حب في الثانوية

chapitre 94

غير وصلت ماما بقات تسقسي فيا ، قتلها ماما خليني نرقد من بعد نحكيلك .رقدت شوي من بعد فطنت تخطفت من بلاصتي نسيت خلاص عثمان ياربي زعما وش يكون صىرالوا . هزيت التلفون عيطت مرة زوج الثالثة باه هز عليا قتلوا الوا عثمان  لباس . سمعت قالي انا باباه شكون انتي ، حشمت وش راح نقولوا انا السبة لي ولدك تضرب .قتلوا انا نخدم  معاه . قالي انتي اريج . اه ياربي وين يعرفني باباه من بعد تفكرت كي قالي راني حكيت عليك لبابا .قتلوا ايه انا اريج وين راه عثمان .قالي راه في السبيطار . قتلوا ياك لباس برك قالي وش من لاباس وجهوا في حالة وش صرى معاكم قالولي بلي كان معاك وجا واحد تعارك معاه شكون هدا طليقك .مقدرتش نكذب  خاطر باين بلي علابلواا بالحكاية كاملة . قتلوا ايه طليقي صرا سوء تفاهم برك .قالي شوفي بنتي ادا شفتي روحك راح ديري مشاكل لوليدي وطليقك هدا  مش راح يخليك في حالك بعدي على لوليدي خاطر هدا ما نسعى في هاد الدنيا منيش حاب نشوفوا في الحالة لي شفتوا فيها ليوم . بقيت ساكتة وانا نسمع فيه تمنيت الارض تنشق وتبلعني هدا الكل بسباب وجه الهم تاع آدم . قالي سمعتيني بنتي منيش نلوم فيك بصح ادا شفتي روحك راح تجيبي المشاكل لولدي غير بعدي عليه . قتلوا عندك الحق من ليوم منزيدش نقرب ليه غير عيطت باه نطمن عليه برك .قالي راه لباس اسمحيلي بنتي بصح كون جا عندك ولدك راكي تعرفي معنى هدرتي الكبدة صعيبة .قتلوا ايه هيا في أمان الله.كوبيت خبطت التلفون مع الارض  خربلي حياتي الله يلعنوا .دخلت ماما بقات تشوف معايا قاتلي وشبيكي. قتلها والوا قدمت قاتلي اعدليي روحك نديرلك الدوا .قتلها خلي برك دوك نديرو وحدي .قاتلي ماتقدريش خلي ندرهولك قاتلي لا انا لي نديرهولك .بقات تنحيلي في السبتة  يا ربي وما تشوفش ليطراس تاع يدو   .كملت هبطتلي على دراعي غير شافاتوا شهقت قاتلي علاه يدك زرقة هكدا . قتلها كي طحت عليها زراقت قاتلي تتمسخري بيا شوفي ليطراس تاع يد وصباع شكون دارلك هكدا ديجا انا من لول ما صدقتش حكايتك . قتلها ماما والله .قاتلي متحلفيش بالكدب غير قولي شكون دارلك هكدا ولا والله نقول لباباك بلي راكي تكدبي .قتلها آدم قاتلي علاه دارلك هكدا وشبيه هما هبل حتى يمد يدو عليك والله ليوم نحطلوا سعدوا في يدوا بعد ما طلقك مزال برك يزيد يدور بيك .قاتلي انطقي علاه دارلك هكدا .حكيتلها لحكاية من لول لآخر . كلاتني قريب ما ضربتني قاتلي هدا كل يصرى ومتقوليليش وش صرالوا الطفل هداك عثمان قتلها راه في السبيطار قالي باباه . قاتلي من بعد نتفاهم معاك تاع تخرجي مع واحد بلا علمنا وتزيدي تركبي معاه في الطونوبيل مخفتيش يديرلك كاش حاجة قتلها ياماما والله عثمان متربي وعاقل جامي غلط قدامي ولا معايا .قاتلي معليش غدوة نتفاهموا مليح خلي سع نتفاهم مع هداك لكلوشار تاع آدم وشدخلوا فيك غدوة نسودلوا سعدوا اصبري برك .دارتلي الدوا كملت قاتلي غدوة ونتفاهموا مليح .فاتت ليلة بالخف نخمم غير في غدوة . طلع الصباح على السبعة سمعت ماما تهدر دخلت عندي لابسة قشها قعدت قتلها ماما وين رايحة قاتلي رايحة نتفاهم مع هداك الكلوشار ليوم نوريه بايتة ليلة كاملة مرقدتش كيفاش خلاه ربي يهز يدو عليك نهدر معاه ادا مافهمش قدرو نقول لباباك يتفاهم معاه مشي كي حب طلقك ودرك راح يكرهلك عيشتك .قتلها ماما بلا ما تروحي و الله انا عييت من المشاكل كرهت أصلا هو مشكلتوا كي شافني مع عثمان وعتمان صاي فضت حكايتو باباه قالي بعدي على طريق وليدي قاتلي شوف اسيدي مش هو ولدوا لي كان يجري وراك ويحاول فيك قتلها انا ميهمنيش المهم نفض عليا جد المشاكل أصلا منقدرش حتى نخرج بعد التبهديلة لي صرات . قاتلي بركاي عليا من نديب انتي من لول لي غلطتي بصح مزال مولداتوش يماه لي يمد يدو على بنتي بكري كنت نسكتلوا كي كنتي مرتوا بصح درك تشوفي وش ندير فيه .قتلها يا ماما قاتلي اسكتي لا ماما لاوالوا انتي ديما حقك ضايع معاه ، كون كي روحتي للسبيطار قلتي للطبيبة دارتلك سيرتيفيكا شكيتي بيه ، ولا مزلتي متحبيش عليه .قتلها ماما منيش حابة مشاكل بزاف عليا انا كرهت افهميني .قاتلي معليش من بعد نكملوا هدرتنا راني رايحة درك بصح منعرف نلقاه في خدمة ولا في دار .قتلها معلاباليش قاتلي حتى شئ نروح للدار ادا ملقيتوش نشقالوا للخدمة .قتلها اففف ديري لي حبيتي اخطوني برك. غير خرجت هزيت التلفون نعيطلوا ، ايه لازم نعيطلوا . درت نميرو تاعوا منعرف ادا بدلوا ولا لا بصح راهو يصوني صونا زوج خطرات هز عليا قتلوا آدم قالي ريجا لاباس قتلوا لاباس بقيت ساكتة حتى هو سكت قتلوا عيطتلك باه نقولك بلي ماماا جاية عندكم. قالي ايه مرحبا بيها بصح علاه . قتلوا كي شافت ذراعي وعرفت لحكاية قاتلي ليوم نروح نتفاهم معاه كيفاش يضربك. سمعتوا ضحك قالي تجي على روحها . قتلوا آدم تعيش منيش حابة المشاكل انا كرهت أخطيني وانا نخطيك متزيد دور بيا منزيد ندور بيك منيش حابة بابا يسمع ولا محمد يسمع ،وادا على عثمان والله ما بقيت نهدر معاه لاهو لا غيرو انا حابة نقرى ونكمل حياتي .قالي كيما حبيتي حياتك مبقيتش ندخل فيها بصح ونشم ريحة راجل بحداك اقسم بالله ننسا كلش وما يهمني لا باباك لا خوك نذبحك قدامهم، انتي تاعي  انا الناس كل علابالها بهاد الشئ.قتلوا بصح انت راح تعاود حياتك علاه هدا شي من حقك وانا لا .قالي انا كون ما شفتش روحي بلي لازم نعاود حياتي عمري لاتدخل حياتي مرا بغيرك بصح لازم هاد الشي .قتلوا حتى انا محتاجة راجل في حياتي . ناض يعيط ضربة وحدة قالي تزيدي تعاودي هاد الهدرة &&&## سمعتي زيدي عوديها كون منشقالكش نريبلك فمك .بقيت حايرة ياك كان يهدر نورمال وشبيه تحول هدا . بقيت نسمع فيه حتى حتى سكت شوي من بعد قالي وش حوال ذراعك..قتلوا علاه تسقسي ياك انت لي كسرتهالي .قالي ايه وكون تبعت شيطاني لبارح راني كسرتك كاملة على شي لي درتيه . قالي هاه يخي مش توجع فيك بزاف . قتلو شوي برك ، قالي ريجا علاه المرة لي فاتت رجعتي الدراهم ، هدوك الدراهم حقك .قتلوا منيش محتاجة دراهمك باه نعيش عندي الحمد الله قالي بصح هداك حقك بالشرع وبالقانون .قتلوا ما عندي ماندير بيه قالي خبيه يجي نهار وتسحقيه .قتلوا ما عندي ما نسحق احكم دراهمك عندك.قالي كيما تحبي انا دوك ندبر راسي .قتلوا انا راح نكوبي .قالي علابالك كل ليلة رجعت نحلم بيك في داري وفي فراشي  .. كوبيت ديراكت وشبيه هدا هبل تاع الصح . تكيت في بلاصتي وانا ننهج شفت في المراية وجهي احمر حتى انا كل ليله نبات نحلم بيه .
عند  آدم غير كوبات  عليه قعد يضحك عليها كمل يلبس في قشوا سمع الباب  تاع الدار يطبطب عرفها بلي نسيبتوا لي جات . كمل يلبس ويهدر يضحك  هاي جات يمات حبيبتي ليوم ماتفراش بيناتنا . هبط في الدروج يسمع فيها في صالوا تعيط وتحرش في يماه ليوم وش راح يسكتها .دخل لقاها قاعدة مع يماه ودنيا قالها سلام عليكم خالتي وشراكي لاباس .قاتلوا يخلخل ضروسك منيش خالتك ، ضحك قالها علاه هدا .قاتلوا وتزيد تضحك من فوق كسرتلي يد بنتي وتزيد جاي وتضحك شوف يا آدم انت راك عندي كي محمد بصح تزيد تدور ببنتي والله ما نتفاهم معاك اخطي الطفلة اسيدي كرهتها عيشتها وش مزلت تسحق من عندها . قالها سقسي بنتك وش دارت حتى كسرتلها دراعها لقيتها راح تركب مع راجل في طنوبيل تاعوا حبيتيني نشوفها ونسكت . قاتلوا وش دخلك فيها تركب حتى مع عشرة رجال ما راهي خطيبتك ماراهي اختك ما راهي مرتك فهمني وش دخلك .قالها شوفي اريج تاعي وتبقى تاعي نزيد نشوف خيال راجل معاها اقسم بالله نذبحها قدام عينيك . شافت مع يماه قالتها سمعتي ولدك وش راه يقول راح يطغى علينا . عاودت شافت معاه  قاتلوا اريج راح تتزوج ليوم ولا غدوة ديجا عثمان لي ضربتوا وشوهتلوا وجهوا غير يرتاح يجي يخطبها وهي قابلة وفرحانة انت علاه دخل في روحك .قالها اريج تحبني ومزالت تعشق فيا  وعلابالي بيها دير في هاد شي كامل مكرة فيا زعما تعاند فيا كي شافتني خطبت حابة حتى هي تتخطب غير مكرة برك ، ومن بعد تعاشي نادمة راني نعرفها وحافظ تخممامها كي داير ،غير زواج لي ما تحلمش بيه كي نموت زوجيها على روحك . قاتلوا يماه آدم ولدي صلي على محمد اخطي الطفلة ياك طلقتها وش مزلت تحوس من عندها  طفلة صغيرة حتا هي من حقها تعاود حياتها وتشوف حياتها مع راجل آخر كيما انت . قالها يما انتي مدخليش روحك انا راني عارف وش راني ندير .قاتلوا يمات اريج شوف من لخر يا تخطي بنتي يا نقول باباها وخوها هما لي يتفاهموا معاك. قالها وانا قلت هدرتي راجل ما يدخل حياتها وراني خاطيها.قاتلوا لا اله الا الله  يا وليدي وشبيك هبلت انت وش الهدرة لي راك تقول فيها كيفاه علاجالك الطفلة  التحبس حياتها . قالها علاه قتلك تحبس حياتها انا قتلك راجل ما يدخل حياتها وفرات .قاتلوا ملا كون منزوجهاش مكرة فيك . قالها تجرب برك ديرها . هز مفاتحوا وخرج قاتلها  انا نقول لباباها هو يتفاهم معاه. قالتها يماه بالعقل برك ونتفاهموا .قالتلها وولدك خلى فيها عقل عاد يضربلي بنتي في الشارع  ترضايها لبنتك يصرالها هكدا . حتى هي هزت روحها وخرجت .
غير خرجت يمات اريج دنيا هزيت التلفون ودخلت للشمبرة تاعها عيطت لمحمد قاتلوا محمد ياك اريج لاباس ليوم وين سمعت بلي آدم ضربها كسرلها ذراعها قالها وش قاعدة تخلطي انتي شكون لي ضربها اريج طاحت على ذراعها واحد ما ضربها .قاتلوا انت ما علابالك بوالوا صباح جات يماك هنا تهدر مع آدم سمعتها قاتلوا انت لي ضربتها كسرتلها ذراعها .قالها راكي تهدري صح وقتاه صرا هدا قاتلوا لبارح كان معدي على وين تقرى لقاها مع طفل في الطونوبيل تاعوا وكيما تعرف آدم يحبها وزيد يتقلق بالخف راح ضرب الطفل لي كان معاها وهي كي جبدها على ذراعها دارت وداها للسبيطار . غير كملت هدرتها كوبا عليها ديراكت.حطت التلفون وهي تضحك قالت شوفي ضرك يا اريج  كيفاه تسلكي روحك من الطريحة لي حا تديها من عند محمد