حب في الثانوية

chapitre 67

فاتت سمانة ودخلت في شهري الثاني بصح كرشي بدات تكبر قبل وقتها لي يشوفني يقول راني في الرابع مش الثاني زدت في الميزان رجعت نوزن اكثر من قبل و هادا الشي لي قلقني ادا من ضرك راني زدت كي نوصل للتاسع كيفاه نعود . في الليل كنت ساهرة مع دنيا نخمموا كيفاه نقنعو آدم يقبل يخيلها تتخطب مسكينة راهي تعاني ، من لي جاست تاعها عرفتها بلي تحب محمد خويا وراهي ميتة غير باه يجي يخطبها .دخل آدم قالنا ديرو في حسابكم غدوة راني عارض زوج صحابي للعشا باه توجدو كلش . قتلوا ايه ، تهنى دوك نوجدو كلش .جا رايح قتلوا آدم راني سخفانة على البوراك . قالي من راح نجيبلك بوراك دوكا راهي 11 ونص تاع الليل علاه مقلتليش من قبيل . قتلوا درك وين سخفت عليه روح شوف برك بلاك تلقى . قالي ايه . راح بقيت نستنى فيه حتى للوحدة تاع الليل ، عيطتلوا التلفون تاعوا خلاه في الدار . بقيت رايحة جاية في الصالة  خايفة علاه طول هكدا . قاتلي عجوزتي دوك يجي بلاك راه ساهر مع صحابوا . هي كملت هدرتها شفتوا فتح الباب ودخل رحت نجري عندو تحضنتو قتلوا وين كنت علاه طولت هكدا من قبيل وانا نستنى فيك . قالي كنت نحوس على البوراك لي راكي سخفانة عليه ، هز الصاشية . قالي راني جبتلك حكمتها عليه وبستوا على خدوا قتلوا ربي يخليك ليا . قالي هيا روحي كوليه قبل ما يبرد . حطيتوا في الصحن وديت للصالة قلت لعجوزتي كولي معايا  قاتلي لا لا  بصحتكم انا نروح نرقد راحت للشمبرة تاعها وزيد عرضت على دنيا قاتلي  كولي بصحتك انا شبعانة راني رايحة نرقد . راحت حتى هيا ترقد بقيت غير انا وادم .حتى هو ماحبش ياكل بديت ناكل كملتهم كل وهو كل دقيقة يقولي حبسي راكي تضري من الماكلة . نقولوا خليني راني سخفانة عليه . كي كملتهم بقيت قاعدة مقدرتش حتى نوقف تالمو كليت بزاف . قالي آدم ادا كملتي هيا نروحوا نرقدوا راح الحال . قتلوا مانيش قادرة  نتحرك من بلاصتي . قالي راني قتلك حبسي من الماكلة . قتلوا خلي دوك نرقد هنا برك . حطيت مخدة حطيت عليها راسي . قالي كيفاه راح ترقدي فوق الزربية  دوك يوجعك ظهرك . قتلوا ملا هزني اديني للشمبرة . ضحك قالي لا منهزش حابة تعوقيني ..قتلوا علاه . قالي شوفي راكي وليتي بقرة . قتلوا ياااا انا بقرة . ضحك  قالي ايه شوفي كيفاه عدتي . وقفت بقيت نخزر مع روحي علابالي بلي زدت في الميزان بزاف بصح كي قالهالي طيحلي المورال . قتلوا صح سمنت بزاف .قالي ايه بزاف . قتلوا هاد كل بسباب ولدك لي راه في كرشي سينو راني كي لغزال . ضحك وقالي مكلاه تحصليها في ولدي من لول كي جبتك جبتك بطة لا غزال لا والوا. قتلوا قول بلي متقدرش تهزني وصاي علابالي هادو العضلات كامل لي عندك راهم غير نفخ باطل   .بقا يضحك قالي والله . قتلوا ايه راك نافخ العضلات . قالي وين  سمعتي بيها هادي . قتلوا قريتها في الفايسبوك بلي الرجال عادوا ينفخوا العضلات كيف النسا كي ينفخوا شواربهم . قالي ارواحي هنا نوريلك العضلات . شفتوا جا جيهتي . رجعت لورا نضحك قتلوا راني نضحك معاك برك متوريلي ما والوا . قالي ارواحي برك مراح نديرلك والو . بقيت ندور وهو يدور ورايا ، وانا غير نضحك . قتلوا دومي خلاص حبس . حبست قعدت في الارض وانا نضحك غفلني وهزني بين يديه لصقت فيه قتلوا عندك طيحني ، باسني على فمي قالي هبلت انا حتى نطيح بنتي . وصلني حطني في السرير وراح بدل قشوا وجا رقد معايا  وحط يدو على كرشي قالي  ولدي راه كبر . قتلوا ايه شوف ديجا كبر قبل وقتوا تقول راني في الشهر الرابع .قالي الله يبارك ، ان شاء الله يجي على خير وعافية . قتلوا ان شاء الله . 
غدوة وصلت الثلاثة تاع العشية بدينا نطيبو في العشا لاصحاب آدم وصلت السبعة كان كلش واجد ، عجوزتي راحت عند اختها بقينا غير انا ودنيا ، قالنا آدم اقعدو في الكوزينة باه كي نحتاج حاجة منبقاش نعيط عليكم وتبقاو رايحين جايين . جاو صحابوا . حطنالهم لعشا في الصالة . بقينا قاعدين في الكوزينة عيطنا لشروق  نحكيو معاها بالاكام . مع الحكايات  بقينا نضحكوا وانا ودنيا فينا صنعة ادا ضحكانا لازم نضحكوا بالصوت الناس كامل تسمع ونخبطوا يدينا في بعضانا . نسينا خلاص بلي الصالة لي قاعدين فيها آدم وصحابوا لاصقة في الحيط تاع الكوزينة اي هدرة في الكوزينة تسمعيها في الصالة . حنا نضحكوا  شفت آدم دخل علينا وجهوا مايتفسرش ديراكت هز يدو ضربني على فمي قالي من بعد نتفاهموا صوت الضحك تاعكم نسمع فيه  كيما راه في الصالة . قتلوا وشبيك تضرب فيا نحي عزرين يدك عليا.  قالي اغلقي فمك لا يسمعوك . قتلوا يسمعوا على رواحهم وش راح نديرلهم . قالي معليش راهم يروحوا من بعد نتفاهم نربيك ولا منيش انا . خرج و خبط الباب .قاتلي دنيا والله ليوم يكسر الدار على رسينا حتى ماما مكانش . قتلها لاه وش درنا حنا حتى راه يتحلف فينا . قاتلي غير اسكتي  انتي كون تهدري تزيدي تخلطي الحالة اكثر . بقينا ساكتين خايفين علابالي بيه راح يدير حالة خاطر هو ديما يوصينا ادا ضحكنا ولا هدرنا نضحكوا بالعقل.سمعت صحابوا كي خرجوا .دنيا قاتلي انا نبدا  نبكي قبل ما يجي باه ميدورش بيا . شفتوا دخل جا ديراكت حكمني من شعري قالي وش قتلك على صوتك ياك وصيتك ولا لا . قتلوا نسيت بلي كاين ضياف عدنا والله وديجا وش فيها يخي غير. صوتي برك مخرجتلهمش عريانة ضربني كف قالي انتي حابة نكسرلك فمك على هدرتك الخامجة هادي . قتلوا بعد عليا متزيدش تقيسني . هز يدو قرصني على جنبي فحمت قالي درك تطلبي السماح . قتلوا نحي يدك وجعتني . قالي هيا راني نستنى اطلبي السماح . كان يهدر ويدور لحمي حسيتوا تقطع بين صوابعوا . قتلو وانا نبكي آدم وجعتني . قالي هيا . قتلوا سامحني والله ما بقيت نعاود . قالي يا ربي نزيد نلقاك عاودتيها . بعدت عليه ورحت للشمبرة دخلت طلعت الجبة بقيت نشوف لقيت جنبي كامل ازرق.  بدلت قشي ودخلت رقدت في الفراش.  حسيت بيه كي جا  دخل . باسني على خدي وراح غسل من  بعد رجع رقد . صباح نضت قبلوا خرجت لقيت دنيا توجد في الفطور . بقينا نهدرو قتلها وش دارلك آدم لبارح قاتلي ما دارلي والوا آدم غير يشوفني نبكي ميدورش بيا ميحبش يشوف دموعي ، يحبني خويا لعزيز ..انا الحق حسيت بالغيرة علاه انا ملا ضربني لبارح وشافني نبكي وكمل قرصني حتى زرقلي لحمي . وهي غير شافها تبكي مدارش بيها .. جا قالنا صباح الخير مرجعتلوش خزر معايا و سكت  قعدنا نفطروا في الثلاثة ساكتين . حتى نطقت دنيا قاتلوا آدم يا متفكر باه تشريلي وش وصيتك . قالها ايه متفكر . قاتلوا ادا غالية بزاف متشريش .قالها حاجة ما تغلى عليك لعشية تكون عندك . خزرت مع دنيا قتلها على واه تهدري قاتلي على السلسلة تاع القمر هديك لي ورتهالك في الانستغرام  نعتها لآدم باه يشريلي كيفها ..قتلها ايه بصحتك . هبطت راسي وانا غايرة ، مش غايرة من دنيا خاطر صاحبتي ونحبها ونحبلها غير الخير بصح علاه آدم ميعاملنيش هكدا هي حسب هدرتها جامي هز يدو عليها ولا ضربها  حتى من زوجت جامي سمعتوا عيط عليها ولا ضربها وانا من ليجابني عندو ديما يضربني  ويعيط عليا . كملنا لفطور جا خارج باسني قالي تهلاي في روحك ادا حتجتي حاجة عيطيلي . بعدت عليه قتلوا ايه وسكتت . خرج هو حبيت نروح عند بابا غاضتني روحي كيفاه ضربني البارح ياك ضحكنا في زوج وسمعنا في زوج علاه ضربني انا وهي خلاها . وصلت 12  تاع النهار عيطتلوا . هز عليا الوا بطة لباس .قتلوا لاباس راني عيطتلك باه نقولك كي تجي  من بعد اديني عند ماما . قالي علاه . قتلوا كيفاه لي علاه توحشت دارنا عندي بزاف ما رحتش . قالي لا مكانش روحة . وليت نبكي قتلوا علاه حابة نروح توحشت بابا . تنهد قالي خلاص وجدي روحك  كي نجي على الوحدة نديك .
جاني على الوحدة لقاني واجدة ، قالي نديك ولعشيا نجيبك . قتلو راح نبقى سمانة . قالي غير مكلاه لعشية نجي نروحك . قتلوا الله يسهل انا راح نبقى سمانة . قالي متقلقنيش لا نحلف مانديكش خلاص . قتلوا متدنيش نعيط لبابا يجي يديني . قالي اريج ريڨلي ر# روحك راكي بديتي تقلقيني هادوا ليمات . قتلوا مانقلقك ما ولوا انا راح نبقى سمانة في دارنا عندي بزاف مروحتش. قالي راني قتلك لعشية نجي نديك فهمتي مكانش قعدة . سكتت علابالي كون نبقى ناقش فيه نتعاركوا . خرجنا ركبنا في الطونوبيل  شفت في الكرسي باطة  تاع شيكولا رفايلوا ،انا فرحت قلت سير جابها ليا باه يرضيني كي ضربني لبارح . بقيت نستنى باه يعطيهالي حتى قريب نوصلوا مقاليش . قلت انا نسقسيه خير . هزيتهاقتلوا يااااا جبتلي شيكولا . قالي حطي  ماشي ليك . هديك التبهديلا لي صراتلي . قتلوا لمن ملا . قالي لدنيا هي تحبها . حطيتها وانا راح نموت من التبهديلا . وصلنا ديراكت فتحت الباب راح نهبط . قالي حبسي بالعقل راني وصيتك من بعد نحي نروحك نلقاك واجدة درتلوا براسي ايه وجيت راح نهبط زاد حبسني قالي  متبوسيش راجلك . قدمت بستوا على خدوا بزربة وهبطت خبطت الباب . دخلت ديراكت لدار . لقيت ماما سلمت عليها . قاتلي وشبيك تباني متقلقة قتلها والوا قاتلي متعاركة مع آدم . قتلها لا جيست تعبانة برك . قاتلي روحي تكسلي في الشمبرة تاعك حتى يجي خوك وباباك . رقدت في الشمبرة حتى جاو ..قعدت معاهم وصلت الستة ، قرب يجي يروحني . قلت لبابا حابة نبقى هنا . قالي قولي لراجلك ادا خلاك اقعدي ايمات عندي . قتلوا راني قتلوا نقعد مخلانيش . قالي ملا مدام قالك راجلك لا لا .قتلوا بصح انا حابة نبقى هنا .قالي اريج تعلمي اسمعي الكلمة قالك لا لا .. قتلوا منيش  حابة نروح معاه حابة نبقى هنا . قالي علاه متعاركة مع راجلك . قتلوا لا بصح كرهت حابة نرجع نسكن هنا معاكم توحشتكم . قالي هادي هيا الدنيا الطفلة لازم تزوج وتخرج من دار باباها ، وقت لي تتوحشينا قوليلوا يجيبك  وادا محبش نجي انا نديك بسيف عليه.  جا باه يروحني دخلوا بابا لصالة قعدوا بابا تحضني قالوا تهلالي في بنتي . قالوا آدم بلا ما توصي . سلمت عليهم وركبنا في الطونوبيل انا غير ساكتة هو يهدر معايا انا نجاوبوا كلمة ونقص معاه الهدرة . قالي وشبيك قتلوا والوا . قالي علاه مراكيش حابة تهدري معايا . قتلوا هكدا برك . خزر معايا وسكت . انا دورت وجهي نتفرج مع تاقة حتى وصلنا . ديراكت بدلت قشي ودخلت في الفراش . قالي نوضي تتعشاي. قتلوا شبعانة. قالي نوضي مترقديش بلا عشا. قتلوا راني  قتلك شبعانة متفهمش انت . قالي وشبيه ر## تعيطي . قتلوا روح أخطيني متهدرش معايا.  قالي واش جاك هبالك ديجا . قتلوا ايه جاني  هبالي روح أخطيني . قالي انا نخرج خير علابالي كون نبقا معاك نضربك نفزدك . خبط الباب وخرج  بقيت نخمم حتى شفتوا دخل قالي مزالكي نايضة قتلوا ايه مجانيش النعاس. شفتوا جبد باطة من الجيب تاع الفيسة تاعوا  حطها فوق طابل دو نوي.  قتلوا وش هدا قالي السنسلة لي وصاتني عليها دنيا راني شريتهالها غدوة نمدهالها راهي رقدت . قتلوا  بصحتها .دورت الجيهة لخرى. ورقدت  . غدوة الصباح جات  عجوزتي. . قعدنا نفطروا  شفتوا جبد لباطة تاع سنسلة مع شيكولا مدهم لدنيا فرحت ناضت باساتوا زاد جبد باطة تاع تلفون .قالها وشريتلك تلفون جديد تاعك صاي راه عاد مودال قديم .قاتلوا شريتوا غير لعام لي فات . قالها يخي قتلك كل عام نجيبلك واحد جديد .قاتلوا ربي يخليك ليا . وقالها ويخليك ليا شكون عندي من غيرك .انا هنا طلعولي الجنون . قتلهم بصحتكم ودخلت للشمبرة ، قعدت نبكي شفتوا دخل مسحت دموعي . جا قعد بجنبي قالي وشبيها بنتي . قتلوا والوا , ضحك وقالي علابالي بيك غايرة . قتلوا علاه راح نغير قالي غايرة عليا من دنيا ، رجعت نبكي قتلوا خاطر تحبها اكثر مني . ضحك قالي والله .قتلوا ايه حتى لبارح ضربتني انا وهي خليتها. بقا يضحك قالي راكي حابتني نضربها ولا كيفاه . قتلوا لا مش قصدي راني نهدر برك . باسني قالي فهمتك ، بصح انتي وهي مش كيف كيف هي اختي وانتي مرتي نحبكم في وزوج .دنيا راني مربيها انا بابا مات وخلاها مولات ثلاث سنين انا لي ربيتها وكبرتها ، من لي مات بابا حلفت نديرها بنتي ومنخلي حتى حاجة تأديها حتى لوكان انا وزيد دنيا كي نهدر معاها تسكت ومترجعليش الهدرة بصح انتي تبقاي ترجعيلي في الهدرة حتى تقلقيني وتهبليني نولي نضربك . قالي علابالك والله راني خايف تتزوج بواحد يكون صعيب معاها  ولا يمرمدها على هديك منيش حاب خلاص نزوجها حتى تكبر تقرر هي بمن تزوج باه مرة أخرى متلومنيش وتقولي انت لي زوجتني. قتلوا  حابة نقولك حاجة. قالي غير قولي راني علابالي مخبيين عليا حاجة انتي وياها . قتلوا خويا محمد حاب يخطب دنيا . ضحك وقالي قولي والله قالي والله . قالي لامجاش قالي . قتلوا حشم منك وزيد حابني نسقسيك انا قبل باه حتى ادا رفضت انت تجيه نورمال . قالي ولاه  انا  رحت وقتلوا بلي حاب نخطبك نورمال . سكتت من بعد قالي اريج قوليلي صح كاين حاجة بيناتهم . قتلوا كيفاه زعما . قالي يعني راهم اونكوبل ولا حاجة . قتلوا لا والله مكاين حاجة . قالي نشوفوا . من بعد وقف راح للخزانة جبد باطة جبهالي قالي هاكي . قتلوا واش هدا .قالي أفتحي وشوفي .فتحتها لقيت فيها سنسلة كيف تاع دنيا وتلفون وشيكولا . ضحكت قتلوا  هادوا ليا . قالي ايه لازم نجيب لمرتي بصح مبقيتش نحبك تبكي خلاص تحضنتوا قتلوا ربي يخليك ليا .