حب في الثانوية

chapitre 82

شويا تفاعل ❤️❤️❤️
غير كملت دنيا هدرتها تفتح الباب تاع الشمبرة كان آدم دخل خزر معانا قالنا وشبيكم ، بقينا ساكتين ودنيا تخزر فيا علابالي بيها راح تقولوا بقيت نخزر فيها ونحاول فيها بعينيا باه ماتقولش . بصح هي نطقت وقاتلوا آدم ، قصيت عليها الهدرة وانا نعصر في يديا قلبي راح يحبس من الخلعة قتلها دنيا تعيشي ..... قالنا وش كاين فهموني درك وش راكم مخبيين انتوا لزوج . نطقت بزربة قتلوا ماكاين والوا حبيبي والله رانا نقصرو برك روح انت دوك نجيوا وراك ..قاتلوا دنيا آدم راح نقولك . عاودت قصيت عليها الهدرة وانا نبكي قتلها دنيا اسكتي . عاد يعيط قالنا وش بيكم فهموني . خزر مع دنيا قالها وانتي اهدري وش كاين . قاتلوا اريج راهي اونسانت .شاف معايا قالي وش راهي تقول صح راكي اونسانت . درتلوا براسي لا وانا نبكي . قدملي حكمني من دراعي قالي انطقي قولي راكي اونسانت صح ؟؟؟ نطقت وانا نشهق قتلوا ايه . غير كملت هدرتي طلقلي يدي قالي غدوة نديك للطبيبة تهبطيه ومن بعد نتفاهموا . وخرج خزرت مع دنيا لقيتها تبكي قاتلي اريج سامحيني والله راني في مصلحتك . قتلها عمري مانسامحك من اليوم متعرفيني ما نعرفك فهمتي انساي بلي تعرفي وحدة اسمها اريج . مسحت دموعي وخرجت لحقت آدم . لقيتوا في الصالة جيت راح نهدر قص عليا قالي جيبي حوايج تاعك رانا مروحين هزيت الصاك تاعي ولحقتوا، ركبنا في الطونوبيل وانا غير نبكي ونخمم يا ربي علاه ديما فرحتي متكملش علاه بصح والله ما نهبطوا يا لوكان يصرا واش يصرا هدا ولدي ومستحيل نسمح فيه ياك هادي حياتي انا وانا حرة فيها . وصلنا للدار دخلنا وحنا ساكتين هو قعد في الصالة وانا دخلت للشمبرة بدلت قشي وخرجت وانا نخمم كيفاه نقنعوا ، دخلت للصالة لقيتوا قاعد فوق فوتاي ومغمض عينيه قعدت في الارض قداموا بحدا رجليه حطيت يدي على ركبتوا قتلوا آدم تعيش مديرش فيا هكدا ، انا مستحيل نسمح في ولدي ونطيحوا .قالي و هو مزالوا مغمض عينيه ريجا نوضي روحي خليني وحدي ، رجعت نبكي قتلوا آدم علاه راك دير هكدا نورمالمو راك فرحان كي راني اونسانت وراح نجيبلك بيبي . ديراكت فتح عينيه ولاح يدوا حكمني من شعري قالي انتي علاه متفهميش علاه وش وصيتك على الدوا ياك وصيتك وقتلك يا اريج راكي تشربي فيه قولتيلي ايه راني نشرب فيه وانتي تكدبي عليا في وجهي وزيد فوق هدا كامل كنتي مقررة تخبي عليا بلي راكي اونسانت في بالك مش راح نفيق بيك ، انتي لمن جيتي هكدا علاه وليتي هكدا ، نوضي من قدامي منيش حاب نغلط فيك نوضي منيش حاب نشوف وجهك وغدوة على الصباح نديك للطبيبة تهبطيه فهمتي.قتلوا والله ما هبطوا هدا ولدي انا وانا قررت نجيبوا . ناض يعيط قالي ### انتي متفهميش حياتك راهي في الريسك . قتلوا ياك هادي حياتي انا . طبس حط يدوا على خدي قالي ريجا حبي علاه راكي ديري هكدا ياك رانا عايشين هانيين فرحانين علاه راكي تفسدي في فرحتنا اماجيني تصرالك حاجةبعيد الشر انا منقدرش نعيش بلا بيك . حكمتلوا يدوا بستها قتلوا ادا صراتلي حاجة راهي مكتبة من عند ربي سبحانو . عاود رجع كيما كان قاعد قالي نوضي من قدامي روحي ترقدي وكيما تفاهمنا غدوة نروحو للطبيبة . رجعت نبكي قتلوا ماتفهناش آدم ربي يخليك نبوسلك رجلك خليني نجيبوا نبوسلك رجلك خليني هبطت راسي راح نبوسلوا رجلو تاع الصح تهسترت علابالي غير هادي الطريقة لي تنفع معاه ، علابالي بلي يحبني و مستحيل يتحمل يشوفوني هكدا وراح يقبل وش نقولوا وصح هداك لي كان غير شاف حالتي هبط عندي تحضني على قوة جهدوا وقالي اريج خلاص حبي راح يكون كلش كيما تحبي انتي يزي مديريش في روحك هكدا . باسني على راسي قالي شششش خلاص حبي .طلعت راسي خزرت فيه وانا نبكي قتلوا تخيلي نجيبوا . تنهد ودارلي براسوا ايه وسكت رجعت نبوس فيه قتلوا ربي يخليك ليا نحبك نحبك نحبك . عاود تحضني وقالي خلاص يزي من البكا راكي شبعتيني دموع وخناين . ضحكت قالي هيا ارواحي ترقدي راكي تعبتي ليوم . هزني وداني للشمبرة تاعنا حطني في الفراش رقد قدامي. حطيت راسي فوق صدرو ورقدت .
غدوة الصباح نوضني فتحت عينيا قتلوا صباح الخير قالي صباح النور هيا نوضي وجدي روحك نديك للطبيبة . قعدت وانا مخلوعة قتلوا علاه ياك تفاهمنا البارح .قالي ايه بصح راح نديك باه نطمنوا عليه . تنهدت قتلوا ايه خمس دقائق نكون واجدة . راح قعد في الصالة يستنا فيا علابالي راه فوق قلبوا بصح المهم قبل ، كملت ليه ليه وخرجت عنده قتلوا كملت . شاف معايا وتبسملي . قالي هيا ركبنا في الطونوبيل طريق كامل وانا متحمسة وفرحانة وهو غير ساكت . وصلنا هبطنا دخلنا للعيادة تاع الطبيبة لي من قبل كنت نتبع عندها . قعدنا في صال داتونت وهو حاكم يدي ومزير عليها تقول عليا راح نهرب علابالي بيه خايف عليا وصلت دالتنا دخلنا عند الطبيبة عرفتني قاتلي أهلا اريج وش راكي لاباس . قتلها لاباس قاتلي ان شاء الله غير الخير لي جابكم عندي . انا تحمست قتلها ديراكت راني انوسانت . شفتها خزرت مع آدم من بعد شافت معايا قاتلي راكي متأكدة . قتلها درت تاست خرجلي بوسيتيف . تنهدت قاتلي نديرلك الايكو نزيدوا نتأكدوا . رحت معاها دارلي الايكو كملت قاتلي ايه راكي اونسانت في شهر ونص رجعت قعدت مقابل آدم ، قاتلي لازم تروحي ديري ليزاناليز خرجت مع الفرمليه نتاعها .وخليت آدم قاعد يستنا فيا .
غير خرجت اريج نطقت الطبيبة قاتلوا ميسيو نورمالمو راك علابالك بلي ممنوع عليها الحمل ياك وصيتك . بقا ساكت قاتلوا 90 بالمئة ميقدرش يكمل هاد الحمل خاطر الرحم تاعها مش راح يقدر يتحمل راهي راح تعدب روحها في الباطل كأقصى حد في الشهر الخامس راح يصرى اجهاض كيما المرة لي فاتت و المرة هادي راح يكون عندوا مضاعفات خطيرة . قالها راكي متأكدة . قاتلوا راني قتلك 90 بالمئة وراح نزيد نتأكد من التحاليل لي راح ديرهم ، انا ننصحك انها دير الاجهاض دوكا قبل ما يكبر الجنين وتولي الحالة معقدة وصعيبة هي في كل الحالات راح تخسروا ، وادا حبت تكمل فيه راح نعطيكم اوراق ثثبت بلي راكم على علم بالحالة الصحية وراكم موافقين باه ادا صرات حاجة ميكونش عندي دخل . آدم كان غير ساكت ويسمعلها حتى كملت . قالها في اقرب وقت نجبهالك ديريلها عملية الاجهاض . تبسمت معاه قاتلوا هدا هو القرار الصحيح صحة الام هي الاهم ومتخافش راح تكون عملية ساهلة خفيفة حاول كيفاه تقنعها خاطر راهي تبان متحمسة وفرحانة لهاد الحمل قالها ان شاء الله .
غير كملت التحاليل رجعت البيرو تاع الطبيبة لقيت آدم مزال قاعد يحكي مع طبيبة كي دخل سكتوا قعدت هك شوي وجابت الفرملية النتائج تاع التحاليل فتحتهم الطبيبة قراتهم . من بعد شافت مع آدم قاتلوا كيما قتلك مسيو . مسح على وجهو و تنهد من بعد استغفر ووقف قالها ان شاء الله ، قالي هيا ريجا . وقفت قلت للطبيبة ربي يعينك. وخرجنا . حط يدو على كتافي وجبدني ليه . خزرت معاه كان يبان يخمم قتلوا وش قالتك الطبيبة .قالي ما قاتلي والوا وصاتني بلي لازم تشربي لي فيتامين برك . قتلوا ايه مليح .جبدت الصورة تاع الايكو من جيبي قتلوا وانا نضحك شوف ولدنا شحال شباب باين راح يجي يشبهلك . ركبنا في الطونوبيل وانا راح نموت بالفرحة منيش مصدقة بلي راني اونسانت وادم قبل نورمال . برونشيت التلفون تاعي مع الطونوبيل وحطيت الغنا بقيت نغني ونشطح وهو غير يشوف حتى وصلنا للدار .دخلنا قتلوا نعيط لماما نقوللها. قالي خلي برك متقوللهاش دوركا . قتلوا علاه . قدم حضني وقالي خودي الراي بلا ما تسقسي . قتلوا ايه . قالي ريجا انا وياك حاجة ما تفرقنا مهما يصرا عمرك لا تسمحي فيا وانا عمري ما راح نسمح فيك . طلعلي راسي وبقا يمسحلي على شعري .