حب في الثانوية

chapitre 28

كملت نهاري روحت لدار بدلت قشي وقولت نقول لماما على الرحلة تاع غدوة رحتلها الكوزينة لقيتها طيب في العشاء قتلها ماما علابالك غدوة في الليسي دايرين رحلة وصحباتي كل رايحين قتلي غير ما كلاه تقوليلي نروح قتلها بصح ماما صحاباتي الكل رايحين وزيد ماناش رايحين وحدنا حتى المعلمين معانا قاتلي انساي مكانش روحا قتلها بصح علاه حتى مانروحش رايحين ناس الكل غير انا . قاتلي راني قتلك مكانش روحا صاي روحي خليني نطيب .روحت وخليتها قلت منبعد كي يجي محمد هو لي يقنعها تخليني نروح .
جاء محمد في الليل رحتلوا لشمبرة قتلوا خويا غدوة في الليسي دايرين رحلة من الصباح حتا الليل وحابة نروح ، قالي اواه ياسر من الصباح حتا الليل قتلوا تعيش خويا خليني نروح وزيد ماناش رايحين وحدنا حتى المعلمين معانا قالي وشكون هدو المعلمين لي رايحين قتلوا زوج معلاباليش شكون وشهرة وادم قالي لا متروحيش خير وانا في الويكاند نديك تحوسي صحا قتلوا يا وعلاه انا حابة نحوس مع صحاباتي . سكت وبقا يخمم شوي ومن بعد قالي روحي بصح تلفون يقعد في يدك كي نعيطلك تهزي ديراكت . قتلوا مرسي خويا لعزيز وبستو على خدو . قتلوا بصح ماما مقبلتش قالي انا ندبر راسي معاها . قالي على قداه تروحي الصباح قتلوا معلاباليش . قالي دوك نعيط لآدم نسقسيه خير . روحت لشمبرة تاعي فرحانة وجدت قشي لي راح نلبسو غدوة ، خزرت مع روحي في لمراية بقيت نمس في شعري وتفكرت كي قالي شعرك فتنة تسما يعجبو شعري .وليت نضحك وحدي كي المهبولة اي حاجة منو تفرحني .
جاني خويا قالي اريج لازم على السبعة تكوني في الليسي باه تروحي، قتلواايه معليش .
غدوة الصباح نضت بكري لبست غوب تاع les fleurs لونها غوز قصيرة فاية الركبة شوي مع فاست تاع الدجين زرقة وصبات أبيض ، وشعري حكمت نص وطلقت نص ، درت شوي غسيل وبريون لافر غوز . جاني خويا قالي ادا كملتي وجدتي روحك هيا نهبطك في طريقي . قبل ما نخرج حكمتني ماما توصي فيا وتعاود . المهم خرجنا وصلنا الليسي لقيت ديجا وحايد جاو دخلنا لقينا آدم واقف قدام الباب . قدم سلم على خويا وخزر معايا وتبسملي طيرلي عقلي، بقا يحكي مع خويا وانا واقفة معاهم وساكتة ، الغاشى بدا يجي قالي خويا هيا اريج انا نروح وانتي تهلاي في روحك وكي نعيطلك تهزي عليا ok و عندك تنساي متشربيش الدوا قتلوا ايه تحضني وباسني على خدي . قال لآدم عينيك عليها آدم كيما تعرف قالوا متكسرش راسك صاحبي . راح محمد وبقينا انا وادم واقفين . هو جبد قارو يتكيف فيه وانا جبدت التلفون تاعي نكونيكتي مع شروق وجلال . حتى وصلت شروق جات سلمت عليا وقاتلوا صباح الخير قالها صباح النور جا البيس لي راح نروحو فيه . ركبنا في البيس ،هو ركب من قدام مع المعلمين لي جاو وشهرة ديمارا بينا البيس حنا نتحكاو . هكا شوي ورجع قعد معانا وقلنا مي انتم مكمش تاع امبيونس هيا زهيو الحالة شوي . قالوا الطفل وش راح نديرو . سكت شوي ومن بعد قالنا شكون عندو كابل تاع التلفون قتلوا انا عندي قالي اعطيهولي ، عطيتهولوا ركبو في التلفون تاعو ومن بعد برونشاه مع البيس ودرلنا الغنا كي سمعو الغنا الكل ناضو يعيطو ويصفرو ، عادو كل يصفقو مع الغنا وناضو الدراري يشطحو ، وحنا البنات نغنيو مع الغنا بيسك الغنا الكل تاع راي مشهور . شروق قاتلي مقدرتش نحكم روحي راح نوض نشطح هكا شوي ناضت تشطح صح . آدم شافها ناضت تشطح مات بالضحك علاها بصح قالهم ممنوع التصوار . قالوا المعلم لي جا معنا آدم الرحلة تاع ثقافة قلبتهالنا عرس قالوا ياولدي خلي يزهاو على رواحهم . شهرة نشوف فيها مش عجبها الحال هي ولي معاها . هكا شوي درلنا الغناية تاع انتي سبابي عيشتني في الدوت تاع شاب عقيل . شروق ناضت تعيط قاتلي يا اريج هادي الغناية لي تحبيها . دار خزر معايا ومن بعد قوا في الصوت . رجعنا نغنيو ونصفقو وانا تالمو نحب الغناية ملڨري قديمة قعدت نغني فيها من قلبي وهو يخزر معايا ويتبسم ياربي راني نعشق فيه . فضت الغناية قالي جلال و هادي غنية يحبوها الناس ، قالي استناي تشوفي انا وش نحب راح عند ادم وبرنشا التلفون تاعو وحطلنا غناية تاع قصبة حنا سمعناها متنا بالضحك وزيد ناض يشطح علاها ههههه . ناضت معاه شروق والبنات عاندو علاها وناضو يشطحو . المهم جبنا الطريق كامل امبيونس وضحك حتى وصلنا .
كي هبطنا لقيناها بلاصة كيما الجبل بصح تحتها البحر تهبل كاملة خضرة . قالنا آدم ليوم غداكم عليا حل لامال تاع البيس وجبد الشواية ولحم ودوزان كامل تاع الشوا .
حنا لبنات بقينا مع التصوار ولحكيات و الدراري مع الشواية وشهرة نشوف فيها من بعيد تخزر معايا كون تلقى تقتلني بصح من صباح محكاتش معايا باينة هو لي وصاها .