حب في الثانوية

chapitre 74

غدوة الصباح فقت لقيتها العشرة تاع الصباح آدم مكانش ، هبطت لدار عجوزتي لقيتها دير في الميناج هيا ودنيا .حبيت نعاونهم بصح مقدرتش ، بقيت قاعدة غير في بلاصتي حتى كملوا وقعدوا . قاتلي عجوزتي راني  عرضت شوي من لافامي برك محبيتش نعرض بزاف . قتلها ايه مليح بصح متقوليليش بلي عرضتي هديك اللفعة تاع كوثر ويماها قاتلي ايه عرضتهم عيب من سلفي نعرض لوخرين وهم منعرضهمش . قتلها ربي يجيب الخير برك . ضحكت قاتلي عندك لا تضربيها برك راني نعرفك . ضحكت قتلها لا بصح ادا هي خربت فيا متلومنيش . قاتلي راه غير نهار ويفوت احمليها وفرات وش راح ديري . قتلها ايه . جيت راح نوقف وجاعة كبيرة حكمتني في كرشي . عاودت قعدت . قاتلي عجوزتي وشبيك . قتلها والله عندي نهارين مش قادرة خلاص حابة غير نتكسل وزيد شوفي رجليا داروا فيا حالة .قاتلي نورمال راه غير من الحمل برك ، انتي متتحركيش بزاف دوك يخف عليك لوجاع . فات نهار كامل  من نجي نتحرك يحكمي سطر كبير  بصح بقيت  حاملة وساكتة محبيتش نفسد عليهم فرحتهم وهم يوجدوا في الحوايج تاع الخطبة لغدوة .في الليل قبل ما يجي آدم طلعت لدار بسيف قلت خلي نطلع نستيكي روحي ، سشورت شعري درت شوي مكياج  ولبست غوب قصيرة  حمرة جاية سيري ومن بعد لارج من تحت . غير سمعتوا دخل خرجت عندوا . قتلوا جيت ليوم راك طولت . قالي ايه كانت عندي خدمة بزاف .حكمت عليه الحوايج لي في يدو . غير صاشي هكا تبان تاع كادوات محبش يعطهالي . قتلوا هات عليك . قالي خلي برك ..دخلت الصاشيات الكوزينة خاطر كان فيهم غير قضيان  . قالي وش طيبتي عشا . قتلوا مطيبتش يما عطاتني شوربة من عندها .قالي ايه معليش  . قتلوا راني وجدتلك الدوش روح دوش وارواح تتعشا . قالي درتي مليح حتى انا تعبان . دخل دوش وانا بقيت نوجد في الطابلة حتى خرج من الدوش قعدنا نتعشاو قالي  ياك وجدتوا كلش لغدوة . قتلوا ايه وجدوا كلش . قالي مليح . خزر معايا قالي اريج يما راهي عرضت لافامي وعرضت كوثر ويماها بلا ما نوصيك منحبش المشاكل . قتلوا علابالي بصح. قالي لا بصح لا والو مانحب حتى مشكلة كون نعرف بلي درتي حاجة نشويك اقعدي عاقلة راه غير نهار ويفوت   . درتلوا براسي ايه وسكتت . كملنا تعشينا هو راح قعد في الصالة وانا بقيت في الكوزينة نغسل في الماعن . عيطلي قالي بطة  جيبيلي فنجان قهوة .. طيبتلوا وهزيتها ديتهالوا حكمها عليا . قعدت مقابلاتوا  نشوف معاه وهو لابس هداك التريكو المزير على العضلات تاعو     والبونتاكور زايد فيه النص وشعرو لمشمخ من الدوش طايح  على عينيه . توحشتوا قلبي رجف عليه  الله غالب  وحمي  كامل جا  غير عليه هو كون نلقا نبقا غير نشوف معاه . فاق بيا قالي وشبيك. هبطت راسي حاشمة منو  كيفاش نقولوا توحشتك عيب كون جا أصلا عينو فيا هو لي يقربلي مش حتى نقولوا انا .  قتلوا والو . مدلي يدوا  قالي ارواحي . رحت قعدت بحداه جبدني لحضنوا قالي وشبيها البطة تاعي . قتلوا والوا غير تعبانة برك .قالي لا علابالي بيك حاجة  اخرى قولي . انا حشمت قتلوا ما بيا حتى حاجة  غير تعبانة برك.  قالي خلاص ملا روحي ترقدي . طاحلي المورال يعني هو لهاد الدرجة ما يفهمش يعني بلي راني متوحشاتوا  ولا صاي كرهني لدرجة مبقاش يحب يقربلي  . نضت من بحداه  ودخلت للشمبرة قفلت الباب ودخلت تحت الغطا نبكي  علابالي صاي راه كرهني ، لابسة ومستيكية روحي روايح ومكياج باينة على جالوا  بصح
هو مقيمنيش حتى دارهالي لبارح وزيد ليوم ومن فوق يقولي روحي ارقدي . صاي راه وصلني الميساج بلي مبقيتش نعجبوا ومبقاش يحب يقربلي . هكا شوي وسمعتوا دخل للشمبرة ، مسحت دموعي ولعبتها رقدت ، دخل في الفراش وعطاني بظهرو ورقد كشغل ما كاين حتى حاجة راقدة بحداه . بايتة ليلة كاملة وانا نبكي سيلونسيو علابالي كون يفيق بيا راني نبكي يبقا يسقسي فيا علاه راني نبكي  ... حتى اذن الفجر نضت صليت ورجعت رقدت  .
فطنت غدوة الصباح على صوت عجوزتي تنوض فيا . قاتلي اريج نوضي . فتحت عينيا  بالسيف كان راسي راح يتكسر عليا من لبكا تاع البارح وكرشي ومسلاني فيهم وجاع ميتحملش تفكرت بلي ليوم الخطبة تاع دنيا ومحمد ، بصح وينوا القلب لي راح نحضر بيه الخطبة وانا زواجي راح يتخرب . عاودت غمضت عينيا وغطيت راسي . قتلها  خليني نرقد . قاتلي نوضي راهي العشرة يا ربي ادا كفاك الوقت باه توجدي روحك . هبطوا الدموع من عينيا  قتلها  معندي علاه نوجد روحي منيش راح نحضر الخطبة . قاتلي علاه حتى متحضريش . بقيت ساكتة وداخله تحت الغطا . بقات شوي  تهدر محبيتش نرجعلها ومن بعد خرجت. وحد الساعة ونص نسمع فيها تهدر مع آدم . قاتلوا وشبيها مرتك متعاركين انت وياها . قالها لا  علاه . قاتلوا جيت  نوضها باه توجد روحها للخطبة قاتلي منحضرش ورجعت رقدت ، روح شوفها بلاك راهي مريضة . دخل قعد بجنبي في السرير قالي اريج نوضي راهي 11ونص راح الحال . بقيت ساكتة هز عليا لغطا بقيت مغمضة عينيا . مسحلي على شعري قالي ريجا هيا نوضي . قتلوا خليني منيش قادرة نوض، طفي الضو وخليني نرقد . قالي لا نوضي مكانش رقاد فوتي الخطبة ومن بعد ارجعي ارقدي . قتلوا متفهمش انت قتلك منوضش . قالي اريج متقلقنيش خير ياالله نوضي ويزي من الدلال تاعك غير ساعة ولا زوج وارجعي ارقدي . علابالي غير رايو هو لي يمشي وليت نضت دخلت دوشت بالخف . سشورت شعري درتلوا لبلاك . خرجت من الدوش لقيتوا يستنى فيا قالي هاكي . عطاني صاشي تاع الكادو لي جابها لبارح . قتلوا وشنوا هادي . قالي غوب شريتهالك باه تلبسيها ليوم.  حكمتها عليه  و دخلت للشمبرة لبستها جاتني قدقد لونها مارو كاراميل وجاية سيرطاي  من فوق على الصدر  ومن بعد ڨونفلي من تحت بالفولار طبقة فوق طبقة ودراعيها حتى هم تاع فولار ڨونفلي . ولبست صندالة طالوا تاعها صغير ودرت لاماش بومبي كيما تاع الكوريين وحطيت سيرتات على شعري وطلقتوا مع مكياج سامبل ، كملت شفت مع روحي جيت نبان كيوت خلاص امبوسيبل واحد يشوفني يصدق بلي راني متزوجة واونسانت ، سيرتوا مع لاغوب كي لبستها صغرتني اكثر . شفت الساعة لقيتها الوحدة ونص.  وهم راح يجيو على 2 . هبطت  لدار عجوزتي ورحت عند دنيا لقيتها واجدة وقاعدة تستنى سلمت عليها قتلها اسمحلي الصباح مقدرتش نوض باه نبقى معاك راكي تعرفي الحمل دار فيا حالة . قاتلي نورمال علابالي بيك مريضة بصح وش هادي الحطة كاملة جيتي باربي ربي يبارك . قتلها حتى انتي جيتي تهبلي ربي يبارك .قاتلي بصح قوليلي من جبتي لغوب هادي . قتلها جابهالي آدم . قاتلي الله الله على الحب والرومانسية شرالك غوب . ضحكت وقلت في قلبي وش من حب وهو لبارح راقد بحدايا تقول راقد مع صاحبو مخزرش فيا حتى . وصل الوقت وجاو دارنا انا بقيت قاعدة غير مع دنيا محبيتش نخرج ونقابل الناس أصلا مورالي كان زيرو . كي بقات ماما تسقسي عليا جاتني عجوزتي قاتلي اخرجي راهم كامل يسقسيو عليك . خرجت فوق قلبي ودخلت للصالة لقيتها معمرة بالنسا  سلمت عليهم كامل  .وفاملتهم لي نسلم عليها تبقى تقول الله يبارك هادي مرت آدم صغيرة و شابة . حتى قاتلي ماما ربي يبعد عليك  العين . غير كملت سلمت عليهم رجعت قعدت مع دنيا . جا الوقت باه يلبسوا الخاتم خرجت دنيا وكامل  تلموا في الصالة باه يتفرجوا ،غير انا محبيتش نخرج أصلا كلش كان سامطلي وزيد الوجاع قتلني ، جيت في السرير تاع دنيا وتكسلت نطيح في الدموع الدمعة ورا اختها . سمعتوا يسقسي عليا قالها يما وين راهي ريجا . قاتلوا والله منعرف مكانش في الصالة ،شوف في الشمبرة تاع دنيا . دخل وغلق الباب جا قعد بجنبي قالي وشبيها بنتي. قتلوا والوا قالي حاجة توجع فيك  . درتلوا براسي لا. قالي ملا علاه راكي تبكي ودبلانة هكدا .  بقيت ساكتة قالي من بعد نحكو دوركا  هيا راهم راح يلبسوا الخاتم . قتلوا روح برك انت انا راح نقعد هنا مش قادرة نوقف . قالي لا متقعديش وحدك هيا شوي برك واطلعي للدار ارقدي . مسحلي الدموع من خدي  قالي علاه هادوا الدموع كامل واحد ما يستاهل دمعة من عينك  . وقفت وقف معايا بقا يعدلي في شعري قالي الله يبارك على العميرة  تاعي لي باقية وتزيان وراح يحسدوني عليها الحباب قبل العديان  . تبسمت معاه . قالي علابالك كي شفت لاغوب قلت هادي تليق على ريجا بصح  مكنتش علابالي بلي  راح تجيك شابة هكدا وليتي تباني بنتي تاع الصح . حطني تحت جناحوا وخرجنا للصالة لقيناهم يستناو في أدم باه يدخل معاه محمد . راح آدم جاب محمد وجا هو  دخل وحنا بقينا  واقفين في الباب برك خاطر آدم محبش يدخل لداخل على جال النسا   . قعدنا نتفرجوا عليهم ، تحضني وقالي تشفاي على نهار خطبتنا . تبسمت وانا نتفكر في نهار الخطبة تاعي  قتلوا ايه كنا فرحانين كيفهم هكدا . باسني على شعري وقالي يا عمري انتيا . عدت  نبكي ،كنت مضغوطة من الشي لي صرالي وزيد مع الجو لي كان لتم مقدرتش نشد دموعي ،اصلا حاسة روحي وليت  حساسة فوق اللازم اي حاجة تبكيني .  قالي شششش علاه هادوا دموع كامل علاه ، اه قولي علاه اهدري اريج علاه راهي حالتك هكدا ؟؟ومتقوليليش ما بيا  والو . مقدرتش نشد روحي اكثر . قتلوا نبكي خاطر توحشتك آدم ، توحشت راجلي الحنين لي يحبني ويخاف عليا ، توحشت راجلي لي ميقدرش يرقد بلا مايديرني في حضنو . توحشت راجلي لي يفهمني بلا مانهدر ، علابالي بروحي غلطت وقت لي خبيت عليك بصح انت قسيت عليا بزاف بلا ماتفهم وش حسيت وقتها ولا وش راني حاسة دوركا وانت كل يوم تتصرف معايا بطريقة  من زي ، آدم راني حاسة حاجة ناقصة مني حاسة حاجة ضاعت مني منيش قادرة نلقاها قلبي راه مكوي على حاجة منعرف وش هيا ، عمرك ما راح تفهم وش راني حاسة . مسحلي دموعي قالي خلاص عمري خلاص يزي  من البكا علابالي بلي كثرتلها معاك بصح غير حبيت نعلمك متخبيش عليا هدا ماكان عمري لا نسمح فيك ولا نبدلك انتي حياتي ودنيتي ، علابالي لبارح غاضاتك مني وقت لي انتي حبيتي قربي وانا مقربتلكش . قتلوا لا مش . قاطعني قالي بلا ما تكدبي انا راني نفهمك من عينيك بصح انا لبارح عملت هكاك باه تتعلمي المرة الجاية وقت لي تكوني حابة قربي تجي تقوليلي خاطر  انا راجلك معندك علاه تحشمي مني فهمتي . درتلوا براسي ايه وحطيت راسي على صدرو . مسحلي على شعري قالي بنتي الكبيدة تاعي لي نموت عليها ، راح نبقى نحبك لآخر يوم في حياتي ، عمرك لا تشكي في هادي الشي راح نبقى نعشق فيك حتى للموت . قتلوا بعيد الشر عليك . شفت دنيا لي كانت تشطح مع محمد وهي حاشمة بعد ما لبسوا الخاتم  بقات تشاورلي . قالي دنيا راهي تعيطلك روحيلها . دخلت عندها قدمت سلمت عليها وباركتلها هي ومحمد . قاتلي وش مش راح تشطحي معايا . شطحت معاهم شوي ومن بعد رجعت لادم دخلت في حضنو باسني على خدي قالي مزلتي  تعبانة حابة ترقدي ،درتلوا براسي ايه . قالي هيا نطلعك للدار لفوق ارقدي . قتلوا خلي يروحوا ونطلع خير . قالي ايه كيما تحبي .