حب في الثانوية

chapitre 70

فات نهار آدم من لي خرج ما رجع بقيت قاعدة في دار عجوزتي ، وهي كل زوج دقايق تسقسيني علاه تعاركتوا ووش صرى بصح انا محبيت نحكيلها حتى حاجة مشاكلي انا وراجلي نحلوها وحدنا مدام هوا مقالهاش على وش صرى حتى منقولهاش حتى ماما منقولهاش ، بقيت هكداك التخمام حرقلي راسي وزاد عليا الحال بالقيا  تاع لوحم بقيت نهار كامل رايحة جاية على التوالات . وصلت التسعة سمعت صوتوا عرفتوا بلي جا  كنت فب الشمبرة تاع الضياف  قدمت للباب نصنت عليه وش قاعد يقول هو ويماه . قاتلوا آدم ولدي وش صرى بيناتكم حتى راك تخمم في الطلاق وراك ناوي  تزوج  عليها وانت معندكش حتى خمس شهر من تزوجت . قالها  ما حكاتلك  والوا اريج . قاتلوا لا محبتش تهدر ، نهار كامل وهي تبكي وحاكمة الشمبرة وزاد عليها الحال مع الوحم راك تعرف. قالها غير متفاهمناش برك وزيد تعرفيني انا بالخف نتقلق وهي ترجعلي الهدرة هدا ما كان . قاتلوا ياك كل يوم وانتم متعاركين وهي من لول  علابالك بيها لسانها متحكمش فيه ، وش لي تبدل ليوم حتى راك حاب طلقها وتزوج عليها . قالها يما فض المكتوب بيناتنا كل واحد يروح في طريقوا متفاهمناش . قاتلوا آدم ياك من لول قتلك اخطيك منها راهي صغيرة عليك مستحيل عقليتك تمشي مع عقليتها انت عشت وشفت  وجامل عقلك ورازن روحك بصح هي  مزالها صغيرة وطايشة  متعرفش تصرف ملڨري نحبها كي بنتي وربي لي شاهد بصح ساعات راهي متعرفش تصرف ومتعرفش تهدر  لدرجة نتقلق  منها بصح نقول صغيرة وتتعلم  ، دوركا. كيفاه راك معول طلقها صح الطفلة بنت الناس مزالت موصلتش حتى 19  سنة تعاشي مطلقة وبصغير في رقبتها والناس وش تقول عليها . قالها يما خليني دوركا راني مش قادر نخمم في حتى حاجة ،راسي راح يطرشق عليا . كان طلع من بعد رجع يحكي قالها يما متخليهاش تقعد بالشر مش مليح ليها وادا تشهات حاجة قوليلي .ضحكت عجوزتي وقاتلوا الله يهديكم لزوج ساعات والله. نحسكم مهابل .
رجعت قعدت في السرير حطيت يدي على كرشي ونخمم في حياتي لي فسدتها بيدي ، بقيت نخمم حتى حسيت بالوجع في كرشي عرفتها من الجوع خاطر ما كليت حتى حاجة ليوم . خرجت الكوزينة حطيت سلاطة مشوية في المكرووند تسخن بقيت نستنى فيها شفتوا دخل خزر معايا قالي علاه نايضة درك امشي احكمي بلاصتك منحبش نشوف خليقتك قدامي، شحال  جرحني كي قالي هكدا حسيت موس مشا في قلبي . قتلوا جعت ، قالي كي تكملي تمشي ترقدي مع يما سمعتي قتلوا ايه . قعدت في الطابلة وحطيت الصحن قدامي ناكل منوا بلا شهية غير باه نحبس الجوع ، فات الفريجيدار جبد منوا قرعة تاع الما قعد يشرب بالعقل. حتى كمل وبقا واقف ساكت . حتى انا  محبيتش نهدر خفت لا نهدر يضربني ولا نتعاركوا في نص الليل الحق الحق عدت نخاف منوا  نتوقع منوا اي حاجة ، سيرتوا كي يتقلق يتحول تقول عبد اخر. كملت الصحن بصح مزلت جيعانة عاودت هزيت شوي سلاطة وحطيتها ديراكت في الصحن وراح نبدا ناكل . قالي سخنيها معدتك متحملش الماكلة باردة .وقفت نسخن فيها خزرت معاه بطرف عيني يبان هادي شوي على الصباح قلت خلي نجرب نحكي معاك بلاك يخليني نحكيلوا كلش . كان واقف متكي على البوطاجي وهاز  الكاس في يدو ، قدمت عندو وانا نرجف حطيت راسي على صدرو وحكمت في التريكوا تاعوا . قتلوا آدم علاه راك دير فيا هكدا  ،  علاه راك تعدب فيا مكفاش ولدك لي في كرشي و متعبني وتزيد انت  اسمعني برك خليني نفهمك كلش والله مش كيما فاهم راك ظالمني  . قالي بعدي عليا منيش حابك تزيدي تقربيلي فهمتي وتفكري ديما بلي لي بيناتنا لي راه في كرشك  برك ، الا ادا انتي حبيتي على حقك ولا انا ادا حبيت على حقي ملڨري علبالي مش راح نحب عليه منك . دموعي  هبطوا قتلوا آدم حرام عليك  علاه راك دير فينا هكدا عمروا ماكان لي بيناتنا حق وواجب ولا بيبي، لي بيننا حب وعشق ولا نسيت .قالي انتي لي وصلتينا لهنا انتي لي بعمايلك وتخمامك وصلتينا  لهنا ، انتي بالكدب تاعك والتخبية وصلتينا لهاد الحالة ودوركا بعدي عليا امشي كملي عشاك و امشي طيري ترقدي. بعدت عليه مكنتش قادرة نزيد نحاولوا. أكثر  كنت تعبانة بما فيه الكفاية ديجا كنت واقفة قدرة برك كون ينسف عليا نطيح حاسة روحي راح نموت  .هزيت الصحن ورجعت ناكل ونمسح في دموعي هاد البيبي حسيتوا نحس من لي سمعت بيه في كرشي وانا في المشاكل حتى من قرايتي نسيتها خلاص كرهتوا قبل حتى ما يجي للدنيا . كملت هزيت الماعن وحيطتهم في البوطاجي وانا ننهج عاد اصغر مجهود يتعبني  ،  كي سمعني ننهج قدملي قالي وشبيكي . قتلوا والوا غير تعبت برك ، قالي امشي ترقدي عند يما ،سمعت التلفون تاعوا صونا جبدوا هز سمعتوا قالوا لقيت لادراس ابعثهالي راني جاي ، اسبقني انت عندك لا يهرب متخليهش يفيق . وكوبا انا توسوست عرفتوا يهدر على كريم ، قتلوا آدم وش كاين ، مرجعليش وخرج يلبس في صباطوا قتلوا آدم وين رايح جاوبني . جا خارج حكمتوا قتلوا وين رايح جاوبني . قالي امشي. ترقدي حاجة متخصكش متزديش دخلي رب روحك فيا بعدني عليه وخرج .
عند ادم لي خرج بعد ما بعثلوا صاحبوا لادراس تاع دار كريم لي كان متخبي فيها باه يهرب من آدم ، وصل لدار طبطب الباب فتحلوا كريم لي كان ماعلابالوش بلي آدم عرف بلاصتوا  ، ديراكت آدم ضربوا بدبزة جابوا طايح في الارض دخل آدم وقفل الباب والطاح بالضرب على كريم لي كان مش قاعد يدافع على روحوا خاطر علابالو بروحوا هو لي غالط  ويستاهل هاد الضرب وزيد كان حاب يريح ضميروا من لي عداب لي راه يحس  فيه من جيهة آدم . حكموا آدم على رقبتوا وقالوا علاه درت فيا هكدا بعد ما كنت نأمنك على داري و روحي ونقول حتى ادا انا مكانتش كاين كريم خويا وصاحبي وولد  عمي نأمنوا على كلشي غير هو لي ميغدرنيش ، ياك علابالك بيا مدايرك كي خويا الحاجة لي تطلبها مني تكون بين يديك حتى يا لوكان من تحت الارض ،نهار جيتني قصدتني في حاجة وقتلك لا ، نهار موقفتش معاك كنت دايرك خويا الصغير لي مجابتوش يما بصح انت خرجتلي  افعى نربي فيها في داري ، اول ما غفلت غدرتني وشفت لمرتي لي نورمالمو انت تصونها وتحافظ عليها خاطر مرت خوك في مقام اختك . بصح وش راح نقولك خرجت رخيس كلمة راجل خسارة فيك . قالوا كريم والله كنت شارب والله كنت سكران معلاباليش وش راني ندير، راني ندمت وطلبت السماح من اريج . ضربوا آدم برجل على كرشوا قالوا اسكت اسمها متنطقوش بلسانك### لندبح ليوم ،احكيلي كلش نحب نسمع كلش من لول للخر . بدا كريم يحكيلوا وهو يبكي حتى كمل وقالوا والله في السبيطار طلبت منها السماح وانا لي وصيتها باه متقولكش مكنتش حاب نخسرك ، راه غرني الشيطان وتبت لربي وآله راني ندمان .ضحك آدم ومسح وجهوا وقالوا راك حابني نصدق وش راك تقول هكدا . قالوا كريم اصبر راح فات للدوش توضى وهز  المصحف حلف عليه قدام آدم بلي كلشي قالوا صحيح وما كدب في حتى حرف . قالوا حتى ادا مصدقتنيش انا على الأقل صدق اريج والله هي خاطيها انا لي درت كلش انا لي تبليت عليها  وياريتني متت قبل ما نخمم في هاد الشي  ندامة كلاتلي قلبي لدرجة كنت نخمم نسافر ومبقيتش نرجع غير باه نريح ضميري . قالوا آدم وهدوك لي فوطوا شكون لي بعثهملي ادا مكنتش انت.  قالوا والله ما راني انا  ، حتى انا لبارح الصباح كنت في دار بابا بعثولي ميساج بلي راك عرفت كلشي وراك تحوس عليا باه تخلف ثارك مني على هديك هربت وتخبيت هنا . قالوا انت تتخبى وهيا لي ضحية تاعك في كلشي تخليها حاصل في راسها كلش . بصح معليهش تخلصوا الثمن في. زوج انت وهي . طابس عليه وجبد من جيبوا موس كرونداري ضربوا بيه على دراعوا من لول للخر عيط عيطة وحدة والدم ساح واد وزاد كمل ضربوا بيه على رجلوا.  وقالوا المرة الجاية ادا خممت برك تعاودها هاد الموس يكون في بلاصة اخرى راك علابالك بيها نخليك ما تصلح لوالوا لا راك مرا لا راك راجل ، ومن ليوم تنسى بلي عندك ولد عمك إسموا آدم . كيما راح ننسى انا بلي عندي بنت عمي  إسموا كريم خاطر خسارة فيك كلمة راجل . خلاه وجا خارج كي وصل للباب نطق كريم  وقالوا آدم  اريج ما كان مدخلها ماعندها علاه تخلص الثمن كيما راك تقول . خزر معاه آدم وقالوا تخلص ثمن انها خلاتني راقد على وذنيا كيف الطحان ونقولك يا خويا وانت تدنيت ليها . خرج وخلاه غارق في دموا .