حب في الثانوية

chapitre 41

غدوة الصباح عند ادم وجد روحو وراح للكافي لي راح يتلاقى فيه مع ام اريج. وصل قعد يستنى فيها حتى جات . قعدت مقابلاتو قاتلوا آدم لباس قالها لاباس ، ضحك و قالها نفس القعدة قبل عامين ونص ، قاتلوا ايه نفس القعدة . قالها بصح المرة هادي لازم عليك  تسمعيني . قاتلوا وش نسمع ،  ديجا رجعت من نهار لول بعد قلبتلي حوال بنتي ،عادت تقلي وش دخلك فيا وتقولي نهرب معاه . قالها آدم علاه متصدقيش بلي بنتك تحبي راه عامين ونص وما نساتنيش وش تحبي دليل اكثر من هك باه تتأكدي بلي ريجا تحبني صح . خزرت معاه حايرة  وقاتلوا ريجا . قالها قصدي اريج . سكتت ومن بعد قاتلوا انت لي جبتلها السنسلة لي مكتوب فيها ريجا . قالها ايه انا . قاتلو انت صح تحبها ، قالها ايه نحبها  ونعشق فيها . تنهدت وقاتلوا كيما تحبو مش  راح نوقف في طريقكم ربي يسهل عليكم . قالها تسمى راكي قابلة ، قاتلوا وش الفايدة تاعي نقبل ولالا . قالها بالعكس عندها فايدة انا حاب كلش يمشي على حسب  الاصول ولازم الوالدين يكونو قابلين بهاد الزواج . قاتلوا ايه قابلة ،  بصح حبيت نقولك هدرة تقعد بيناتنا منحبش اريج تسمع بيها . قالها ايه قولي . سكتت شوي ومن بعد قاتلوا ياك علابالك اريج مريضة بالتضخم في عضلة القلب . قالها ايه علابالي . كانت راح تكمل ومن بعد سكتت ، قالها كملي وش كنتي راح تهدري ، علاه حبستي ، قاتلوا شوف  انا حبيت نقولك درك  باه يكون عندك علم بكلش  قبل ما تكون كاينة حاجة رسمية ، المرة لخرة كي رحت لطبيبة تاعها قاتلي بلي الحاله المرضية تاعها تقدر تأثر على حياتها  الزوجية .   قالها وش تقصدي بكلامك. قاتلوا  قاتلي الطبيبة ممكن تكون عندها صعوبة في العلاقة الزوجية مقارنة مع انسان طبيعي،سرتو من ناحية التعب و القدرة تاع التحمل تاعها  ، وقادر حتى يأثر على الحمل والانجاب . أدم بقا ساكت وهي تخزر معاه وقاتلوا ادا مش راح تقدر تتقبلها  تتحملها بالحالة تاعها نورمال ما نلومكش وتقدر تروح تشوف حياتك وقلها بلي أنا لي مقبلتش وانت مقدرتش تقنعني ،مش مجبور باه تتزوج بوحدة مريضة . تكا ظهروا على الكرسي وضحك قالها لحد لآن مفهمتنيش ، انا اريج حبيتها وانا علابالي بلي راهي مريضة وعمروا ما كان المرض حاجة تعيبها ولا تنقص منها بالعكس هاد الشي راح يخليني نحطها في عينيا ، متنسايش بلي راني قاري مش جاهل  وعلابالي بلي المرض تاعها عندو أثار سلبية على حياتها ،بصح هاد الشي كل ما يهمنيش ، المهم عندي انها تكون مرتي حلالي في داري تتكتب على اسمي تولي تاعي وحدي ونعيشوا تحت سقف واحد   وعلاقة الزوجية لي راكي تهدري عليها آخر اهتماماتي الحب عمرو ما تعلق بالعلاقة الجسدية . تبسمت معاه وقاتلوا طمنتني ، تهنى انا لي راح نوقف معاكم في هاد الزواج ربي يتمملكم على خير ويجمعكم في الحلال ، هيا انا نخليك في أمان الله . وقفت وخرجت وادم بقا قاعد في بلاصتو يخمم في هدرتها . من بعد هز التلفون راح يعيط لاريج.

نضت على 11تاع الصباح رجع عليا تعب تاع الباك ههه. لقيت التلفون تاعي يصوني شفت النميرو عرفتوا تاع أدم هزيت عليه قتلوا الوا صباح الخير . قالي صباح النور على البطة تاعي  واش درك وين نضتي  ، قتلو ايه حتى وجهي مزلت ما غسلتوش ضحك وقالي  عندي ليك خبر هايل  راح يفرحك  قتلوا واش هو ، قالي  يماك صاي راهي قابلة ، قفزت من بلاصتي قتلوا قول والله ، ضحك وقالي والله راني تلاقيت بيها وفهمتها وراهي صاي قابلة . بعثلوا بوسة طويلة في التلفون وقتلوا نحبك نحبك نحبك . عاد يضحك بالصوت وقالي حتى انا نعشق فيك ، مزال لعشية نحكي مع محمد وباباك وصاي ، قتلو ان شاء الله حتى هم يقبلوا ، قالي متكسريش راسك انا نفريها معاهم المهم انتي تهلاي في روحك وفي صحتك برك  .قتلوا انا وش راح يخصني راني غير ماكلة ورقاد ، قالي إيه هكدا نحبك ، هيا انا نخليك من بعد نعيطلك قتلوا باي . كوبيت معاه ونضت نقفز فوق السرير ونعيط راني حاسة روحي راح نطير من الفرحة ، هبطت ورحت نجري لدوش غسلت وتوضيت. ورحت نصلي ركعات شكر وحمد . بقيت ساعة وانا نصلي وندعي ونشكر في ربي لدرجة دموعي ساحوا على خاطر عطاني فرحتين ورا بعض الباك وادم . وصلاة هي احسن طريقة تتواصلي بيها مع ربي.

كملت  وبقيت فوق السجادة نسبح ونستغفر حتى  جات ماما دخلت عليا ، خزرت معايا حايرة وش من صلاة نصلي فيها على 11تاع الصباح ، قاتلي وصلك لخبر ولا مزال . لعبتها نية في لهبال قتلها واش من خبر . ضحكت وقاتلي راح تعديها عليا باين عيطلك وقالك يماك راهي قبلت صاي . نضت بسلها راسها قتلها ربي يخليك ليا يا لعزيزة . تحضنتني قاتلي المهم عندي نشوفك فرحانة .قتلها متتخليش قداه راني  فرحانة لدرجة خايفة نحسد روحي على الفرحة لي راني فيها . قاتلي ربي يدومهالك أن شاء الله.

في لعشية آدم عيط لمحمد تفاهمو باه يتلاقاو في القهوة ، تلاقاو سلمو على بعضاهم وقعدوا يحكيو . حتى قال آدم لمحمد ، قالوا شوف صاحبي راني قاصدك في حاجة وإن شاء ما تعكسنيش . قالوا غير الخير خويا قالوا خير بربي ان شاء الله خير ، شوف انا جيتك من باب لحسب ونسب نخطبك في اريج ليا . محمد قعد حاير قالوا اريج اختي انا ليك انت . قالوا ايه . سكت شوي ومن بعد قالوا شوف قبل كلش انا يشرفني تكون نسيبي وين راح نلقا راجل كيفك لاختي ، بصح ياك علابالك بلي اريج مريضة . آدم ديراكت قص عليه الهدرة قالوا بلا ما تهدر علابالي بكلش وراني قابل بيها وعاجبتني . محمد ضحك وقالوا تقولي فيها في وجهي عاجبتني . آدم قالوا ايه عاجبتني علاه حتى نخبي ياك راني قاصدها للحلال . محمد تبسم وقالوا انا من عندي راني قابل ويشرفني تكون نسيبي وراح نتهنى على اريج معاك بصح لازم نسقسي بابا ونشوف رايو هو كلمتو لي تمشي . آدم لعبها نية قالوا  ايه لازم واريج متسقسيهاش  على رايها . محمد ضحك وقالوا ياولدي هديك كون نقلها خطبك آدم غدوة تهز الفاليزة تاع قشها وتجيك . ضحك آدم وقالوا علاه . تنهد محمد وقالوا اريج تحبك . آدم حار كيفاه حتى عرف بلي اريج تحبوا  وقالهالوا نورمال بقا ساكت ومحمد كمل يهدر وقالوا هي  مقالتلييش  ديراكت بصح  انا علابالي راني مربيها على يدي ونفهمها من عينيها ، عرفتها تحبك من  نهار لي قلتلها بلي رايح تخطب شهرة كانت لاباس بيها وكي سمعت طاحت ديتها لسبيطار لثم توسوست وشكيت بصح قلت اواه مكانش منها . وبقيت نعس فيها وفي التصرفات تاعها  كانت من لي تسمع اسمك الطفلة تتبدل تحمار وتحشم ولا تهرب  . حتى جا نهار لي أنت سافرت فيه كانت لاباس عليها حتى سمعت كيف كيف طاحت ودينها لسبيطار جابتها 15يوم وهي غير بكا و دايخة  دخلت في اكتآب واحد ما فهم علاش بصح انا فهمتها وزيد سمعتها تحكي  عليك مع صحبتها هديك شروق لثم تأكدت بلي تحبك . بصح قلت حب تاع مراهقة اي طفلة في عمرها تجيها هاد الحالة دوك  شهر ولا زوج وتنسى بصح الظاهر منساتش ، على خاطر كل مرة نسمعها تتعارك هيا ويما بسبتك . انا مقدرتش ندخل على خاطر هادي حاجة حساسة وهي ممكن تفهمني بالغالط ولا تحشم مني .خزر مع آدم وقالوا شوف انا قتلك هاد الشي باه ادا كتب المكتوب بيناتكم تحطها في عينيك راهي بنتي مش اختي ، يمكن راح تتعب معاها شوي على خاطر صغيرة  . راح تلقاها مدللة بزاف وعقليتها كيف تاع دراري الصغار   على اتفه حاجة تبكي بصح لازم تتحملها ما عندك ما دير على  خاطر تحبك ونتمنى متكسرلهاش  قلبها  . تبسم آدم معاه وقالوا تهنى راح نحطها في عينيا .