حب في الثانوية

126

بعد ما جا من الخدمة وصلني للدارنا قعدت حتى الليل تعشينا من بعد خرجنا مروحين ركبنا في الطونوبيل طريق كامل وهو يسوق شارد يخمم في اللحظة حبيت ندخل لمخو نعرف علاه  راه يخمم هكدا  والتلفون محبسش من لي ميساج كل دقيقة يدخلوا ميساج في ميسنجر و لا في النميرو هو مرة يهز مرة ميهزش ، انا صاي الوسواس حرقلي مخي لازم نعرف شكون . قتلوا آدم شكون لي راه يعيط هكدا . قالي من الخدمة .قتلوا حتى في الليل الخدمة . سكت قتلوا وش الخدمة متحبسش خدمتك هادي  ميزيش نهار كامل وانت تخدم حتى في الليل  يعيطولك . قالي اريج سكتينا يرحم والديك راسي راح يطرشق عليا متزيدينيش بحكاياتك . سكتت  بصح صاي ديسيديت من بعد نشوف تلفونوا ونعرف مع من راه يهدر  امبوسيبل نصدق بلي من الخدمة كيما راه يقول  مدام قلبي وسوسني من جيهتوا الا ما يكون راه مخبي عليا حاجة ويخوفي تخرج الحاجة لي راهي في بالي منقدرش نموت نورمال  .
وصلنا للدار  شفتوا حط التلفون فوق لاكوافاز و هز قشو  من الخزانة دخل للدوش باه يدوش  ، غير غلق الباب ديراكت هزيت التلفون وانا نرجف  جيت راح نفتحوا لقيتوا داير كود تاع ارقام . هادا الشي لي زاد وسوسني واكدلي بلي راه مخبي حاجة خاطر من لي عرفتوا جامي لا عمل الكود لتلفونوا الا ما تكون كاين حاجة مخبية فيه  . بقيت نجرب في الارقام على الزهر بصح وصلت  28 مرة وانا نجرب وحتى واحد ما صلح  حبست خفت لانوصل لل30 ويتكودالي ويفيق بيا . انا راح نرجع نحطو في بلاصتوا وصلوا ميساج وهو في يدي . شفت لقيتوا ميساج من نميرو مش ميساج ميسنجر قريت الميساج  من فوق خاطر التلفون مغلوق بالكود مكتوب علاه ماراكش تريبوندي ، الباقي مقدرتش نقراه لازم حتى ندخل باه نقدر خاطر باين ميساج طويل.  سمعت خطواتوا جاي درت بزربة باه  نرجع التلفون لبلاصتوا لقيتوا وصل دخل للشمبرة  لقاه في يدي قالي وش راكي ديري قتلوا صونا كنت راح نجيبهولك . جا نحاهولي من يدي قالي  صحا مرة الجاية ادا سمعتيه يصوني خلي على روحوا متدنايش ليه   . مقدرتش نزيد نصبر وصلت بيا صاي قاع الافكار جاو في مخي قلبي حسني بلي راه سخون فيا وراكم تعرفوا قلب لمرا ديما يكون احساسوا صحيح سيرتوا في حوايج هادم  قتلوا آدم شكون لي راه يبعثلك في لي ميساج وراه يعيط . قالي تبقاي تسقسي ريجا ياك قتلك قبيل من الخدمة. قتلوا  حتى دوك على 12 تاع الليل الخدمة .  عيط عليا ملقري كنت نهدر معاه نورمال قالي ايه الخدمة  راكي تكدبي فيا ولا وشنو فهميني  . حسيتوا يتهرب و حاب يرجعني  انا الغالطة وراني نكدب فيه . هديت روحي لازم نتصرف بعقلانية منيش حابة يصرى سوء تفاهم قادر انا نكون غالطة وانا لي راني موسوسة روحي في الباطل علابالي آدم  ميكدبش من لي عرفتوا جامي كذب عليا ولا حتى كدب  بضحكة    قتلوا لا  مصدقاتك منيش نكدب فيك  غير افتح التلفون واعطيني نشوف لي ميساج .قالي علاه حتا تشوفيهم راكي شاكة فيا قولي هادي اخرتها اريج تشكي فيا وتخربي في تلفوني . هنا تنطبق المقولة تاع السافيه يقرى ما فيه عاود وسوسني من دورا وجديد  . قتلوا منيش حابة نشك فيك بصح انت لي راك تخلي فيا نشك فيك بسيف ڨاع هادوا لي ميساج صباح وعشية حتى على 12 تاع الليل كيفاه حاب منشكش  اي مرا في بلاصتي راح تشك وتتوسوس . قالي راني قتلك من الخدمة عندي مشاكل وراهم يعيطوا ما فيها والوا . قتلوا خلاص ياك قلت ما فيها والوا اعطيني نشوف لي ميساج باه نحي الشك لي في راسي . قالي منيش راح نقعد نعاودلك  في نفس  الهدرة  نقولك حاجة شكي ولا اقعدي وتلفوني نزيد نلقاه في يدك منتفاهمش معاك راني وصيتك . جا خارج قتلوا انا لي نقولك حاجة وحطها مليح في راسك   علابالك بيا نحبك ونعشقك بصح  نهار نعرف بلي راك تخون فيا ولا خنتي لوكان حتى بكلمة والله  نسمح في كلش ونروح متزيدش تلقاني نقبل منك كلشي غير دخل لحياتنا مرا اخرى حتى لوكان بتمسخير ، اضربني ولا اعمل لي تحب عليه بصح باه تخوني هنا تحبس ننسا بلي انت آدم  . بقا يشوف معايا من بعد رجعلي حكملي وجهي قالي  وانتي حطي مليح في راسك بلي مستحيل  نخونك صحا بطة  ونحي هاد التوسويس من راسك خلينا عايشين هانين ونفرحوا ببنتنا لي راها جاية . درتلوا براسي ايه وقررت نصدقوا ونكذب كلشي . من وراها نهارين لا ميساج يوصل لا ابال تصوني  ،قلبي رتاح شوي بصح عقلي بقا يوسوسلي اكثر علاه حتا نقصوا لي ميساج ولي زابال . في الليل دخل لقاني قاعدة في الشمبرة نوجد في الفاليزة تاعي تاع الولادة قعد قالي وش راكي ديري قتلوا نوجد في فاليزتي باه من بعد ميفوتنيش الوقت كي يحكمني لوجاع تاع الولادة نكون مجهزة كلشي  . شفت معاه لقيتوا يخزر معايا والخوف في عينيه من لي قرب وقت لولادة  وهو هكدا مخلوع وخايف تقول هو لي راح يولد ساعات نقعد حايرة فيه . ضحكت قتلوا شبيك خايف تقول انت لي راح تولد.  قالي وانتي تحسابيها ساهلة نشوفك تتوجعي قدامي  كون يجيك لوجاع تاع لولادة قدامي منعرف واش ندير . قتلوا صاي متزيدش تخوني ديجا انا بلا والوا ميتة بالخوف.  جا قعد قدامي وجبدني لحضنوا قالي راني قتلك نقولوا للطبيبة تفوتك ديراكت سيزريان خير ما تبقاي تتعذبي.  قتلوا ياك سمعتها قاتلي الولادة  الطبيعية احسن حتى ماما وماماك كل قالولي هكدا.  قالي بصح باه نشوفك زوج ولا ثلاث سوايع قدامي وانتي تتوجعي منقدرش .قتلوا في خاطر بنتك لازم تتحمل.  قالي في خاطر ريتاج . قتلوا مزالك حاب تسميها ريتاج .قالي ايه عجبني قتلوا اوكي سميها كيما حبيت . باسني على جبيني قالي حبيبي انتي . حسيت بركلة في كرشي . توجعت قالي وشبيك راكي موجوعة قتلوا لا غير بنتك لي راهي ترفس فيا وقيلا راهي حابة تخرج . ضحك قالي وقيلا غارت و راهي حابتني نبوسها حتى هيا . هبط لكرشي  بقا يبوس ويهدر حبيبة باباها  الطبوزة تاع باباها وقتاه تجي وتفرحي باباك قولي يا الحنينة تاعي يا فرحة عمري  . نضمن بلي آدم  راح يكون أحسن اب لولادو ساعات انا يعاملني كشغل بنتو حتى قريب نصدق روحي بلي صح بنتو ، حنانتو واهتمامو يخلوه يكون أحسن اب في الدنيا . طبعت بوسة على شعرو . شاف معايا عاودت طبعت بوسة على خدو قتلوا ربي يخليك لينا . ضحك قالي بصح كي تجي بنتك متعملوليش عصابة انتي وياها منقدرش على دلالكم في زوج .