حب في الثانوية

chapitre 66

غدوة الصباح قعدنا نفطرو الكل في الكوزينة .دنيا بقات تسقسي فيا قاتلي وش حكيتي مع آدم كيما وصيتك . قتلها اسكتي برك راهو تحلف فينا قالي باينة كاين حاجة مخبيتها عليا انتي ودنيا . قاتلي احكي معاه برك ، جربي حتى اجبديلوا لحكاية برك ، وشوفي وش يقولك . قتلها ايه نجرب ولعمال على ربي . خزر معانا آدم قالنا وش قاعدين تحكوا انتي وياها من الصباح . قتلوا والوا نحكوا برك .بقا يشوف معايا عرفتوا مصدقنيش . قلت لعجوزتي والله يا يما راني سخفانة نروح لعرس نشطح ونزهى .قاتلي لعراس تاع لافامي كامل فاتوا . قتلها يا ريت جات دنيا مخطوبة وقريب عرسها والله روعة . شفت مع دنيا هبطت راسها حاشمة . راح تفيق بروحها الجايحة من لي جاست لي دير فيهم . قالي آدم غير انساي  دنيا مزالت صغيرة على الزواج حتى تكمل قرايتها وتتخرج من بعد ساهل .قتلوا وين صغيرة راهي قدي  ادا جاها المكتوب مدها . قالي انا نعرف ما يليق باختي وراني قلت بلي صغيرة ، مش مطيشة من دار باه نزوجها وهي في عمرها 18 ، خلي حتى تكون روحها وتتخرج من لقراية وتعيش حياتها ومن بعد تتزوج على روحها . انا تقول كب عليا بدون تاع ما بارد ، طلعولي الجنون ، قتلوا وش قصدك ، تسما انا مطيشة من دار كي تزوجتك وانا في عمري 18 . قالي شكون هدر عليك انتي . قتلوا والله . وقفت من الطابلة ودموعي طاحوا . قاتلي عجوزتي يا بنتي شكون هدر  عليك  وشبيك يهديك ربي . قتلها باينة يهدر عليا .خزرت معاه قتلوا باه نقولك حتى انا خويا وبابا يحبوني ويخافوا عليا مش مطيشيني من الدار كيما قتلي . وقف قالي وشبيك انتي ليوم راكي تحوسي على مشكلة بلا سبة . قتلوا ما مشكلة ما والوا ، خليتوا ورحت للشمبرة قفلت الباب بالمفتاح وقعدت في السرير.نبكي سمعتوا لحقني جا راح يفتح الباب لقاه مغلوق طبطب قالي ريجا افتحي الباب خليني نهدر معاك . قتلوا روح متهدرش معايا.   عيط عليا قالي  أفتحي الباب  لنكسروا على راسك ليوم راني نشوف فيك  بديتي طيري عليا كي شفتيني نساعف فيك . بقيت ساكتة .قالي اريج راني نهدر معاك افتحي الباب متجهلنيش . مهدرتش . قالي معليش راني رايح نخدم لعشية نتفاهموا عليها . خبط الباب وراح سمعتوا خرج . هكا شوي زاد جات عجوزتي ودنيا محبيتش . قاتلي دنيا اريج راه آدم مش قصدوا عليك وشبيك . قتلها بركاي مدافعي عليه راكم سمعتوه بودنيكم وش قال . عياو فيا محبيتش نفتح عليهم الباب ، حتى وقت لغدا محبيتش نفتح . وصلت لعشية  كيف كيف ، بقيت غير قاعدة في الشمبرة نبكي . وصلت السبعة سمعتوا جا . بقا يسقسي في عجوزتي قاتلوا من الصباح وهي غالقة على روحها في الشمبرة . جا طبطب الباب . قتلوا روح منفتحش . قالي اريج افتحي ر## الباب متهبلنيش . قتلوا لا.  عيط عليا قالي أفتحي لا نكسروا . انا خفت منو كي سمعتوا يعيط علابالي آدم كي يتقلق يتحول وليت وقفت رحت فتحت الباب ورجعت لورا . جا ديراكت حكمني من شعري قالي علاه كي نهدر معاك متسمعيش الهدرة قولي ، قتلوا نحي عزرين  يدك عليا برك  . بقا  يحرك فيا من شعري  قالي انتي راني نشوف فيك تحوسي على طريحة ليوم ، علاه غالقة الباب من الصباح . قتلوا معندو ما دخلك فيا أخطيني . ضربني على فمي قالي اعدلي فمك لنكسرك . قتلوا نحي يدك عليا متزيدش تقيسني منيش مطيشة عندك . قالي يزي بلا صحنية الوجه تاعك لا نجهل عليك لعشية هادي . قتلوا اديني عند بابا منقعدش عندك هنا . قالي والله جديدة هادي . قتلوا ايه اديني ولا نعيط لبابا يجي يديني . سمعتني عجوزتي قاتلي لاه وش صرا حتى تروحي لداركم . قتلها هكدا مش حابة نقعد عند ولدك . قالي والله ما راك متحركتها من هنا ، انتي علابالي بيك راكي حابة طيري كي شفتيني نساعف فيك . هيا امشي قدامي الكوزينة تتغداي ومن بعد نتفاهمو . قتلوا منتغداش ومعندنا علواه نتفاهموا دوك نعيط لبابا يجي يديني. ولا يعيط . قال راح تجهلني الطفلة هادي ، وشبيك انتي ليوم تحوسي على مشكلة وخلاص . قتلوا ما راني حوس على مشكلة ما والوا حابة نروح لدارنا ولا هادي تاني حرام . قالي مكانش روحة وامشي قدامي  الكوزينة تتغداي راكي بالشر من الصباح . قتلو مانكلش شبعانة  . قالي انتي الله يسهل  عليك تحبي حتى تقعدي عام كامل بالشر بصح ولدي راه في كرشك لاكان ناسية كون تصرالوا حاجة بسبابك تشوفي واش ندير فيك . وليت نبكي قتلوا صار هكدا معليش . قالي ايه معليش امشي قدامي يالله للكوزينة  . رحت للكوزينة وانا نبكي حطتلي دنيا لغدا . قالي من ليوم تزيدي تفوتي غدا ولا عشاء تشوفي واش ندير فيك فهمتي . بقيت ناكل ونبكي وهو يتفرج فيا نسمع فيه يهدر وحدو قال والله لعبد حاس  روحوا متزوج ببيبي نهار كامل وهي تبكي هادي انا نربيها ولا نربي ولدي بلاك نفتح حضانة خير . خزرت معاه قتلوا معجبتكش طلقني راني نشوف فيك ديجا راك كرهت مني واش شفت وحدة جديدة حاب تزوج بيها . ضحك وقالي ايه والله شفت وحدة جديدة تهبل كبيرة جاملة عقلها حتى كي نهدر معاها تفهمني وتسمع الكلمة  وتعرف تتهلى فيا مش كيفك انتي حتى تنشفيلي ريقي باه تسمعي الهدرة . رجعت نبكي بالصوت قتلوا يا الغدار ادا كنت حاب تتزوج بوحدة كبيرة علاه من لول جيت عندي يا الكداب يالخاين . جات عجوزتي .قاتلي وش كاين وشبيكم ثاني . قتلها شوفي ولدك حاب يتزوج عليا راه يخون  فيا . هو نشوف فيه يضحك . زاد قلقني . قتلوا والله ما نقعد عندك طلقني يا الخاين . قاتلي عجوزتي راه يتمسخر بيك برك وانتي تصدقي فيه . قتلها لا راه يهدر صح ، ديجا علابالي راه كره مني شفتيه الصباح وش قالي . نطق وهو يضحك قالي غير قوليلي قداه في عمرك والله تقول بيبي غدوة نديك تقراي في الحصانة  . قتلوا راك تضحك عليا ، درك تديني لبابا منقعدش عندك يا الخاين وليت تعرف في النسا وتقولي فيها في وجهي . قاتلي عجوزتي راه غير يضحك برك .  قالي لا راني راح نعاود نتزوج صح . قتلوا والله نقتلك قبل ماديرها سمعت والله نقتلك ونشرب من دمك يالخاين ، شفت الباط تاع السرفيات هزيتوا ورميتوا بيه . على آخر دقيقة هبط راسو سينوا راه قاسوا . وقف يضحك قالي يا شوفي المهبولة  هادي حابة تقتليني صح . خزرت مع عجوزتي قتلها راني قدامك قتلوا ادا  خمم برك يشوف في مرا اخرى اقسم بالله نقتلوا صح السم تاع الفيران كاين راه غير بعشرة الاف . عجوزتي قعدت ميتة بالضحك .قاتلي والله غير ضحكتوني ،راه غير يتمسخر بيك وانتي تصدقي فيه وتقلقي في روحك صح ..قالها لا يما راني نهدر صح راني صاي عرفت وحدة عمرها 30.كبيرة رزينة مش كيف هادي من لي جبتها وهي بالمشاكل تاعها ، وزيد عقلها تاع بيبي وش راح ندير بيها غير يجي ولدي نروح نزوج .... انا حكموني الجنون قتلوا والله ما نقعد عندك دوك طلقني دوك . رحت نجري وهو يعيط وريا ويقولي بالعقل برك عندك طيحي . دخلت للشمبرة قفلت الباب بالمفتاح .هزيت التلفون تاعي عيطت لبابا نبكي غير هز عليا قتلوا بابا ارواح اديني آدم حاب يتزوج عليا . مسكين تخلع قالي بالعقل بنتي حبسي لبكا وفهميني وش صرا .قتلوا آدم قالي غير يجي ولدي نتزوج  عليك ونجيب مرا في عمرها 30 . مصدقنيش قالي اواه مكانش منها آدم قالك هكا . قتلوا ايه قالي كرهت منك  ومن مشاكلك وغيرتولدي نتزوج .قالي خلاص دوك نجي نديك وجدي روحك . لبست قشي وانا نبكي بالشهقة ، كملت قعدت نستنى في بابا وهو نسمع يهدر مع يماه في صالوا ، قالها خلي تروح على روحها انا راح نتزوج دبر راسها تقبل ولا تقعد . وعجوزتي تضحك قاتلوا آدم حرام عليك تقلق فيها مسكينة مريضة . قالها يما مارانيش نضحك راني نهدر صح .  قاتلوا كون جيت منعرفكش تموت عليها راني صدقتك . قالها غير صدقي انا راني كرهت منها صاي الناس تتزوج بالنسا وانا مزوج ببيبي ، انا مقدرتش نسكت قتلوا وانا نعيط من الشمبرة باه يسمعني  والله يادومي نقتلك والله نديرلك السم ونرهجك ما تبقى معايا  لا أنا لا الشارفة تاعك هادي . سمعتهم يضحكو .قاتلوا عجوزتي راهي تتحلف فيك وتقولك يا دومي . بقا يضحك قالها شفتي يما باه راني  متزوج بمرا متعرفش حتى تتعارك ، قوليلي هادي وش ندير بيها  . قاتلوا عجوزتي آدم صاي راك كثرتلها راهي صدقاتك صح . وهو غير يضحك و انا في الشمبرة نبكي دمعة وخنونة. سمعتوا جا بقا يطبطب في الباب قالي بطة افتحي الباب. بقيت ساكتة ونبكي قالي هيا افتحي نتفاهموا راني كي نتزوج تتوحشيني ملا غير اشبعي بيا درك . هزيت   الفيوزة الصغيرة رميتها على الباب تكسرت قتلوا روح أخطيني متهدرش معايا . قالي اسمعي وش كسرتي ، انا مرتي لي راح    نجيبها  جديدة عاقلة متكسرش لحوايج تاع الدار كيفك .  رجعت نبكي بالصوت سمعت صوت بابا وماما جاو فتحت الباب ورحت نجري عند بابا  تحضنتو نبكي قتلوا بابا اديني ، آدم حاب يتزوج عليا .  قالي متبكيش بنتي خلاص . قالت ماما  لادم وش لحكاية تاع راح تتزوج . ضحك قالها راني غير نضحك معاها صدقت لحكاية صح وراهي دايرة حالة . قتلوا راك تهدر صح حاب تتزوج وراك تعرف وحدة . قالي كيفاه نعرف وحدة . قتلوا انت لي قتلي نعرف وحدة عمرها ثلاثين . عجوزتي قالتلهم  راه يضحك معها وهي صدقت صح . قاتلي ماما تسما شقيتينا على حكاية فارغة . قتلها انا راح نروح مع بابا . قالي آدم. علاه تروحي راك مريضة مش مليح ليك الركوب تاع الطونوبيل غير تبراي روحي .  قالي   بابا ايه  اقعدي في دارك خير . راحوا روحوا وانا قعدت مع عجوزتي . قاتلي كيفاش صدقتي بلي آدم يتزوج عليك صح . قتلها كون مجاش حاطها في بالو لحكاية ميهدرش عليها. علابالي بيه كره مني .جا قعد بجنبي وجبدني لحضنو قالي والله أنا نكره منك . عمرك شفتي واحد يكره من بنتو . قتلوا متقليش بنتي منيش صغيرة.  قالي بنتي ومرتي وحياتي ودنيتي . رجعت نبكي قتلوا صح راح تتزوج عليا . ضحكت عجوزتي وناضت قالتنا انا نروح نصلي وانتما كملوا تمعشقوا. على رواحكم . طبس باسني قالي علاه هبلت انا نخلي البطة تاعي   الزين والطراوة ولخدود  ونروح نتزوج بوحدة اخرى  . خزرت معاه قتلوا دومي مبقيتش نعجبك ، كرهت مني صح . قالي علابالك من لي شفتك مزدتش شفت نسا عدت نشوفك غير انتي وجهك وليت نشوفوا في  النسا الكل ، حبك ولالي ادمان ،  راني غير نزيد  نحبك اكثر ، ساعات صح تقلقيني وتهبليني تخرجيني من عقلي بصح نبقى نحبك ونموت عليك . قتلوا ياااااا انا نهبلك . قالي ايه والله راكي تجهليني تخرجيني من ملة محمد ، عندك راسك  خشين فيه الحجر متسمعيش الهدرة . ولسانك أطول منك . بصح نحبك . قتلوا حتى انا نحبك . تحضنتو قتلو آدم عندك شي نهار تسمح فيا  والله نموت كون تخليني . قالي علاه حتى نسمح فيك . قتلوا منعرف هدرت برك . طلعلي راسي خزر معايا قالي ريجا ياك ماكي مخبية عليا والوا . تفكرت المشكلة لي صراتلي مع ولد عمو كريم حبيت نقولوا بصح انا قلت راهي حكاية وفاتت وهو تاب  لربي معندي علاه نقولوا ونجبد حكاية قديمة وندير مشكل جديد لعمري .قتلوا ماني مخبية والوا .