راجلك قلت نتعرف عليك بلاك نعودو صحبات . انا حشمت منها مالقيت وش نقولها من وقفتها عرفتها حابتني نقولها ادخلي حتى انا جاتني عيب عليا نوقفها هكدا قدام الباب قتلها تفضلي مرحبا بيك راني غير وحدي راجلي راح يصلي .قاتلي حتى انا راجلي راح يصلي .دخلتها للصالة كنت لابسة غير بيجامة  بونتاكور وتريكو صون مونش . قعدت معاها قاتلي ربي يبارك تهبلي بلا خيمار حتى شعرك يهبل .قلتلها عينيك لملاح كنت ديجا موجدة صينية تاع حلاوات والزلابية والقهوة زدت جبت الجي حطيتلها . قاتلي ملا راكي عروسة جديدة ماشفتكش قبل هنا  موالفة نشوف راجلك برك هنا  قتلها ايه عندي شهر ونص  قاتلي زواجة لعمر ان شاء الله . قتلها وانتي قاتلي عند سبع سنين زواج ولعام لي فات باه رزقني ربي ببنتي هادي .قتلها ربي يحفظهالك وش اسمها قاتلي اسمها  اريج .قتلها يااا كيما اسمي ارواحي عندي اببونة . حكمتها عندي بنتها عاقلة تهبل بقيت نحكي انا وياها عقليتها هايلة ، وصلت العشرة ونص  فضت التراويح قاتلي انا نروح يكون راجلي رجع من الصلاة عجبتني الڨصرة معاك غدوة نجيك  نسهرو كيما ليوم . وصلتها للباب مع فتحتهولها باه تخرج ونشوف آدم جاي من  بعيد غير شافنا خليقتوا تبدلت .  قتلها تصبحي بخير .قاتلي راني غدوة نجيك . خرجت ودخلت لدارها  غلقت الباب ودخلت للكوزينة كنت معولة منقولش بلي جاتني بصح كي شافها خرجت من عندي وش راح نقولوا . سمعت صوت المفتاح وهو يعيط اريج . خرجت عندو مع وصلت هز يدو ديراكت لشعري حكمني منو على قوة جهدو الجلدة حسيتها طارت .عيطت قتلوا آدم اطلقني وشبيك .قالي وشبيا يا ال##### شكون هادي لي كانت عندك عدتي دخلي الناس للدار بلا ما تسقسيني .قتلوا والله غير جارتنا لي تسكن مقابلتنا  هي لي جات طبطبت عليا . ضربني على فمي بظهر يدو وهو مزال حاكمني من شعري قالي وش وصيتك على الباب ياك قتلك يتكسر وما تفتحيش هدرت ولالا قولي .قتلوا راني عيطتلك باه نقولك وانت ماهزيتش عليا خفت ليكون واحد من لافامي تاعنا .عاود ضربني قالي وكي شفتها هي علاه دخلتيها للدار هدرت معاك كلمة درتي فيها لامان وكون ظهرت  كاش مهبولة ولا سراقة مش طفرت فيك  انتي وقيلا راكي حابتني نمشي معاك كيف الحيوانات باه تفهمي علاه متسمعيش الهدرة علاه حتا نسوطك باه تبردي قولي . بكيت قتلوا تحڨر فيا قتلك هيا لي جات طبطبت عليا وحبت تتعرف كي شافتني معاك الصباح ، ياك مدخلتش راجل . عاود ضربني على قوة جهدو حتى ساح الدم من شفتي .قالي نقتلك اريج نقتلك، راني منيش حاب نضربك متقلقنيش شوفي فيا  من ليوم تتحرق بيك الدار هنا وتعرفي روحك راح تموتي الباب مايتفتحش فهمتي ولا لا تسمعيه تكسر متفتحيش . بقيت غير نبكي .جبدلي شعري قالي فهمتي ولالا راني نهدر معاك نزيد نلقاك  حدا الباب كيما قبيل نكويك ولا منيش راجل وراكي تعرفيني غير متخلنيش نوريك وجهي الخايب وتاع كل يوم النسا خارجين داخلين مكانش منيش فاتح   داري بورديل . شاف معايا وش لابسة قرصني على دراعي حسيت لحمي طار بين صوابعوا قالي وقاعدة معاها هكدا معرية على روحك عبالك راح تهبليني انتي علاه جايحة وبهلولة هكدا كون غفلاتك وصوراتك بلا ماتفيقي علاه متخمميش والله يا اريج تعوديها غير السنتورة تاكلك ليوم راني فوتها كي عاد رمضان بصح تعوديها ما تلومي غير روحك .
عاود خرج وخلاني دخلت للدوش وانا نبكي بالشهقة  علاه تبدل معايا هكدا وعاد صعيب ، هو مكانش هكدا كان مساعفني مدللني حتى ادا حاب ينصحني ينصحني بالحنانة والمسايرة  ، بصح من لي تزوجنا عقليتوا مبدلة معايا نهار كامل وهو عڨابي نهار كامل وهو يبخص ويعيط وادا هدرت معاه كلمة ميخليليش علاها يحاسبني حتى على الهدرة تاع الصح وليت نخاف نهدر معاه براحتي نخاف نقول كلمة ينوض يديرلي عليها شرع . شفت مع يدي لقيتها ولات بقعة زرقة وموف من صوابعوا ،غسلت فمي من الدم  عدلت شعري وخرجت . دخلت للشمبرة بقيت نخمم في حياتي معاه زعما يبقى هكدا معايا يحاسبني حتى على اتفه حاجة . نعست وهو مزال ما جا وصلت 12 سمعت الباب تفتح عرفتوا هو وليت ريقلت الرافاي على زوج تاع الصباح باه ندير الصحور وغطيت راسي باه يفهم بلي راني رقدت . حسيت بيه كي دخل للشمبرة وجا وقف عند راسي بقاو يشوف معايا منعرف علاه من بعد نحالي لغطا على راسي وباسني وعاود خرج للدوش. كملت رقدت حتى صونا الرافاي ، فقت طفيتوا شفت بجنبي لقيت آدم راقد كنت راح نوضوا بصح علابالي راح يبقا يعيط  وانا صراحة كرهت من عياطوا . وليت  عدلتلوا لغطا وخرجت للكوزينة نوجد الصحور  بقيت نوجد فيه  وانا نتخلع وحدي ونتلفت ورايا  خايفة السكات وليل ، انا من عند ربي نخاف في ليل ومن فوق  بلا ماندير الحس بزاف باه مايفيقش  هداك  سهيت وانا نفيض في الحليب ما جيت ندور نلقاه واقف ورايا . من الخلعة صاي قلبي حبس وعاود مشى نهجت نهجة وحدة  حكمت قلبي لارض لعبت بيا حتى زرب هو حكمني    قالي  هدا انا برك ريجا وشبيك تخلعتي هكدا   .قعدني في كرسي وانا مزلت حاكمة قلبي مع الخلعة ،  طبس حكملي وجهي قالي خلاص ما صرا والوا علاه تخلعتي هكدا . بقيت ساكتة قعد على ركبة ونص وتحضني وانا قاعدة فوق الكرسي قالي خلاص عمري استغفري والله ما قصدي نخلعك غير حبيت نعنقك برك وانتي دورتي على غفلة . حطيت راسي على كتفوا غمضت عينيا قريب ندوخ من الخلعة حسبتوا جن خرجلي .