حب في الثانوية

139

I'm back 😌❤️

بقات سمانة على الستوننس تاعي  الخلعة بدات تحكمني ملڨري عبالي خدمت الميموار تاعي مليح بصح هكاك بقيت خايفة خاطر تلهيت شوي على القراية بعرس دنيا . نضت صباح مع آدم وجدتلوا الفطور هو فطر وراح يخدم وانا كملت غسلت الماعن  وحطيت ادواتي  والبيسي فوق الطابلة تاع الكوزينة نقرى والماكلة  تطيب ريتاج مزالت راقدة  الحالة كالم بديت نحفظ حتى وصلت العشرة ونص ناضت ريتاج نسمع فيها فاتت ديراكت للشمبرة تحوس وليت عيطتلها جات تجري هزيتها حطيتها في حجري نبوس فيها الكبدة تاعي هادي قاتلي حليب . وليت حطيتها في الارض وحطيتلها الدبدوب تاعها تلعب . قتلها  اقعدي هنا نوجدلك الحليب ما تمسي والوا . علابالي بيها كون  منوصيهاش والله تقطعلي كراساتي كامل . نضت وجدتلها حليبها وعطيتها شرباتوا وانا كملت نقرى حتى  سمعت تلفوني يصوني خليتوا في الشمبرة قتلها ريتاج ماما كملي اشربي حليب وما تتحركيش من بلاصتك عندك تقربي من النار افة تحرقك . دارتلي براسها ايه خرجت للشمبرة لقيتوا آدم لي يعيط هزيت عليه قالي اهلا الحب وش راكي ديري قتلوا والوا اني نحفظ . قالي وريتاج وين راهي قتلوا اي في الكوزينة تشرب في الحليب قالي صحا تهلاي قتلوا تجي من بعد تتغدا ولالا قالي والله منعرف على حساب الخدمة ادا قدرت راني نجي . قتلوا اوكي المهم ربي يعينك . قالي عندك على ريتاج عسيها متخليهاش وحدها. ضحكت قتلو علابالي آدم  راني حفظتها هدرتك كل يوم تقولهالي . قالي نقولها ويا ربي ديجا راكي خليتيها وحدها في الكوزينة. وليت خرجت وانا نهدر معاه ورجعت للكوزينة نلقا لالة ريتاج واقفة مع الطابلة ومنعرف وش قاعدة تخنتب  في كلافيي تاع بيسي روحتلها نجري قتلها ابنتي  وش قاعدة ديري . جيت نشوف نلقا صفحة  بيضة بقيت نطلع ونهبط في ميموار كامل بيضة وليت نترعد وحدي ونعيط علاها وش درتي يا كلبة وش مسيتي وهيا غير تشوف لاعبتها شغل ما دارت والوا بقيت نطلع نهبط والوا ما كاين في بيسي رجعاتوا تقول عليه جديد سيبريمات كلش فيه . رميت التلفون من يدي وبقيت عڨابوا والوا حاجة ما فيه غزلت الدموع هبطو حسيت السخانة طلعتلي لراسي تلفون غير يصوني هزيت عليه قالي وشبيك كوبيتي وشبيها ريتاج كشما صرالها اهدري .قتلوا وانا نبكي  وش نهدر خايف غير على بنتك وهيا اللالة سبريماتلي كلش من بيسي يا ربي سيدي كيفاش ندير دورك . قالي بالعقل برك زيدي شوفي مليح. قتلوا من قبيل وانا نشوف راهي سبريمات كلش حتى رجع ما فيه والوا فرماطاتو ڨاع والله نقتلها الكلبة وش ندير دوك انا كي بقات سمانة على الستوننس تاعي راحت سبريماتلي كلش علابالي دارتها زكارة فيا . قالي يهديك ربي وينا زكارة الطفلة ما تعرف والو   . قتلوا ياك ديما نوصاها ما توصلش حوايجي وادواتي علاه تمس فيهم ادا مزرقتهاش منيش اريج . كوبيت عليه ورحت نحوس عليها لقيتها تخزنت ورا الفوتاي تاع الصالة ديما هكدا غير تعمل عملة تروح تجري  تتخزن  . جبدتها وحكمتها من اليدين قتلتها ضربتها حتى عادت تبكي بالشهقة هكاك باه طلقتها راحت تجري تخزنت في شمبرتها وهيا تبكي . رجعت للكوزينة بقيت عڨاب بيسي والوا حاجة ما حبت ترجع فيه وزيد حتى لي فوطو تاع عرسي كنت حاطتهم فيه   . سمعت صوت المفتاح عرفتوا جا سمعتوا يعيطلي خرجت عندو حضني  قالي وش صرا هدا علاه هاد الدموع كامل .  قتلوا شفت بنتك وش عملت سبريماتلي كلش تعبي كامل راح باه راح نسوتني انا معنديش حتى كوبي كلش كان في البيسي وش ندير انا دوك . قالي متبكيش دوك نديه عند واحد صاحبي يعرف للفكاير هادو بالاك يقدر يرجعلك على الأقل حتى الميموار برك . قتلوا ميقدرش راهي فرماطاتوا قاع انا من قبيل نجرب والوا ما رجع . شاف فيا قالي متقلقيش برك دوك نلقاو حل ،  وين راهي ريتاج .قتلوا راهي في شمبرتها .  راح عندها مع دخل شوي وخرج عند هازها في يدو الدخان يخرج من وذنيه حكمني من ذراعي قالي  وشبيه ### انتي مريضة انتي مريضة في راسك تضربي في الطفلة وشبيك هبلتي في مخك ، شوفي يدها كيفاش زراقت . قتلوا تستاهل حتى هيا وش داها تحط يدها على حوايجي ياك وصيتها قلتلها متمسي والوا حتى نرجع . قالي وتضربيها هكدا  حتى يدها زراقت  ومن قبيل وهيا تبكي وما دخلتي شفتيها ولا حتى سكتيها . سكتت . قالي شوفي اريج اقسم بالله يا تزيدي غير تحطي يدك فيها ولا تضربيها غير نرجع معاك للعقلية تاع بكري نزرقلك لحمك ولا منيش آدم راكي تعرفيني كي نحلف غير ما كان لاه تخليني نولي نعمل  كيما زمان . قتلوا باه تهدر معاها هيا لي ريحتلي تعبي كامل جاي ليا انا تتحلف فيا .قالي لا لله الا الله اريج انتي مريضة وشبيك راني سيريو هبلتي قاع الطفلة صغيرة وش راح نهدر معاها يهديك ربي راهي عامين مزال ما وصلت . بكيت راح وخلاني شوي ولحقتوا لقيتوا يرضي في لالة ريتاج وهيا تدلل عليه وتوريلو في يدها زعما توجع فيها وهو يبوس فيها ويعنق . قتلوا باه تجي ليا  انا وتشوف حالتي ولا تلقالي حل قاعد معاها وترضي فيها بعد ما ضيعت تعبي كامل في السما . ناض وقف قالي صاي اريج والله لا مريقتيها سمطيها قاع  ياك راني قتلك دوك نشوف صاحبي يرجعلك حوايجك  وصاي . خرج راح لدوش، بقيت نشوف مع ريتاج قتلها اصبري برك عليا اكي طيحي في يدي نتفك يا وحد الفايحة وهيا تشوف معايا حايرة . حق ربي  حسيت روحي هبلت ڨاع قاعدة نتحلف في وحدة متعرفش حتى تهدر بصح كل ما نشوفها مع آدم منحبش نقول هيا صغيرة وبدات تديه مني كي تكبر كيفاه ، بالاك الناس تحير في تخمامي ويقولوا بنتك . بصح انا نقول الوقت هداك لي راه معاها علاه ما يفوتوش معايا انا هو غير يدخل ديراكت يروح  ليها يجري يهزها يلعب معاها وغير يكمل لعشا يخرجها برة يدور بيها ويشريلها ويرجعها في ليل كيفكيف يرقدها عندو حتى ترقد خلاص باه يحطها في شمبرتها والله حسيت روحي جبت ضرة مش بنتي .