حب في الثانوية

chapitre 90

نرجعو قبل بتسع شهر عند آدم لي غير وصلاتوا ورقة الطلاق مع لابوليس عقل ما بقى في راسو غير هادي لي متوقعهاش من اريج مالڨري كان علابالو بلي راهي تخطط لحاجة سيرتو كي سكتت ، بصح باه ترفع عليه قضية تاع  خلع وتبعثلوا لابوليس حتى للخدمة متوقعاش ، ديراكت ركب في الطونوبيل طاير للدارها ليوم يربيها غير الطلاق لي متحلمش بيه من عندو امبوسيبل يطلقها راهي لهوا لي يتنفسو ميقدرش يبعد عليها وصل للدار باباها هبط طبطب في الباب غير فتحتلوا طاح عليها بالضرب مكانش علابالو بروحوا وش راه يدير حاب غير يبرد قلبوا فيها بهدلت بيه قدام الخدامة  تاعوا ، وزادت من الفوق الهدرة لي قالتهالوا كيفاه قدرت تخرجها من فمها وتقولوا تديني للرجال لهاد الدرجة قدرت تمسح بكرامتو الارض البرج تاع العقل لي كان عندو طيرتهولوا . مقدرش يحكم روحوا وطلقها ملڨري علابلوا راح يتعدب وهو بعيد عليها بصح هاد هو الحل هي لي حبت ميقدرش يخليها على إسموا بعد الهدرة لي قالتلها قاتلوا مبقيتش نتيق فيك ومبقيتش ندير الامان فيك .خرج من عندها وهو بلا روح ركب في الطونوبيل ديراكت وصل للدار دخل غير شافاتوا يماه قاتلوا آدم ولدي وشبيك كشما صرى . مرجعلهاش و طلع لدارو  طاح يكسر في كلش مهوش مصدق وش صرى ليوم . لحقاتوا يماه تطبطب في الباب وهي تسمع فيه يكسر محبستش حتى فتح عليها الباب .قاتلو ولدي وشبيك وشبيها حالتك وش صرى قولي ولدي.  قالها والوا ما صرا والوا .  قاتلوا كيفاش ما صرا والوا علاه راك مكسر الحالة هكدا قولي كشما عندك مشاكل في الخدمة .قالها يما خليني وحدي . قاتلوا منروحش حتى تقولي وشبيك انطق . قالها يما ليوم طلقتت اريج .قاتلوا يا نندب علاه حتا طلقتها وشبيك هبلت تطلق مرتك . قالها يما هي لي حبت هي لي بهدلت بيا قدام الناس بعثثلي لابوليس حتى للخدمة.قاتلوا امبوسيبل اريج ديرها راك غالط الطفلة تحبك تموت على التراب لي تمشي عليه راك غالط . قالها يما متقوليليش غالط متقوليليش غالط متزيديش تهبليني انتي ثاني راهي رفعت عليا قضية تاع خلع وش من غالط . قاتلوا بالعقل برك ولدي تهدن بلاك دارتها مكرة فيك برك راك تعرفها بلا عقل ما تخممش من بعد تندم .قالها حتى انا قلت هكدا بصح كي رحت عندها  قاتلي مبقيتش ندير فيك لامان منيش حابة نكمل معاك  هدا كل بسباب لولاد وانا كلش درتوا على صلاحها ظهرت انا لي غالط وانا لي ما نصلحش  وانا الغدار والخاين . قاتلوا ارواح اقعد ولدي مش هكدا تتحل الامور خمم بالعقل هي صغيرة وغلطت وزيد علابالك بيها تحبك تموت عليك روح رجعها وتفاهموا بالعقل والله راكم تندموا ياك علابالك بيها من لول صغيرة ومتعرفش  تخمم وعقلها على قدها لازم تتحملها . قالها الله يسهل انا والله مبقات تدخل لداري ياك هي حبت هكدا انا  قلبي لي يطحنني نجبدوا ونعفس عليه برجلي مش انا لي نعيش مع وحدة بهدلت بيا ومش حابة تعيش معايا . قاتلوا والله عين وصابتكم كنتوا لاباس عليكم من هبطت علينا هاد الموصيبة ، زيد خمم اولدي مدام طلقتها وانت مقلق تقدر ترجعها ، روح رجعها وبرد فيها قلبك غير طلاق لا والله راكم تتعدبوا في زوج راني يماك ونعرف صلاحك وين . قالها يما خلاص انا ما عندي ما خسرت هي حبت الطلاق وانا طلقتها من غدوة نجيب لالاتها ونحرقلها قلبها .قاتلوا من قلبك هاد الهدرة ، ملا حتى هي من غدوة تفوت العدة تاعها وتعاود تزوج .قالها والله ندبحها نباصي عليها تجرب ديرها نبعثها عند لي خلقها . قاتلوا روح رجع مرتك اولدي هادا غير شيطان لي دخل بيناتكم ، غير جرب عيطلها تلقاها نادمة وتطلب منك السماح . قالها يما  اخرجي خليني وحدي . قاتلوا الله يهديكم برك . خرجت يماه وخلاتوا يخمم في هدرتها هي عندها الحق علابالوا بيها متقدرش بلا بيه وراح تندم بصح صاي طاح الفاس في الراس من  الكلام لي قالتهولوا حلف لا  راح تبقا على إسموا ولا راح تدخل داروا ، يمكن يفوتلها كلش تسب ولا تعيط ولا تصحح وجها ولا ترجعلوا الهدرة بصح باه طيح بيه وتعفس على كرامتوا غير هادي لي ميقبلهاش . فوت نهار كامل وهو يخمم فيها كيفاش راح يقدر على بعدها هو ميقدرش ينكر بلي يحبها و فات مرحلة الحب . سمع التلفون تاعوا يصوني شاف شكون لقاه محمد هز عليه قالوا نتلاقاو بدل قشوا وخرج ، قعد في القهوة يستنى فيه حتى قعد قالوا وش صرى الصباح روحت لقيت الدار مقلبة كيفاه خلاك ربي طلقها . قالوا سقسي اختك تقولك وش دارت . قالوا محمد اختي حكاتلي وعلابالي بيها غلطت بصح مش طلقها كاين ميات حل علابالك حالتها كيفاه خليتها بسبابك . قالوا ضرك ولات بسبابي انا شوف اختك غلطت قداه من مرة وهي تحكيلك هي تغلطت وانا نسامح بصح باه توصل بيها تطيح بيا وترفع عليا الخلع وتكتب في الخلع بسسب عدم قدرته على أداء وجباته الزوجية هادي ادا تقبلها انت انا منقبلهاش منيش طحان  ، شوف انا اريج حبيتها ومزلت نحبها ونعشقها وانت علابالك بصح صاي فض المكتوب بيناتنا مانقدروش نكملوا مع بعض صاي ديجا طاح لقدر ما بيناتنا ، اختك قالتلي هدرة  خلاتني نطلقها ونحلف عليها . قالوا محمد صح عندك الحق بصح راك علابالك بيها صغيرة وعقلها على قدها ، راهي قاتلي روح حاولوا باه يرجعني .تبسم قالوا علابالي هيا راح تندم وانا راح نندم بصح صاي اختك مبقاتش عندها مكتوب معايا . قالوا محمد آخر هدرة قالوا آخر هدرة .  قالوا محمد صحا معليش. وقف ماشي قالوا آدم محمد تهلا فيها . قالوا محمد راح توصيني على اختي !!.  مشا وخلاه يخمم فيها كيف عادتوا ديما . ليل كامل ما رقد ما شاف النوم حتى طلع الصباح  وجد روحوا وراح للخدمة ، خلي ينسي روحوا فيها بالخدمة . بدا يخدم حتى دخلت عندو هادي اميرة طفلة من لي جات تخدم معاه في المحاسبة تاع الشريكة وهي تمعنيلوا وتشرلوا بلي راه عاجبها بصح هو معندوش مع النوع هدا تاع النسا لي ترمي روحها على راجل واصلا هو قلبوا عند اريج غير هي لي متربعة على قلبوا وسكنت فيه  ، قعدوا يخدمو حتى يشوفوها دخلت للبيرو كيف الاعصار وجها احمر وعينيها منفخين من البكا باينة نهار كامل وهي تبكي ، شافها عينيها ديراكت طاروا عند اميرة تكيل فيها تهز وتحط . غير خرجت اميرة . بقات تحاول فيه باه يرجعها عندوا مينكرش انوا فرح وقت سمعها تعترف للمرة الألف بلي تحبوا ومتقدرش تعيش بعيدة عليه بصح مقدرش يشوفوها تبكي قداموا أصلا نقطة ضعفوا دموعها ميحملش وهاد الشي لي زاد على ما بيه وخلاه يجهل  عليها ويكسر كلش حابها تنساه وبلا ما تعدب روحها خاطر صاي هو حلف عليها وديجا غير الصباح راح المحكمة وقبل بالطلاق . خرجها ووصلها لدار باباها فضت فيه وقسمتلوا قلبوا وهو يشاف فيها دايخة وتهترف بأسموا هنا ندم ، ندم بزاف لي طلقها علابالوا راح تتعدب باه انسان هدا ادا نساتوا .بقا واقف يشوف فيها وهي ماشية مع خوها عمرو ماينسى شوفاتها فيه كأنوا تترجا فيه بعينيها باه يرجعها . قوى قالوا وركب في طموبيل وديمارا رايح  . وصل لدارو الدوزيام ودخل ديراكت للشمبرتهم وين كانوا دكرياتهم لحلوين والمرين هنا كانت تقعد وتدلل عليه وتقولوا  امشطلي شعري وهنا تقولوا هزني على ظهرك وهنا كانت تتكسل على حجرو ووتفرج التلفزيون . بقا يتففكر في دكرياتهم مع بعض ، هو يلوم فيها علاه حتا وصلتهم الحالة هادي علاه قلقاتوا حتى خلاتوا يدير حاجة راح تعدبهم للزوج . بقا هكدا حتى لقا روحو رقد بالقعاد . فطن على صوت التلفون تاعو كانت يماه لي عيطت هز عليها . قالها يما علاه تعيطي على الصباح وش كاين  نوضتيني من رقادي .قاتلوا وعطاك قلبك ترقد اريج راهي في السبيطار . تقعد من بلاصتوا قالها وشليها وش صرالها .قاتلوا وصلتها الورقة تاع الطلاق طاحت من طولها مسكينة عيطتلي يماها تلوم فيا على عملتك قتلك يا آدم تبث روحك متبردش حتى تقتل الطفلة ناقصة عمر . قالها يما وش راكي تقولي انتي اعطيني اسم السبيطار. قاتلوا معندك ما تروح بعد على الطفلة يا طلقتها صاي أيا كل واحد يروح في طريقوا راح تبقا تتمسخر بيها   . قالها يما وشبيك ض. قاتلوا لا يما لا والوا كون جات اختك تقبل يصرا فيها هكدا طفلة مريضة مرحمتهاش ، كون تموت وكشما يصرالها ذنبها في رقبتك . وكوبات عليه  . حكم راسوا بين يديه جلس روحوا بين  نارين . فاتوا نهارين هكدا يسمع  اخبارها غير من شروق صحبتها حتى دنيا مفهمش علاه تعاركت معاها وكرهتها . في النهار الثالث قاتلوا شروق بلي محمد داها وسافر من لثم فات شهر زوج ثلاثة ربعة خمسة ما سمع عليها حتى خبر . خمس شهر فاتوا عليه جحيم حب غير يسمع خبارها ولا يشوفوها حتى لوكان من بعيد ولا يسمع صوتها لوكان دقيقة ، قتل روحوا بالخدمة باه غير ينساها بصح مقدرش هي سكنت عقلو وقلبوا هي حياتوا ودنيتوا .