حب في الثانوية

128

سمعت صوت هدرة بحدا راسي فيقني من نومتي  كان صوت آدم يهدر. فتحت عينيا ديما نسلك من الموت على شعرة محطيتش روحي راح نقدر نعيش بعد هداك الوجاع لي توجعتوا ولي حسيت بيه في ولادتي قلت هادا آخر نهار في حياتي بصح مكتوب ربي كتبلي نزيد نعيش بعدما كنت متيقنة اني قلبي مراحش يقاوم اكثر . شفت بجنبي لقيت آدم قاعد وهاز لفة غوز في يدو يهدر معاها  تقول عليه يهدر مع انسان كبير اجمل منظر شفتوا في حياتي بنتي وراجلي . دموعي هبطوا على خدي من شدة فرحتي ، طلع راسوا شاف معايا توسعت تبسيمتوا حطها في سريرها لي كان بجنبي وقدم عندي باسني على راسي قالي الحمد على سلامتك يا قلبي . قتلوا الله يسلمك . قالي وش حاسة روحك ادا راكي موجوعة نعيط للطبيبة تشوفك قتلوا لا راني لاباس . رجع باسني على خدي قالي اللحمد يا ربي .شفت مع سرير لي كانت فيه بنتي .قتلوا آدم بنتي . هزها من سريرها وحطهالي فوق صدري قالي شوفيها شحال شابة  . غير حسيت بيها فوق صدري قلبي رجف عليها هادي هيا كبدتي لي تعذبت علاجالها يا ربي على هداك الإحساس ربي يرزق بيه كل مؤمن  ادا كان هدا هو احساس الامومة مستعدة نتعذب علاجالوا الف مرة دموعي رجعوا يهبطوا وحدهم بقيت نشم في ريحتها شحال دافيه وحنينة صغيرة قد كفة اليد مغمضة عينيها ومكمشة يديها شعرها الاكحل خارج من تحت البوني الغوز صوت تنهيداتها صغار  . حسيت بيد آدم فوق راسي .شفت معاه قتلوا هادي بنتي .قالي ايه هادي بنتنا الطبوزة تاعنا شوفي شحال شابة وتشبهلك . وصح ملقري صغيرة بصح عندها نفس الملامح تاعي ونفس لون بشرتي السمرة . ضحكت قتلوا ايه تشبهلي . مد يدو راح يهزها قالي هاتيها عليك بزاف راكي مزالكي مريضة من بعد وهزيها .قتلوا خليهالي شوي برك مزلت ما شبعت منها. قالي مزالوا ليام قدامك وتشبعي منها دوك بزاف عليك غير ابرايلي وارجعي نوري دارك انتي وبنتك . هزها رجعها لسريرها ورجع قعد حكملي يدي قالي ركبتيلي السكر ولاطونسيو علابالكي ادا مرضت راهي من تحت راسك.ضحكت قتلوا علاه وش درتلك انا . قالي لا ما درتي والوا غير راكي من لبارح وانتي دايخة خلعتيني عليك حتى طبيبة قاتلي راهي من تعب ولوجاع بصح مصدقتهاش قلبي مرتاحش حتى شفتك فتحتي عينيك . قتلوا صح . قالي ايه من  كملتيش ولدتي ريتاج ودختي من هداك الوقت مزدتيش فطنتي قاع كلشي كملهولك وانتي دايخة ماراكي جايبة خبر لوالوا . تفكرت قتلوا حقا  وين راهي الطبيبة هديك والله نخلص فيها كلشي قتلتني بالضرب كي نقلها راح ندوخ وهيا تولي تضرب فيا بالكف . ضحك قالي وش حبيتيها ديرلك وانتي دختيلها ورقدتي في نص الولادة ومنكدبش عليك حتى انا وقت لي عيطتلي ودخلت شفتك دايخة ضربتك باه تفطني . قتلوا حرام عليكم والله تخلصوها عذبتوني . هز يدي باسها قالي الله غالب في خاطر الطبوزة تاعنا . قتلوا عاوني نبدل راني حاسة روحي مشمخة . جيت راح نتقعد رجعني قالي اصبري متتحركيش حتى تشوفك الطبيبة خير وزيد البرد نخاف يقيسك الهوا حتى نسقسيها . صب كاس تاع تيزانة وشربهولي بالبايات . قتلوا وين راهي ماما علاه ما جاتش .قالي من لبارح وهيا هنا قلتلهم يروحوا على الأقل حتى تفيقي من بعد يرجعو . قتلوا وقتاه نخرج حابة نروح للدار .قالي الطبيبة قالت لازم تبقاي ثلاث ايام باه تخرجي بصح ريتاج لعشية نخرجها صحتها راهي مليحة . قتلوا وانا علاه لازم نبقى .قالي مزالكي مريضة وزيد وقت الولادة صراتلك ايموراجي لازم حتى يشوفوا حالتك من بعد يقرروا هكدا خير باه نطمن عليك اكثر .جات شافتني الطبيبة قاتلي راكي مليحة بصح حاذري روحك من الهوا ولازم تنوضي تمشي باه يخرجولك لي ڨاز . وكيما كان الحال في هديك العشية خرجوا ريتاج من السبيطار وبقيت انا ثلاث ايام آدم كل يوم عندي هو لي قايم بيا  ، ماما تجيبلي الماكلة وريتاج قعدت عند عجوزتي ودنيا . كي خرجت قاتلي ماما تروحي عندي للدار . قالي مستحيل غير انساي تقعدي في دارك . وصح خرجت ديراكت لداري . غير وصلت للدار لقيتهم يستناو فيا ماما وعجوزتي ودنيا . مع قعدت جابولي بنتي ريتاج غير ثلاث ايام كبرت ملامحها بانوا اكثر تشبهلي فولة وتقسمت على نص  بقيت غير نلعب بيها منيش مصدقة بلي هادي بنتي . في الليل كل راحوا .دخلت لشمبرتي رقدت ورقدتها بجنبي  نشوف فيها كيفاش راقدة . دخل آدم قالي وش راكي ديري  قتلوا شوف بنتنا شحال شابة وصغيرونة.  طبس باسني قالي كيفك هكدا حتى انتي شابة وصغيرونة  .ضحكت قالي بصح هيا طبوزة عليك . قتلوا ايه صح  بصح علاه  تبكي بزاف . قالي مزالها صغيرة باينة راح تبكي مسكينة . ثاوبت نعسانة قالي راح ترقدي قتلوا ايه مزالني تعبانة حاسة عظامي كامل مكسرين عليا . قالي ارقدي دوك يروح عليك التعب . هز ريتاج في يديه قتلوا علاه هزيتها . قالي باه ترقدي الاز . قتلوا خليها برك مراحش تقلقني .قالي لالا انتي نومك ثقيل وتتقلبي بزاف في السرير  قادر ترقدي فوقها خليها دوك نرقدها عندي حتى لغدوة نجيبلها سريرها هنا. قتلوا كيما تحب . من وراها رقدت رقدة اهل الكهف  فطنت غير صوت بكاها . فتحت عينيا لقيتوا هازها في يدو ويدوح بيها رايح جاي في الشمبرة باه تسكت ويقولها هيا  اسكتي  الاميرة تاعي خلي ماما ترقد شوفيها مسكينة كيفاش راقدة تعبانة . بقا معاها محبتش تسكتلوا قريب راح تفحم . قعدت قتلوا وشبيها تبكي .قالي نوضاتك قتلوا لا صاي شبعت نوم هاتها عندي . غير حطهالي في حجري سكتت تشوف معايا . ضحك قالي راهي كانت تحوس عليك وانا نقول وشبيها تبكي.  قتلوا حبيبة ماماها . شفت معاها قتلوا وقيلا حابتني نرضعها من صدري شوف كيفاش لاصقة فيا . قالي لا مترضعيهاش بزاف عليك وزيد راهي تشرب البيبرون نورمال مكان لاه تعذبي روحك . قتلوا بصح شوف مسكينة كيفاش راهي حابة ترضع .قالي دوك توالف . بقيت ندوح بيها وهيا ساكتة تتفرج فيا قتلوا ارقد شوي  من لبارح ما رقدت قالي نورمال مارانيش نعسان . بقينا نايضين في ثلاثة حتى طلع الصباح . جات عندي ماما جابتلي الماكلة والتيزانة وغسلت لريتاج وقمطتها . عاد هدا هو الروتين تاعنا كل يوم هكدا تجيب بينا الصباح ما نرقدو لا انا لاهو نباتوا نايضين في ثلاثة . نهار السابع درنالها عقيقة عرضنا ڨاع لافامي ودرنا ذبيحة وكلشي.  لغدوة  عيطت لماما باه تجي كيما موالفة تغسل لريتاج وطيبلي لغدا والعشا وتروح . قاتلي راني مريضة بالڨريب منقدرش نجي نعديك . قتلها وكيفاش ندير انا منعرفش نغسللها ونداويها وحدي قاتلي جربي باه تتعلمي لوقتاه رح تبقاي متعرفيش لازم تتعلمي وتعولي على روحك .