حب في الثانوية

105

غدوة عيطلي آدم قالي راني جاي عند باباك وراح نجيب معايا عمومي والامام لازم ليوم تتفرا لحكاية مش راح نبقاو هكدا . قتلوا وشبيك تهدر هكدا ياك لبارح كنت نورمال . قالي يما راهي كسرتلي راسي في الدار كل زوج دقايق ازوج راك كبرت ومنعرف واش وعندها لحق لوقتاه راح نبقاو هكدا باباك زاد فيها بزاف ياك قتلوا مدهالي واشرط لي تحب ، بصح المرة هادي يا يقبل يا نديك بسيف انا نحبك وانتي تحبيني وحابة ترجعي عندي مفهمتش علاه راه راكب راسوا هكدا وواقفلنا في الطريق  .قتلوا آدم بالعقل مش هكدا تتحل الامور . قالي من لول علابالك بيا انا معنديش الصبر هدا كامل بصح علاجالك راني صابر وكل  يوم طالع هابط على داركم وانا بديت نتقلق تاع الصح بزاف زاد فيها بزاف . قتلوا آدم ياك من لول انا قتلك نهدر معاه وانت قلتي لا علاه راك تعيط عليا . سمعتوا يستغفر . قالي كوبي من بعد نعاودلك . كوبيت ورميت التلفون من يدي خرجت عند ماما للكوزينة قتلها آدم راه جاي وجايب معاه جماعة . قاتلي والله راه يكسر في راسوا باطل باباك قال منمدهالوش لوكان تطيح السما على الارض . قتلها مفهمتش علاه بابا يدير هكدا اففف ياك انا حابة نرجع . قاتلي شوفي متبدايش خليها بيناتهم انتي مدخليش روحك باباك مش راح يبقى مخشن راسوا هكدا يجي نهار ويقبل ملا انتي مدخليش روحك هادي حاجة تع رجال  . قتلها ايه حتى آدم قالي هكدا . قاتلي شفتي كيفاش يخمم هو تعلمي منو شوي . قتلها منعرف علاه جاني ليوم مقلق قالي يما راهي تقولي تزوج بانتلي بلي تدابز معاها . قاتلي ربي يهدي برك وش راح نديرو باباك والله كثرلها بصح مكاين حتى حل معاه . شوي وسمعت لاصونات تاع الباب بابا راح فتح كانوا هما دخلهم الصالة نسمع في الحس و الهدرة قاوية فهمت منها غير آدم كي قاعد يقول لبابا مش من حقك توقف في طريقنا ماما راحت شوي ورجعت قاتلي انتي آدم راه جا معول عليها   سمعتوا قال لباباك يا نديها يا نديها مكانش حل خلاف ليوم نفروها . قتلها يا ربي وما يصرا والوا آدم راه يبان مقلق خلاص المرة هادي منيش حابة يصرى مشكل . قاتلي ربي يستر برك . بقينا نصنتو عليهم شوي ونسمعوا في الأمام يهدر مع بابا منبعد كي كمل بابا قالوا انا مزلت على كلمتي انا معنديش بنات للزواج . مور ما قال بابا كلمتوا نسمع غير في صوت آدم يعيط قالوا كيفاه هادي معندكش بنات للزواج انا حاب نرجع مرتي ، شوف انا مرتي نرجعها عندي رضيت ولا مرضيتش .  حتى بابا ناض يعيط قالوا  راك تهدد فيا ولا واش  انا  قلت كلمتي بنتي متزيدش ترجع عندك . قالهم الأمام صلوا على محمد انا عندي الحل خلي نسقسيو الطفلة ونشوفوا رايها  وادا قالت بلي حابة ترجع لطليقها انت راح تقبل . سمعت بابا ناض جا عندي قالي البسي  حجابك وارواحي .نضت وانا مخلوعة وش راح نقول من جيهة حابة نرجع عندك آدم  ومن جيهة انا منقدرش نوقف في وجه بابا ونطيح بكلمتوا . لبست حجابي وبابا يستنا فيا درت الخمار ومشيت معاه للصالة دخلت لقيت آدم وعماموا قاعدين متوترين وادم وجهوا احمر وقارن حواجبوا خويا قاعد منعرف وش قاعد يهدر معاه بانتلي راه يهدن فيه والأمام غير يستغفر . قلت السلام عليكم شافوا معايا كل هبطت راسي حشمت منهم . قالي الامام بنتي راح نسقسيك وخممي ورجعيلي دوك طليقك حاب يرجعك عندوا وباباك رفض انا اقترحت عليهم نشوفوا رايك ادا قبلتي انتي ووقفتي ووقلتي حابة نرجع باباك راح يقبل . بقيت ساكتة راح نبكي وش الموقف هدا لي طحت فيه طلعت راسي شفت مع آدم لقيتوا  يخزر معايا تبسملي تفكرت هدرتوا من قالي بلي كي يسقسيني بابا على رايي نقولوا رايي من رايك. من بعد خزرت مع بابا لقيتوا يستنى في جواب تاعي وهو خايف علابالي خايف لنطيح كلمتوا  أصلا انا منقدرش نوقف في وجه بابا علابالي بلي كون ندير هكدا راح تجيه طيحة قدام الرجال بصح آدم علابالي حتى كان زعف نورمال شوي وينسى بصح بابا منقدرش  نديرها . قتلوا انا وش يقول بابا راني قابلة كلمة بابا هي لي تمشي هو يعرف مصلحتي وهو لي يقرر ..   . سمعت بابا تنهد فرح قال الامام الله يبارك ونعم التربية الله يبارك عندك  الحق بنتي باباك هو لي يعرف مصلحتك . خرجت ونبكي شافتني ماما سقسااني حكيتلها كلش قاتلي درتي الصح  . شوي وسمعت الامام قال لي فيها الخير ربي يكتبها . وخرجوا  عيطت لآدم مهزش المرة الثانية  هز عليا يعيط قالي هكدا اريج بعتيني وسمحتي فيا .قتلوا آدم اسمعني والله جاتني كبيرة نوقف في وجه بابا عيب كون نديرها راح  طيح كلمتوا وراح يقولوا بنتوا كسرت كلمتوا قدام الرجال والله انا نحبك وحابة نرجع عندك ونزوجوا .  قالي ميهمنيش  صاي كل واحد في طريقوا . وليت نبكي قتلوا آدم اسمعني والله جاتني صعيبة نقول بلي حابة نرجعلك قدام الرجال ونوقف في وجه بابا. نسمع فيه عاد  يضحك قالي علابالك كون قلتي قدام الرجال بلي حابة ترجعي عندي والله ما نرجعك . بقيت حايرة  قتلوا كيفاش ياك كنت تلوم فيا وتقولي سمحتي فيا ودوك راك تضحك  . قالي نضحك معاك برك باينة بلي لازم  تسمعي كلمة باباك ومطيحش بكلمتوا قدام الرجال . تنهدت قتلوا حرام عليك خلعتني حطيتك زعفتي مني  . قالي محال نزعف من حبيبي المتربي لي يعرف يهدر علابالك عمامي من لي روحوا هوما يشكرو فيك ويقولولي عندك الحق كي راك حاب ترجعها تستاهل متربية وعاقلة . قتلو  صح . قالوا والله كيما نقولك حتى الامام قالي عرفت تخير ومتسمحش فيها حتى يمدوهالك   . قتلوا انا أصلا تفكرت هدرتك وقولتها . قالي شوفتي كي تسمعي الكلامي  وش يصرا . قتلوا ايه ، ياك مزعفتش من بابا والله منعرف وشبيه . تنهد قالي والله باباك ملقيت معاه حتى حل الطريق لي نجيه منها يغلقها في وجهي مفهمتش علاه . قتلوا نصبروا برك معدنا حتى حل قالي هنا صابرين وش راح نديروا . كملنا هدرنا شوي وكوبيت . دخل عندي بابا متبسم حسيتو فرحان جا ديراكت تحضني قالي بنتي ليوم حمرتيلي وجهي ومكسرتيش كلمتي ملڨري علابالي بلي حابة ترجعي عندو بصح مطيحتيش كلمتي . تبسمت وقتلوا انت هو اهم واحد في حياتي واكيد مش راح نطيح بيك قدام الناس . قالي صحيتي بنتي لعزيزة ربي يهمنيك ويعطيك ما تتمناي .  خزرت معاه قتلوا بابا علاه راك رافض آدم هكدا . قالي شكون قالك بلي راني رافضوا . قتلوا راك مقبلتش . قالي راني نجرب فيه ونشوف قداه راح يصبر علاجالك  راح نشفلوا ريقو باه نمدك ليه . ضحكت قتلوا صح قالي ملا لي حاب الورد يصبر على شوكو وهو حاب يوصلك الله يبارك زين ودين لازم يصبر علاجالك . تحضنتوا وانا فرحانة نضحك قتلوا ايه لازم يصبر علاجالي.