حب في الثانوية

113

شاف مع عجوزتي وقالها  شوفتيها هادي لي راهي  تقولي جايبها عڨابي   علاه جايبها عڨابك خاطر ماراكيش تاع مسؤولية فطور كيما الناس مقدرتيش  عليه حرقتيه وحرقتي يدك وكون غفلت عليك شوي  نلقاك حرقتي بينا الدار  ومن فوق نروح نصلي نرجع للدار نلقاها مدخلة مرا ما تعرف اصلها من فصلها لا سراقة لا مهبولة لا عقلها موسوس قاعدة معاها وطالڨة لاطاي كون جات حتى ساترة روحا كلش فيها يبان ومن فوق تقولي راك تظلم فيا يا سيدي راني نظلم فيك نزيد  نلقاك درتي حاجة مش كيما حاب لحمك نزرقوا نربيك ولا منيش راجل .لي يسمع هدرتو يقول راني مهملاتوا وقاتلاتوا بالشر والدار راهي ماكلها الدود   تالموا قلقني قتلوا  تقولي نربيك  ، راني متربية خير من طاسيلتك . كان هو واقف في الدخلة تاع الكوزينة بحدا البوتاجي وانا واقفة بعيد عليه ، غير كملت هدرتي شفتوا غير كيفاش هز الكيكوطة كانت محطوطة فوق البوتاجي ورماني بيها كون ما هربتش في آخر دقيقة راه كسرلي بيها وجهي عيطت يا ماما  . عجوزتي عيطت قاتلوا ياااا راح تقتل الطفلة وشبيك هبلت . مرجعلهاش وهو جاي عندي هربت نجري من ورا عجوزتي لصقت فيها .قالي اخرجي يا #### ليوم والله واحد ما يخلصك من  يدي . قاتلوا عجوزتي امسحها راه حاكم فيك الدخان خليها برك كي تفطر دير فيها وش تحب .قالي يما راكي سمعتيها بوذنك وش قالت الكلبة لا حشمت مني لا منك والله ليوم نقتلها . قاتلوا عجوزتي انت لي قلقتيها وهي رجعتلك نورمال . قالها مدافعيش عليها الكلبة هادي . غمزتني عجوزتي قاتلي اهربي للشمبرة واقفلي عليك بالمفتاح . غفلتوا  وخرجت نجري للشمبرة نسمع غير في صوت رجليه يجري ورايا يا ويلي خلات عليا ليوم زربت دخلت للشمبرة وغلقت الباب بالمفتاح . خبط الباب قالي والله ما راكي خارجتها اقعدي بالشر نلقا رجلك برة نقصهالك  على صحانية لوجه تاعك . راح قعد في الصالة بقيت قاعدة في الشمبرة وحدي ونسمع في عجوزتي تهدر معاه قاتلوا مزلتوا برك في عوايدكم انا قلت بعد ما طلقتوا ورجعتوا راكم بطلتوا هاد الصنايع .قالها شفتيها هي لي وجها صحيح تقعد كلمة بكلمة معايا نهدر معاها هدرة ترجعلي عشرة حتى نضربها باه يبرد قلبها  .قاتلوا  انا مفهمتش عليك ياك من بكري تعرفها هكدا علاه دورك حاير فيها كشغل متعرفش عقليتها . قالها لا بصح هاد المرة زادت فيها بزاف تقولي متربية خير من طاسيلتك . والله  بقا غير ندير فيها وندير فيها انا نسمع فيه نقول وش  داني نشرك فمي حتى نعاشي حاصلة معاه دوك وش نسيه في هديك الهدرة  . وصلت الستة ونص ومزال نص ساعة على اذان المغرب. جات عجوزتي طبطت في الباب قاتلي اريج افتحي الباب مبقاش بزاف على الفطور . سمعتوا قالها خليها خليها تعتب الباب كسرها .ولات راحت شوي وسمعت الاذان تاع المغرب .  هدا معول صح يخليني بلا فطور اففف راح نموت بالشر  سمعت صوت مشي عرفتها مشيتو طبطب في الباب قالي هيا انتي مش راح تفطري . قتلوا لا شبعانة . قالي اريج افتحي . قتلوا لا منفتحش روح افطر على روحك . سمعتو يستغفر قالي اريج هيا اخرجي راني موسع بالي معاك متخلنيش  نعيط مغرب مغرب هيا اخرجي . روحت نفتح تجيني في كف دورك خير على الأقل نفطر راح نموت بالجوع . غير فتحت مشا وخلاني . دوك وين رتاح قلبي صاي باين نسا لحكاية .قعدت في الطابلة على جنبو مقابلة دنيا وعجوزتي مقابلاتوا . غير شافتني دنيا حكمها الضحك راح تتطرشق  وجابتلي معاها الضحك وتغمز فيا عليه زعما وتقلد فيه بوجها يا ربي مقدرتش ، غير وقف راح يتكيف بدينا نضحكو مقدرناش نحبسوا وعجوزتي تقولها اسكتوا يسمعكم تشوفوا وش يدير فيكم  حتى رجع  باه سكتنا . كملنا لفطور وهو مشافش فيا خلاص هزيت انا ودنيا الطابلة وغسلنا لماعن وهو من خرج يصلي العشا والتراويح ما رجع حتى 12 تاع الليل غير سمعتوا فتح الباب خرجت عندو فات عليا وخلاني بلا مايهدر معايا . عرفتوا مزال زعفان دخل للشمبرة دخلت وراه لقيتوا راح يرقد غير شافني دخلت  قالي اخرجي متقابلينيش .قتلوا علاه .قالي منبقاش نعاود في الهدرة اخرجي درڨي وجهك عليا . قوست حواجبي قتلوا وين راح نرقد انا .قالي وش هدرت يالله طير عليا من هنا .خرجت وخبطت الباب سمعوا يعيط كسريه خير نوض ليك نكسرك . دخلت عند دنيا غير شافتني ضحكت قاتلي متقوليليش سحتك .قتلها ايه سحتني راح نبات عندك . ما رقدنا ماوالوا جبناها تفراج وحكايات حتى للسحور ، وجدناه ودخلت زعما باه نوضوا لقيتوا ناض ديجا ويتخنزر فيا خرجت وخليتوا مش ناقصة عياطوا . تسحرنا وهو هاز شنايفوا عليا حتى كي يحتاج حاجة يقول لدنيا وانا ميهدرش معايا قلت بالناقص منو حتى انا تعبانة . كملنا رجعت مع دنيا للشمبرة هي رقدت وانا بقيت نتقلب والفت بفراشي و والفت بيه هو  .طلع الصباح باه رقدت فطت   مع ظهر خرجت مالقيت حتى واحد غير دنيا تتفرج في الصالة .قتلها وين راح آدم .قاتلي راح يخدم وماما راحت عند خالتي .قعدت معاها قاتلي آدم صباح دار حالة بالعياط  مسمعتيهش  .قتلها  لا مسمعتوش علاه .قاتلي عليك باينة قال بلي ماراهيش لاتية بيا ومش تاع مسؤولية ومهملتني وموجدتليش حوايجي وقريب راح عليا الحال وهي منوضتنيش ومعلابالهاش بيا . قتلها يا ربي سيدي خوك راح يهبلني معاه ياك لبارح هو لي سحتني وقالي متورنيش وجهك وش راح نديرلوا انا  حرت معاه . قاتلي تفاهموا بالعقل مش هكدا المفاهمة انتم من تقابلوا بعضاكم وانتم تتقابضوا . جا  لعشية من الخدمة عولت نهدر معاه كشما يروحلوا الزعاف بصح غير شافني قلب عليا وجهو .قلت معليش انا نبادر ونهدر معاه كشغل ما صرا والوا . في الليل كي فطرنا  وكملنا وهو كان رايح يصلي قتلوا آدم راني سخفانة على قلب اللوز اشريلي معاك. سكت ما قالي لا ايه لالا خرج ديراكت . كي رجع من الصلاة جاب في يدو قلب اللوز بصح معطاليش ليا مدها لدنيا . ودخل للشمبرة . انا تاع الصح بدا يقلقني أصلا انا اكثر حاجة تقلقني هيا واحد يتجاهلني ويستفزني كي يعاملني بالبارد . لغدوة نفس الشي  غير متجاهلني ما يهدر معايا وما يقيمني ملڨري كنت نحاول نهدر معاه عادي . في الليل  كنت قاعدة في الصالة مع دنيا كل عليا قالي وجدي روحك نروحوا للدار . قتلوا راح الحال خلي غدوة وصاي.  تخنزر فيا قالي وش هدرت نوضي يالله .وجدت روحي وسلمت على عجوزتي ودنيا  . انا بقيت نهدر مع دنيا في الكلوار تاع الخرجة سمعتوا يهدر مع عجوزتي قاتلوا آدم بالعقل على الطفلة راني علابالي وش في راسك . قالها مدام علابالك وش في راسي متقوليليش بالعقل .قاتلوا انت حاب تبدلها في شهر ولا في شهرين خلي الطفلة تعيش عمرها ، لكان حرقت خلي تحرق لكان معرفتش تطيب مع الوقت تتعلم لبنات راهم مايجوش بالضرب والوعارة راهم يجوا بالسياسة والكلمة لحلوة و الهدرة الطيبة ولوكان تبقى معاها هكدا بهاد العقلية راح تولي تخافك وادا خافاتك راح تكرهك . قالها يما انا علابالي وش راني ندير منيش حاب نرخفلها خاطر كون نرخفلها راح دير كيما قبل انا نعرفها ونعرف كيفاش تخمم خلي نتصرف معاها كيما حاب حتى تتريڨل من بعد ساهل الحال .قاتلوا وش راح نقولك اولدي ربي  يسهل المهم  جامي تنسى بلي هيا باقية صغيرة وصحتها على ڨدها . قالها ان شاء الله يما هيا غدوة راني نعدي في العصر تحتاجي حاجة عيطيلي واغلقوا البيبان مليح ودنيا ترقد معاك . قاتلوا ايه علابالي روحوا برك ربي يسهللكم ان شاء الله .