حب في الثانوية

chapitre 80

قتلوا علاه تقول هكدا راني نحبك فوق ما تتصور عمرك تشك في هاد الشي .قالي بصح فعايلك وهدرتك تقول العكس ، انتي في أي فرصة تقوليلي طلقني ، سامحة فيا  مبقيتش نحسك تحبيني كيف قبل يمكن حبك ليا  كان  غير فترة وفاتت وضرك راكي نادمة ومش  
حابة تقولي ، بقيت نشوف معاه حايرة في التخمام تاعوا . قتلوا آدم راك شوكيتني بتخمامك انا سامحة فيك كيفاه حتى جا هاد الشي في بالك . قالي من فعايلك ريجا . قتلوا وشبيها فعايلي آدم نورمالموا هاد الهدرة انا لي نقولها شكون لي رماني شهر ما جا ما شافني وما طل عليا ، شكون لي كل يوم يدي في الضرب انا ولا انت ، بصح عمري ما خممت كيف ما راك تخمم ، قدمت وحطيت يدي على خدوا قتلوا عمرك تخمم اني حبي ليك نقص ولا كان غير فترة وفاتت بالعكس انا كل يوم نحبك اكثر من قبل دنيتي تحلا غير وقت نسمع صوتك ونشوفك  ولا نشم ريحتك ، وقت لي قعدت شهر في دارنا كنت نبقى نستنى غير وقتاه تجي ولا حتى تعيطلي يوم ورا يوم  وقت لي فقدت الامل انك تجي عندي وحدك. قلت انا نجيبو كنت نبقى برا حتى للعشية  بلعاني علابالي اخباري يوصلولك  وعلابالي انت مش راح تبقى ساكت وراح تجي تحاسبني على شي لي ندير فيه كنت نقول نورمال حتى كان جا وقلب عليا الحالة وعيط عليا وضربني كيما موالف نورمال المهم عندي نشوفك ونسمع صوت علابالي بقات غايضاتك مني وقت لي حطيت عليك اللوم كي ماتوا لي بيبي بصح انا هداك الوقت كنت غير نهدر برك معلاباليش وش راني نقول كبدتي كانت مشوية على ولادي لي راحوا قبل ما نشوفهم وحرقت قلبي كاملة خرجتها فيك انت وفي ماما  وندمت بزاف  وقت لي عرفت اني نخسر 1000 بيبي ومنخسركش انت  خاطر انا نحبك ومنقدرش نعيش بلا بيك ، انت حياتي وراجلي وعينيا لي نشوف بيهم الدنيا  وحبيت نطلب منك السماح بصح انت مخلتليش الفرصة باه نهدر  . كملت نهدر وهو غير يشوف معايا كي كملت باسني على جبيني قالي علابالك انتي احلى حاجة في حياتي ملڨري ساعات تهبليني وتخرجيني من عقلي بفعايلك بصح نبقى نحبك ونموت عليك . تحضنتو على قوة جهدي قتلوا ربي يخليك ليا . قالي ويخليك ليا عمري ، بعدني عليه ومسحلي وجهي قالي هيا نروحوا راح الحال وانتي تعبانة. قتلوا ايه ميتة بالتعب . خرجنا طول الطريق وحنا نحكيو هو مرة يسقسيني على القراية مرة يسقسيني على نهاري كيفاش فات ، وانا فرحانة خاطر علاقتنا بدات ترجع كيف ما كانت قبل .حبس في المول قتلوا علاه حبست هنا قالي نشروا قضيان للدار . دخلنا لقينا غاشي بزاف حكمت في يدو وقتلوا الغاشي بزاف قالي ابقاي حاكمة في يدي ، منطولش بزاف نشري ليه ليه ونروحوا . بقا يشري في القضيان وانا غير نشوف أصلا منعرفش نقضي ماما هي لي ديما تشري . كمل فات على وين يبيعوا السقايط هديك شيبس وشيكولا قالي هيا خيري وش تحبي .انا خيرت الأنواع الكل عمرتلوا الشاريو . خزرت معاه قتلوا صاي كملت . خلصنا وكي جينا خارجينا  فتنا على لي يبيعوا الباتسري ، جبدتوا من يدوا قتلوا دومي اشريلي تورتة . ضحك وقالي ايه نشري لحبيبي احلى تورتة .  شرالي وروحنا للدار بدلت قشي وقعدت نفرز في الكوزينة طيبت عشا خفيف كملت رحت للصالة لقيتوا قاعد يتفرج رميت روحي فوق حجرو قتلوا يا يما راح نموت بالعيا . حكمني وضحك قالي ياك قتلك خلي غدوة وافرزي براحتك خير قتلوا لا هكدا خير . حكملي شعري بيدوا قالي علاه صبغتي شعرك هكدا تقول عليك دايرة نحاس في راسك . قتلوا علاه معجباتكش .ضحك قالي ايه معجبتنيش . قتلوا الله يسهل عليك المهم انا عجبني . قالي والله ياك زعما درتيها باه تعجبيني.  قتلوا انا درتها لروحي مش علاجالك ديجا انا نعجبك بلا حتى ما نصبغ ولا ندير حتى حاجة . بعدلي لاماش على عينيا قالي شوف اسيدي وش الكونفيونس هادي الكل  شكون لي قالك بلي تعجبيني . قتلوا ايه نعجبك وتحبني وتموت عليا سينو راك متزوجتش بيا منيش مرتك في دارك وبين يديك . باسني على رقبتي وقالي نعشق فيك ، وحكم شعري بقا يشم فيه قالي وشعرك هدا نفنى عليه ومع صبغة هادي عاد احلى من قبل . ضحكت وقتلوا ملا علاه تقولي معجبتنيش قالي نڨصر معاك برك أصلا اي حاجة فيك تعجبني . بقيت قاعدة حتى  قالي هيا نوضي  استحليتي القعدة هنا روحي حطيلي نتعشا . قتلوا اففففف نوض حط وحدك برك انا تعبانة . قرصني على شواربي قالي وش قلنا على كلمة اففففف هادي . قتلوا نسيت خلاص . حطني ووقف قالي هاني رايح نحط وحدي . شوي ورجع قالي راني حطيت ارواحي تتعشاي ومشا  راجع للكوزينة لحقتوا نجري وتعڨشت في ظهرو بيديا ورجليا  نبوس فيه على خدو قتلوا انتا احسن راجل في العالم واحلى  دومي في العالم  عسل ياربي عسل . عاد يضحك بالصوت قالي اطلقني يا بنتي راكي خنقتيني اهبطي من فوق ظهري . قتلوا لا وصلني هكدا للكوزينة . قالي الاميرة تاعي تأمر وانا نفد . وصلني للكوزينة وحطني فوق الكرسي وقعد تعشينا مع الحكايات ، شحال كنت متوحشة هاد القعدة مع آدم قعدة صافية فرحانين متفاهمين بلا عراك ولا مشاكل .كملنا رحنا للشمبرة هو تكسل في السرير وانا قعدت في الكوافاز ندير في الروتين تاعي قبل ما نرقد ، حتى نطق سقساني قالي ريجا راكي تشربي في الدوا تاعك . خزرت معاه في المراية قتلوا وش من دوا قصدك دوا تاع القلب ايه نشرب فيه علابالك لازم نشربوا . قالي لا مش على الدوا تاع القلب قصدي على الدوا تاع منع الحمل la pilule. انا قلبي ضرب في الألف وش فكرو فيهم ضرك أصلا من لي مدتهملي الطبيبة جامي شربتهم ومنيش باه نشربهم انا نحوس غير وقتاه نولي اونسانت وهو يقولي اشربي دوا مهبول هدا . كدبت عليه قتلوا ايه راني نشرب فيهم قالي مليح عندك تنساي متشربيهمش راني وصيتك . قتلوا علاه . قالي كيفاه علاه ياك علابالك بلي ممنوع عليك الحمل الفترة هادي كاملة . دورت عينيا عليه و خبطت القرعة la crème édratent  لي كانت في يدي فوق الكوافاز قتلوا تهنا منيش باه ننسا بلا ما تبقا تفكر فيا . قالي اريج شوفي فيا نهدر معاك. خزرت معاه .قالي بلا ما تخبطي وتشنفي هادي حاجة بسيف عليك ديريها فهمتي . قتلوا ايه فهمتك .قالي هيا ارواحي عندي . رحتلوا رقدت بجنبوا باسني على خدي قالي بلا ما تخممي ربي يرزقنا من عندو ان شاء الله مزالت الدنيا قدامنا ، بقا يحكي شوي من بعد رقدت وانا بقيت نخمم مستحيل نشرب هاد الدوا كون يقتلوني ما نشربوش وخلي لي يصرا يصرا . 
غدوة الصباح نضت لقيتوا مكانش بحدايا، دخلت للدوش لقيتوا واقف بلا تريكوا مقابل لمراية وهاز التندوز راح يحفف اللحية تاعو . قدمت بستوا على ظهرو قتلوا دومي صباح الخير . قالي صباح النور على البطة تاعي . قتلوا ما بقات فيها لا بطة لا والوا راني وليت قط .عاد يضحك قالي علاه هدا قتلوا شوف راني ضعفت خلاص . قالي نورمال دوك ترجعي كيف قبل . قتلوا صح عندك الحق . كان راح يبدا يحفف قتلوا دومي خليني نحففلك انا راني نعرف   .   قالي لا ،  خطفتلوا تنداز من يدو وهربت نجري قالي اسمعي هاتي هنا خليني نحفف ونروح نخدم راح الحال مش وقت لعب . قتلوا لا خليني انا لي نحففلك . قالي يا بنتي وين تعرفي تحففي انتي هاتي هنا . قتلوا لا والله ما نعطيهالك خليني برك نحففلك ياك انا مرتك حبيبتك . قالي بلا ما تحاولي هاتي  . قتلوا دومي هيا برك راني نحاول فيك خليني برك . حكملي يدي ونحهالي من يدي . قالي راني قتلك لا . قتلوا يا حرام عليك والله حابة نجرب خليني برك . بقيت نحاول فيه محبيتش نحبس حتى قالي خلاص هاكي واسكتي عليا . قدمت بستوا قتلوا يعيش آدم . ضحك قالي هيا برك وعندك تنحيها كاملة نقصي منها برك .قتلوا ايه علابالي هيا هبط راسك باه نقدر نوصل . هزني وحطني فوق لافابوا قالي هكا خير . بقيت نحففلوا وهو يضحك قالي علاه حالة فمك . قتلوا متضحكش عليا راني حالة فمي باه نركز مليح ولا نجرحك بيها . قالي تقول عليك قاعدة تعملي في عملية هيا برك ديجا التندوز  متجرحش. بسيف باه كملتلو بيا يشوف مع روحوا من بعد هز يدي باسها قالي يعطيك الصحة درتيها هايلة . صفقت بيدي قتلوا راني قتلك نعرف . قالي هيا روحي وجديلي قشي ندوش و نلبس ديجا راه راح عليا الحال . بقا ينحي في قشوا باه يدوش . قدمتلوا نمشي وانا ندلل عليه قتلوا تدوش وحدك بلا بيا . قالي اريج وقيلا مش حابتني نروح نخدم ليوم . قتلوا ايه صح اقعد معايا ليوم راني متوحشاتك بزاف وزيد عندك بزاف مخرجتنيش نحوس . قالي كيما يبغي حبيبي روحي وجدي روحك ليوم نجيبو نهار كامل برة . رحت نجري للخزانة نشوف وش راح نلبس لقيت جيب تاع الكوير هزيتها نشوف معاها زعما يخليني نلبسها ، تكلت على ربي ولبستها مع بودي تاع الصوف ولبست فوقها مونطو طويل و معاهم بوتس تاع الطالوا . ودرت شوي مكياج خفيف باه مايفيقش بيا ، كملت شفت  مع روحي راني واجدة و جيت نهبل . بقيت نستنا فيه حتى خرج  من الدوش شافني قالي راكي واجدة اوقفي نشوف وش لبستي . وقفت وانا ندعي في ربي ما يقوليش بدلي قالي علاه لابسة جيب البسي حجاب خير.قتلوة دومي خليني برك ياك مستورة ومونطو طويل  والله راني سخفانة نلبسها . قالي اول واخر مرة تزيدي تلبسيها. قتلوا ايه . صاي دوك وين فهمتلوا الكود تاعوا كي نحاولوا بالعقالة والتستات يخليني ندير وش نحب بصح ادا صححت وجهي وجيتوا بالقباحة والطيرة  معاه يزيد  يخشن راسوا اكثر ومكرة ميخلنيش وغير راسوا هو لي يمشي  . خرجنا فوتنا نهار يهبل شبعني تحواس مكانش بلاصة ما دانيش ليها ، كساني شرالي قش وبرفانات الحاجة لي نقولوا ملاحة وتعجبني يشريها ، رجعنا للدار قريب 12 تاع الليل رقدنا ديراكت .
غدوة الصباح الجمعة قالي وجدي روحك نديك عند دنيا . رحنا عندهم غير دخلت من الباب حكمتني بالتحضان والبوس كنت متوحشتهم عندي قريب شهرين ما شفتهمش قعدنا مع بعضانا نهار كامل حتى لليل طلعت لداري لفوق كملت هزيت حوايجي لي خليتهم ونسحقهم وهبطت وصلت للصالة تاع عجوزتي نسمع فيها تهدر مع آدم قاتلوا كشما كاين حاجة جاية في الطريق .قالها وش تقصدي يما . قاتلي كاش حمل ولا والوا . قالها يما تهدري صح ياك علابالك الطبيبة قالت لاريج الفترة هادي كاملة متقدرش تهز الكرش . قاتلوا قولها تهز برك معندو ما يصرالها ادا بقيتي تبع في هدرة تاع الطبة والدواوات منا على خمسة سنين وشوف وشوف. قالها وش فيها ادا ستنينا حتى خمسة سنين المهم تكون صحة اريج بخير هدا لي يهمني . قاتلوا يا نندب عليك خمس سنين لاه تحساب في روحك صغير نتاجك راهم ولادهم قريب يدخلوا يقراو وانت ابقا استنا ، ادا كانت مرتك صغيرة وتقدر تستنا ، انت راك كبير الله يبارك على الأقل حتى كي تجيب ولاد دوكا تقدر عليهم وعلى تربيتهم وش الفايدة كي تجيبهم على كبرك متقدرش حتى توقف عليهم .قالها يما لي يسمعك تهدري هكدا يقول راني في عمري خمسين ولا ستين سنة ديجا وقت لي يكتب ربي يجيو هاد الهدرة كامل ماعندها حتا فايدة . قاتلوا راني نهدر في مصلحتك لوقتاه راح تبقى تستنا انت ،ياولدي راني حابة نشوف ولادك قبل ما يدي ربي امانتوا وعيني تغمض راني حابة نتهنى عليك . قالها يما وش دانا للهدرة هادي ربي يطول في عمرك وتشوفي حفاد حفادك ، راني هكدا هاني.  قاتلوا وينوا لهنا لراك تهدر عليه من لي تزوجت وانت في المشاكل والهموم السبعة نهار كامل وانت تجري في السبيطارات مع مرتك . بقيت نسمع فيها تهدر وانا مش مصدقة وش راني نسمع هيا عندها الحق في حكاية تاع لولاد بصح وقت لي قاتلوا نهار كامل وانت تجري في السبيطارات جرحتني بهدرتها يعني راهي تشوف فيا نمرض في روحي بلعاني ياك هادي حاجة تاع ربي ربي بلاني بالمرض وش راح ندير . نسمع فيه قالها يما هاد الموضوع مبقيتيش تهدري فيه لا معايا لا مع اريج هادي حاجة تخصنا . قاتلوا على هادي لي ديتها تسكن في الدار الثانية خايف  عليها . قالها ايه خايف على مرتي علابالي بيك انتي تبقاي تجبديلها على الاولاد وهي هاد الموضوع ثثأثر منو بزاف ديجا باه رجعت كيف قبل غير بسيف مش حابها ترجع تمرض بسبة هاد الحكاية وقت لي يكتب ربي لولاد يجيو . خبطت يديها وقاتلوا واش هاد الدلال كامل حنا بكري  كنا . قاطعها قالها راكي قلتيها بكري مش دركا وادا على الدلال مرتي صغيرة ونحب ندللها واحد ما يسالني وادا بقيتي تجبدي على الحكاية هادي مبقيتش نجيبها خلاص هنا . سمعتوا يعيط ريجا. مسحت دموعي ودخلت عندهم قتلوا نعم عيطتلي  قالي هيا رانا مروحين قتلوا علاه بصح مزال الحال  مزلت حابة نقعد مع دنيا .  عيط عليا قالي راني قتلك هيا متناقشنيش . بقيت نشوف معاه مسح على لحيتو وقالي هيا روحي وجدي روحك وش راكي تستناي . وجدت روحي ليه ليه ورجعت لقيتوا مكانش سقسيت عجوزتي قتلها وين راه آدم . قاتلي خرج راه يستنا فيك في الطونوبيل . سلمت عليها وعلى دنيا كي جيت خارجة قاتلي ان شاء الله المرة الجاية تجي وتجيبيلنا معاك خبر يفرح . عرفتها تمعني على الحمل قتلها ان شاء الله وخرجت ، ركبت في الطونوبيل ديمارا يسوق ووجهوا ما يقصوش السيف.  بقيت نتفرج على التاقة ونخمم لازم في اقرب وقت نكون بالحمل وخلي يصرا لي يصرا .