حب في الثانوية

107

فاتت سمانة كاملة من وراها وهو من نعيطلوا يتجاهلني يقولي زوج كلمات ويكوبي عليا مفهمتش علاه مش لهاد الدرجة يزعف مني ندمني على النهار لي هدرت فيه . في العشية جا عندنا بعد ما قال لبابا بلي راح نروح معاه باه نخرج لوراقي تاع العقد ولازم نكونوا في زوج وجدت روحي بالخف كيما يبغي هو لا مكياج لا سروال لا طالوا ، كان قاعد في الصالة غير كملت روحت عندو قتلوا صاي راني واجدة قالي هيا امشي . قدمت نمشي قبلوا، غير وصلنا للباب تاع الخرجة حبسني قالي روحي بدلي الحجاب..قتلوا علاه ياك راه مغطي .قالي وين تشوفي فيه مغطي وانتي من لور تباني كيما راكي . قتلوا وين نبان شوف راه مغطي. قالي تعرفي خير مني قتلك روحي بدلي ولا اقعدي مكانش خرجة . قتلوا حتى الحجاب وخرجتلي فيه مشكلة بلاك حابني نلبس الجلباب خير . قالي قريب تلبسيه مبقاش بزاف. مشيت راجعة للشمبرة نبدل وحايرة وشبيه بدل العقلية ضربة وحدة تقول مش نفس الشخص سبحان الله . رجعتلوا خرجنا ركبنا في الطونوبيل السكات وهدوء يجيب النوم بقيت نتفرج في الطريق من بعد خزرت معاه . قتلو آدم نسقسيك . قالي ممم راني نسمع فيك .قتلوا شوف فيا . قالي راني نسوق كيفاه نشوف فيك عندي ربعة عينين انا . قتلوا بطلت والله ما هدرت مبقاتش هدرة معاك خلاص انت . قالي براحتك . لا هكدا بزاف راه يقتل فيا بالعرق هدا وشبيه عاد مستفز هكدا . قتلوا آدم راح تعود سولافي . خزر فيا مصدوم .قالي كيفاش ؟ وش نعود؟ قتلوا سولافي تربي لحية طويلة ومبقيتيش تضحك خلاص . طرشق بالضحك على طول صوتو حتى عادوا عينيه بالدموع من ضحك .قالي والله سيريوا بطة من تجيبي في الافكار انتي باه تخممي هههه علابالك راني حاير فيك . قتلوا علاه راك تضحك وانا نحكي بصحي .ڨارا الطونوبيل بعيد على الطريق ودارلي حكملي يدي قالي شوفي اول حاجة مأسمهاش سولافي لي منعرف مين جبتيها اسمها سالافي يعني ملتزم بالسنة والفرض ،ثاني حاجة كيفاه حتى جا في بالك بلي وليت سولافي على قولك .قتلوا منعرف شفتك وليت دير كيفهم متضحكش معايا ومتحبش تهدر معايا بالتلفون وقوتلي قبيل بلي راح ديرلي الجلباب .ضحك قالي تسما عندك انتي سالافيين ميضحكوش . درتلوا براسي ايه . قرصني على نيفي .قالي راكي غالطة بالعكس هما يضحكوا ويهدروا عادي جدا . قتلوا منعرف انا ديما من نشوفهم برة ديما ساكتين ومهبطين ريوسهم . قالي والله انتي حابتهم يشوفوا فيك. قتلوا لا مش قصدي هكدا .قالي المهم فكنا من هاد الموضوع علابالك علاه منيش نحكي معاك . قتلوا معلاباليش قالي خاطر راني زعفان منك وبزاف . قتلوا علاه وقتاه زعفتك انا ولا مزلتي زعفان من المرة لي فاتت ياك قتلك سامحني . قالي يمكن انتي تجيك حاجة تافهة بصح هيا حاجة كبيرة بالنسبة ليا صيغة الامر لي هدرتي بيها معايا معناها ماراكي دايرتلي قدر ما راكي محترمتني . قتلوا يااااااا والله ما قصدي خرجت وحدها بلا ما نخمم أصلا انت تعرفتي نهدر بلا منخمم. قالي هادي يسموها دصارة الزايدة مش هدرتي بلا ما تخممي . قتلوا وش العقلية لي جبتها جديدة هادي على جال كلمة تقعد زعفان شهر وتقولي دصارة وما دصارة ياك قتلك سامحني . قالي هكدا باه نعيشوا بلا مشاكل انتي تعرفي حدك وانا نعرف حدي والقدر بيناتنا . بقيت نشوف معاه تاع من نيتك . قتلوا عمرك سمعتي بزوج متزوجين قعد بيناتهم لقدر ، بصح كيما تبغي انت لي حبيت ، هيا دورك ديماري قبل ما يروح علينا الحال. ديمارا وصلنا للبلدية ستنينا دالتنا باه نخرجوا لورق كي وصلت دالتنا طلبوا عليا لاكارت ومن زهري نسيتها قالولنا لازم تجيبوها باه تقدرو . خرجنا من ثم وهو ياكل في روحوا قالي هدا هو التمسخير لي نهدر عليه جاية تخرجي ورق بلا لاكارت باه راح تخرجيهم ب### شقيتينا في الباطل . خزرت معاه قتلوا هدا لي تقولي نقعدوا بالقدر وهدا سبان وتطياح واش عسل راه يقطر من فمك . قالي اركبي وانتي تعرفي غير ترجعي الهدرة منعرف وين كان مخك حتى جيتي بلا لاكارت . قتلوا ايه يا عمري علابالي مبقيتيش تسكت وتحكمها عام وانت تهدر علاها. ركبنا ديمارا فات على فاست فود قتلوا حبس حبس . قالي علاه قتلوا سخفت على فريت تاعهم اشريلي . قالي دوك نجيبلك وش نجيبلك معاه . قتلوا قولوا يكثر من سلاطة والطماطم والمايوناز والفريت يديروا زائد ملح. قالي اهبطي طيبيه انتي خير راكي تتمسخري، انا نجيبهولك كيما يبيعوه وكوليه ولا دبري راسك .هبط شوي ورجع هاز صاشي في يدو مدهالي فتحتها لقيتها كيما وصفتهالوا جابها. قتلوا يعطيك الصحة حبي . قالي بصحتك بديت ناكل قالي علاه راكي تاكلي هنا روحي لدار وكولي ،شوفي والله وتخمجيلي الطونوبيل غير انتي لي تغسليها . قتلوا راني جيعانة نبقى بالجوع حتى نروح لدار، وشبيك خايف على الخدرة هادي ما نخمجها ما والوا . قالي هادي ناس يقولوا عليها خردة انا نسكت خير . كملت كليت حتى خلصتها كاملة تنهدت قتلوا الحمد الله درك وين شبعت .قالي مشحاحة معرفتيش حتى تمديلي شوي معاك. قتلوا نسيت بصح حتا انت اصرف على روحك شوي ابن عمي . ضحك . قتلوا حط شوي غنا خلي نزهاو . برونشيت التلفون في الطونوبيل وبقيت نحوس على غناية ملاحة خطفلي التلفون من يدي وبقا يشوف من بعد قالي هيه زيدي شيشي واضربي الڨاروا وصاي وش هاد الغنا لي راكي تسمعي فيه مانيني وشيخ مراد ، لا غير اخرجي اسهري انا راجل ومنسمعهمش . قتلوا راح تبدا آدم راح تبدا . قالي ما نبدا ماوالوا صاي راني سوبريميتوا ومنزيدش نلقاه في تلفونك..كمل يشوف قالي وش هاد التسجيلات . قتلوا والوا مايخصوكش هات هنا التلفون . حبيت نحيهولوا مخلانيش طلع يدو لفوق قالي والله نسمع وش فيهم . قتلوا آدم كون تسمعهم نزعف منك تاع الصح اعطيني تلفوني . مسمعليش وفتح تسجيلات لقاهم صوتوا خاطر انا les appels تاعوا كاملين من لي بدينا نحكوا معضانا جمعت الهدرة الرومنسية تاعوا كامل وحطيتها في تسجيلات حبيت نخليهم سوفينير . بقا يسمع فيهم حتى كملهم . تبسملي قالي لهاد الدرجة تعشقي فيا ، قتلوا واكثر من هكدا انت حياتي . جبدني لحظنو قالي عمري الشابة .قتلوا صح رجعت شابة كيما قبل .قالي اكثر من قبل فتنة سيرتوا لاطاي واصلا حلاوتك وحدها تكفي وتوفي كل ما نقربلك نحس روحي نحبك اكثر ومغروم بيك اكثر . قتلوا منيش مصدقة بلي راح نرجعوا نتزوجوا ونعيشوا تحت سقف واحد كيما قبل وكلش يرجع بيننا حلال . قالي مبقاش بزاف ثلاث ايام وتكوني عندي في داري . قتلوا حقا وين راح نعيشوا . قالي في دارنا باينة ولا زعما راح نعيشوا عند باباك . قتلو آدم رجعني للدار . ضحك قالي والله راني حاب نقلقك برك راح نعيشوا في دارنا وحدنا مش لي مع يما . قتلوا تعرف شحال توحشتها هديك الدار ملقري ما عشتش فيها بزاف بصح حبيتها . قالي ادا تحبي نشروا دار اخرى .قتلوا آدم راح نقولك حاجة بصح متزعفش . قالي غير الخير قولي قتلوا علابالك بلي وليت تبذر بزاف وهكدا حرام ربي صح رزقك الله يبارك بصح راك غير تفسد كل مرة تشري حاجة وهي ديجا عندك منها كيما الطونوبيل مكانش لازم تشري هادي ديجا لي كانت عندك مازالها  جديدة مزالت بالصاشي تاعها . قالي شكون قالك بلي راني نبذر انا معيشتي هكدا واللحمد الله الخدمة ماشية مليح علاه حتى نبخل روحي .قتلوا بصح تخيل ادا قدر الله وحبست الخدمة ما تلقى عندك والوا . قالي يا لطيف علاه راكي تفاولي عليا ما تحبس ما والوا وراني داير حسابي . قتلوا انا قتلك وانت دبر راسك . ضحك قالي حق ربي ظهرتي مشحاحة تاع الصح . قتلوا مش مشحاحة لمثل يقول ربي ولدك على الشدة حتى كون يعود عام الرخا . قالي والله تسمى انا ولدك .قتلوا ولدي وراجلي وعمري كامل . قالي عمري انتي هاتي بوسة .قتلوا احشم راح نقعدوا بالقدر حتى نتزوجوا. ضحك قالي راكي ترجعيلي فيها . درتلوا براسي ايه قتلوا هيا ديماري راح الحال .