حب في الثانوية

chapitre 44

بقينا قاعدين في الصالة نحكيو ، قالي وقتاه تحبي نديرو العرس قتلوا كيما تحب انت ، قالي كون جات ليا انا نديرو غدوة ، ضحكت قالي وش قولك نديروه الشهر الجاي . قتلوا بزاف منقدرش نوجد روحي وشورتي منا لشهر  الجاي ، قالي مكلاه تجيبي حوايج لدار على خاطر راهي واجدة من كلش . قتلوا بصح بزاف منا لشهر الجاي . قالي لازم نديروه الشهر الجاي على خاطر راح نفتح l'usine الشهر لي بعدو وراح نكون مشغول بزاف . قتلوا ملا خلاص الشهر الجاي وانت زيد سقسي بابا ادا قبل راني قابلة . قالي راني هدرت معاه صاي وقالي ربي يسهل ، انتي خيري la date برك وقوليلي . قتلوا خيرها انت برك . قالي اواه لازم تخيريها انتي . قتلوا علاه لازم نخيرها انا  . ضحك وقالي معلابالكش علاه لازم تخيريها انتي  . قتلوا لا معلاباليش . قعد يضحك قالي تحكي صح قتلوا والله نحكي صح . تنهد وقالي دوك تفهمك يماك علاه ، المهم انتي قوليلي وقتاه تروحي تسجلي في الجامعة قتلوا السمانة جاية .  كملنا حكينا شوي وصلت الخمسة قالي هداك هو باه نروحو قتلوا يا زيد اقعد  شوي . قالي اواه تفاهمنا نروحو على الخمسة . وقف وقفت معاه تحضني دخلت في صدرو ، باسني على خدي وقالي هيا بطة انا نخليك من بعد نعيطلك قتلوا ايه . بستو على خدو قتلوا نحبك ، قالي وانا نموت عليك . سمعت التلفون تاعو يصوني ، قالي هيا راني خارج تهلاي في روحك ، بقيت محضناتو  لاصقة فيه وحاكمة في الفاست تاعو . عاود التلفون تاعو صونا .  ضحك وقالي يابنتي اطلقيني خليني خارج الناس تستنى فيا لبرة . هزيتلوا كتفي تاع ميهمنيش وبقيت متحضناتوا . بقا التلفون تاعو يصوني ، باسني على رقبتي وقالي هيا حبيبي خليني نخرج الناس تستنى فيا عيب . وليت نبكي مكبشة فيه ، قتلوا متروحش زيد اقعد معايا شوي . حكملي وجهي وقالي ياعمري على البطة تاعي علاه تبكي علاه ، حتى انا حاب نزيد نقعد معاك بصح عيب الناس تستنى فيا لبرة ، نوعدك  غدوة نعيطلك نتلاقاو ونجيبوها نهار كامل مع بعضانا . خزرت معاه وقتلوا صح . قالي ايه هيا درك امسحي دموعك خليني نشوف ضحكتك . تبسمت معاه  باسني على فمي وقالي ياعمري على الزينة تاعي ، خرج وانا خرجت وراه لقيت النسا كل يوجدو في رواحهم
. جاتني عجوزتي (يماه )قاتلي سمحتي فينا على خاطر آدم من لي رحتي معاه مرجعتيش . هبطت راسي حاشمة . عادت تضحك وطلعتلي راسي  قاتلي معندك علاه تحشمي ، عندك الحق الضربة الكل في راجلك ، الباقي بالبحر عليهم . وليت نضحك ، قاتلي انا عندي المهم نشوف وليدي فرحان هديك هيا فرحتي . سلمت عليها وعطيتها كادو . راحو وقعدو غير لافامي تاعي مڨصرين مع بعضانا  درنا لعشا . كنت قاعدة مع البنات تاع فاميلتي حتى نطقت بنت خالتي هادي لي تكرهني . قاتلي نصارحك يا اريج والله آدم خير منك ، واحد كيما هو  تليقلوا وحدة ملكة جمال وقليلة عليه . انا وجهي تبدل  بقيت حايرة فيها كيفاه قالتهالي في وجهي . نطقتلها بنت عمي قتلها ولاه اريج وش خصها زين وعين وقراية وتربية . قالتلها حاشة مخصها والوا ملڨري سمينة شوي  ،رجال  راهم يكرهو لمرا السمينة بصح  ، انا راني نقول في راي برك.  وقفت قتلها  حبيبتي  رايك احكميه عندك  و آدم  راه يحبني ويموت عليا  ، قاتلي  متفهمنيش بالغالط  ،  راني غير نڨصر  برك ربي يهنيكم حبيبتي . ضحكت وقتلها  حما قابل وعرشو هابل ههههه..رحت لشمبرة تاعي وخليتهم.  انا دخلت لشمبرة تاعي  وانا دموعي هبطوا غزلتني وجه الهم، بقيت نخزر مع روحي في لمراية، ونثبت مع جسمي  زعما صح وليت سمينة بزاف، يجي نهار  ويكره مني .
سمعت التلفون تاعي يصوني شفت  لقيتو آدم ،  هزيت عليه بقينا نهدرو تفاهمنا نتلاقاو غدوة ، قالي غدوة على 11نجي نديك . قتلوا اوكي .
غدوة الصباح وجدت روحي لبست سروال وليكات ودرت شوي مكياج . قعدت نستنى فيه يجي . هكا شوي عيطلي قالي راني نستنى بحدا الباب . خرجت لقيت الطموبيل تاعو  مڨاريا ركبت سلمت عليه .  ديمارينا  جبد لانجات  رمهالي قالي امسحي وجهك ، قتلوا علاه نمسح ، قالي امسحي عليا هاد الخماج لي راه في وجهك . قتلوا علاه نمسح راني منيش مكثرة . قالي راني نهدر هيا ازربي امسحي . قتلوا علاه بصح مانيش مكثرة بزاف . قالي اريج منبقاش نعاود في الهدرة قتلك امسحي . سكتت بقيت نمسح في وجهي من المكياج  حتى نحيتو كامل . خزر معايا قالي آخر مرة نشوف بالمكياج لبرة ، وسروال ممنوع . قتلوا والسروال علاه راني لابسة ليكات طويلة . قالي ما تناقشينيش قتلك السروال ممنوع آخر مرةنشوفك بيه مفهوم  . سكتت قالي مفهوم قتلوا ايه . وصلنا الريستورو مقابلة لبحر تهبل دخلنا قعدنا . قالي البطة تاعي وش تحب تتغدا . قتلوا شبعانة ، قالي اواه وش لي شبعانة هادي ،لازم تاكلي . عيط للسارفور راح جابلنا البيتزا وسلاطة ومونادا . انا بقيت نشوف معها سخفتني بصح ما نقدرش ناكلها على خاطر صاي قررت ندير الرجيم لازم نقص الميزان هدرة تاع بنت خالتي قعدت في مخي ممكن صح مع الوقت يكره مني . قسملي البيتزا وعطالي طرف قالي هاكي كولي . قتلوا لا مانيش حابة . قالي اصبري ملا نقولوا يجيبلك  قاطو تاع الشيكولا لي تحبيها . راح سارفور جابلنا . انا مقدرتش نقاوم القاطو تاع الشيكولا ،ديجا هي نقطة ضعفي . بديت ناكل فيها كل ما ناكل لقمة نقول دوك نحبس ،حتى  وصلت لنص حبست قالي كملي كولي . قتلوا لالا صاي شبعت . حكملي يدي قالي علاه مراكيش حابة تاكلي . قتلوا الصراحة راني بديت في الرجيم . قالي علاه . قتلوا شوف كيفاش وليت سمينة بزاف . قالي لالا مراكيش سمينة  . قتلوا لالا شوف كيفاش سمينة حتى بنت خالتي قاتلي راكي سمينة بزاف ورجالة ميحبوش وحدة سمينة .ضحك وقالي والله . قتلوا ايه قاتلي رجالة يكرهو لمرا السمينة وقاتلي بلي انت خير مني تليقلك وحدة ملكة جمال مش وحدة سمينة كيفي . عاد يضحك بالصوت .وليت نبكي قتلوا انا نحكي معاك سيريو وانت تضحك . قالي وانتي صدقتي هدرتها . قتلوا ايه راهي عندها الحق . هز يدي وباسها قالي ياعمري انتيا ياك علابالك بلي أنا نحبك ، هزيت راسي تاع ايه. قالي ملا متكسري راسك بحتى واحد أنا نحبك هكدا  سمينة المرة الجاية كي يقولك واحد راكي سمينة ، قوليلوا آدم يحبني هكدا بطة . تبسمت معاه. قالي هيا حبي كملي كولي القاطو تاعك و حكاية الرجيم هادي تنسايها .