حب في الثانوية

chapitre 103

لغدوة الصباح نضت لقيت ماما جات قاتلي راني هدرت مع الطبيبة ليوم راح ترجعي تاكلي بصح لازم غير ليسوب الخفاف برك قلتلها الحمد الله على  الأقل نرجع ناكل كي ناس راني حاسة روحي بيبي . قاتلي هانت يا بنتي قريب تتهناي . قتلها ايه المهم هيا بدليلي وامشطيلي شعري ليوم راهي جاية عندي يمات آدم ودنيا قاتلي وش جايين يديرو قتلها ماما جايين يطلوا عليا . قاتلي وانتي شكون لى قالك راهم جايين .قتلها قالي آدم لبارح كي هدرت معاه . قاتلي بعد كامل وش صرا وزيد جايين . قتلها ماما راح نقولهم متجوش ياك دقائق وهم رايحين مادريش مشكل . لبستلي بيجامة جديدة ومشطتلي شعري  هي كملتلى وانا سمعت طبطيب في الباب راحت ماما فتحت لقيتهم هما لي جاو سلمت ماما عليهم من بعد دخلوا سلمت عليا عجوزتي ومن بعد دنيا تبدلت بزاف لدرجة قريب ما نعرفهاش وجها رجع مشيان بزاف وتبان مهمومة قعدوا مقابليني بقات عجوزتي تسقسي على حالتي وددنيا غير ساكتة . نطقت قتلها ماما روحي شوفي الطبيبة على العلاج الفزيائي . شافت معايا غمزتها قاتلي ايه . وقالت لعجوزتي هيا نكسلوا رجلينا شوي ونشوفوا الطبيبة ونرجعوا . خرجوا هما بقينا غير حنا وحدنا . قاتلي اريج سامحيني . قتلها علاه نسامحك . قاتلي خاطر وصلتي للحالة هادي بسبابي والله ندمت ، سامحني كنت وقتها غيرانة منك وحابة ننتقم منك خاطر بعدتي عليا خويا ، آدم من لي عارفك عاد يحبك اكثر مني حتى من تطلقتوا نهار كامل وهو يخمم  فيك وانا وماما قريب راح ينسانا ، علابالي انتي معندك حتى ذنب بصح والله الشيطان وقتها لعبلي بمخي وزيد حتى محمد تبدل عليا من لي تطلقتي . قتلها السماح أصلا انا منيش زعفانة منك  خاطر حتى انا كون جيت في بلاصتك راني عملت نفس الشي لي عملتيه ، انا  زعفانة من روحي أكثر خاطر في اللحظة هديك ايماني ضعف و عملت في روحي لي عملتوا ربي يهدينا برك . ضحكت قاتلي منيش مصدقة بلي سامحتيني كنت منقدرش الليل وانا نايضة ندعي ربي يشفيك ونطلب منك السماح باه ضميري يرتاح فاتوا عليا خمس شهر جحيم . قتلها الله عز وجل سبحانوا ويسامح شكون انا حتى منسامحش ، أصلا قررت ننسا لي فات كامل ربي عطاني فرصة باه نعيش حيات جديدة . قاتلي صح مرسي بزاف متعرفيش قداش فرحت وهدرتك طمنتني وزيد شفتك هكدا لباس . قتلها ايه راني لاباس وراح نرجع خير من قبل . ضحكت قاتلي علابالي . قتلها نسقسيك . قاتلي سقسي . هبطت راسي قتلها آدم مزال خاطب اميرة هديك . قاتلي يا بنتي وش نحكيلك ياك وحدها وحدها قاتلوا نبطلوا قتلها راكي تحكي صح قاتلي والله كيما نقولك كي بقا يسقسي فيها علاه حبت تبطل قاتلوا لي كنت نحبوا جا حاب يخطبني .يخي قالها آدم الحمد الله كي جات من عندك حتى كنت نخمم كيفاه نقولك كل واحد يروح في طريقوا ههههه. قتلها خوك مهبول . قاتلي مهبول بيك. قتلها كل ما نتفكر بلي رانا مطلقين نتقلق . قاتلي المهم هو يحبك . قتلها يابنتي خلاها آدم كلمة كونا في الحلال ورجعنا للحرام . قاتلي بريبي ان شاء تعاودوا تزوجوا وتعيشوا مع بعض خير من قبل . قتلها ان شاء من فمك لربي . دخلت ماما وعجوزتي قاتلي دنيا حنا نروحوا . قتلها من بعد عيطيلي قاتلي في نميرو تاعك . قتلها لا عيطيلي في النميرو تاع آدم تلفونوا راه عندي عطاهولي . قاتلي صاي من بعد نعيطلك . قدمت عندي باستني على خدي قاتلي مرسي بزاف اريج عمري ما ننسا خيرك كي سامحتيني قتلها مابيناتناش حبوبتي . كي خرجوا قاتلي ماما وش صرا راني نشوف فيك تسامحتوا . قتلها ايه جات طلبت سماح وانا سامحتها المسامح كريم . قاتلي بنتي الزينة المتربية العاقلة هكدا نحبك . صونا التلفون تاعي لقيتوا آدم هزيت عليه قالي بطة لباس قتلوا لاباس وقتاه راح تجي عندي توحشتك . قالي ليوم منقدرش نجي راني حاصل مع الخدمة . قتلوا بصح انا توحشتك ارواح نشوفك دقيقة برك وروح على روحك . قالي والله يا ريجا راني في الخدمة صرالي بروبلام منقدرش نجي ديجا بسيف لقيت وقت باه نعيطلك . قتلوا اففف صاي ربي يعينك . قالي بطة حبي غير مكان لاه ديري الشنوفة . قتلوا ايه راني مشنفة عليك ولازم عليك ترضيني ومنا لهداك الوقت ماتهدرش معايا باي . كوبيت عليه وضحكت . بقات معايا ماما حتا لليل وروحت . غير روحت ماما عدلت روحي في الفراش ورقدت غير غفيت شوي سمعت الباب تفتح تفكرت بلي الفرملية متجيش وانا راقدة فتحت عينيا وانا مخلوعة.لقيتوا آدم قتلوا آدم هدا انت خلعتني . قالي نضتي زعما راني فتحت الباب بالشوي باه مانوضكش خاطر سقسيت الفرمليه قاتلي راهي رقدت . قتلوا نحساب شكون دخل عليا قلبي قريب حبس . قالي شكون لعندو الجرئة يدخل على الكبيدة تاعي باه ندبحوا . تبسمت قتلوا علاه جيت عندي قالي جيت باه نرضي للمدللة تاعي عندك مشكل .قتلوا لا صاي مدام جيت راني رضيت عليك . قدم عندي قالي بعدي شوي خلي نرقد بحداك راني ميت بالعيا .قتلوا آدم احشم كون يشوفونا قالي شكون راح يشوفنا ديجا راني غلقت الباب بالمفتاح هيا دزي شوي لهيه . قتلوا اففف . قالي ريجا وش قولنا مبقيتيش تقولي اففف .قتلوا نسيت .بعدت شوي هو جا دخل بحدايا باسني على رقبتي قالي توحشتك . قتلوا حتى انا توحشتك . قالي فكرتيني جبد من جيب تاع الفاست تاعوا شيكولة مدهالي . حكمتها . فتحتها . قالي وش راكي ديري قتلوا راح ناكل منها . قالي ريجا وش هدرت المرة لي فاتت .قتلوا والله سخفت خليني برك ناكل حبة ومنزيدش أصلا الطبيبة قاتلي أبداي كولي . قالي راني نستنا غيرر وقتاه تخرجي من هنا . قتلوا حتا انا كرهت من هنا حابة نروح للدار .  شاف معايا قالي هيا ترقدي عندي كيما قبل . شفت معاه من بعد حطيت راسي على صدروا بقيت نشم في ريحتوا قتلوا ريحتك تهبل . ضحك قالي انتي لي تهبلي يا عمري . بقيت متكية على صدروا وهو يلعب بشعري .قالي ريجا منيش حاب نبقاو هكدا .  طلعت راسي شفت معاه قتلوا كيفاش هكدا . قالي حاالتنا هكدا حرام وانا منيش حاب الحرام.بعدت عليه قتلوا وش قصدك كيفاش راح تبعد عليا . حكملي وجهي قالي وشبيك تخلعتي وخفتي انا عمري ما نبعد عليك قصدي بالهدرة لي قلتها نعاودوا نزوجوا. فتحت عينيا قتلوا صح قالي ايه ..قتلوا بصح بابا منظنش بلي يقبل . عدل  رقدتوا قالي نورمال نبقا وراه حتى يقبل واحد ما يقدر يوقف بيني وبينك غيررربي سبحانوا انا وانتي تخلقنا لبعضانا .  بستوا على خدو وحطيت  يدي على لحيتوا وانا ندلل قتلوا دومي  تحبني . قالي ريجا راكي تطلقي في دلالك عليا  ورانا غير انا وانتي ثالثنا شيطان اركحي خير من ندير فيك حاجة ..... استغفر الله  . قتلوا علابالي مادرلي والوا . فتح عينيه قالي تحبي نوريك وش نقدر ندير فيك . ضحكت قتلوا لا صاي غير ما توريني ماوالوا مراناش نقصين ذنوب ، ذنوب لي عندنا تكفي . قالي ملا هيا كي شاطرة خليني نرقدك ونروح راه عندي خدمة قد راسي .