حب في الثانوية

chapitre 34

وصلت لليسي حالتي حالة وجهي منفخ من البكا ،قبل ما ندخل مسحت دموعي باه ما يبقاوش البنات يسقسيو بصح باينة من وجهي بلي كنت نبكي ، دخلت نقرا تالمو لي غاضتني عمري رجعت نبكي في القسم بلى ما نفيق حتى قاتلي المعلمة اريج علاه راكي تبكي ، كدبت عليها قتلها مريضة برك قاتلي اهبطي اغسلي وجهك ادا عدتي مش قادرة روحي تروحي . هبطت للتولات قعدت نبكي بالشهقة حسيت روحي وحدي انا لي كنت مدللة عند بابا ، ولا هو لي راح يزوجني بسيف عليا . هدا كل بسباب ماما في لحظة هادي كرهتها تاع الصح . كون ما جاتش هيا لي عمرتلوا راسو مستحيل بابا يقبل . سمعت الباب تحل وخرجت دنيا من تولات قاتلي اريج علاه راكي تبكي بقيت ساكتة ما حابة نهدر مع حتى واحد ، كي شافتني بقيت ساكتة قاتلي علابالك مش مليح تبكي في التولات قتلها صح معلاباليش . قاتلي ايه ومن بعد شوي قاتلي مش راح تقوليلي علاه راكي تبكي قلتلها ساعات يوصل وقت الانسان يحب يبكي حتى لوكان بلى سبة . قاتلي عندك الحق ،هيا انا نخليك راني طولت على الدرس درتلها باي ، بقيت وحد الخمس دقائق وانا نغسل في وجهي باه حبسو الدموع . مع خرجت لقيت آدم في وجهي قالي ريجا علاه راكي تبكي ، قتلو والوا قالي اهدري وشبيك قتلو اسمحلي رايحة نقرى عندي درس مشيت راح نطلع للقسم حكملي يدي قالي انطقي متهبلنيش علاه كنتي تبكي . رجعت نبكي من اول وجديد ، كان مقابلنا قسم فارغ ، دخلني للقسم وغلق الباب قالي اهدري .بديت نحكي وانا نشهق من البكا ما فهم حتى كلمة ،حكملي وجهي قالي خلاص ريجا تنفسي بالعقل ، حبسي من لبكا وفهميني وش صرا قتلوا بابا قالي وش بيه باباك قتلوا قالي الخطبة في العطلة تاع الصيف .حسيتو تصدم اكثر مني في بالوا بلي كي نقول لا مش راح يسيفو عليا .قالي ومحمد قتلوا حتى هو مش قابل بالحكاية وتعارك معاهم قلهم خرجوني منها . وليت نبكي خزرت معاه قتلوا وش ندير وش الحل معاهم قدم تحضني وانا حكمت في القمجة تاعو على جنابو ودفنت راسي في صدرو وهو يمسحلي على شعري كنت صح محتاجة حضنو محتاجة واحد يواسيني نفرغلوا قلبي ويسمعني ،بقيت نبكي قتلوا هيا السبة هيا لي عمرتلوا راسو عليا ، طلعلي راسي قالي شكون هادي قتلوا ماما مفهمتش علاه تكرهني هكدا ، رجعت دفنت راسي في صدرو نبكي . كمل يمسحلي على شعري قالي اشششش خلاص يزي من لبكا ، طلعلي راسي وحكملي وجهي بين يديه قالي شوفي وجهك كيفاه تنفخ من لبكا ، مسحلي الدموع من خدي قالي واحد ما يستاهل تبكي عليه ، واحد ما يسوا دمعة من عينيك . بقيت غير نشهق من البكا قال استناي نجيبلك ما ، هو خرج وانا قعدت وحطيت راسي على الطابلة نخمم عمري ما توقعت انا راح تصرالي حاجة كيما هادي كنت ديما مدللة حاجة لي نقول عليها يديروهالي حسيت روحي راح ندوخ من التخمام . رجع آدم هاز قرعة تاع ما صغيرة ، دخل وقفل الباب ،جا قعد بحدايا قالي ريجا طلعي راسي اشربي ماء ، طلعت راسي جبدت حبة تاع الدوا من جيبي وشربتها بالما وهو يشوف معايا كي كملت حط يدو على كتافي وجبدني ليه تكيت راسي علي صدرو ويدو على كتافي قالي ما تخافيش هاد الحكاية عمرها ما تصرا ، قتلوا كيفاه قالي ما تكسريش راسك . ساعات من لي جاست تاعو نحس بلي يحبني وساعات نقول بلي من كثر ما نحبو عقلي عاد يصورلي بلي حتى هو يحبني . بقيت نخمم حتى غفيت وانا حاطة راسي على صدرو فقت غير كي حسيت بيه يمسحلي على شعري وصوت لاصونات تاع الساحة ، فاق بيا بلي فطنت قالي صحا النوم وضحك عدلت قعدتي قتلوا يا رقدت والله ما فقت مع روحي قالي نورمال ورجعلي لاماش تاع شعري ورا ودني ومن بعد هبط صبعو وبقا يمسح تحت عيني قالي باينة من ليساغن بلي ماراكيش ترقدي مليح ، قتلوا بالعكس نرقد مليح وديجا نشرب الدوا تاع الرقاد ساعات نقعد 12ساعة وانا راقدة ، قالي علاه حتى تشربي الدوا تاع الرقاد قتلوا هكدا والفتو ، قالي متزديش تشربيه فهمتي قتلوا علاه ، قالي ماش مليح مع الوقت يولي ادمان وزيد ما تنسايش بلي راكي مريضة وتشربي في الدوا قادر يديرلك اعراض مش مليحة ، شوفي ديجا خرجلك لي ساغن قتلوا صاي مبقيتش نشربو قالي صحيتي الفحلة وقرصني على خدي .تبسمت وهبطت راسي قتلوا انا نروح على خاطر عندي درس تاع رياضيات لازم نحضر . قالي هيا روحي قبل ما نخرج درتلوا باي وخرجت .
آدم بقا قاعد شوي ومن بعد جا راح يوقف شاف التلفون محطوط فوق الطابلة ,عرفو ديراكت باي تاع اريج ، هزو فتح الكود على خاطر ديما تفتحو قدامو ، دخل les photos . بقا يتفرج فيهم حتى لقا صورة متصورة بالفاست تاعو لي عطاهالها لبستها نهار لي صبت المطر ، شافها ضحك جبد التلفون تاعو وبقا يبعث في les photos تاعها ليه . كي كمل دخل les appels كتب النميرو تاع امها في تلفون تاعو .
عيط لامها هزت عليه قاتلوا الوا شكون معايا قالها آدم قاتلوا غير خير اريج لاباس قالها لاباس ، ادا نقدر نتلقاك عندي هدرة معاك .