حب في الثانوية

119

غير خرجوا بابا وادم من الدار طاحت عليا ماما بالبليغة تاع النيلوا قتلتني ، جامي في حياتي ماما ضربتني هكدا تاع الصح كانت تضرب بالبليغة حتى صوتها يتسمع على لحمي . محبتش تحبس وانا نعيط لربي لي  خلقني ديجا كنت فشلانة وجسمي مكسر عليا  من la grippe زادتني هيا ، تضرب وتسب فيا تقولي يا لي ناقصة تربية يا لي ما تحشميم خليتي باباك ڨدو قد قدادو في نص حوايجوا قدام راجلك وش تقول عليك عجوزتك دوك تقول يماها معرفتش تربيها ، وجه الميزيرية والمشاكل شهر كي النسا معرفتيش تقعديه في دارك بلا مشاكل . محبستش حتى جا محمد لقاها تضرب فيا  فكني منها على آخر روح كون زادت شوي راح تقتلني بين يديها تضرب وين جات حتى ليطراس تاع الضرب تماركاو في زنودي في فخاضي في خدي على ضهري مخلاتش بلاصة ما ضربتنيش فيها ، لصقت فيه  قالها علاه راكي تضربي فيها ياك شحال من مرة نقولك متزيديش تضربيها يما مهيش صغيرة باه تضربيها بالبليغة . قاتلوا مدخلش روحك بنتي نربي فيها ، ديجا انت هو سبابها نهار كامل وانت تحللها في العين ودلل فيها  اريج نجيبلك اريج نشريلك اريج نديك تحوسي حتى شوف كيفاش عادت ما تخاف من حتى واحد وما تحشم من حتا واحد تكدب  وتصحح في وجها حتى راجلها يجي يشكي منها والله نقتلك يا اريج راكي تعرفيني . قالها يما بالعقل لا تطلعلك لا طونسيو احكيلي وش كاين . حكاتلوا ماما كلش قاتلوا حشمتنا قداموا باباك ما لقا وش يهدر بهدلت بينا ، دوك يماه وش تقول علينا واش ندعي عليك برك يا اريج . انا غير حاكمة كوانة ونبكي غايضتني عمري كيفاش ماما ضربتني هكدا  ولحمي كامل يوجع من الضرب وزيد قلبي عند بابا  علابالي حتى هو يجي يقلب عليا الدار . شاف معايا محمد قالي روحي للشمبرتك . نضت بسيف من بلاصتي ودخلت للشمبرة تاعي غطيت على راسي ونبكي ، ما دريتش مع روحي كيفاش غفيت فقت على صوت بابا يهدر في الكوزينة مع ماما قالها وين راهي اريج قاتلوا في الشمبرة تاعها  جا عندي طبطب الباب ودخل غير شاف وجهي عقد حواجبوا بصح ماهدرش قالي وجدي حوايجك غدوة الصباح يجي راجلك روحي لدارك . درتلوا براسي ايه وسكتت ، قالي منزيدش نسمع حتى شكوة عليك اريج راني وصيتك راكي مبقيتش صغيرة مدام تزوجتي تتحملي مسؤوليتك صحا بنتي ،  نوضي تتعشاي متبقايش بالجوع . خرج رجعت غطيت على راسي بردانة مالڨري  السخانة تقتل بصح انا كنت بردانة مجمدة ،عرفتها تكون حكمتني الحمة من la grippe . وليت روحت للدوش غسلت بالما البارد وشربت دوا تاع السخانة ورقدت . مافقتش حتى للصباح نضت منيش عبد السخانة تاكل فيا لوجاعة عڨابي هزيت التلفون لقيت ثلاثة ابال من عند آدم مسمعتوش ومن بعد بعثلي ميساج كاتبلي فيه متهزيش عليا معليش من بعد نتفاهموا فيها راني جاي نروحك على العشرة. شفت الساعة لقيتها ديجا التسعة ونص نضت من الفراش قابلتني المراية تاع الخزانة وجهي فيه ليطراس زرقة في خدي باينة بلي ليطراس تاع ضربة عينيا ذبلانين من الحمة لي حكمتني لبارح فليل وجهي أصفر شعري طالع في السما   لحمي قاع فيه ليطراس زرقين  . يعني تاع الصح حالتي كانت تشف العدو ، خملت حوايجي لي جبتهم وخرجت ديراكت للدوش غسلت ومشطت شعري رجعت للشمبرة لبست قشي حجاب والخمار وصباطي وقعدت نستنى  بلا ما نخرج ماني حابة نشوف حتى واحد سيرتوا ماما بعد الشي لي دارتوا فيا لبارح وزيد بابا حاشمة منو . عرفتوا وصل وقفت لي سمعت صوتوا يهدر مع محمد . شوي وجا عندي محمد  كل عليا من الباب قالي راه جا آدم . نطقت بلا ما نشوف فيه قتلوا   صحا راني جاية . دخل وغلق الباب قالي اريج ادا مراكيش حابة تروحي ومزالكي حابة تقعدي هنا غير قولي والله ما تخليك تروحي . شفت معاه قتلوا لا راني رايحة . قالي ملا وشبيك ادا على كي ضرباتك يما متزعفيش منها راكي تعرفيها وديجا مهيش اول مرة ، صح المرة هادي قسات عليك بصح غير كي تقلقت من فعايلك  . قتلوا علابالي حتى انا ما قلت والوا . قالي بلا ما تقولي راني علابالي وش راكي تخممي بصح حطي حاجة وحدة في بالك كلشي راه في صلاحك ومدام انا راني عايش لي يخرب فيك كشغل راه حرب فيا انا حتى لوكان راجلك . عنقتوا قتلوا ربي يخليك ليا . قالي ويخليك ليا هيا اخرجي روحي شوفي راجلك دوك نخرجلك الفاليزة . خرجت ودخلت للصالة لقيتوا قاعد عطيني بالظهر كي سمعني نمشي تلفتلي