حب في الثانوية

chapitre 33

غدوة الصباح نضت لقيت بابا وصل رحت نجري عندو تحضنتو نبكي قتلوا بابا توحشتك متزيدش تروح وتخليني  ، ضحك وقالي  علاه تبكي لمدللة تاعي اه شكون لي بكالي بنتي قتلوا هكدا توحشتك برك ، قالي حتى انا توحشتك بصح الله غالب الخدمة تاعي تحتم عليا نروح ونخليك بصح نوعدك هاد لعام لخر العام الجاي ندير retraite. قتلوا صح قالي ايه علاجالك . بستو على راسو قتلوا ربي يخليك ليا  . جات ماما قعدت بقات تهدر هي وبابا حتى جبدت الحكاية قالها والله ادا الطفل ولد فاميليا ومتربي وخدام  علاش لالا نمدلوا وبعد الباك بربي ان شاء الله يدير العرس لوكان على القراية نقولوا لازم تكمل قرايتها و الخدمة نحطوهم مع الشرط. انا سمعت هدرتهم وانا هبلت قتلهم انا مانيش قابلة قالي بابا علاش ادا كان مكتوب مليح اقبلي في لول ولخر رايحة تزوجي قتلوا بصح انا مزلت صغيرة وزيد مانيش حابة نتزوج ماشي بسيف ولا كرهتوا مني حابين تتهناو مني. عيط عليا بابا  قالي  اريج اعدلي هدرتك  قدامي . نضت وخليتهم دخلت لشمبرة تاعي نبكي على زهري وعلى آدم لي حبيتو وعلى بابا لي اول مرة يعيط عليا  وعلى ماما لي نورمالمو توقف معايا وتفهمني بصح هي واقفة ضدي للحظة داقت بيا الدنيا ومن بعد قعدت نستغفر في ربي ونضت صليت باه تنحى عليا شوي وليت شربت الدوا تاع الرقاد ورقدت .

غدوة الصباح نوضتني ماما ، وجدت روحي مهدرتش معاها  . خرجت ديراكت قبل حتى ما نفطر ، دخلت قريت بصح بالي مش مع القراية . جات الساعة تاع أدم دخل حتى هو حالتو اكثر من حالتي بقا يقري فينا بصح انا مانيش مركزة ڨاع معاه ، حتى سقساني المرة لولة معرفتش نجاوب بيسك ما كنتش مركزة معاه بصح قالتلي شروق الجواب ملڤري  فاق بيا بلي شروق لي قالتلي الجواب mais ما قال والوا ، قاتلي شروق واشبيك كشما عندك مشكل  قتلها لا شوي مريضة برك قاتلي معليش تبعي مع الدرس خير ومتكسريش راسك بالتخمام. بصح انا قعدت نخمم سقساني المرة ثانية كانت شروق راح تقولي الجواب ، قالها شروق خليها تجاوب وحدها . خزر معايا قالي هيا اعطيني الجواب ، انا كنت راح نقولوا سؤال وما سمعتوش وانت تحوس على الجواب ، بقيت ساكتة قالي اسمعي هنا  تجي باه تقراي مش باه تخممي في حوايج اخرى المرة الجاية نسقسيك ما تجاوبيش نسحتك فهمتي . وكمل يشرح انا وجهي ولا احمر كي الطماطم من التبهديلا ، بصح رجعت نتبع في الدرس  .
فضت الحصة تاعو جيت خارجة قالي استناي ، دورتلوا قتلوا وش تحتاج، قرصني على زندي قالي واش رجعتي لصحانية لوجه تاعك ،قتلوا ايي نحي يدك عليا وجعتني ، وبقيت نمسح على البلاصة لقرصني منها ، قالي وشبيكي جاية منرفيا على الصباح غير الخير قتلوا والوا ، قالي اهدري وشبيك قتلوا بابا جا لبارح و ماما قاتلوا على الحكاية قالي ايه وش قال ، قتلوا قبل نورمال . قال تحكي صح قبل قتلوا ايه قبل بصح انا قتلوا مارانيش  قابلة ولا يعيط عليا. بقا ساكت ويخمم .
فاتو نهارين وبابا ميهدرش معايا حسيت صح الدنيا داقت بيا ، فليل سمعت خويا يهدر مع بابا قالوا الطفلة مزالت صغيرة وحابة تكمل قرايتها علاه حتى تقبل تتخطب وهي في عمرها 16، قالوا بابا انا الطفل سقسيت عليه متربي وعاقل خدام بدارو  واختك مالازمش  تفوت مكتوب كيما هدا ، تقبل بالخطبة ومن بعد العرس ساهل وراه قالي ادا على القراية نورمال نخليها تقرى وتخدم . قالوا خويا انا مفهمتش عليكم لهاد الدرجة جايتكم نورمال بنتكم تتخطب وهي ماراهيش قابلة  ، قاتلوا ماما  اختك راهي غير تدلل غير تتخطب يعجبها الحال . قالهم ملا انا خرجوني منها لحكاية انا منسيفش  على اختي حاجة مش حابتها . 
غدوة الصباح نضت وجدت روحي باه نروح نقرى ، قعدت نفطر في الطابلة حتى لقيت بابا قعد قالي ديري في بالك بلي في الصيف الطفل يجي يخطبك ، انا دموعي طاحو قتلوا بصح انا مارانيش حابة . قالي  انا عطيت كلمتي لراجل صاي . حكمتلوا يدو قتلوا بابا تعيش ماديرش فيا هكدا قالي بنتي رانا في مصلحتك . قتلوا انا مفهمتش عليكم وش هاد المصلحة لي  تخليكم تسيفو على بنتكم الزواج ، والله نقتل روحي قبل ما تصرى هاد الخطبة . عيط عليا بابا قالي اريج تزيدي تعاودي هاد الهدرة والله ما بقيت نشوف في وجهك ليوم الدين خبط الطابلة وخرج . جاتني ماما كانت راح تهدر معايا قاتلي بنتي ، قصيت عليها قتلها مانيش بنتك كلوا منك انتي ، نكرهك هزيت صاك تاعي و التلفون وخرجت .