حب في الثانوية

106

فاتوا ليام وبقا على الرمضان شهرين . جات عندنا عجوزتي واختها وبناتهم رحبنا بيهم قعدوا حكاو حتى رجعت عجوزتي فتحت السوجي تاع العرس قالت لماما زيدي اهدري مع باباها خلي نزوجوهم على الأقل قبل الرمضان خاطر ورا الرمضان آدم راجع للمريكان عندو قراية ثم بلاك يبقا خمسة ولا ستة شهر وحاب كي يروح يدي مرتوا معاه منها يحوسوا ومنها يكمل شغالاتوا ويرجعوا والله نتهناو عليهم، انا كي قالت هكدا متت بالفرحة  احي عليا كتبتلي تحويسة جديدة  . قالتلها ماما انا كل يوم نهدر معاه ونفهم فيه مدابيا حتى انا نتهنى على بنتي في دار راجلها دوك نعاود نقولوا ونرجعلكم الخبر . في الليل كي جا بابا قاتلوا ماما على الحكاية جاني للشمبرة قالي عيطيلوا قالوا غدوة يجيني عندي هدرة معاه . انا حشمت لعبتها قتلوا معنديش نيميرو تاعوا ، تبسم  قالي زعما راكي حاشمة عيطي عيطي وانا كل يوم نسمع فيك تحكي معاه . يا ارض انشقي وابلعيني . تمنيت نموت في بلاصتي من الحشمة ههههه . عيطتلوا وقتلوا بابا قالك غدوة ارواح عندي هدرة معاك . قالي زعما راح يقولي بلي قبل . قتلوا غير متتحمسش راه سمعني نهدر معاك وقالي علاه مزالكي تهدري معاه  . قالي صدقتك غير اسكتي وانتي متعرفيش تكدبي كيما الناس باينة راح يقولي  بلي راه قابل انا من درك راني كومنديتلك على واحد لاغوب بلونش تشوفها عقلك يطير . قتلو صح ابعثيلي نشوفها قالي سوربريز حتى لنهار العرس باه تشوفيها . قتلوا بصح لازم نقيسها قبل بلاك تجيني كبيرة . قالي غير مكان لاه تقولبيني راني نعرف لاطاي تاعك مليح مليح . ضحكت قتلوا بصح هكدا بزاف علاه نزيد غوب بلونش مرة أخرى ياك لبستها قبل . قالي انا حاب نعاودوا كلش من جديد . قتلوا بصح هكدا غير خسارة . قالي يا المشحاحة ياك انا لي راح نخسر من جيبي ، قتلوا بصح انتيا راجلي وجيبك هو جيبي . ضحك قالي صاي كي راني راجلك دخلتي معايا شركة في جيبي . قتلوا لازم حبي انا شركة معاك في كلش حتى قلبك .قالي لا في هادي غلطي قلبي راكي ديتيه كامل مش شركة فيه . قتلوا ربي يخليك ليا عمري وقالي ويخليك ليا غدوة راني نجي غير اخرجي عندي نشوفك راني متوحشك موت . قتلوا حتى انا ادا قدرت راني نشوفك . قالي هيا بون نوي حبي راني رايح نرقد ميت بالنعاس .قتلوا تتمسخر آدم راح ترقد على العشرة  . قالي ريجا راني نعسان يا ربي ادا رقدت ونحيت تعب غدوة نخدم بكري . قتلوا من وقتاه وانت ترقد بكري ياك ديما  تسهر ولا رايح تتمعشق مع وحدة اخرى . ضحك قالي اريج يرحم باباك غير اسكتي هيا بون نوي. قتلوا آدم والله تكوبي تشوف وش ندير  منتفاهموش كيفاش هادي رايح ترقد مدخلتليش مخي عمرك كامل وانت تسهر دورك تقولي راني رايح نرقد على العشرة . قالي راكي تكدبي فيا قتلك رايح نرقد تعبان سبحان الله العبد ميتعبش . قتلوا باينة بلي راك تكدب . قالي اريج اقسم بالله نحكمك على كلمة تكدب نهرسك  منيش نتيجك تقوليلي تكدب اهدري مسڨم . قتلوا صاي وليت لطبايعك صاي من دورك راك تتحلف يدرا كي نرجع عندك كيفاش تولي كل ليلة ترقدني على دبزة كيما بكري . قالي ريجا سيريوا راكي تحوسي على المشاكل غير فوتيني وكي ترجعي عندي تشوفي الدبزة كي دايرة . قتلوا والله ونتزوجوا تحط يدك عليا ولا تحڨرني نهز روحي ونصد في دارنا متزيديش ڨاع تشوفني.  قالي زهري الكلب لي طيحني في وحدة كيفك . كوبا عليا وقيلا  زدت فيها شوي بصح حتى هو من وقتاه يرقد عليه العشرة سيرموا عندوا حاجة جامي رقد على لعشرة . حتى انا درت روتيني ورقدت غدوة الصباح فقت هزيت التلفون نشوف موالف كل الصباح يعيطلي ولا يخلي ميساج . بصح ليوم مكانش باينة  زعف من لبارح ، حتى انا وشبيا زدتلها هكداك لبارح يعني قالي تعبان ما فيها والوا انا وقيلا لي وليت موسوسة . عيطتلوا مهزش عليا . بعثلوا ميساج محبش يريبوندي .   بقيت نستنا فيه حتى لعشية باه جا عند بابا دخلوا للصالة بقيت نصنت عند الباب سمعت بلي بابا قبل وادم قالوا مش حاب يطول عشرة ايام ونديرو العرس كلش في نهار واحد . الحمد لله يا ربي . سمعت كامل وش هدروا من بعد رحت عند ماما الكوزينة قتلها ماما . قاتلي واش غير خير راني نعرفك من صوتك غير قولي قتلها آدم قالي حاب نشوفك هنا قبل ما نروح عندي بزاف متلاقيتوش . قاتلي والله شوف اسيدي يحسابها ساهلة .قتلها هيا برك اماما . قاتلي شوفي خمس دقايق متفوتيش سمعتي راني نبهتك . قتلها ايه خمس دقايق برك . رجعت للشمبرة تاعي عدلت شعري بدلت لبست روبة تاع دار شابة وطالوا تاع دار درت شوي ريحة ومكياج .  بقيت نستنى في ماما باه تخرج بابا من صالة وندخل انا باه نشوفوا . شوي وسمعت صوت بابا خرج . روحت نجري للصالة دخلت لقيتوا قاعد وحاط مع التلفون .قتلوا بسس الزين مخطوب ولا يستنى في المكتوب  . طلع راسوا شاف معايا وعاود رجع كيما كان ، عرفتوا زعف مني من لبارح .قدمت عندو عنقتوا على رقبتوا .قتلوا آدم توحشتك بزاف .قالي بعدي .قتلوا آدم راك زعفان مني . شاف معايا قالي اقعدي نهدر معاك قعدت مقابلاتوا كي قعدت بانت الشقة تاع الروبة . شاف معاها قالي غير الخير راكي عرتيلي على ساقيك  زعما في بالك هكدا راح ننسى وش صرا لبارح. حشمت وغطيت ساقيا قتلوا مش قصدي وشبيك .قالي شوفي اريج باه نتفاهمو المرة الجاية تعاودي هدرة تاع لبارح تشوفي وش ندير فيك . قتلوا وشبيك آدم والله راني كنت نضحك معاك برك . قالي ريجا قداه عندي ملي نعرفك؟؟ ربع سنين وعشتي عندي عام يعني نعرفك وقتاه تكوني تضحكي وقتاه تحكي سيريوا . قتلوا وشبيك كبرت لحكاية قتلك كنت نضحك برك وحتى ادا راني نهدر سيريوا وش فيها نورمال . قالي شفتي روحك كيفاش كنتي تهدري معايا جاتك نورمال تقوليلي هكداك . هبطت راسي وسكتت علابالي انا لي زدت فيها لبارح منعرف وش صرالي زعما لعبتها نعزر فيه  جات في راسي . قالي تزيدي تعاوديها نتفاهم معاك بطريقة اخرى كي تهدري معايا تهدري مسڨم فهمتي . درتلوا براسي ايه وبقيت ساكتة . وقف قالي راني  تفاهمنا مع باباك بعد عشر أيام العرس والعقد وكلش في نهار واحد . حتى انا وقفت قتلوا رايح .قالي ايه هداك هو طولت بزاف . مشا حتا وصل للباب تاع الصالة . وانا بقيت واقفة في بلاصتي بففف متوقعتش بلي هكدا راح يكون اللقاء بيناتنا . كي شافني مزلت في بلاصتي قالي ارواحي قدمت عندوا قالي شوفي فيا . طلعت راسي شفت معاه  ، قالي  مبقيتيش تعاودي هديك الهدرة منحبكش  تكوني  صحيحة الوجه  . عوجت فمي قتلوا ايه  علابالي . ضحك قالي علاه راكي تعوجي في شنايفك عليا.  قتلوا هكدا برك . قالي المهم راني رايح . قتلوا باي .  هو خرج وانا قعد حايرة فيه يعني انا موالفة  قبل نهدر اكثر من هكدا وهو جامي زعف هكدا صح كان يزعف شوي ويرجع  بصح لبارح اليوم منعرف وشبيه على علجال زوج كلمات  غسلني ونشرني .