حب في الثانوية

118

وصح غير كوبيت عليه عيطت ديراكت لمحمد قتلوا ارواح اديني للدار قالي علاه قتلوا هكدا برك توحشتكم وحبيت نجي . وجدت حوايجي لي راح نديهم لميتهم في فاليزة عشر دقائق وصل محمد هزيت الفاليزة وخرجت عند عجوزتي ما فهمت والوا قاتلي  راكي رايحة قتلها ايه راح نروح عند ماما نقعد . قاتلي الله يسهل . وشنفت عرفتها معجبهاش الحال خرجت مع محمد ، وصلت لدارنا قعدت صونا تلفوني جبدتوا لقيتوا آدم يعيطلي في واتساب محبيتش نهز عليه باينة عجوزتي وصلتهالوا سخونة بلي خرجت . كي محبيتش نهز بعثلي ميساج قالي هزي متخلنيش نجهل عليك .  كيف كيف محبيتش نهز  عليه خليه ياكل روحوا . بقا يعيط ويعاود حتى حبس وحدوا . كانت العشية رقدت حتى ليل كي نضت شفت التلفون ادا عاود عيط ولا لا مالقيت حتى ابال من عندو ، تعشيت وعاودت رقدت . فوتت سمانة كل يوم نخرج مع ماما نحوسوا نروح معاها للسوق ولا للبحر ولاللبارك المهم مقعدتش خلاص في دار نحيت الغمة لي كنت  فيها   وهو ما عيط ما سقسى حتى عجوزتي ودنيا معيطوش موالف غير نبقى نهار يبقاو يعيطو  قلت الله يسهل عليهم حتى هو حلفت منزيدش نعيطلوا خلي يكمل خدمتو في عقلو كيما قال . حتى لنهار الخميس هبطت مع ماما للسوق رجعنا على الوحدة تاع النهار الشمس تقتل  غير وصلت للدار ديراكت فتت لدوش من بعد ديراكت شعلت لاكليم ورقدت مافطنتش حتى لتسعة تاع الليل بصح فطنت منيش عبد السخانة تاكل فيا يدي منيش قادرة نهزها الموت شفتها بين عينيا  هزني بابا للسبيطار قالولي ضرباتك الشمس خاطر دورتي فيها بزاف . دارولي الدوا في السيروم باه يهبطلي الحمة لي طلعتلي غير كمل السيروم رجعني بابا للدار ، بصح ما جا يوصل نص النهار عاودت مرضت بصح مش بالحمة غير نتقيا ودايخة ،عاود رجعني للسبيطار كيف كيف قالولو راها من السخانة برك  ،  كي جات الطبيبة باه تعاود تحطليي السيروم قاتلي ياك ماراكيش انوسانت قتلها لا ولات، ركبتهولي  وكي كملتوا رجعني للدار ،بقيت في الشومبرة راقدة صونا تلفوني لقيتوا آدم هدا وين تفكر بلي راه متزوج وعندو مرا نورمالمو يسقسي عليها . هزيت عليه قالي لاباس قتلوا لاباس ، كان يهدر معايا ومشنف مش حاب حتى يشوف في وجهي قالي باباك لعشية يكون في الدار قتلوا ايه علاه .قالي باه نجي عندي هدرة معاه   .قتلوا علاه لاه رجعت . قالي ايه قتلوا علاه ماقتليش .ضحك  من بعد طرطق فيا ضربة وحدة تقول كان يستنى فيا نهدر قالي سيريو اريج حتى نزيد نقولك ، حتى هادي نزيد نقولهالك  كون هزيتي تلفون وقلتي غير نسقسي على راجلي نشوف حوالوا كون راكي عرفتي بصح انتي لا لا ، سكت من بعد قالي نقولك حاجة كوبي خير . كوبا عليا بلا ما يستناني نكمل هدرتي . وليت طفيت التلفون ورقدت بعد ما  قلت لماما بلي آدم لعشية جاي عند بابا  وانا في بالي بلي جاي باه يرضيني . في العشية كي دخلوا بابا للصالة منعرف وش قعد يحكيلوا شوي وجات عندي ماما قاتلي نوضي لراجلك راه يعطيلك بدلت البيجامة لبست روبة تاع دار ولميت شعري خرجت البابي موشوار في يدي والدموع يسيلوا من عينيا  بسبة la grippe  صوتي مبحاح المهم حالتي حالة وصاي . مع دخلت لقيتوا قاعد مع بابا كالعادة لابس وحاط الحطة تحساب دورك وين خرج من الفترينة وش نكره كي يبقا هكدا مهتم بروحو وبلبستوا وديما حاط الحطة وبرفان تاعوا  سابقاتوا  نحسو خير مني وهاد الحاجة توسوسني . المهم قعدت بلا ما نهدر معاه ديجا راني ديخانة وحدي . نطق بابا قالي متعرفيش تسلمي على راجلك وتقوليلوا الحمد الله على سلامتك كي وصلت لاباس . بلعت البخصة .قتلوا خفت لانعديه ب la grippe .  عاود قالي انتي صح جيتي هنا بلا مشورة راجلك . خزرت مع آدم  قتلوا لا يخي قتلك بلي راح نقعد في دارنا .قالي وانا وش قتلك ياك قتلك رجلك متعفسش عتبة الباب حتى نرجع هدرت ولا لا . قتلوا مش راح نبقى محبوسة في دار شهر حبيت نخرج ويماك مخلاتنيش وليت جيت عند ماما باه نخرج معاها مافيها والوا . حمر عينيه فيا قالي اول حاجة مأسمهاش يماك من باب التربية على الأقل قولي يما و    يما مخلاتكش خاطر انا وصيتها ووصيتك معاها على الخرجة برة ومن فوق   من لي جيتي هنا سمانة وانتي كل يوم تخرجي برة وما خممتيش على الأقل تهزي التلفون وتشاوريني ادا راني قابل تخرجي ولا لا .قتلوا ياك في دار بابا حتى هنا نزيد نشاورك  ثاني  وديجا مخرجتش وحدي كنت نخرج مع ماما.  مسح على لحيتوا وقال لبابا راك تسمع بوذنك كيفاش راهي تحكي معايا وكيفاش تصحح في وجها معايا . دخلت ماما قعدت شاف معاها قالها ترضايها انتي مرت ولدك تهز قشها وتعيط لخوها وتروح معاه بلا ما تشاورك ولا على الأقل تقيمك وتقولك من قبل  وهيا امانة ولدك في رقبتك ، ترضايها تقولك منيش حابة نبقى عندك ، وخلي وخلي  . شافت معايا ماما تاع نحكمك  نقتلك خاطر انا كي جيت ما حكيت والو جيست قولتلها حابة نقعد هنا حتا يرجع برك وكي تخرجني معاها تقولي شاورتي راجلك نقولها ايه . قاتلوا عندك الحق ومنرضهاش باينة هادي بصح  يكون منك العقل انت الكبير وراح تعرف عقليتها كيفاش يمكن مش قصدها . قطعلها الهدرة قالها قدرك عالي بصح هادي كون نحكيلك على خرايبها لي راهي دير فيهم وتخبي كون راكي تضربي فيها بالسوط ، آخر حاجة برك انا راجلها نعيطلها متهزش عليا ومهيش دايرتني في حسابها سمانة ما قالت نعيط نسقسي على راجلي ما قالت نشوف حوالوا  ما قالت نشاورو كي نخرج بالاك ما يحبش ، ومن فوق نهدر معاها كلمة تقولي نصد لدارنا ومنزيدش نرجع وقيلا راكي دايرة فيا مزية كي راكي في داري  . قتلوا حتى انت قالي واش حتى انا راني باخل عليك في حاجة راني مقصر معاك في حاجة تاكلي تشربي تخدمي عايشة في دارك وحدك تحوسي تلبسي نهار طلبتي حاجة وماجبتهالك ، راني قتلك غير هنيلي روحك واسمعي كلامي صعيبة هادي  ، خليني نخرج من دار وانا متهني . بابا غير ساكت ما نطق حتى كلمة غير يسمع قالي شوفي من لخر اريج راكي تعرفي عقليتي هادي شحال عييت ما نساعف فيك نقول صغيرة معليش ما فيها والوا احسبها كي بنتك غلطت فوتلها رجعاتلك الهدرة فوتلها ما راح تخسر والوا بصح باه توصل يما تشكيلي منك وتقولي مرتك هنا تحبس  تكملي بهاد العقلية راح تشوفي معايا وجه واحد آخر ها راني قلتلهالك قدام والديك باه من بعد متقوليليش راك تظلم فيا وراك حاڨرني يا تبدلي عقليتك يا راح تشوفي مني الويل لحمر . شاف مع بابا قالوا بنتك بهاد العقلية لي راهي ماشية بيها والله ما تعمر معايا الدار يا تبدلها يا نشوفوا حل آخر . وقف قالوا هيا انا نخليكم سلام عليكم . خرج وخرج وراه بابا شفتهم وقفوا في الهول وبابا منعرف وش قاعد يهدر معاه . بصح عرفتها راح تخلا عليا .