حب في الثانوية

chapitre 68

عند ادم بعد ما سمع من اريج بلي محمد حاب يخطب دنيا عيطلوا وتفاهموا باه يتلاقاو راحلوا سلم عليه وقعدوا بقاو يحكيوا حتى قال آدم لمحمد. معندك حتى حاجة تقولهالي .محمد حشم قالوا والله منعرف كيفاه راح نبداهالك مي انا حاب نجي نخطب اختك ادا تقبل . آدم ضحك قالوا علاه حاشم نورمال ادا فيها مكتوب ربي يسهل بصح لازم نسقسي دنيا ويما ادا راهم قابلين مرحبا بيك وين راح نلقى راجل كيفك لاختي .محمد فرح قالوا ان شاء الله يقبلوا . قالوا آدم ان شاء الله ،كملوا السهرة مع بعضاهم .
كنت قاعدة انا ودنيا وعجوزتي في الصالة نتفرجوا انا كنت متمددة في الفوتاي خاطر مسلاني عاد يوجعني بزاف ادا قعدت مدة بلا ما نتمدد . بيسك كرشي كبرت . دخل علينا آدم جا قعد في الفوتاي وحطلي راسي على فخضوا قالي وش راهي بنتي .قتلوا لاباس
قالي غدوة نديك كونترول عند الطبيبة تاعك . قتلوا ماعندها حتى فايدة كي نروح نتعب في الطريق باطل كل سمانتين تعاودلي نفس الهدرة . قالي اواه لازم تروحي باه نطمن عليك انتي والبيبي . قتلوا وش راح يخصنا رانا في زوج ملاح ديجا شوف البيبي لي راك تهدر عليه راه كبر قبل وقتوا . قالي الله يبارك على ولدي خارج لباباه . قتلوا والله راك فرحان خاطر مش انت لي هازو في كرشك راني قريب نتخنق منو . باسني على خدي قالي معليش احملي راهي غير فترة وتفوت ، قتلوا بصح انا صاي تعبت وقتاه نجيبوا ونتهنى ، ضحك قالي راه غير شهرين ونص صاي كرهتي منو . قتلوا ايه شوف رجعت سمينة قريب منقدرش نتحرك من بلاصتي . قالي غير تولدي ترجعي كيما كنتي . قالي حقا راه مسلم عليك محمد قتلوا تلاقيتوا .قالي ايه حكيت معاه وقالي حاب يخطب دنيا . قتلوا وانت وش قتلوا . قالي قتلو نشاورها هيا ويما ونرجعلك لخبر. خزر مع دنيا وقالها راهم جاو خطبوني فيك ليوم . هي هبطت راسها حاشمة وعجوزتي قاتلوا شكون هدا نعرفوه . كنت راح ننطق ونقولها بلي محمد خويا قرصني خزرت معاه قالي اسكتي سكتت . وهو خزر مع دنيا قالها واحد يخدم معايا في لوزين متربي وعاقل وولد فاميليا انا من رايي تقبلي . نشوف في دنيا وجها صفار وخضار قريب راح تبكي. قاتلوا منقبلش مزلت صغيرة . قالها كيما تحبي مش راح نسيف عليك . ناضت راحت للشمبرة تاعها . قتلو علاه مقتلهاش بلي محمد . قالي وش يفرق محمد على غيرو هي مش حابة تزوج قاتلي صغيرة فرات . قتلوا بصح كون تعرف بلي محمد لي خطبها تقبل . وقف قالي هيا نطلعوا لدارنا قتلوا علاه مزلت ساهرة . قالي قتلك هيا ازربي وقفت سلمت على عجوزتي وطلعنا غير دخلنا لدار حكمني من يدي قالي دورك تقوليلي وش كاين بين محمد ودنيا .قتلوا وش راح يكون بينهم عجباتوا جا خطبها . قالي متكدبيش علابالي كاين حاجة بيناتهم قولي صح راهم يخرجوا مع بعضاهم ؟, قتلوا وش فيها كان خرجوا مع بعضاهم يخي حنا قبل ما نتزوجوا خرجنا مع بعضانا . قالي كون نعرف بلي خرجت معاه ندبحها الموس يمشي على رقبتها . قتلوا وشبيك انت تقول جاي من العصر الحجري دوك مكانش طفلة متخرجش ومهيش اونكوبل . قالي وش دخلني في بنات الناس انا المهم اختي مديرش هاد الشي ومطيحش بقيمتي وقيمة بابا والباقي الله يسهل عليهم . قتلوا تسما انا كي خرجت معاك طيحت بقيمة بابا هدا وش حاب تقول انت . قالي شكون هدر عليك انتي ومتبدليش الموضوع كون نعرف بلي خرجت معاه ولا بينهم حاجة وانتي علابالك وساكتة تخلصوها غاليه في زوج . . انا بقيت حايرة في هدرتوا في كل كلمة يقولها يجرحني بيها جا رايح حكمتوا من يدوا قتلوا آدم راك فايق مع روحك وش قاعد تقول ، راك لثاني مرة تجرحني بكلامك . قالي علاه نجرحك كي راني نهدر في الحق اي طفلة تمشي مع طفل. وتكون معاه بلا ماكاين بيناتهم حاجة رسمية راهي قاعدة طيح من قيمة باباها وخاوتها حتى قيمتها طيح . انا بقيت ساكتة نخزر معاه ودموعي يهبطوا متوقعتوش راح. يقولي هكدا ، مسحت دموعي وقتلوا ايه فهمتك ، لكان راك تمعني عليا بكلامك انا كي خرجت معاك خاطر نحبك وكنت مستعدة ندير كلش علاجالك ستنيتك عامين ونص وكنت مستعدة نستناك عمري كامل ، أصلا انا كي خرجت معاك كنت حاطة فيك ثيقة كيما ثيقتي في محمد خويا ، ادا راك حاب توصلي بلي طيحت بقيمتي وقيمة بابا نورمال انا معرتلكش روحي و مقتلكش ارواح ني## # حتى راني طيحت قيمتي ، هز يدوا ضربني على فمي قالي وشبيك ربك تخسري في هدرة حابة نريبلك فمك على هدرتك الخامجة هادي . بعدت عليه وقتلوا اشفا عليها مليح واشفا على هاد نهار مليح خاطر عمري ما راح ننساهالك وتخمامك الناقص هدا لي راك تخمم فيه احكموا عندك . قالي امشي من قدامي لنفزدك ونزيد نسمعك تخسري الهدرة تشوفي واش ندير فيك . دخلت للشمبرة بدلت قشي ودخلت في السرير نخمم عمري ما توقعت بلي آدم راح يعايرني بنهار لي خرجت معاه فيه ندمت على هداك النهار ديجا هو نهار واحد بصح ندمت عليه ڨد صبري في دنيا. جرحني بهدرتوا عمري ما راح ننساهالوا هاد الهدرة . شفتوا دخل غمضت عينيا لعبتها رقدت ، باسني وجا رقد بجنبي وحط يدو على كرشي ورقد . غدوة صباح نضت لقيتوا يوجد في روحوا باه يروح يخدم خزر معايا قالي صباح الخير مرجعتلوش وقعدت تكيت ضهري على السرير قالي نوضي وجدي روحك نديك عند الطبيبة . قتلوا منروحش خلي برك قالي راني قتلك نوضي يالله متقلقنيش ، قتلوا منروحش راني لاباس عليا ماعندها حتى فايدة كي نروح عند الطبيبة . قالي دبري راسك انتي تعرفي ما يليق بيك . خرج ديراكت وانا بقيت قاعدة شوي من بعد نضت درت شغالاتي كملت هبطت عند دنيا لقيتها في الشمبرة تاعها عينيها منفخين وتبكي قتلها علاه راكي تبكي هكدا وش كاين . قاتلي والوا شفتي خوك بدل في هدرتو قالي نجي نخطبك من بعد ماجاش .قعدت قدامها في السرير قتلها نقولك الصح . محمد هو لي جا خطبك لبارح وادم محبش يقولك راه شاك بلي كنتي تخرجي مع محمد . ناضت تحلف قاتلي والله ما خرجت معاه جامي غير نهار لي روحنا للسبيطار . قتلها انا علابالي بصح آدم هو لي شاك . قاتلي والله ماخرجت معاه أصلا علابالك بيا نخاف من ادم كون يفيق يخي تعرفيني من كنت في الليسي جامي خرجت مع واحد . سكتت شوي من بعد رجعت تبكي قاتلي وش راح ندير درك باين آدم يروح يقولوا راهي مقبلتش . قتلها معندك حتى حل غير انك تروحي لآدم تقوليلوا بدلت رايي وحابة نتزوج ساهلة .قاتلي وكون يقولي علاه بدلتي رايك .قتلها هديك الله يسهل عليك انا خاطيني تفاهمي انتي مع خوك حاولي كيفاه تقنعيه . وصل وقت لغدا جا آدم انا طلعت لداري وجدت الطابلة وقعدت نستنى فيه باه يجي يتغدا ، طول قلت باينة قعد يتغدى لتحت عند عجوزتي . وليت حطيت ليا وقعدت ناكل حتى شفتوا دخل خزر معايا قالي علاه مستنيتنيش نتغداو مع بعضانا قتلوا حسبتك راح تتغدى مع يما ، قالي كون جيت راح نتغدى مع يما راني قتلك . راح غسل وجا قعد حطيتلوا صحن تاعوا قعد ياكل وانا نشوف معاه حابة ندوق من الصحن تاعو ملڨري راهي نفس الماكلة بصح هكا جاتني على صحن تاعو وزيد الصحن تاعي قريب يفض وانا مزلت جيعانة . طلع راسو خزر معايا قالي علاه مراكيش تاكلي . قتلوا والوا راني ناكل . وبقيت نشوف معاه ، عاود طلع راسوا قالي وشبيك .بقيت ساكتة صونا التلفون تاعو راح للصالة يهدر انا ديراكت بدلت الصحونة ديت الصحن تاعو وحطيتلوا الصحن تاعي.ورجعت ناكل ، كي كمل الهدرة رجع قعد في بلاصتو باه يكمل غداه .خزر مع الصحن من بعد خزر معايا ضحك قالي وش درتي . انا خزرت معاه ودرت نية في الهبال زعما معلابالي بوالوا قتلوا وش درت انا . قالي علاه بدلتي الصحونة . قتلوا لا مبدلتش . بقا يضحك قالي والله . قتلوا ايه . كملت ناكل حتى خلصت وهو يخزر معايا ويضحك . كي كملت قالي شبعتي و لا مزال . قتلوا ايه شبعت قالي بصحتك حبي . قتلوا يسلمك ، هزيت الماعن وغسلتهم كملت دخلت للشمبرة لقيتوا راح يرقد قتلوا متخدمش لعشية .قالي لا معنديش خدمة ليوم ، دخلت للدوش دوشت ولبست سوغتي دو بان وخرجت رميت روحي فوق السرير هكداك . قالي وشبيكي . قتلوا والوا عييت برك وغمضت عينيا راح نرقد . قالي نوضي البسي قشك ونشفي شعرك وارواحي ارقدي خير راه البرد قادر تمرضي قتلوا خليني برك تعبانة . جبدني من دراعي حتى دخلني في حضنو .باسني على فمي قالي حبيبي ليوم مشنف عليا . قتلوا منيش مشنفة . قالي قريب صدقتك وانتي حتى صباح الخير مرجعتيهاليش وزيد كليتيلي غدايا. ومبستنيش . قتلوا ايه خليني برك راح نرقد . قالي بطة حبي راح تقعدي زعفانة مني قتلوا منيش زعفانة غير تعبانة برك . قالي لا راكي زعفانة من لبارح بصح لبارح انا كي هدرت مهدرتش عليك وزيد انتي خرجتي معايا نهار واحد وزيد انا كنت متأكد بلي عمري ما نسمح فيك وراح تكوني حلالي . قتلوا صح . قالي ايه صح انا عمري ماكنت راح نسمح فيك ولا نخليك . قتلوا بصح ادم دنيا و الله ما خرجت معا محمد وزيد راهي تخاف منك حتى كي كنت مسافر جامي حكات مع طفل ولا خرجت . قالي علابالي ، بصح كنت لازم نتأكد المهم راني هدرت مع محمد وقتلوا صاي راهي قابلة وتفاهمنا بلي السمانة الجاية يجي يخطب . قفزت من بلاصتي قتلوا قول والله حكمني قالي بالعقل وشبيك راكي انوسانت ادا نسيتي .قتلوا اصبر نروح نقول لدنيا نفرحها . قالي خلي متقوللهاش من بعد انا نقولها . رجعت لبلاصتي .
رجعت تكيت راسي على صدرو قتلوا يووو والله غير فرحتلهم في زوج ربي يكمللهم قالي ان شاء الله .من بعد ضحك قالي بصح تشفاي كي كنتي بكري تكرهي دنيا .قتلوا ايه نشفا في بروميار تاع الليسي كنت منحملهاش خلاص .قالي علاه بصح مسكينة هيا مادارتلك والوا . قتلو كنت نغير منها . قالي علاه حتى تغيري منها . قتلوا خاطر انت تحبها ومدللها . ضحك وقالي جديدة هادي راهي اختي باينة نحبها ونعزها كيما انتي خوك يحبك . قتلوا وانا . قالي وشبيكي انتي . قتلوا تحبني ولا لا ، باسني قالي انتي مش نحبك نعشق في دين والديك مهبول بيك . بستو قتلوا حتى انا نعشق فيك راح يدو يفتحلي في سوغتي دو بان . حكمتلوا يدو قتلوا دومي البرد قالي انا ندفي عمري ديجا عندي بزاف مسلمتش على ولادي هيا خليني نسلم عليهم قتلوا ولادك . قالي منعرف راني حاس بلي راهم زوج ولا ثلاثة ولا ربعة. قتلوا حبس تحساب فيا قطة نجيب ربعة مع بعضاهم. قالي ان شاء الله يكونوا ربعة صح . قتلوا ياااا حرام عليك كيفاه ندير معاهم. انا ربعة ديجا غير واحد وراني خايفة كيفاش راح ندير معاه . قالي وانا وش ندير نعاونك في كلش غير يجيو على خير. وعافية برك .قتلوا ان شاء الله.. غير كملنا انا رقدت ، .بعدت عليه ورميت لغطا . حسيت بيه جبدني ليه ودورني عندو دخلني في حضنو وغطاني . عاودت رميت لغطا وبعدت عليه . زاد جبدني عندو وغطاني . قتلوا وانا راقدة دومي خليني نرقد السخانة . قالي مكانش السخانة كون ترقدي بلا غطا تمرضي . زير عليا في حضنو وبقا يمسحلي على شعري .انا وليت نخرنن قتلوا دومي اطلقني حابة نرقد وانت حضنك دافي . قالي ارقدي برك عمري دوك نشعل للكليماتزور . بقيت هكداك نخرنن ونحاول فيه محبش يطلقني حتى رقدت شبعت نوم فطنت لحمي كامل مكسر عليا وسخانة خارجة مني . شفت بجنبي ملقيتش أدم وانا مغطية بالغطا ، كان الباب تاع الشمبرة مفتوح شفتوا خرج من الدوش جا عندي باسني قالي صحة النوم على صغيرونة تاعي قتلوا يعيشك . قالي وشبيك حمرة . قتلوا منعرف . طابس حط يدو يقيسلي في السخانة . قالي راكي مسخنة شفتي راكي مرضتي قتلك نشفي شعرك وانتي مسمعتيش راسك تقول فيه لحجر ناض يعيط قال راح تهبلني الطفلة هادي . ضحكت قتلوا دومي علاه راك تعيط عليا درك . قالي متكلحنيش بدومي تاعك والله مزلت نقولك كلمة ومتسمعيهاش غير نزرقلك لحمك. هزني قتلوا اصبر نلبس قالي معندك.علاه تلبسي دخلني للدوش وقفني وفتح عليا الما البارد . لصقت فيه نعيط ونقولوا أدم الماء بارد بارد . بعدني عليه وحطلي راسي تحت ما وبقا يمسحلي على راسي وانا نعيط . قالي خلاص عمري باه تتنحا عليك السخانة احملي شوي برك . وحد العشر دقايق وخرجني لبسني بيجامة وجاب سشوار بقا ينشفلي في شعري . كي كمل باسني قالي هيا صحة على بنتي . بستوا قتلوا ربي يخليك ليا رجعت دخلت في السرير . قالي نخرج نشري لعشا ونجي . كي جا خارج قتلوا دومي راني سخفانة على لاكريم . قالي اواه حبي راكي مريضة كون تاكليه يزيد يضرك اكثر كي ترتاحي نجيبلك . قتلوا اوكي . قالي هيا باي منطولش ونجي .