حب في الثانوية

chapitre 86

بعد ما خرج وراح باه يتلاقا مع  آدم ويحكي معاه . بقيت غير نستنا يمكن هدا أطول نهار فات عليا في حياتي حتى وصلت 11 تاع الليل باه روح خويا غير دخل خرجت عندو  نجري قتلوا حكيت معاه وش قالك  . حكمني قالي ارواحي نقعدوا . دخلني للصالة قالي حكيت معاه بصح هو قالي صاي كل واحد في طريقو ديجا الطلاق وقع صاي قالي هي لي حبت هكدا وهي لي حبت الطلاق وهادي ماراهيش لعبة .تحضني قالي اريج صاي فض المكتوب بيناتكم هدا وش كتبلكم ربي مش نهاية العالم هادي مديريش في روحك هكدا حاجة ما تستاهل دمعة من عينيك . وقفت ودخلت للشمبرة تاعي وفاتت ليلة كاملة وانا نخمم غدوة نروح عندو هو مستحيل يسمح فيا هو يحبني .
في الصباح غير خرج بابا وخويا راح للخدمة وجدت روحي بالخف وهزيت صاك تاعي وخرجت بالعقل باه متفيقش ماما ،  انا وصلت وين باب خرجت ماما من الكوزينة قاتلي اريج وين رايحة . خزرت معاها قتلها رايحة عند آدم . قاتلي انتي راح تهبلينا معاك وين رايحة عندو الراجل طلقك قالك صاي فض المكتوب بيناتنا وانتي مزلتي حابة تروحي عندوا وش من وجه راح تقابليه بيه انتي مش راح تحشمي برك والله يسمع باباك يقتلك المرة هادي يزينا من المشاكل تاعك براكات يا سيدي تقول غير انتي لي تزوجتي في الدنيا من لي تزوجتي وانتي بمشاكلك . قتلها ماما راح نهدر معاه برك . قاتلي مكانش خرجة معندك ما تهدري معاه ارجعي للشمبرة تاعك يالله . قتلها راح نروح مدخلكش فيا .قاتلي والله يا اريج نضربك نحصل فيك ارجعي للشمبرة تاعك متقلقنيش خيرلك . وليت نعيط قتلها ماما انا راح نروح عندو نحكي معاه ياك هادي حياتي انا مدخلكمش فيا قيلوني خلوني ندير وش نحب علاه راكم ديرولي هكدا . قاتلي روحي على روحك روحي الله يسهل عليك  خلي يرخسك ويبهدلك وان شاء الله يسحتك وتستاهلي وش راه صاري فيك الشح من صغرك وانتي تموتي على الهم و المشاكل البنات كل تزوج وتحكم ديارها  وتتربى غير انتي من لي تزوجتي وانتي غير طيري راح تطلعي للسما . كملت فتحت الباب وخرجت وخليتها تهدر وحدها نمشي في الطريق ونبكي حكمت تكسي ركبت ، جبدت التلفون عيطت لدنيا هزت عليا قتلها آدم في الدار ولا في الخدمة قاتلي علاه تسقسي عليه ياك حبيتي تطلقي منوا وهو طلقك وش مزلتي تحوسي عندو اخرجي من حياتو أصلا هو مش تاع وجهك من غدوة نروحو نخطبولوا لالاتك وانتي تشوفي اصبري برك . قتلها حتى انتي يا دنيا . قاتلي ايه حتى انا وشوفي من ليوم ما نعرفك متعرفيني فهمتي . كوبات عليا كلهم خرجوني انا لي غالطة كلهم ضدي مافهمتش علاه . شافني شوفور نبكي قالي يخي لاباس بنتي .قتلوا لا باس وصلني للبلاصة لفلانيه . وصلني للدار عجوزتي . خلصتوا وهبطت طبطبت الباب فتحتلي دنيا قاتلي وش جابك عندنا علاه جيتي وش تحوسي قتلها ما جيتش عندك آدم هنا ولا لا قاتلي علاه تحوسي عليه متزيديش تجي عندنا فهمتي سمعتنا عجوزتي خرجت قالت لدنيا وش الهدرة لي راكي تقولي فيها احشمي . قاتلها منحشمش متزيدش تجي عندنا  . قاتلي عجوزتي آدم مكانش هنا راح يخدم . قتلها صحا وخرجت حكمت تكسي وصلني وين يخدم ، دخلت وطلعت للبيرو تاعو لقيت السكرتيرة راح ندخل حبستني قاتلي اسمحيلي مدام بصح المسيو آدم قالي مدخليلي حتى واحد . قتلها علابالك شكون انا ولا معلابالكش بعدي يدك عليا راح ندخل .قاتلي ماتقدريش تدخلي مدام . قتلها اسمعي راني مرتو وندخل وقت لي نحب مش وحدة كيفك تقولي متدخليش فهمتي بعدي من طريق خيرلك . بعدتها ودخلت عندو لقيت وحدة  قاعدة مقابلاتو  وحاطة قدامها pc  تهدر معاه   غير شفتها قلبي مرتحلهاش باينة افعة . دخلت ورايا السكرتيرة قاتلوا اسمحلي مسيو  دخلت بالسيف . قالها نورمال روحي خرجت بقيت نشوف مع لي قاعدة مقابلاتو  طويلة وشقرة كاملة حتى من عينيها زرق  .قالها ديزولي  اميرة من بعد نكملوا هدرتنا كيما راكي تشوفي عندي ضيفة مزروبة . خزرت معايا وتبسمت وقاتلوا نورمال شوف برك الصغيرونة وش تحتاج . نطقت قتلها صغيرونة تاع....... ، كنت راح نسبها كي شفتوا خزر معايا تاع اسكتي سكتت منيش حابة نزيد نعقد الحالة اكثر . وقفت هي  لابسة سروال كلاسيك بالفاست تاعو في بلو سيال كون متهدرش بالدزيري تبان ڨاورية . خرجت وقاتلوا من بعد نتغداو مع بعض ونكملوا هدرتنا قالها اوكي . خرجت وغلقت الباب . شفت معاه قالي علاه جيتي .قتلوا بالخف بدلتني بهاد العقرب الصفرة . قالي علاه جيتي قولي وش عندك واخرجي منزيدش نسحق تجي هنا فهمتي . قتلوا تسحتني ؟؟؟؟ قالي ايه باي صفة راح تجي هنا ؟؟؟؟؟ قتلوا مرتك .قالي طلقتك لبارح  لاكان نسيتي . قتلوا آدم والله غير كنت مقلقة مكنتش نخمم كنت غير حابة نرجعلك وش درت فيا . قالي وش درت فيك لاه وش درت فيك انا قولي درت كلش في مصلحتك بصح انتي لا معندكش عقل تخممي بيه ،ديجا هاد الهدرة كامل ماعندها حتى معنى بعد لي صرا لبارح انا يا اريج ديري فيا هكدا خلع ومعلاباليش واش وتبعثبلي في لابوليس حتى لهنا . قتلوا والله ما انا المحامية دارت كلش من راسها . قالي المهم علاه جيتي هادي الحكاية فاتت صاي . قدمت عندو حكمتلوا يدو قتلوا آدم مش راح تسامحني مش انا حبيبتك اريج . بعد يدو من يدي قالي اريج حكايتنا خلاصت لبارح . قتلوا آدم مديرش فيا هكدا نبوسلك رجلك متخلنيش انا منقدرش نعيش بلا بيك وقف قالي روحي تروحي لدار وريحي باين اعصابك  تعبانين راكي مش فايقة مع روحك  . تلحت فيه نبوس فيه وانا نحاول فيه معلاباليش وش راني ندير المهم عندي يسامحني . بعدني عليه وهو يعيط قالي اريج خلاص فيقي لروحك رانا طلقنا فهمتي تطلقنا مبقتيش تقربيلي صاي راكي محرمة عليا فهمتي .طحت في الارض على ركابيا قتلوا متقولش هكدا متقولش هكدا نبوسلك رجلك يا آدم دير فيا وش تحب بصح متسمحش فيا انت تحبني علابالي تحبني مستحيل تخليني . نشوف فيه غير كيفاه دار للبيرو لحوايج لي فيه كامل كسرهم وهو يعيط راح تهبلني راح تخرجيني من عقلي راح تجهليني  يا #### حصلت في ### حصلت فيك وش ندير معاك فهميني وش ندير معاك أخطيني هالرب انسايني  . بقا غير يعيط ويكسر غطيت وجهي وانا نبكي على طول صوتي يا ربي ونكون نحلم يا ربي ونكون في كوشمار وميكونش هاد الشي صح . راحلي النفس بقيت غير نشهق . حبس وجا عندي هبط عندي قالي خلاص حبسي من البكا  حبسي عليا ## لبكا جبد لاباري تاعي من الصاك ودارهالي حتى راحت عليا . قالي نوضي . وقفني قالي شوفي اقسم بالله يا اريج نزيد نشوفك قدامي نباصي عليك فهمتي انسايني فهمتي انسايني كيما راح ننساك . قتلوا آدم قالي حبسي ما راكي تذلي في روحك حبسي انا صاي طلقتك مراحش نزيد نرجعك عندي فهمتي متزيديش تحاوليني  ولا تذلي روحك فهمتي حكايتنا خلاصت هيا امشي قدامي . خرجنا من البيرو لقينا السكرتيرة تشوف معانا باينة سمعت كلش هبطنا وهو حاكمني على الدراعي وانا نتراما معاه كلش نشوف فيه مضبب رجليا ماعلاباليش وين راني نحط فيهم وصلنا للطموبيل فتحلي الباب ركبت وراح ركب ديمارا يسوق وانا حاطة راسي على على الكوسالة نبكي ونهدر معلاباليش وش راني نقول كشغل دايخة نايضة حسيت بيه دورلي وجهي عندو قالي افتحي فمك فتحتو حسيت بيه حطلي حبة تاع الدوا وفتح قرعة تاع الماء وحطهالي شربت منها شوي . غير كملت حسيت اعصابي ترخفو ورتحت سكتت حتى وصلنا لقيت خويا  برة والتلفون في يدو باين  عليه متقلق باين تحير عليا كي روح و ملقانيش في الدار . هبط آدم فتحلي الباب قالي هيا اهبطي ياك تقدري تمشي . درتلوا براسي ايه. مع هبطت جا خويا ديراكت تحضني قالي ريجا خويا وين كنتي من الصباح وانا نعيطلك تلفون تاعك مغلوق . بقيت ساكتة قالوا آدم كيفاه تخلوها تخرج وحدها مش تشوفوا فيها مريضة ، شوف حالتها كيفاه كون كشما صرالها في الطريق قالوا محمد  صحا كي وصلتها المرة الجاية عيطلي برك  انا نتصرف متشقيش روحك  . من هدرتهم يبانوا شغل متقابضين . جبدت  محمد من تريكوا تاعوا قتلوا آدم هيا ندخلوا تعبانة  منيش قادرة نوقف. غلطت باه نقول محمد قلت آدم قالي محمد هيا خويا ندخلوا هيا. بقا يمشي فيا من بعد قالي  وش رايك نسافرو انا وياك كيما قبل . درتلوا براسي ايه وانا أصلا مش نسمع فيه عقلي مزال مع لي راه  واقف ورانا ، درتلوا خزرت معاه لقيتوا مزال واقف يشوف معانا من بعد  هبط راسوا  وركب في طموبيل تاعو وديمارا راح .