حب في الثانوية

chapitre15

نضت في ليل تفكرت وش صرا وليت نبكي حتى راسي ولا يوجع فيا .كي كملت البكى حلفت بلي من اليوم منزيدش نشوف فيه ولا نحكي معاه .
غدوة الصباح وجدت روحي باه نروح نقرى قلت لازم ننسا شغل  ماصرا والو.وصلت وين ليسي دخلت لقيتو واقف معاها مخزرتش حتى معاهم كملت نمشي حتى وصلت عند  شروق وجلال سلمت عليهم قالي جلال: وشبيهم عينيك منفخين. قتلوا :والو جيست لبارح كنت مريضة قالي: سلامتك . طلعنا للقسم قرينا الساعة لولة وتانية بصح انا بالي مش مع القراية بالي مع آدم على قد محبيت  نحيه من راسي و  ننساه مقدرتش لازم نخمم فيه كرهت  .جا وقت الساحة خرجوا الكل غير انا قعدت محبيتش نخرج باه منشفوش بقيت قاعدة حتى نشوف في شهرة دخلت .كي شفتها دخلت وقفت باه نخرج قاتلي حبسي نحكي معاك قلتلها وش تسحقي مني قاتلي وش نسحق انا منك انتي كانت تهدر وتشاور بصبعها غزلتني بصح حملتها وسكت قاتلي كنت راح ندير بيك تقرير بصح آدم بقا يحاول فيا ويقولي راهي مريضة وزيد راهي اخت صاحبي يعني كيف اختي . فهمتها بلي حابة تقولي بلي راه مديرني كيف أختوا .خزرت معاها وقلتلها تحبي ديري تقرير ديري على روحك ميهمنيش خرجت وخليتها. وليت نبكي منبعد تفكرت هدرتو كي قالي متبكيش هنا .رحت للتوالات باه نغسل وجهي لقيت اختو وصحبتها كي شافوني نطقت صحبتها قالتلها صح آدم يخرج مع شهرة قالتلها اختو ايه صح البارح قال لماما في العطلة روحي اخطبيهالي ديجا راهم صحاب من بكري خزرو معايا في زوج وخرجوا .انا سمعت هدرتهم حسيت موس مشا في قلبي .خرجت جاتني شروق قاتلي آدم كان يحوس عليك قلتلها متزديش تجبديلي عليه قاتلي علاه وش دارلك قلتلها ما دارلي والو جيست سمعت اختو تهدر بلي راح يخطب شهرة في العطلة قاتلي تحكي صح ،راني قتلك اخطيك منو راه ميليقش عليك وكبيرعليك وزيد باين فيه يحب هديك الهاملة تاع شهرة .
جات الحصة تاعو ،دخل خزر معايا شنفت عليه ودورت وجهي ،سمعت صوت شهرة جيت نشوف نلقاها داخلا قاتلوا آدم ليوم جيت نقرى عندك  ،راك علابالك راهم جايين  باه يرسموني قالها مرحبا بيك في أي وقت .ضحكت وقعدت مقابلتني ،قاتلي شروق تبالي شهرة علابالها بلي راه يعجبك آدم قلتلها وين علابالها ديجا شكون راح يقولها راني حكيتلك غير ليك انتي .بدا آدم يشرح وانا منيش معاه نخمم في هدرة تاع شروق عندها الحق ،علاه حتى تكرهني وشاريتهالي كون مش علابالها بلي يعجبني آدم. بقيت نخمم حتى فضت الحصة تاعو  خرجت انا لولة منيش حابة نهدر معاه .