حب في الثانوية

chapitre 19

دخلنا لقاعة الاساتذة كانت ظلمة كي عاد الضو مكانش .شعلي الفلاش تاع التلفون تاعو قالي اقعدي قعدت شافني نمسح في دموعي ،قعد مقابلني قالي علاه راكي تبكي خايفة  ،قتلوا ايه ،قالي  من واه خايفة قتلوا الرعد صوتو يخوف  ناض يضحك قالي خايفة من الرعد راني معاك علاه خايفة ديجا شوي ويجي خوك يروحك درتلوا براسي ايه .جا العساس عطانا الشمع وراح ، بقينا ساكتين انا راح نموت بالبرد حتى من الفاست تاعي مبلولة ،بقيت كل مرة ننفخ في يدي باه يدفاو ،حسيت نفسي دياق عليا وقلبي عاد يوجع فيا ديراكت جبدت الدوا تاعي باه نشربو ،تفكرت بلي معنديش الماء .آدم كان مهبط راسو مع التلفون قتلوا استاذ هز راسو خزر معايا قالي وي اريج كشما تحتاجي قتلوا والو جيست ملقيتش ما باه نشرب الدوا . قالي دقيقة دوك نروح نجيبلك من المطعم ونجي ،هو وقف راح يخرج وقفت معاه قتلوا تخليني وحدي شاف معايا قالي منطولش دقيقة وانتي استناي هنا ،قتلوا انقعد وحدي  ضحك و  قالي خوافة  ،ملا هيا تجي معايا .خرجنا نشوف في الدنيا ظلمة والمطر قاوية مع صوت الرعد تقول عليا في فيلم تاع رعب  .بقينا نمشيو بالضو تاع التلفون وانا كل ما نسمع صوت الرعد نلصق في آدم نحكم في الفاست تاعو .فاق بيا قالي هاتي يدك ،حكملي يدي وقربني ليه قالي هكا خير باه مكلاه تخافي ،تبسمت معاه وانا ميتة بالحشمة .حسيت روحي في فيلم هندي نمشي مع آدم في المطر كانت آخر حاجة نتوقعها تصرالي ايه هدا هو المكتوب. وصلنا المطعم شربت الدوا .كي عدنا راجعين قالي تع وش هدا الدوا لي شربتيه قتلوا ماما عطاهولي قاتلي كي تتعبي اشربي منو .سكت
صونا التلفون تاعو كان خويا لي عيطلوا سقساه عليا قالوا مقربيش توصل قالوا اواه السركيلاسيو دايرة حالة وحد الساعتين وياربي قالوا سمحلي آدم تعبتك معايا قالوا نورمال كون جيت بالطونوبيل تاعي راني انا لي وصلتها مي راك علابالك اي فاسدة ،المهم رانا نستناو فيك كوبا عليه .دار خزر معايا قالي راه مزال حاصل في السركيلاسيو .تنهدت وقعدت على الكرسي تعبت وبردت حابة نرقد الزهر لي عندي . شافني بردانة قالي نحي الفاست تاعك ،انا تخلعت قلت وشبيه هدا ،شفتو ينحي في الفاست تاعو متت خزر معايا ضحك قالي وشبيك تخلعتي ههههه بقيت ساكتة قالي نحي الفاست تاعك راهي مبلولة والبسي تاعي البرد عليك قتلوا وانت تبسملي قالي انا نورمال نحمل مش كيفك راح تتجمدي من البرد .لبست الفاست تاعو لي بلعتني تالمو كبيرة عليا كانت لاصقة فيها الريحة تاعو مخلطة مع ريحة الدخان تهبل . جبدت شكيولا ناكل فيها جعت عرضت عليه قالي هاتي نصبروا بيها رواحنا حتى يوصل محمد .خزر معايا قالي خوك وقيلا راح يجيب بينا الليل باه يوصل قتلوا حصلتك معايا قالي علاجالك نورمال تبسمتلوا قتلوا مرسي . حنا قاعدين وتتكسر التاقة لي فوقي من الريح نضت نجري من الخوف والخلعة دموع يسيحو وحدهم شعرة لا طاح  الزجاج فوق راسي .جاني آدم يجري قالي لاباس درتلوا براسي ايه حتى الهدرة مقدرتش نهدر وهو باقي يثبت ادا قاسني الزجاج بقيت جامدة في بلاصتي شافني بلي تخلعت قالي خلاص ماصرا والوا وبقا حاكملي يدي ويمسحلي على شعري .جانا العساس يجري قالنا سمعت صوت تاع التكسار قالوا آدم  التاقة تكسرت من الريح قالوا معليش ارواحوا تقعدوا عندي خير هنا البرد عليكم وديجا خوها باين راح يطول على خاطر الدنيا كامل مغلوقة رحنا معاه  طريق كامل وادم حاكملي يدي   ومغطيني على المطر تقول عليه بابا  . وصلنا كانوا ديرينلوا بلاصة سبيسيال تاعو فيها صالة وشمبرة وتولات .دخلنا للصالة قعد آدم فوق البونكات وقعدني معاه مزال حاكملي يدي حتى انا بقيت حاكمة في يدو كنت خايفة من العساس ديجا كانو جابوه جديد جابلي زاورة قالي تغطاي بيها  على البرد ،بقاو يحكيو هو وادم وانا عينيا يتغلقو وحدهم من التعب .خزر معايا آدم قالي ريجا ادا نعست ارقدي نورمال كي يجي محمد نوضك قتلوا لا منيش نعسانة ،قالي متخفيش ادا حابة ترقدي ارقدي  راني معاك وتبسملي وانا قلبي زاد عشق فيه . انا حشمت لا نرقد قدامو . بقيت ساكتة وهما يحكيو حتى مقدرتش نقاوم النعاس رقدت ،حسيت كيف آدم بقا يقلي ريجا رقدتي ومن بعد حطلي راسي على فخدو وعدلي الزاورة غطاني كاملة غير راسي وبقا يمسحلي على شعري منبعد ما حسيت بحتى شي . فقت على صوت محمد خويا ينوض فيا نضت  لقيتو قاعد قدامي     وادم قاعد بعيد ديراكت حضنتو قتلو علاه طولت عليا من صباح وانا نستنى فيك كنت نبكي ونهدر  ضحك هو وادم قالي خلاص هاني جيت يزي من البكا قالوا آدم من قبيل وهي تبكي خايفة من الرعد ههههه .