حب في الثانوية

137

نهار عرس دنيا فوتوا بستة وستين كشفة اول مرة ريتاج تلصق فيا هكدا  تقول جامي شافتني . قاتلي غير اقعدي هازيتني في حجرك .  مخلاتني ندير حتى حاجة حتى من الحفافة ديتها معايا وغيير سمعت صوت السيشوار خافت وتبكي في البكية تاعها تقول معزة راهي تبكي . وليت عيطت لآدم محكمتوش تخرجلي مغلق وليت  هزيتها ورجعت للدار لا حفافة لا هم يحزنون النسا والبنات كل راحوا عدلوا رواحينهم ومكيجوا غير انا في نصهم  مزالني كيما راني غير هازة ريتاج نسكت فيها . وليت طلعت لفوق للدار كلش سامطلي قريب نبكي علاه يا ربي  . كنت قاعدة في الكلوار تاع الدخلة حتى دخل آدم قالي مزال ما وجدتي روحك ياك قلتيلي راني رايحة الحفافة مع البنات  شبيك ماروحيش . قتلوا وبنتك خلاتني من فتحت عينيها وهيا تبكي تحوس نبقا هازتها .ديتها معايا الحفافة فحمت من صوت السيشوار والله هبلتني معاها ملقيتلها حتى حل هاد الطفلة النسا كامل ولادهم كي ملايكات لا حس لا صوت غير يلعبواو وفرات وانا بنتي كي شيطان من تنوض وهيا تبكي وتعيط . عيط عليا قالي وش الهدرة هادي علاه تقولي عليها شيطان ملايكة مسكينة وش تعرف هيا . قتلوا انت هدا وش تعرف غير تعيط عليا انا أهدر معاها هيا قولها تسكت وتسمع كلامي راهي قريب تشيبني ولا احكمها عليا اسيدي ربي عرس مقدرتش نشفا على والوا وما شفت والوا منو غير في جرتها هيا لا شطحت كيما النسا لا لبست كيما النسا . نحهالي من يدي قالي هاتي ### هنا انتي أصلا كارهتها من لول نهار كامل وانتي تتشكاي منها  ومكيش تاع مسؤولية طفلة وحدة نهار كامل وانتي جايبتها وراها ، دوك نداها معايا وانتي غير لبسي واشطحي برك ياك هدا لي همك . داها وخرج غاضتني هدرتوا حتى بكيت  ديما يقولي راكي كارهتها ، انا والله روحي فيها غير مزلت ماوالفت بمسؤولية تاعها  اصلا عمري ما تعايشت مع ذراري صغار في عمرها اول تجربة ليا معاها وهيا واعرة قبيحة منعرفش أصلا كيفاش نتصرف معاها ساعات تجيب نهار كامل كل زوج دقايق تبكي . لقيت عجوزتي طلعت عندي قاتلي مزال ما لبستي . قتلها راكي تشوفي ريتاج وش دارت فيا مخلاتني ندير والوا قاتلي راه مزال الحال شوي ارجعي عند الحفافة امشطي ومكيجي وارواحي البسي بالخف . تبعت هدرتها خرجت عند الحفافة جارتنا مكياتلي وليساتلي شعري طلقتوا كامل خاطر كون تكوافيهولي ميكفيش الوقت  ورجعت للدار لقيتهم نصهم لبسوا ويستناو غير يروحوا للصال . حتى انا طلعت للدار لبست ڨندورتي الثقيلة تاع الفتلة وحطيت ذهبي كامل بعد مارجعهولي آدم وزادلي معاه شوي .غير التاج مقدرتش نديرو خفت يطيح خبيتوا برك . انا كملت سمعت آدم وريتاج دخلوا خرجت عندهم قالي بدليلها حوايجها وجيبيهالي . راح قعد في الصالة مشنف . حكمت ريتاج غسلتلها برك وبدلتلها لبستها روبة  تاع عراسات قلت من بعد نلبسلها روبة بيضة كيف عمتها ومشطلها شعرها كملتلها بستها قتلها عيطي لآدم . ناضت تعيط  آدم آدم مع هيا تنطقها سبيسيال تقول  (ازم) . جا عندها هزها قالها ناكلك انا قولي . ضحكت قاتلوا شوف شابة ؟؟ ضحك نص هدرتها تعلمتها مني اي كلمة نقولهالوا  تعاندها عليا .قالها شابة عمري شابة . شوف  شوف الحلوف  في عوض هاد الكلمة يقولها ليا  انا يقول فيها لهاد السوسة . شاف معايا يثبت قالي وش درتي لوجهك هكدا ومالقيتي حتى كولار ديريه في شواربك غير الاحمر هدا لي يبان من راس الجبل  .قتلوا راح تبدا آدم ياك عرس . قالي امسحيه مطلعش  عليك . علابالي راه يتمسخر بيا غير باه نمسحوا محبنيش نخرج بيه هكدا   قتلوا راح الحال خلي نروح للصال ونمسحو . سكت من بعد قالي غطي شعرك مليح واخرجي ديراكت اركبي  في طموبيل متبقايش واقفتلي في الباب . قتلوا ايه علابالي.  هز ريتاج وراح وانا بقيت معاهم لتحت حتى ركبوا كل من خرجت ديراكت ركبت مع آدم لقيتوا مركب معاه يماه وخالتوا . مع ركبت قاتلي عجوزتي اريج ياك غلقتي كلش قتلها ايه صاي راني غلقت وهاكي المفتاح . حكماتوا عليا قاتلي صحيتي بنتي . عرس كامل وعجوزتي معولة فيه غير عليا انا اي حاجة تخبيها عندي سيرتو حوايج دنيا تقولي مكانش لامان حتى كي تخرج تقولي اقعدي انتي في بلاصتي خلي كلش على يدك . انا الحق عجبني الجاست تاعها يعني ثايقة فيا ومكبرة بيا بصح تعبت بزاف  من الشغل والجري وزيد مزاللي الميموار تاعي حاصلة فيها . نطقت خالت آدم تضحك قاتلوا آدم مرتك الله الله كبرت وعادت  دار كاملة واقفة عليها كلش على يدها طريتها ليماك في الشطارة . ضحك قالها ملا علاه راني ميت عليها انا . ضحكوا قاتلوا عندك الحق انا حشمت تبسمت معاهم وسكتت . ناضت ريتاج تبكي قاتلوا نقعد عندك . قالها نو بابا منقدرش دوك من بعد وتقعدي عندي دوك روحي لماماك . غير قتلها ارواحي عندي  .وجيت راح نهزها ناضت تزعبط وتبكي وتقولي لا  . قتلها الله لا جيتي ابقاي لثم في بلاصتك. كنت راح نكمل نعيط عليها  . شفتوا خنزر فيا  ، سكتت  . غير وصلنا هبطوا هما كامل غير انا قالي اصبري حتى يتفرزوا وادخلي ديراكت متوقفليش برة والناس تصور  . هو هبط مع اختوا وانا نتفرج عليهم غير على التاقة حتى كملوا جا عندي قالي اسمعي تحكمي بلاصة وتعقدي متبقايش تشطحي وتحركي في #### حتى يصوروك ولا  يضربوك بالعين  ( وهدرتوا خرجت صح )وشعرك تدخلي تهزي قساموا علاه طالقاتوا هكدا. قتلوا لا غير زيد قولي ابقاي بالعباية خير ياك غير نسا في نسا . قالي اريج منعاودش الهدرة وراني وصيت  يما عينها عليك راهي تقولي كلش .سكتت قالي ريتاج نخليها عندي كي نعيطلك هزي عليا . قتلوا ايه . فتحلي الباب طبس قالي هيا اعطيني بوسة روحي .بستوا قالي الليلة نفوتوها كيما قلتيلي لبارح . درتلوا براسي ايه . قالي هيا ملا اطلعي من بعد ان شاء الله .
فات عرس هبال عندي بزاف مزهيتش في عرس هكدا محبستش من الشطيح وهدرة آدم وتوصيات تاعوا كامل دخلوا من وذن وخرجوا من وذن العين كانت غير عليا انا بعد العروسى لي يشوفني وميعرفنيش يقول هادي والله ما راهي متزوجة لا درت حساب لا زعما كي راني متزوجة منشطحش ونثقل روحي  بالعكس الغناية لي تجي نوض معاها درت امبيونس كحلة . فض العرس غير ركبنا مروحين نطقت خالتوا قاتلي اريج درتي حالة ليوم يعطيك الصحة  على هداك المسلان والله زهيتي العرس سيرتوا من شطحتي على القبايلي نسا كل قعدت تتفرج فيك.  أيا هديك الحصلة مع  آدم غير يسمع ويبرڨلي في عينيه من التروفيزور والله ليوم ندي طريحة.  قالها خالتي ملا قولتيلي اريج شطحت . قاتلوا مش غير شطحت الله يبارك عرس كامل ما قعدت ما حبست  تقول ما راهي متزوجة وعندها طفلة عندها الحق تفرح مع حبيبتها . شاف مع يماه قالها صار هكدا يما وش وصيتك انا . بقات ساكتة ، شاف معايا قالي معليش انتي نروحوا للدار ونتفاهموا . حتى خالتوا سكتت كي شفاتوا تقلق . ولات قاتلي اريج وش كاين همستلها قتلها وصاني قالي متشطحيش . قاتلي يا والله معلابالي صينوا راني مهدرتش . قتلها نورمال دوك نروحوا للدار و نهدر معاه .