حب في الثانوية

chapitre 47

كملت نهار كامل في السبيطار قالولي حتى لغدوة باه تقدري تخرجي جاتني ماما وعجوزتي ، قعدو معايا قاتلي ماما غدوة كي تخرجي تجي عندي تقعدي عندي حتى ترتاحي . قالها آدم ماعندها علاه تجي تقعد في دارها  خير . قاتلو انت ماتقدرش تقوم بيها كيما نقوم بيها انا ، ديجا يماك كبيرة واختك تقرى وانت تخدم شكون بيها  . قتلوا ايه حتى انا حابة نروح نقعد عند ماما من لي تزوج ما روحتش عندها . تنهد وقالي روحي بصح ثلاثة ايام ونجي نديك . قتلوا ايه .
غدوة خرجت روحت مع ماما قعدت نهارين ورجعت  نمشي نورمال بصح بقيت نخمم علاه صراتلي الحالة هادي ومن نسقسي ماما ولا آدم يبقاو يقولولي من تعب برك ، مي علابالي بلي مش من التعب على خاطر مكنتش نتعب خلاص ، كنت غير ماكلة وتحواس  ورقاد . قلت غدوة الصباح نروح لطبيبة تاعي نسقسيها هي لي تقولي الصح .غدوة الصباح نضت وجدت روحي  لبست لي جا قدامي  سروال وليكات . قاتلي ماما وين رايحة ، قتلها رايحة نتلاقى مع شروق قاتلي شاورتي راجلك قولتيلوا . كدبت عليها قتلها ايه قتلوا . خرجت حكمت تكسي وصلني العيادة تاع الطبيبة ، دخلت بقيت نستنى في دالتي ، حتى جات الفرملية عيطتلي دخلت عند الطبيبة . شافتني قاتلي أهلا اريج صفا قتلها حمد الله . قاتلي جيتي وحدك وين راه راجل ولا يماك قتلها جيتك  وحدي . قالتلي غير الخير . قلتلها جيت حبيت نحكي معاك وحدنا قاتلي ايه قولي . قتلها المرة لي فاتت من الصراتلي الحالة هديك وش هو السبب . تنهدت وقاتلي شوفي درك راكي كبيرة ومتزوحة وقارية وكي نهدر راح تفهميني .ملڨري يماك وراجلك قالولي متقوليلهاش بصح راح نقولك  باه تاخدي احطياتك . كيما تعرفي  المرض تاعك مرض مزمن وعندو اعراض جانبية واهمها انوا راح يأثر على علاقة الزوجية . قتلها  وش قصدك مفهمتش . قاتلي بالمختصر المفيد.انو مراحش تكوني كأي مراة عادية تقدر تمارس العلاقة الزوجية وقت لي تحب هي  وكل يوم  وفي اي  وقت . انتي راح تكون قدرتك على الممارسة محدودة يعني مثلا مرة في السمانةولا زوج كأقصى حد si non راح تصرالك الحالة لي صراتلك المرة لي فاتت. انا تقول عليا  واحد صب عليا ما بارد دموعي هبطوا . جات الطبيبة قعدت بجنبي قاتلي معندك علاه تبكي احمدي ربي انوا عطاك زوج متفهم  ومقدر حالتك وتهموا غير صحتك . قتلها آدم علابالو قاتلي ايه علابالو وراه  متفهم الوضع . انا وليت نبكي بالصوت ياريتي ما جيت وما عرفت ، اول مرة نحس بالنقص . بقات الطبيبة تسكت فيا بعد 10 دقايق باه حبست البكا . وقفت خرجت سمعت التلفون تاعي يصوني شفت لقيتو آدم ، هزيت عليه قالي بطة حبي CV قتلوا cv.قالي لعشية نجي نروحك  وجدي روحك .قتلوا ايه قالي هيا صحا من بعد نعيطلك قتلوا ، ok . كملت نمشي معلاباليش قداه مشيت حتى لقيت روحي مقابلة لبحر قعدت فوق رمل وقعدت نبكي معلاباليش حتى قداه قعدت . حتى سمعت التلفون يصوني .لقيتوا أدم هزيت عليه قالي اريج وين راكي . انا تخلعت ، كدبت عليه ديراكت قلتوا راني فدار علاه  . قالي والوا سقسيت برك هيا من بعد وكوبا . وقفت ديراكت حكمت تكسي باه نروح لدار نخاف يروح لدار ومايلقانيش . انا وصلت وانا نشوف في الطموبيل تاعو مڨاريا قدام الباب يا يما هديك الخلعة لي حكمتني ، طبطبت وانا نقدم في رجل ونوخر في رجل . فتحت ماما لباب قتلها آدم هنا قاتلي ايه هنا من قبيل وهو يستنى فيك . انا سمعتها زد خفت اكثر ، قتلها وبابا هنا قاتلي مكنوش غير محمد قاعد مع آدم . قلت الحمد لله على الأقل كاين خويا . دخلت عليهم لقيتهم في الصالة نطق خويا قالي اريج علاه طولتي قتلوا سيركيلاصيو ، ونشوف في أدم يخزر معايا في خزرة تاع موت وبقا يثبث مع لبستي درك وين تولهت بلي لابسة سروال . نطق قالي جيبي حوايجك باه نروحوا قاتلوا  ماما اقعدوا تغداو قالها اواه مرة أخرى ان شاء الله ليوم عندي خدمة.عاود خزر معايا قالي هيا ازربي . انا رحت نجري دخلت للشمبرة تاعي هزيت الكابة تاع قشي وبقيت نحط في قشي ونبكي تخلطت عليا  الحالة معلاباليش حتى علاه نبكي.دخلت ماما قاتلي اسمعي انتي قلتي لراجلك بلي راكي خارجة  . خزرت معاها قتلها لا مقتلوش . قاتلي يا نندب عليك يا اريج هادي عملة ديريها قتلها ماما أخطيني والله ماني قادرة نهدر .قرصتني على زندي وقاتلي وتقوليلي أخطيني يا الكلبة. خارجة بلا ما تقولي لراجلك  وتزيدي تهدري . وليت نعيط قتلها ما تفهميش قتلك أخطيني مانيش قادرة نهدر . قاتلي اقفلي فمك   ليسمعوك . دخل علينا خويا قالنا وشبيكم تعيطوا ، انا مرجعتلوش بقيت نلم في قشي وماما قاتلوا والوا روح برك . خزر معانا وخرج.  حكمتني ماما على دراعي قاتلي اسمعي نهدر معاك غير توصلي لدار تطلبي السماح من راجلك سمعتي . قتلها ايه ايه نزيد نبوسلوا رجليه خير. . قاتلي وشبيك انتي ليوم جلدك يحك فيك تحوسي على طريحة . هزيت الكابة تاع قشي وخرجت وخليتها .. فتت للصالة قتلوا صاي راني كملت . قالي هيا ، ركبنا في الطونوبيل . بقيت نشوف فيه متقلق باينة ليوم يقتلني . قتلوا آدم . عيط عليا قالي متهدريش مع ز## . سكتت جبناها طريق كامل وحنا ساكتين .وصلنا هبطنا . انا فتت لدار عجوزتي سلمت عليها وعلى دنيا. وهو طلع ديراكت للدار .قلت  خلي نقعد معاهم حتى يتكلما شوي ونطلع . قعدت شوي نسمع فيه يعيط من دروج اريج .قاتلي عجوزتي وشبيه آدم متعاركة انتي وياه قتلها لا مناش متعاركين . قاتلي نوضي شوفي راجلك . طلعت للدار وانا قلبي يخبط خايفة . دخلت لقيتو واقف في الهول . خزر معايا وقالي مش راح نهدر على السروال نسقسيك سؤال واحد وين كنتي من الصباح . قتلوا كنت مع شروق . قالي اريج راني حاكم روحي بسيف تهدري بلا كدب وين كنتي . قتلوا مش قاعدة نكدب راني كنت مع شروق .قالي ايه شروق معليش . شفتو جبد التلفون قالي نعيط لشروق نسقسيها بصح نلقاك تكدبي تخلصيها غالية. شفتوا صح راح يعيطلها.  نطقت قتلوا مكنتش مع شروق كنت وحدي . انا كملت هدرتي ويجيني كف  حسيت رقبتي طرشقت . طلعت راسي خزرت معاه قالي كملي اهدري وين رحتي. قتلوا رحت نحوس داق خاطري من الدار . قالي والله داق خاطرك من الدار خرجتي تحوسي وحدك وبلا راي وبالسروال . انا ديجا قلقانة وزيد قلقني بهدرتوا ، قتلوا علاه تكبر في لحكاية قتلك خرجت ندور مافيها والوا وفتت للشمبرة وخليتوا  . لحقني حكمني على شعري فوق الخمار وقالي استناي هنا مزلت ما كملت هدرتي . وش خرجتي تعملي وحدك اهدري .عيطت عليه قتلوا  اخطيني متفهمش انت قتلك خرجت ندور . ضربني على فمي قالي نقصي ر#صوتك متعيطيش عليا .انا هنا هجت مقدرتش نتحمل . قتلوا وشبيك من وصلنا وانت حاكملي وين رحتي وين رحتي يخي ما رحتش نع## . قالي يا كلبة تخسري في الهدرة قدامي وحكمني بالكفوف حسيت وجهي تخدر . بصح انا والله ما سكتت هو يضرب وانا نعيط ونسب وهو زاد هبل كي سمعني نسب ونعيط كيف هكاك . انا معلاباليش حتى وش قاعدة نقول تهسترت بقات في مخي غير الهدرة تاع الطبيبة . قفلي فمي بيدو وقعد يضرب فيا ويقولي وشبيه رب## انتي ليوم محرشة عليا محوستني نقتلك اه قولي  . وانا نفارع  فيه دزيتو ورحت نجري للساك تاعي جبدت التلفون قتلوا والله ما نقعد هنا دوك نعيط لبابا يجي يديني .  نحالي التلفون من يدي ورماه على الحيط كسرو وزاد حكمني على شعري قالي ليوم نربيك والله ماكي خارجتها من هنا . حسيت شعري كامل خرج في يدوا ، بصح دمعة ما هبطتها من عيني ، قعد يضرب فيا على فمي ويقولي زيد تعاودي تخسري الهدرة  اه قولي . انا هنا وليت نبكي خاطر وجعني تاع الصح سناني  جرحوني في فمي  . نسمع في الباب يطبطب وصوت عجوزتي قاعدة  تقولوا آدم أفتح وش عملت لطفلة . وليت نعيط عليها يما اجريلي .وهيا تعيط من ورا الباب بصح هو والله ما حب يطلقني على خاطر قلقتوا تاع الصح . عاودت دزيتو على قوة جهدي ورحت نجري فتحت لباب لعجوزتي وتخبيت وراها وهو لحقني حكمني من دراعي يجبد فيا وعجوزتي في النص قاتلوا يا نندب عليك يا آدم وش عملت في الطفلة اطلقها . وهو يقولها يما متدخليش بيناتنا بعدي خليتي نربيها جبت ق###لداري  بعدي ، جبت كلبة لداري . قاتلوا والله يا تمسها لعاد نهدر معاك ليوم الدين ..بقيت نشوف فيه خرج من رحمة ربي يبعد في يماه حاب غير يحكمني . مكنتش علابالي بلي كي  يتقلق يولي هكدا تقول عليه عبد اخر خاطي آدم . قاتلي عجوزتي ازربي اهبطي لتحت . هبطت نجري في الدروج خايفة لا يحكمني درك وين فقت مع روحي وش كنت قاعدة نقول . دخلت للشمبرة تاع عجوزتي وقفلت الباب بالمفتاح  . نسمع فيه هابط يجري في الدروج ويسب فيا ويقول وين راحت هديك الكلبة وين راحت وبقا يفركت عليا ويسقسي في دنيا ، من بعد سمعتو جا بقا يفتح في الباب تاع الشمبرة . محبش يتفتح بقا يخبط فيه ويقولي افتحي ولا نكسرو عليك افتحي  . انا قعدت في لرض نخمم بين ليلة و نهار تقلب كلش غير لبارح كنت هانية وفرحانة وليت نبكي يا ريت مرحتش الطبيبة . نسمع في أدم ورا الباب يعيط ويماه تعيط . مفهمتش روحي علاه درت هكدا كنت قادرة نتفاهم معاه بالعقل ولا نطلب السماح كيف ما قاتلي ماما . بصح لا كنت حابة نفرغ غشي وهو جا في طريقي . شفت مع روحي في لمراية تقول عليا فومبير وجهي معمر دم . سمعتوا  قالها قوليلها متورنيش وجها و خرج . جاتني عجوزتي طبطب في الباب قاتلي أفتحي اريج ,راه خرج افتحي بنتي . فتحت عليها شافت وجهي تخلعت قاتلي وش عمل فيك الله لاتربحوا . سمعتها دعات عليه معجبنيش الحال  على خاطر انا لي قلقتوا . داتني لدوش غسلت وجهي . وقعدت في الصالة بقات تسقسي فيا علاه تعاركنا  محبيتش نقلها .
قتلها حابة نطلع لداري نرقد . قاتلي مكلاه تطلعي كون يجي ويلقاك لثم تزيدو تتعاركوا . روحي ارقدي في الشمبرة تاعي  حتى من بعد نحكي معاه. رجعت للشمبرة  دخلت في الفراش ، بقيت نبكي حتى دخلت عجوزتي شافتني نبكي جات قعدت معايا في السرير قاتلي علاه راكي تبكي كشما يوجع فيك.  قتلها  لا . بقات تمسلي في وجهي قاتلي زرقلك وجهك الله لا تربحوا . قتلها ماتدعيش عليه . ضحكت قاتلي عطاك طريحة ومزلتي تدافعي عليه . حطتلي راسي على حجرها قاتلي رقدي بنتي ارقدي كلش يتحل .
رقدت حتى شبعت نوم فطنت سمعت صوت الهدرة عرفتوا آدم وقفت ورحت نصنت على الباب نسمع في يماه تقولوا هكا يا آدم تضرب الطفلة تزرقلها وجها. قالها مكنتش راح نضربها هي لي قلقتني . قاتلوا وكي قلقاتك تضربها تفاهمو بالعقل وش هاد الحالة الطفلة قريب قتلتها . بقا ساكت ومن بعد قالها وين راهي درك قاتلوا راهي راقدة في الشمبرة تاعي والله مسكينة قعدت تبكي بسيف باه رقدت . قالها راني طالع قاتلوا ومرتك قالها خليها تبات معاك .
انا سمعتوا قالها خليها تبات معاك زاد طالحلي المورال اكثر ديجا من درك بدا يكره مني كملت ليل كامل وانا نبكي وعجوزتي قاعدة معايا ما لقات ماديرلي. حتى لصباح وانا قاعدة   .  قاتلي نقول لراجلك يشوف وشبيك هادي  والله غير عين وصابتكم كنتوا لاباس عليكم . راحت شوي ورجعت قاتلي مكانوش باين راح يخدم بكري ليوم ، قتلها راني طالعة لداري . طلعت لفوق لقيت الحالة كيف ما خليتها لبارح . لغطا ولوسادة في الصالة باين بات هنا . فرزت الحالة ليه ليه ورجعت تكسلت في الشمبرة نستنى فيه بعثتلي عجوزتي لغدا بقيت نستنى قلت خلي يجي ونتغدا معاه   .  نهار كامل ما جا موالف ديما يروح وقت لغدا ويعاود يرجع للخدمة . وصلت 10  تاع الليل سمعتوا فتح الباب ودخل لعبتها راقدة . دخل للشمبرة طل عليا شافني راقدة راح لدوش . هكا شوي وشفتوا هز غطا ووسادة وراح للصالة  . قعدت نبكي حتى لل12تاع اليل حاسة حياتي كاملة فزدت في نهار لبكا لي بكيتوا البارح وليوم تاع عامين . سمعت الباب تاع الشمبرة تفتح غطيت راسي بالغطا وسكتت . طلع في السرير بجنبي ونحا عليا لغطا قالي علاه قاعدة تبكي . قتلوا خليني وعاودت غطيت راسي . جبدني لحضنو قالي وشبيها حبيبي .  وليت نبكي بالصوت بقا يبوس فيا قالي هدا البكا الكل كي ضربتك تتقص يدي ان شاء الله ادا عاودتها  بصح انتي لي قلقتيني هديك هدرة تقوليهالي ريجا   .  رجعت نبوس فيه قتلوا سامحني حبي والله ما بقيت نعاود  قالي خلاص حبيبي سماح بصح والله تعاوديها نكويلك فمك بنار .