حب في الثانوية

122

بعد ما قررنا صاي باه نروحو نصيفوا قتلوا غدوة نخرج مع دنيا نشرو الصوالح تاع البحر حوايج نحتاجوهم . قالي ايه كيما تبغي فكريني من بعد نمدلك الصوارد باه تشرو . في الليل عيطت لدنيا قولتلها فرحت بزاف قاتلي والله كانت في بالي حتى انا حابة نروح نبحر في بلاصة خلاف . غدوة الصباح جات عندي باه نروحوا نشروا عطانا آدم الدراهم وقالنا اشرو لي بغيتوا ، هو راح يخدم وحنا ديراكت حكمنا الطريق للسونتر فيل كي وصلنا اول حاجة شريناها هيا البوركيني تاع البحر خيرنا زوج تاعي في لون الوردي وتاعها في الموڨ. ليكات تاعهم طوال حتى للركبة مع الفيزو والبوني وزدنا شرينا هدوك لبلايغ تاع البحر كيما الالوان تاع البوركيني . ولي شابوا مع الصاك تاعهم المهم شرينا كلشي بقاتلي ميتنيلف من الصوارد شفت جبة تاع دار صيافي شابة تاع نسا عجبتني شريتها ورجعت للدار قلت من بعد كي نروح عند عجوزتي نقولها ونرضيها بيها زعما علابالي بلي مزالت زعفانة من اخر مرة كي كنت عندهم ورحت عند ماما من هداك الوقت مزدتش تلقيتها . في الليل رحت عندها عطتهالها فتحتها شافتها ورجعتها كيما كانت وحطتها وماقالت حتى كلمة المهم تفاهمنا بعد ثلاث ايام نروحوا ، فاتوا ثلاث ايام بالخف مع توجاد ، نهار لي رايحين بتنا عند عجوزتي نوضنا آدم على الربعة تاع الصباح باه نوصلوا بكري . ركبنا انا ودنيا من لور وعجوزتي من قدام . مع ديمارا حطيت راسي على حجر دنيا وتكسلت عطيتها برقدة منوضتش حتى طلعت الشمس نسمع في آدم يقول لدنيا نوضيها الغيبوبة هديك راهي قادرة تبقى راقدة نهار كامل نورمال . عدلت قعدتي نمسح في عينيا قتلوا وصلنا قالي مزال . قتلوا عييت انا وقتاه نوصلوا . قالي هدا من لي ديمارينا وانتي راقدة وتقوليلي تعبت . نطقت عجوزتي من هيك قاتلي انتم البنات تاع ضرك غير تاع رقاد وقعاد ملا وش يقول ولدي مسكين لي راه يسوق . سكتت من اخر مرة وهي هازتني في خشمها وين تلقا فرصة باه تقصفني بيها جايبتها ورايا تستنى فيا على غلطة منوضة معايا الحرب الباردة بصح انا نسكت ونخليها تهدر على روحها من جيهة كبيرة وفي مقام ماما ومن جيهة قدر لآدم وعلابالي انا لي غلطت معاها لولة يعني راهي ترجعلي فيها. قدمت للكرسي تاع آدم وهدرتلوا في وذنوا قتلوا دومي سخفت على شيكولا . فتح القجر تاع الطونوبيل وعطاني وحدة فتحتها ناكل فيها قسمت حبة وطليت على آدم حطيتهالوا في فمو كلاها . نسمع في عجوزتي تتأفف ومنعرف وش قاعدة تمتم بين شواربها بصح سمعت آخر كلمة كي قالت لا حشمة لا حيا . هادي تهدر عليا بقيت حايرة فيها. موالفة تشوفني مع آدم نورمال يعني هو يتعامل معايا قدامها عادي يعنقني يبوسني على خدي . شفت معاه في الطروفيزار غمزلي تاع اسكتي خلي تهدر كيما تحب . سكتت وكملت ناكل قتلوا مزال بزاف .قالي ايه مزال ادا تعبتي نحبس شوي . نطقت هيا قاتلوا كمل كمل يا ربي كان وصلنا بكري . حتى انا قتلوا كمل برك راح نرجع نرقد . رقدت حتى وصلنا باه نضت دخلنا للدار لي كريناها كانت ديجا وصلت الحداش تاع الصباح . هبطنا الفراش والفاليزات والماعن فرزنا كلشي في بلاصتوا ، وهو راح شرالنا الغدا تغدينا كي كملنا قالنا هيا تروحوا للبحر ولا تعبانين . قولنالوا حتى لغدوة .كملنا نهار في الدار . لغدوة في الصباح وجدنا كلشي كي جينا هابطين للبحر قالت عجوزتي روحوا برك انتم انا منروحش منيش قادرة . قالها آدم كيفاش تقعدي وحدك هنا . قاتلوا وش راح يصرالي المرة الجاية نروح معاك . نكدب كون نقول مافرحتش بالعكس متت بالفرحة هكدا وحدنا خير هيا كانت عاستني على كلمة هبطنا للبحر مكانش بعيد بزاف غير مشية تاع عشر دقائق وصلنا ، بحر يهبل نضيف ومنضم درنا باراسول طابلة وكراسا قعدنا وحطينا حوايجنا .قلت لدنيا هيا نروحوا نعوموا . قالي ديجا راح تعوموا عل الأقل روبوزيو من الطريق .قتلوا وش لي نروبوزي هادي انا جاية غير علجال باه نعوم . قالي روحوا روحوا علابالي مراحش تسمعولي . كنت لابسة ححاب تاع القفالي ولابسة تحتوا البوركيني . حتى دنيا كيفي قلعنا الحجابات بقينا غير بالبوركيني وهو نشوف فيه يكيل فيا من راسي للساسي يدقق كشما يلقا غلطة بصح ما نطق والوا خاطر مستورة كيما الحجاب كلشي مغطي . كملنا قلت لدنيا هيا . وقفنا باه نمشوا خزر معايا قالي تعوموا هنا مقابليني ومتبعدوش بزاف ومتهدرو مع حتى واحد لي يقرب ليكم تخرجوا ديراكت فهمتوا سيرتوا انتي . كان هو يهدر وانا نعلق عليه راه يمد في الوصايا العشرة . بصح مش يسمع فيا غير دنيا تسمع فيا وميتة بالضحك . قالي سمعيني وش راكي تقولي انتي من قبيل وانتي تهدري بين شواربك . قتلوا ما قلت والوا كملت باه نروحوا. تحلف فيا قالي روحوا برك من بعد ونتولها بيك . دخلنا انا نعرف نعوم شوي بصح دنيا تخاف تغطس راسها غير واقفة برك متعرفش تعوم جبتها وراها هبلتها كل دقيقة نغرقها وهي تعود تعيط حتى قريب تبكي درت بيها حالة وانا غير ميتة عليها بالضحك بقينا هكدا شحال وحنا نلعبوا ونعوموا مع بعض و مرة على مرة نشوف مع آدم نلقاه حاط مع التلفون ويشوف معانا علابالي يعس فينا وكي نبعدوا شوي يوقف يشاورلنا باه نرجعوا لقدام . هك شوي نشوف في راجل يحوم علينا وين نروحوا يلحقنا بقيت نقابر فيه ادا راه بنيتوا ولا يدير فيها بلعاني ويتبع فينا حتى صح لقيتوا يحوم علينا وبالضبط على دنيا غير يخزر فيها يمكن عجباتوا ولا منعرف قولتلها شوفي دنيا هاد الراجل من قبيل وهو يشوف معاك ويحوم علينا قاتلي اسكتي برك راني شفتوا قبيل غمزلي ومش حابة ندير طوايش لا يفيق آدم . قتلها هيا نخرجوا شوي حتى يروح ونرجعوا لا يفيق آدم يعاشي مباصي علينا . خرجنا رجعنا وصلنا للباراسول نترعدو من برد خاطر كان شوي الريح ديراكت جبدلي آدم البشكير من الصاك حطهولي على كتافي وجبد واحد لدنيا حطاتوا على كتافها . قعدت بجنبوا وانا مزلت نترعد من البرد قالي جعتي نمدلك تاكلي . قتلوا لا مزال خلي من بعد. قالي وقيلا بارد بزاف البحر ليوم متزيدوش تدخلوا راكم نترعدو من البرد . قتلوا لا ندخل انا مزلت ما شبعت منو. نطقت دنيا قاتلوا آدم احكم مرتك عليا من قبيل وهيا تغرق فيا وتضحك عليا خاطر منعرفش نغطس كيفها . شاف معايا قالي راكي تحڨريلي في اختي شفتي روحك بطة وتعرفي تعومي شوي وليتي تضحكي على اختي . ضحكت قتلوا مسكينة شبعتها ما حتى ولات تعيط يا ماما اجريلي . ضحك قاتلي معليش يا اريج تشوفي . خرجتلها لساني نعيب عليها . وهو يضحك علينا .دورت وجهي على غفلة لجيهة البحر لقيت روحي وحدي وحدي سهيت مع الرمل هداك تاع الشط لي تقيس فيه الموجة . فقت غير كي آدم قالي راني نهدر معاك وين روحتي . شفت معاه قتلوا والوا سهيت برك . وقفت قالي وشبيك وقفتي. قتلوا دقيقة مشيت ديراكت لجيهة هداك الرمل وهو غير يشوف هزيت كمشة في يدي ورجعت قالي وش هزيتي وش هدا لي في يدك افتحي نشوف . فتحتها قتلوا رمل برك. شاف معايا مستعجب قالي وش راح ديري بيه . هزيت شوي وحطيتوا في فمي نمضغ فيه قتلوا ناكلوا سخفت عليه. خبط يديه في بعض قالي أقسم بالله مهبولة ما لقيتي علاه تسخفي غير على الرمل يعني قلت عليك الماكلة. قتلوا الله غالب جا خاطري عليه . قالي كي تكملي اغسلي يدك وارواحي تتغداي . كملت غسلت في البحر ورجعت لقيتوا جبد الغدا وحطو فوق الطابلة . هادوا لي جاست هما لي يخلوني نحب آدم اكثر  ديما يقولي انتي مدللة بزاف ماعلابالوش بلي هو أكبر واحد علمني الدلال ، علابالو بڨاع وش نحب ووش نكره يحوس غير على راحتي تاع الصح حبوا ساكن في قلبي . تغدينا وكملنا نشوف فيه وقف وينحي في تريكوا تاعوا ويحط فب حوايجوا  قتلوا وش راك دير . شاف معايا قالي رايح نعوم . قتلوا وعلاه تنحي في تريكو  عوم بيه برك .دنيا ضحكت وهو شاورلي على واحد البابور بعيد قالي شفتي هداك الباطوا نضربك بكف نوصلك ليه ،كيفاش هادي نعوم بالتريكو تشوفي فيا شايب . قتلوا قول بلي حاب توري روحك و صاي .دخل وخلاني نهدر وحدي بقيت نتفرج عليه الله يبارك كيفاش يعوم غطسة زوج قريب يوصل لنص لبحر .  شوي وخرج قعد قدمت بستوا على دراعوا قتلوا راجلي يهبل . ضحك وجبد واحد لاباراي دارها في فمو .قتلوا وش هادي قالي شيشة   . قتلوا مفضناش من حكاية الدخان خرجتلي  بالموصيبة الجديدة هادي راح تهلك روحك من لي نشوفك وانت الدخنة خارجة من فمك    . حطها من يدو وقالي هيا تدخلي تعومي معايا قتلوا لا خلي برك حابة نبقى في الشمس باه نتبرونزا . قالي هيا شوي ونخرجوا منطولوش . قاتلي دنيا روحي انا راني منزيدش ندخل تعبت.  وليت وقفت قتلوا هيا دخلنا انا وياه . منحكيش على المتعة كي تعومي  مع راجلك في البحر رومنسية مش نورمال بصح آدم كي العادة مخلانيش أصلا نحس بيها خاطر غير مع دخلنا وبعدنا شوي على الشط . نحس بيه غير كيفاش هزني ورماني بقيت هكداك نشرب في الماء ونعيط كي المصروعة  معرفتش حتى نوقف حتى جبدني عندو لصقت فيه بيديا ورجليا وانا ننهج فتحت عينيا و انا نسعل في الما لي شربتوا ، ضربتوا على كتفوا قتلوا علاه . مخلانيش نكمل نهدر عاود غطسني كيما راني تحت الماء وخرجني . عاود كيف كيف ما نجي نفتح عيني يغطسني . وليت نحاول فيه ونعيط يا ماما  محبش يطلقني  قتلوا خلاص حبس راح نموت . قالي تزيدي تقباحي معايا .قتلوا لا والله ما نعاود سامحني . قالي لا غير زيدي احلفي غير انتي منصدقكش . عاود غطسني كي خرجني طيحتلوا عاد يضحك قالي شفتي راني قتلك غير انتي لي منصدقكش . قتلوا خلاص والله ما نزيد نعاود راني نموت وناس يقولوا آدم قتل مرتوا في البحر . عاد يضحك بالدموع قالي صاي خلاص منزيدش نغرقك اطلقيني قتلوا لا باه تزيد تغرقني نبقا لاصقة فيك هكدا حتى نخرجوا . بقينا تعوموا وانا نشوف مع عينيه في الشمس عادوا يهبلوا . قالي علاه راكي تشوفي معايا هكدا . قتلوا والوا راني نشوف مع عينيك باه ولدنا يخرج عينيه كيفك . باسني على خدي قالي لا جيبيلي  طفلة بطة كيفك معندي ماندير بالذكورة . قتلوا ان شاء الله . قالي هيا اطلقيني نبقا رافدك هكدا انا . قتلوا تغرقني .قالي صاي راني قتلك مبقيتش نغرقك . مع طلقتوا نلقاه غير دخلني تحت الماء وانا نعيط لربي لي خلقني وهو ميت بالضحك ويقولي اسكتي فضحتينا دوك يحسابوني راني نغتصب فيك تحت الماء . قتلوا خليني خليني والله ما نزيد نهدر معاك راح تقتلني . جيت خارجة مخلياتوا  حكمني قالي ارجعي برك صاي منزيدش ندور بيك. رجعت قالي هيا احكمي فيا نقدمو شوي لقدام .