حب في الثانوية

138

غير وصلنا لدار عجوزتي هبطت هيا واختها كي  جيت راح نهبط قالي احكمي بلاصتك.شفت معاه قتلوا علاه قالي نروحوا للدار بزاف ما قعدتي هنا . قتلوا نكمل الليلة على الأقل مع الضياف . قالي وش هدرت منزيدش نعاود . علابالي علاه حابني نروح للدار غير باه  يحاسبني . قتلوا صحا على الأقل نهبط نجيب البيبرون والسوسات تاع ريتاج دوك في الليل تبكي عليهم . قالي روحي   مطوليش . هبطت دخلت  للدار هزيت حوايج ريتاج  وبقيت عجوزتي بالخير قتلها غدوة الصباح راني نجي.  قاتلي علاه رايحة . قتلها ولدك لي محبش انا خاطيني بصح غدوة على الصباح نكون هنا . قاتلي صحا معليش  . خرجت ركبت في طونوبيل لقيتوا يلعب مع ريتاج ناضت . قتلها علاه نضتي انتي ثاني ياك كنتي راقدة . حطيتها في حجري ورجعت نرقد فيها قتلوا كون  غير كملنا الليلة مع يما دوك راهي حاصلة وحدها.  بقا ساكت  وڨارن حواجبوا  مشنف . غير وصلنا للدار  دخلنا حطيت ريتاج في بلاصتها لقيتها ناضت تبكي قاتلي بابا . قتلها روحي عندك باباك روحي والله ما نزيد نرقدك في حجري   يا ربي عندي ساعة وانا نرقد فيك غير حطيتك نضتي.  خرجت تجري عندو لحقتها لقيتوا مدلها باطة تاع الجي تشرب فيها وشعللها تيلي  حطها قناة تاع كراميش تتفرج فيها . قتلوا علاه مديتلها جي دوك تبات نايضة .  شاف معايا مخنزر قالي انتي  وش وصيتك انا قبل ما تدخلي  للعرس قولي . سكتت تعلمت  حاجة غير نشوفوا مقلق نسكت حتى نخليه يتكالما باه نهدر  . حكمني على ذراعي قالي راني نهدر معاك وش وصيتك ولا راكي تقوليلي هدرتك تدخل من وذن تخرج من الثانية انطقي . قتلوا يا آدم وش فيها كان شطحت في العرس ياك عرس اختك مش عرس البرانية وشبيك  مكبرها تقول شفتني نشطح في الشارع.  بقا يشوف  كي  حكمني من ذراعي العباية تاعي تفتح شوي  نشوف غير في عينيه راحوا لجيهة صدري .  قالي وش راكي لابسة من تحت  أفتحي نشوف . قتلوا والوا راني لابسة صواري كيما البنات كل . قالي أفتحي يالله . يا ربي كون يشوف وش راني لابسة يقبرني ليوم  صواري قصيرة وضهرها كامل عريان غير خيوط . قتلوا  كون نفتح يضربني البرد . زيرلي على شعري قالي اريج منبقاش نعاود في الهدرة . غير فتحتها ويحكمني قالي يا الكلبة وش راكي لابسة من جبتيها هادي قولي وقتاه شريتيها . ويعطيني ضربة على الضهر تحسب ضربني بحجرة . بعدت عليه قتلوا وشبيك تضرب  حكمك لكلب . قالي يا ### # وتزيدي تهدري  شوفتي روحك وش راكي لابسة اهدري . قتلوا ياك غير نسا . قالي وكي عاد غير نسا تعري روحك هكدا كون روحتي عريانة خير  تحسابي روحك مزال  صبية حتى تلبسي هكدا قولي وش يقولوا الناس مرت آدم  معرية روحها علينا  ، انتي تاع الصح ضحكت معاك شوي رجعتي لصحانية الوجه تاعك. قتلوا اطلق شعري واهدر  بالعقل علاه راك تعيط هكدا . ويخبطني بكف  قالي يال#### وتقوليلي أهدر بالعقل وانتي خليتيلي عقل لابسة الفضح ومنفوق تشطح كشغل موصيتكش طالقتلي شعرك انتي منين تفهمي منين نهدر مع الحيط انا  . قتلوا انت من بكري هكدا غير تشوفني فرحانة تفسدلي فرحتي وش فيها كان لبست وشطحت ياك ما درت العيب . بقا غير يخلخل فيا من شعري قريب يطيرهولي  قالي مدرتيش العيب  وهدا لي لبساتوا مش عيب  قولي سيقانك عريانين مش عيب قولي  ما حشمتي من حتى واحد .قتلوا اطلق شعري ياالغيار كي شفتني جيت ملاحة ونهبل غرتي مني . سيد  تشوكا بقا غير  يشوف قالي وش قلتي دوك انا  غيار . قتلوا ايه غيار  كي شفتني جيت ملاحة غرت مني .  قالي تقوليلي غيار دوك تشوفي الغيار . ويحكم لاغوب لي لابستها من الصدر ويجبدها جابها مقطعة على النص   . غاضتني حتى وليت نبكي عليها بسيف باه  كومنديتها غالية من ولاية خلاف بقيت نستنى شهر باه وصلتني ويجي هو في دقيقة يقطعهالي .  قتلوا علاه عليك قطعتها علاه الغيار هدا والله تخسرهالي ربي يسهل . قالي باه المرة جاية تتعلمي تسمعي لكلام ،وهاد اللبسة تتلبس غير ليا انا مش امة محمد كامل تشوفك بيها . على صوتو خرجت ريتاج بقات تشوف معانا ولا طلقني قالي امشي بدلي  من بعد نزيدو نتفاهموا عليها مليح راني خارج مترقديش حتى نجي .  دخلت للشمبرة وخليتوا سمعتوا خبط الباب وخرج غاضتني لاغوب هزيتها نشوف فيها بالاك نقدر نخيطها بصح لقماش تبان فيه الخياطة وليت خبيتها في الخزانة وخرجت عند ريتاج نسمع في صوتها تغني مع الغناية في الصالة دخلت هزيتها في يدي خرجت نمشي ونزلق  نجي طايحة على طولي مفقتش حتى لقيت روحي راقدة في الارض زلقت في الجي لي سيحاتوا ريتاج جاب ربي زربت حضنت ريتاج بيديا لزوج سينو راهي طاحت في الارض بصح الحمد لله طاحت فوقي . حسيت مسلاني تقسم على زوج وراسي تخبط في الارض وذراعي في حياتي مزلقتش زلقة كيما هادي ريتاج  مسكينة تبكي سيرتوا مين  شافتني نبكي تخلعت عليا . مقدرتش نوض من بلاصتي بسيف باه قدرت نوقف مسلاني منيش حاسة بيه وراسي تنفخ  ذراعي زراق  كامل سيرتوا من جيهة المفصل تقول عليه تكسر قعدت نسكت في ريتاج من الخلعة  . وليت جبدت درت ثلج لراسي ودراعي بصح مسلاني منيش حاسة بيه تقول تعوقت . رقدت ريتاج و دخلت للشمبرة  وتكيت في بلاصتي درت بومدة تاع السطر وكاشية  بصح هكاك مزال شوي وجاع مفقتش حتى رقدت . سمعتوا كي دخل بصح مقدرتش نوض كملت رقادي حتى للصباح سمعت الباب تفتح ما تكون غير ريتاج جات عادتها كل صباح تنوض قبلنا وتصدم علينا للشمبرة تحوس على باباها . بصح المرة هادي جات جيهتي انا وتمس في وجهي بيدها . وتقول ماما. تنوض فيا . سمعت آدم  هزها قالها ريتاج ارواحي عندي بابا خلي ماما راقدة تعبانة .  قعدها فوق صدروا . قاتلوا ماما ديدي . قالها وين عندك ديدي هاتي نشوف . قاتلوا نو ماما  عندها ديدي من ومن . وبقات توريلوا جيهة تاع يدها . قالها صح . مصدقهاش يحسبها تهدر برك . قتلوا ماما تبكي عندها ديدي .  ولا حطها فوق السرير وطل عليا ويعريلي في ذراعي  قالي اريج نوضي . قتلوا خليني . كمل يعريلي في دراعي حتى شاف الزروقة في يدي قالي نوضي وشبيكي من يدك اني نهدر معاك . قتلوا طحت لبارح . قالي كيفاش حتى طحتي هدا قتلوا زلقت في الكلوار .  ناض شعل الضو ورجع قالي نوضي نشوف يدك ، بالاك لا راهي مفعوصة ولا مكسورة . قتلوا لا ما بيها والوا راهي ترضرضت برك كي طحت عليها وزيد كنت حاكمة بيها ريتاج على هديك ضرتني . قالي غير يدك برك لي وجعاتك . وريتلوا مسلاني وراسي قالي راكي قريب هلكتي روحك  كيفاش حتى طحتي هكدا متشوفيش قدامك وانتي تمشي ياك قداه من مرة نقولك نحي عليك الجري ولعب هدا الارض كامل دلدوصول يزلق.قتلوا والله ما كنت نجري ريتاج هيا لي سيحت الجي ما فقتش بيها  وانا زلقت فيه  . ضحك قالي انتي اعملي عمايلك وحصليها في بنتي مسكينة . قتلوا انا لي مسكينة قريب ما تكسرت في جرتها . جاب الدوا دارلي  وقالي
ادا ماحبسش عليك الوجاع نديك للطبيب . رجعت لبلاصتي قالي شفتي قتلك احكمي بلاصتك وانتي قعدتي عرس كامل توري في روحك وتشطحي وتلبسي وتحطحتي حتى صابوك بالعين المزية جات هكدا ولا اكثر . قتلوا مزالك برك تآمن بالعين ديجا  تقول غير انا ياك كل لبسوا وشطحوا زعما غير انا لي يعينوني . ضحك قالي بالاك عيني انا . قتلوا علاه . قالي كي شفتك  لبارح وانتي لابسة هكداك حليتي في عيني بزاف وقلت علاه راكي كل يوم تزيدي تزياني كل ما تكبري كل ما تزياني وتحلاي   . بقيت نسمع فيه وانا ساكتة مع كل كلمة يقولها نحس روحي راني نطير . قالي علابالك حتى غرت قلت علاه راهي لابسة هكدا ياك مش هيا لعروسة من  بعد جات في راسي منخليكش أصلا تروحي منحبش الناس تشوفك مذابيا تلبسي وتزيني وغير انا لي نشوفك . ضحكت قتلوا تسما عندي الحق كي قتلك غيار .  تبسم قالي مش غرت بصح نورمالمو غير انا لي نشوفك لابسة ومزينة هداك حقي انا برك . بستوا قتلوا نحبك  قالي انا نعشق فيك .