حب في الثانوية

chapitre 96

بديت نندم علاه ندير لروحي هكدا هم يبقاو عايشين هانيبن في حياتهم وانا نموت ، يبكو عليا نهار ولا زوج من بعد ينساوني علاه سمحت للشيطان يلعبلي بعقلي ونعصي ربي نموت كافرة لا نربح لا دنيا لا اخرة كونت  في لحظة تاع غضب علاه مستغفرتش ربي وصليت و لقيت حل بلا ما نأذي روحي.هدا الشي كامل خممت فيه وانا نمشي خطوة ونطيح خطوة حابة نوصل الباب ونخرج برة باه تشوفني ماما بلاك نقدر نمنع من الموت منيش حابة نموت يا ربي حبيت نعيط باه تجي عندي ماما بصح والوا صوتي ما حبش يخرج ولساني تعقد . طحت في الارض مقدرتش نزيد نوقف صاي قلبي حسيتو تفتت في صدري النفس راحلي في اللحظة هادي بذات تفكرت حياتي كاملة وقت لي بكيت ووقت لي فرحت وقت لي نجحت .
بقيت شي ربع ساعة هكدا نفطن وندوخ مرة يروحلي نفس مرة يرجع والدمومات تسيل مني حسيت روحي تصفيت من الدم بصح بقيت نقاوم محبيتش نستسلم للدوخة للحظة سمعت صوت آدم يعيط عليا ، ضحكت حتى وانا نموت نسمع في صوتوا عاودت غمضت عينيا دايخة حتى نسمع في واحد حاب يكسر الباب تاع الشمبرة تاعي خاطر كنت غلقاتوا بالمفتاح ، سمعت صوت الباب كي تفتح من بعد صوت ماما تبكي وتعيط وصوت آدم يقولي اريج افتحي عينيك فيقي وبقا يحرك فيا حتى فتحت عينيا لقيتوا  قاعد مقابلني على ركابيه  هازني  بين يديه ودموع في عينيه تبسمت معاه ونطقت بالسيف قتلوا جيت .قالوا جيت يا عمري جيت ومنزيدش نخليك .قتلوا وانا نبكي منيش حابة نموت .حط جبهتوا على جبهتي وهو يبكي قالي مراحش تموتي منخليكش تموتي مزلت مشبعتش منك تحملي شوي برك علاجالي اريج علاجالي منقدرش نعيش بلا بيك . قتلوا تحبني قالي نحبك نعشق فيك نموت عليك . قتلوا حتى انا نحبك .سكتت كي راحلي نفس بقيت نطلع ونهبط والوا مقدرتش وهو نشوف فيه راح يهبل يعيط ويقولي تنفسي   ويرصلي على صدري بيديه وماما تبكي وتعيط . بسيف باه قدرت نجبد شوي تاع النفس حكمتلوا يدوا قتلوا آدم راني مسمحاتك دنيا واخرة  قولهم يسمحوني ان شاء الله نتلاقاو في الجنة .