حب في الثانوية

chapitre 84 تعديل

غير كيما فقت لقيت روحي في العيادة تاع الطبيبة . بقيت نتفكر كيفاش حتى جيت هنا ، غير تفكرت جاني وحد الشعور اول مرة نحس بيه وهو شعور بالخدلان انك ثوثق في واحد ومستعد انك تسلملوا نفسك وانت مطمن مثلا توقف معاه على حافة جبل وانا مطمن بلي عمرو لا راح يدفع من على هديك الحافة بصح هو خدعك ودفعك . هكدا حسيت آدم دارلي خدعني . حطيت يدي على كرشي نفس الوجاعة لي نفيق عليها مرتين كي نفقد ولادي وهادي المرة الثالثة طاحت دموع من عيني بصح مسحتهم منيش راح نبكي راح ندير لي كان لازم يندار .. دخلت الطبيبة قاتلي الحمد الله على سلامتك بنتي . مرجعتلهاش قدمت بقات تفحص فيا قاتلي كلش مريڨل . خزرت معاها قتلها ماما هنا . قاتلي ايه دوك نقوللها تدخل عندك .خرجت الطبيبة شوي ودخلت ماما غير شفتها قعدت بجنبي قعدت تحضنتها و قتلها وانا نبكي خدعني يا ماما صدقتوا وخدعني دوخني وجابني لهنا وقتلولي ولدي . قاتلي شششش مخدعكش في مصلحتك اريج كون زدتي شهر بهااد الحمل كنتي راح تموتي بعيد الشر ، هو جا حكالي وش قاتلوا الطبيبة آخر مرة وانا وباباك علابالنا ووفقنا خاطر حياتك اهم من كلشي . ضحكت قتلها ظهرتوا كل علابالكم غير انا وكل تعرفوا مصلحتي خير مني معليش معليش ، رجعت رقدت في بلاصتي وانا نخمم قتلها هو وينوا . قاتلي كان هنا حتى كملت العملية من بعد خرج ، يحسن عونوا مسكين .قتلها مسكين ايه مسكين تقدري تخرجي خاطر راح نرقد وراكي ديرونجي فيا . تنهدت قاتلي اريج بديتي بفاعيلك ديجا . قتلها وش من فعايل راكي صح مديرونجيتني شوفي قاعدة معايا فوق السرير منقدرش نرقد براحتي ، ديجا كون تروحي للدار خير مكانش فايدة من قعادك معايا هنا. قاتلي اللله يهديك برك ابنتي . قتلها ان شاء الله ربي يهديني . خرجت بقيت نخمم كيما خدعني راح يندم ونخليه يحس وش راني حاسة . سمعت الباب تفتح لقيتوا هو لي دخل قدم عندي باسني على راسي قالي حمد الله على سلامتك ريجا قتلوا الله يسلمك . خزر معايا حاير علابالي كان يحساب راح نبدا نبكي ونعيط ونلوموا ونقولوا انت السبة منعرفش واش ، لا انا راح نخلفهالك راح نخدعك كيما خدعتيني وراح نخليك تحس وش راني حاسة اصبر برك . قعد بجنبي قالي وش راكي حاسة . قتلوا ماراني حاسة بوالوا شوي وجاع في كرشي بصح نورمال . هزلي راسي وحطوا على حجروا بقا يمسح على شعري قالي ريجا ياك علابالك بلي انا درت هاد الشي فوق قلبي بسيف عليا حياتك كانت في خطر قادر تموتي فاي لحظة وانتي محبيتش تطيحيه . قصيت عليه الكلام قتلوا علابالي ايه انت تعرف مصلحتي انا أصلا راني نسيت الحكاية . باسني على شعري ، حسيت بالدموع في عينيا لا يا ربي منيش حابة نبكي بقيت نرمش بعينيا باه ميهبطوش الدموع قالي ريجا ابكي . درتلوا براسي لا قالي ابكي فرغي قلبك متحمليهش فوق طاقتوا علابالك حتى انا قبيل بكيت ايه بكيت خاطر انا ثاني كنت متمني ربي يرزقنا بولاد بصح انتي عندي اهم من الدنيا كاملة . رجعت نبكي بالشهقة حط يدو على راسي وبقا يقرا عليا في القرآن حتى رقدت.
فات نهار كامل ، وصل وقت لي نخرج فيه قتلوا راح نروح نقعد عند ماما . قالي كيما تحبي بصح ثلاثة ايام ونجي نروحك قتلوا ايه وانا في قلبي نقول ادا رجعت معاك راني كلبة .
غير وصلت للدار دخلت للشمبرة تاعي قفلت الباب وعيطت لشروق قتلها الوا شروق راني محتاجتك في حاجة ياك باباك كان محامي وخرج روترات ادا تقدري تقوليلوا يسقسيلي على محامية شاطرة نقدر نعول عليها . قاتلي ايه نقولوا نورمال بصح في واش تحتاجيها . قتلها حاجة متخصكش شروق ادا راح تبداي تسقسي راح نشوف جيهة اخرى بلا ما نتعبك معايا قاتلي لا علاه دوك نشوفلك راني سقسيت برك ادا مش حابة تقولي نورمال . قتلها مليح مدابيك لعشية ترجعيلي لخبر ادا قدرتي وكثر خيرك . قاتلي بلا مزية راكي اختي بصح ان شاء الله ماتكونيش غالطة قتلها لا منيش غالطة بلا ما نوصيك تقعد بيناتنا . قاتلي ايه كوني متهنية . لعشية عيطتلي عطاتني اسم المحامية و بلاصة بيرو تاعها .
غدوة الصباح نضت ديراكت وجدت روحي وخرجت قلت لماما راني رايحة نقرى وانا ديراكت رحت عند. المحامية حكيت معها قتلها حابة الطلاق في اقرب وقت ارفعيلي الخلع نحبو يوصل عندو في اقرب وقت قاتلي لازم يكون عندك سبب باه نقدر ندير دعوة تاع خلع قتلها ربي يسهل حطي اي سبب المهم في اقرب نحب توصلوا الدعوة قاتلي كوني متهنية ملڨري انا كون تدي رايي خلي هو يطلقك خير باه تدي حقك كامل . قتلها انا مهمنيش حقي المهم حابة نحرقلوا قلبوا كيما حرقلي قلبي في يدك نهارين نسحق نسمع لخبر واطلبي لي تحبي . قاتلي نهارين يوصل خبر يفرحك راح ندير خدمتي قتلها مرسي . خرجت من عندها صونا التلفون تاعي لقيتوا هو هزيت عليه قتلوا صباح الخير قالي صباح النور كيفاه تخرجي بلا ما تقوليلي ريجا قتلوا آدم رجعنا لنفس لحكاية ياك رحت نقرى برك .قالي ماقتلكش متروحيش تقراي بصح راكي مزلتي مريضة اصبري على الأقل تفوت سمانة من بعد ارجعي اقراي. قتلوا آدم راني لاباس عليا،ضحكت أصلا والفت كل ثلاث شهر ندير اجهاض راح ندخل موسوعة ڨينيتس هههه . قالي اريج كوبي من بعد نعاود نعيطلك صحا هيا باي تهلاي . وكوبا عليا ايه كوبي معليش طلعت في تكسي وصلت للدار تغديت مع ماما وهي غير تشوف معايا قاتلي ريجا السكتة تاعك هادي متفرحش وش راكي تخططي . قتلها ما راني نخطط لوالوا راني حابة نريح برك هدا ما كان . قاتلي ايه . دخلت للشمبرة لبست بيجامة. راح نرقد لقيتوا عيطلي كام المرة لولة محبيتش نهز عليه من بعد هزيت قالي عام باه تهزي قتلوا كنت راح نرقد قالي وحلاتلك الرقدة بلا بيا انا من لي رحتي وانا مقدرتش نرقد قتلوا كيما تعرف مريضة ولازم نرقد . سكت من بعد قالي بطة غير قولي وش راكي تخططي السكتة تاعك هادي وراها حاجة . ضحكت قتلوا وش راح نخطط وشبيكم الكل تسقسيو في نفس السؤال . قالي شفتي تسما مش غير انا لي موسوس منك راني نعرفك ديجا نقولك غدوة نجي نروحك خير اني لازم تبقاي قدام عيني باه نطمن قتلوا علاه مزلت حابة نقعد عند ماما قالي توحشتك ريجا قتلوا صاي نزيد غدوة برك من بعد نروح قالي خلاص تفاهمنا قتلوا اوكي هيا انا راح نرقد قالي ابعثيلي بوسة نصبر بيها روحي ديجا وشبيك وليتي ناشفة معايا هكدا موالفة تقوليلي نحبك ونعشق فيك . قتلوا تعبانة آدم وحابة نرقد غدوة نقلك وش تحب . سكت شوي من بعد قالي صاي هيا غدوة ان شاء الله . كوبيت و بقيت نخمم من بعد عيطت للمحامية قتلها وقتاه توصل الدعوة قاتلي غدوة الصباح توصلوا صاي راني بعثثها بصح مش راح تسقسي وش حطيت فيها قتلها ما يهمنيش وش حطيتي فيها المهم عندي يطلقني قاتلي من الناحية هادي تهناي بعد الدعوة هادي يطلقك ديراكت قتلها ان شاء الله .
غدوة الصباح ماما راحت تقضي من السوق وبابا خرج خويا يخدم بقيت غير انا في الدار ملڨري منقراش بصح نضت بكري أصلا ليل كامل وانا نايضة ، بقيت نوجد في الغدا ونفرز في الدار سمعت التلفون تاعي يصوني لقيتوا آدم يديا عادو يرجفوا علابالي تكون وصلاتو الدعوة من المحكمة بلي رفعت عليه الخلع . بقا التلفون غير يصوني بصح محبيتش نهز ، شوي وسمعت باب يصوني فتحت الباب كنت نحساب فيها ماما حتى لقيتوا هو وجهو احمر دم تخلعت منو جيت راح نقول الباب دزوا ودخل حكمني من شعري قالي تلعبي ورايا يا #### انا ديريلي الخلع يا ### . قتلوا نحي يدك عليا متزيدش تمسني فهمت وايه درتلك الخلع انا مبقيتش حابة هاد الزواج وحابة نطلق . هز يدو ضربني بكف قالي تخلصيها غالية والطلاق والله ماراني مطلقك . قتلوا تطلقني بسيف عليك فهمت انا مبقيتش نقدر نعيش مع واحد خداع كيفك مبقيتش عندي ثيقة فيك لبارح دوختني وديتني للطبيبة غدوة دوخني وتديني للرجال مبقاش فيك الامان ليخدع مرة يخدع الف مرة . غير كملت هدرتي طاح عليا بالكفوف قالي تشوفي فيا ديوث يا الكلبة انا لي تزوجت وعيشتك كيف الاميرة عندي تقولي عليا هكدا يا الرخيسة انا لي طحان منيش راجل لي كنت نساعف فيك ونطول في بالي معاك بصح والله نربيك يا الساقطة انا وحدة كيفك ترفع عليا قضية تاع خلع .وانا قريب ندوخ من الكفوف لي كليتهم كنت طايحة في الارض وهو حاكمني من شعري منيش نسمع فيه أصلا وش راهو يقول نشوف غير في ماما كي دخلت تجري تبعد فيه عليا بسيف باه بعداتوا وقفت من الارض وماما تسقسي فيه وش صرى قالها سقسي الكلبة تاع بنتك وش دارت شافت معايا ماما قاتلي وش درتي انطقي قتلها رفعت عليه الخلع حابة نطلق . قاتلي يا شومي يا شومي يا نندب عليك يا اريج . قالها وينو باباها نتفاهم معاه وينوا على هدرتوا دخل بابا بقا حاير وش صرى قال وش كاين هنا وش صرى علاه راكي تبكي اريج . قدم عندي بقا يشوف مع وجهي لي كان كامل احمر ودم في شواربي قالي شكون لي ضربك . قالوا آدم انت لي ضربتها خاطر بنتك مهيش متربية . قالوا بابا أعرف وش تهدر كيفاش تقول على مرتك مش متربية وش الهدرة هادي .قالوا آدم من اليوم مهيش مرتي شوف بنتك وش دارت بنتك لي راك الدافع عليها رافعة عليا قضية تاع خلع بهدلت بيا . قالوا بابا وش راك تقول اريج امبوسيبل ديرها . جبد آدم ورقة من الجيب تاع السروال ومدها لبابا بقا يقرى فيها من بعد دار عندي خزر معايا وهز يدوا ضربني كل على قوة جهدوا حكمت خدي وانا مشوكية اول مرة في حياتي بابا يهز يدو عليا جامي ضربني في حياتي قالي تفووو يا خسارة تربيتي فيك . انا بقيت جامدة في بلاصتي متوقعتش ردة فعل بابا راح تكون هكدا . قدم آدم عندي قالي كون جيتي عندي وقولتيلي بلي راكي حابة تطلقي مني كنت طلقتك بلا ما ديري هاد الشي كامل . للحظة ندمت قتلو آدم قالي اريج راكي طالق وفي اقرب وقت توصلك ورقتك مع حقك كامل .