حب في الثانوية

chapitre 87

فاتوا خمس شهر كاملين بعد ما وصلت ورقة تاع الطلاق من المحكمة بلي طلقني قانونيا ، انا كيف عادتي مفقتش لقيت روحي في السبيطار قعدت سمانة من بعد هزني خويا وسافرنا لبلاصة اول مرة نشوفهم في حياتي صح مخرجناش برة لبلاد بصح مخلاش ولاية مدانيش ليها قالي المهم تنساي وترجعي كيف قبل . خاطر انا من بعدوا حاجة ما بقات  تفرحني وحاجة ما تحلالي مهما حاولت ننساه نلقى روحي نخمم فيه حتى نتفكر كي تلاقيتوا آخر مرة وقالي انسايني ومبقيتيش تذلي روحك وتحاوليني هاد الكلام محال ننساه خاطر حسيت روحي رخيسة وانا نحاول فيه قريب نبوسلوا رجلو باه يرجعني . في الليل خرج خويا برة وانا بقيت وحدي في الدار لي كريناها قاعدة نخمم حسيت روحي توحشت  ماما وبابا خمس شهر ما شفتهمش بزاف . سمعت التلفون تاع خويا يصوني في الشمبرة تاعوا  المرة لولة محبيتش نهز من بعد خفت لتكون حاجة ايرجوا. دخلت للشمبرة تاعو هزيت التلفون لقيتها دنيا لي راهي تعيط حرقت التلفون بليزابال . هزيت عليها وبقيت ساكتة منيش حابة نهدر معاها خاطر حتى  هي باعتني  و تخلات عليا وجرحتني بكلامها نسمع فيها تبكي قالت محمد علاه مراكش تهز عليا وش درتلك ياك ما درتلك والوا  ولا راك حاب تبطل الخطبة علاجال آدم كي طلق اريج ياك هيا لي طلبت الطلاق هي حبت ديجا حنا وش دخلنا فيهم بيناتهم. ولا هي لي قاتلك تبطل عليا مكرة في أدم . كوبيت ديراكت مقدرتش نزيد نسمعها وهي تتهم فيا  دخل خويا قتلوا التلفون تاعك كان يصوني وانا هزيت. قالي شكون لي عيط ماما ؟؟؟ قتلوا  لا دنيا قالي علاه هزيتي عليها . قتلوا كي بقات تعيط خفت تكون حاجة ايرجوا . قالي هدرتي معاها قتلوا لا غير هزيت بقات تهدر على اساس انت لي هزيت . سكت قتلوا محمد صح راك حاب تبطل عليها .قالي ايه غير نرجعوا نبطل قتلوا علاه بصح ؟؟ قالي نسيتي لي صرا نسيتي بلي خوها طلقك . قتلوا ومن بعد ادا خوها طلقني تروح انت تبطل  هادي حاجة خلاف  ومتنساش بلي أنا لي غلطت وانا لي حبيت نطلق وهو طلقني أصلا انا نسيت لحكاية ونسيتوا ونسيت كلشي يخصوا قدم عندي مسحلي دموعي قالي وهادو دموع علاه كي راكي تقولي نسيت .قتلوا غير غاضني العام لي ضيعتوا من حياتي في الباطل . قالي نتمنا صح تكوني نستيه خاطر هو ما يستاهلكش . قتلوا ايه نسيتوا صاي ، بصح انت مستحيل نخليك تخرب علاقتك بدنيا خاطر راكم زوج تحبوا بعضاكم مكان لاه تفسدوا حياتكم في جرتنا . قالي ان شاء الله . قتلوا محمد انا توحشت ماما  وبابا وحابة نرجع . قالي خلاص نكملوا سمانة ونرجعوا غدوة نديك ديري شوبينغ واشري لي حبيتي . وصح غير فاتت سمانة رجعنا للدار استقبلوني ماما وبابا بالبوس والتحضان قريب كلاوني محطتهمش توحشوني هكدا . ماما تبكي قاتلي هكا يا اريج خمس شهر متهدريش معايا ومنشوفكش ..قتلها ماما صاي راني قدامك دركا علاه لبكا . قاتلي ايه حمد الله يا ربي . قعدت معاهم شوي ودخلت للشمبرة تاعي فتحت لخزانة باه نبدل قشي قابلتني ديراكت الباطة تاع الساعة لي جابهالي في عيد ميلادي تفكرت كي قتلوا بلي ساعة تدل على الفراق وهو عاد يضحك قالي غير خرافات هزيتها ورميتها في الارض لقيتها مزال ما تكسرت خرجت للكوزينة هزيت اليد تاع المهراس ورجعت طحت عليها نكسر فيها نخرج في كامل غشي فيها ونقول انتي لي فرقتينا انتي تكسري تكسري . دخلت ماما تجري عندي قاتلي وش الصوت هدا .قتلها والوا غير كسرت الساعة كانت حابسة ما تمشيش . بقات تشوف مع الساعة من بعد قاتلي الله يريح قلبك ابنتي  . قتلها امين . هزيت الساعة لي تهرست صاي وعطيتهالها قتلها طيشيها في لابوبال . خرجت ماما وانا بدلت قشي ودخلت  في بلاصتي وجبدت التلفون تاعي لي عندو خمس شهور وهو مقفول . فتحتوا لقيت غير لي نوتيفيكاسيو تاع ليزابال ولي ميساج من عند صحاباتي ومن عند عجوزتي يسقسيو عليا ، بقيت نفركت تمنيت كون غير نلقى حتى ميساج من عندو بصح ملقيتش .  دخلت الموقع تاع الجامعة لقيتهم حطو المعدلات ونجحت بالكريدي  و بقاولي مواد لازم نعاودهم العام الجاي زاد طاحلي المورال اكثر خسرت عام من حياتي في الباطل ما ربحت والوا لا قرايتي لي موالفة كل عام نجي فيها لولة لا صحتي لا زواجي . ستغفرت ربي ودخلت الفايسبوك بقيت طالعة هابطة نعدي في الوقت حتى خرجتلي بلي فتحو اكادمي تقراي فيها ثلاث شهر وتدي ديبلوم تاع فارمسي . بقيت نخمم علاه منديرش فيها حتى الدخلة تاع الجامعة منها نكسر الوقت ومنها نتعلم حاجة جديدة قادر نخدم بيها خير من نبقا قاعدة غير في الدار ونخمم  . فرحت دخلت سقسيت قالولي كل شهر تخلصي ربع ملاين خاطر بريفي وفيها سطاج في نفس الوقت . كي قلت لبابا عليها قالي ايه ديري فيها مكانش كيما العلم غدوة نصبلك الدراهم في الكونت تاعك هزيهم وروحي سجلي قبل ما يفوتك الوقت .
غدوة نضت الصباح وجدت روحي ورحت للابونك باه نجبد الصوارد ونروح نسجل . سقسيت لي تخدم لثم قلتلها شوفيلي قداه عندي في الكونت . قاتلي عندك 30  مليون . قتلها قداه 30 ، راكي غالطة اختي زيدي عاودي شوفي . زادت عاودت قاتلي منيش غالطة عندك 30 مليون .بقيت مشوكية من جاني 30 مليون وانا غير بابا لي يحطلي فيه . قتلها  تقدري تشوفيلي شكون لي حطلي . قاتلي اوكي . بقات شوي من بعد خرجتلي ورقة فيها كلش بقيت نقرى حتى لقيت بلي آدم كل شهر يحطلي خمس ملاين من خمس شهر و البارح بابا حطلي خمس ملاين .انا جنون طلعولي علاه حتى يبعثلي في الدراهم لاه يحساب فيا  مخصوصة ولا معنديش مين نعيش . قتلها اجبديلي الدراهم كل . جبدتهم  نحيت منهم خمس ملاين تاع بابا والباقي خبيتهم في اونفلوب . وركبت في تكسي قتلوا يوصلني وين يخدم . وصلت هبطت تنفست مليح ودخلت ديراكت روحت للبيرو تاعو لقيت السكرتيرة  . عرفتني قاتلي مرحبا بيك مدام تقدري تدخلي المسيو آدم راه وحدو . قتلها لا ما يحتاجش ندخل عندو عطيتها لاونفلوب تاع الدراهم قتلها هادي اعطيهملوا وقوليلو قتلك اريج منحتاجش دراهمك . قاتلي راكي سير ، كون تدخلي عندو انتي خير . قتلها متدخليش في حاجة متخصكش ،  انتي ديري وش قتلك . خرجت  وصلت للدار  دخلت للشمبرة تاعي وقفلت الباب ودفنت راسي في المخدة نبكي علاش يا ربي مقدرتش ننساه علاه مقدرتش  نخرجوا من قلبي ومن عقلي وننساه كيما نساني يحساب شوية تاع الدراهم راح ينسوني في العام لي خسرتوا من حياتي بسبابوا  . فاتوا ليامات ودخلت نقرى في اكاديمي في الصباح نقرى نورمال في العشية يبعثونا سطاج حتى السبعة تاع العشية . ليامات لولين كان خويا يوصلني من بعد والفت وليت نروح ونرجع  وحدي بصح وليت كل ما نعود مروحة نحس طنوبيل تبع فيا خفت بصح محبيتش نقول لبابا ولا محمد خاطر تاع الصح كرهت يبقاو يعسوا فيا كشغل بيبي ، وليت كل مرة نروح في وقت مبدل باه مبقاش تتبعني .