حب في الثانوية

chapitre 76

عند ادم لي كان راقد واريج راقدة فوق صدرو كيف عادتها ، فطن وقت لي حس حاجة سخونة قاعدة تهبط فوق صدرو وين كانت اريج حاطة راسها كان يحسابها قاعدة تبكي لاح يدو شعل الفيوزة وهو يهدر قالها اريج وشبيك راكي تبكي ، جيست ما شعل الفيوزة جا راح يشوف يلقى صدرو كامل بالدم طلعلها راسها قالها اريج من جا هاد الدم . لقاها دايخة ودم يهبط من نيفها ا وفمها ، بقا يحرك فيها باه تفيق بصح قعدت دايخة وقف من بلاصتوا يرعش من الخلعة راح يجري للدوش جاب الماء بقا يرش فيها باش تفطن بصح كانت كيف الجثة بين يديه غير النفس داخل خارج والدم لي كانت تنزف فيه من فمها ونيفها . قالها ريجا حبي افتحي عينيك وش صرالك هكدا فيقي. فات للخزانة جبد حجاب وخمار ورجع هز عليها لغطا باه يلبسها يديها للسبيطار ، غير هز الغطا جمد في بلاصتوا وهو يشوف فيها تعوم بالدم حتى السرير تحتها كامل احمر ، حكم راسوا وهو يقول ياربي وش صرى ياربي اريج أفتحي عينيك حبيبي فيقي وش صرالك  . بقا حاكمها يحرك فيها وهي والوا لا صوت لا حركة ، بعد عليها  بقا غير رايح جاي من الخلعة  معرفش وش يدير حتى فاق مع روحوا هز الحجاب لبسهولها هكداك وحطلها الخمار فوق راسها وهزها بين يديه  هبط يجري بيها في الدروج ويعيط على يماه حتى خرجت غير شافتوا هاز اريج قاتلوا يا نندب وش صرى وش بيها اريج.  قالها معلاباليش يما فطنت لقيتها تنزف كامل . كان يهدر ودموع في  عينيه كان حاس روحوا صاي راح يخسرها . قدمت عندو يماه وهي تبكي قاتلوا بالعقل برك ولدي اديها للسبيطار دوك نعيط ليماها ونلحقك قالها ايه كمل خرج حطها في الطونوبيل وركب يسوق فيتاس عين على  الطريق وعين عندها دموعوا على خدوا كان يبكي كي الطفل الصغير خاطر كان حاس بلي صاي راح تروح من بين يديه وهو مش قادر يدير حتى حاجة . كان يدعي ويقولي ربي متحرمنيش منها ياربي ، وصل في خمس دقايق للسبيطار غير وصل فرينا وهبط يجري هزها بين يديه ودخل بيها ويعيط عاونوني مرتي راح تموت حتى جاوه الطبى بالسرير حطها فوقوا ، سقساتوا الطبيبة قاتلوا وش صرالها . قالها منعرف رقدت نورمال نضت لقيتها تنزف هكدا . قاتلوا عندها مرض مزمن قالها ايه عندها تضخم في القلب . دخلوها ديراكت للبلوك جا راح يدخل قاتلوا ممنوع   قالها كيفاه ممنوع انا راح ندخل منخليهاش وحدها لازم ندخل معاها  . قاتلوا ميسيو قتلك ممنوع خليني نخدم خدمتي راك قاعد تعطل فيا هكدا مش مليح ليها ادعيلها . دخلت وخلاتوا ما فاهم والوا حاس روحوا يحلم مش مصدق لي صرى بقا يشوف مع يديه لي معمرين بدمها معقول اريج تموت وتخليه غير خمم هكدا الارض دارت بيه راح يدوخ قعد في الكرسي وحط يديه على راسوا ودموع طيح من عينيه وهو يتفكر كي بقات توصي فيه لبارح زعما قلبها كان حاسها بلي راح تصرالها حاجة. شوي وسمع صوت لبكا باقي ويقدم طلع راسوا لقاها عايلتها مع يماه ودنيا مسح وجهوا ووقف ، غير وصلوا عندوا سقساتوا يماها وهي تبكي  قاتلوا وش صرى وين راهي بنتي وش صرالها . قالها معلاباليش وش صرالها رقدت نورمال نضت لقيتها تنزف. بقاو قاعدين يستناو في الطبيبة تخرج وهم يبكيو  عليها ، آدم كان غير رايح جاي يستنى فاتت ساعة  مقدرش يصبر مفاقش حتى كيفاه لقا روحو يطبطب عليهم في البلوك ويعيط واحد يخرج يفهمني وش راه يصرى داخل راحلوا محمد يجري قالوا آدم وشبيك بالعقل رانا في سبيطار . قالوا واحد يخرج يفهمني وش راه صاري لداخل ولا يخلوني ندخل عندها . كان يهدر ويعيط حتى جاوه لاجو تاع السبيطار قالوا مسيو يزي بلا عياط راك فيسبيطار وكاين  المرضى هنا راك قاعد ديرونجي فيهم . هو راح يهدر حتى شاف الطبيبة خرجت راحلها قالها وشبيها اريج وش صرالها قاتلوا للأسف صراتلها دبحة صدرية قوية  أثرت ديراكت على حمل والرحم وهاد الشي لي خلى لي بيبي يحبس نبضهم من لبارح في الليل   ، قالها آدم لي بيبي ؟؟؟ قاتلوا ايه كانوا توام ربي يخلف عليكم ،  وهي حالتها شوي صعيبة خاطر خسرت  بزاف دم ادعولها خاطر 24 ساعة الجاية راح تكون شوي صعيبة . آدم حكم راسوا  وهبطت دمعة من عينيه مش مصدق وش راه يسمع خسر ولادوا قبل حتى يشوفهم ويجوا للدنيا  ومرتوا وحب حياتوا بين الحياة و الموت . شاف مع الطبيبة  قالها نقدر  نشوفها . قاتلوا واحد برك يقدر يدخل يشوفها . دور راسوا شاف يماها لي كانت تبكي وتحوس كيفاش تشوفها . قالها خلي تدخل يماها  . قاتلوا ايه ، شافت طبيبة مع يمات اريج قاتلنا مدام ارواحي معايا باه تدخلي تشوفها . قدمت عندوا أختوا تحناضتوا تبكي على صحبتها وعشيرتها قاتلوا آدم اريج صح راح تروح وتخلينا . قالها اششش متقوليش هكدا اريج  مستحيل تروح وتخليني . قاتلوا ايه اريج مستحيل تروح وتخليك خاطر تحبك . فاتت ليلة طويلة وكئيبة عليهم كامل سيرتوا على آدم لي كان طول الليلة واقف مقابل البلوك يستنى في أي خبر عليها يفرح قلبوا ويطمنوا وهو مش مصدق بلي خسر ولادوا لي كان يستنى فيهم يجيوا للدنيا يفرح بيهم ويشوفهم قداموا .وصلت السبعة شاف الطبيبة دخلت عندها شوي وخرجت قاتلوا مسيو تقدر تدخل تشوفها ادا حبيت . قالها صح نقدر ؟؟؟ قاتلوا وي تقدر بصح خمس دقايق مطولش . قالها ايه معليش . غير دخل وشافها قلبوا وجعوا دموعوا نزلوا على خدوا قدم عندها باسها على راسها كان حاس بلي هو لي وصلها للحالة هو لي ضغط عليها حتى مقدرتش تحمل هو سبابها . بقا يشوف معها كيفاش معرينها كامل ولخيوط لاصقين في صدرها ويديها كامل مثقوبين بالسيروم والدم . رجع يبوس فيها وهو يبكي ويقولها سامحني حياتي انا لي وصلتك للحالة هادي ارجعيلي عمري نحبك . شوي وخرج فات ديراكت التوالات محبش يشوفوه وهوفي حالتوا هديك . غسل وتوضى راح للمسجد صلى ودعا ربي يشفيها . ورجع للسبيطار كمل نهار كامل وهو يستنى فيها تفيق  كل مرة تدخل عندها فرملية ولا طبيبة يبقا يسقسي فيهم يقولولوا مزال حالتها تعبانة شوي لازم تبقى في البلوك . عايلتها كامل قاعدين يستناو حتى لافامي لي سمعوا كل جاو باه يوقفوا معاهم بصح هو ماهموا حتى واحد كان يستنى غير وقتاه يطمنوه بلي فاقت وراهي لاباس . وصلت العشرة تاع الليل دخلت عندها الطبيبة شوي وخرجت قالتلهم الحمد الله على سلامتها راهي تحسنت حالتها بصح راح تبقى عندنا نهارين اخرين نزيدوا نطمنوا عليها مليح من بعد تقدر تخرجوها ، راح تكون في فترة راحة وراح نوصي ونعاود الحالة النفسية هي الاساسية لازم تكون في جو ملائم . خزرت مع آدم وقاتلوا مسيو نحتاجك في  البيرو باه نشرحلك حالتها مليح . قالها ايه . فات معاها البيرو قعدوا قاتلوا كيما تعرف مرتك من قبل طيحت بيبي و هادي ثاني مرة تزيد تطيح وللاسف هاد الشي اثرلها شوي على الرحم ولهادا انا ننصح انو ميصراش حمل حتى لمدة عامين لانو راح يكون خطر عليها سيرتوا مع مرضها المرة هادي راهي منعت من الموت على شعرة المرة الجاية بعيد الشر قادر متمنعش منها لدلك لازم تأجل حكاية الحمل المدة هادي كامل حتى تبرى ان شاء الله نتمنى تتفهم الامر . قالها ايه فهمتك  . قاتلوا مليح و نزيد نوصيك على الحالة النفسية . درلها براسوا ايه ووقف قاتلوا رانا راح نخرجوها للشمبرة نورمال تقدروا تشوفوها ...  خرج يمشي ويخمم كيفاه راح يقوليلها بلي لي بيبي ماتوا حاس المشاكل كامل طاحت عليهم ضربة وحدة . لقاهم صاي خرجوها للشمبرة نورمال بصح مزالوا ملصقينلها لاباري ولخيوط وسيروم وهي مزالت مافقتش