حب في الثانوية

chapitre 40

وصلنا الحومة تاعي . قتلوا هبطني هنا برك قالي ok. ڨارا الطونوبيل ودار ليا حكملي يدي قالي غدوة نهدر مع محمد على الخطبة قتلوا صح ، قالي ايه في اقرب وقت نديرو الخطبة والعرس وقت لي تحبي انتي ،خزر معايا قالي راكي متأكدة بلي قابلة ، قتلوا ايه متأكدة متتصورش قداه فرحانة ،بستو على خدو . ضحك وسكت ومن بعد قالي زيدي خممي مليح باه متندميش من بعد ، قتلوا علاه حتى  نندم . قالي فارق لعمر لي بيناتنا . قتلوا ميهمنيش المهم انا نحبك . باسلي يدي وقالي  وانا نعشق فيك ، قتلوا  انا نروح هيا باي وجيت هابطة . قالي حبسي اعطيني النميرو تاعك من بعد نعيطلك تهزي عليا قتلوا ايه جبد التلفون تاعو وفتحوا لقيتو حاط la  photo  تاعي fond d'écran ، قتلوا يا هادي الصورة تاعي من جبتها . قالي من التلفون تاعك كانت هي لي مصبرتني على فراقك،  قدمت تحضنتو على قوة جهدي وقتلوا نحبك انا .  خرجني من حضنو وطلعلي راسي وحط فمو على فمي باسني على فمي. انا جمدت في بلاصتي متوقعتش بلي راح يبوسني على فمي معرفتش حتى كيفاه نبادلوا على خاطر منعرفش واول مرة واحد يبوسني على فمي  .  بقا يبوس فيا حتى تقطعلي النفس وليت نبعد فيه عليا ، بعد عليا وحط جبهتو على جبهتي وقالي اسمحيلي بصح كنت لازم نديرها . درتلوا براسي ايه وانا وجهي ولى احمر طماطم من الحشمة . اول بوسة ليا حسيت وحد الاحساس جامي جربتو مع آدم كلش عندو نكهة خاصة . بعد عليا وكتب النميرو تاعي عندو وقالي هيا راح الحال قتلوا ايه جيت هابطة قالي حبسي نسيتي حاجة شفت معاه قتلوا واش نسيت . شاورلي بصبعو على خدو قدمت بستو وقتلوا نحبك . خطف بوسة من خدي وقالي نعشق فيك . درتلوا باي وهبطت من الطونوبيل مشيت شوي ومن بعد درت ورايا لقيتو مزال يشوف معايا درتلوا باي رجعلي وكملت مشيت .
وصلت لدار طبطبت فتحتلي ماما الباب ديراكت تحضنتها قتلها ماما راني ميتة بالفرحة حاسة روحي نحلم من قوة ماراني فرحانة منيش قادرة نصدق . قاتلي حبسي حبسي  فهميني وش صرى حتى راكي فرحانة هكدا ، قتلها آدم رجع . حسيتها تفاجئت قاتلي تحكي صح قتلها والله وتلاقيتو . قاتلي كيفاه تلاقيتيه  ، قتلها تلاقيتو في café.لي روحتلوا  ونزيد نفاجأك اكثر قالي بلي هو يحبني وراح  يجي يخطبني راني ما نيش مصدقة . رميت روحي فوق السرير وانا نتفكر فيه كيفاش قالي نحبك ونعشق فيك . حتى قالتلي ماما مستحيل يصرى هاد الشي ، خزرت معاها وقتلها وش قصدك  . قاتلي مستحيل نقبل نمدلك ليه،  راه قريب الدوبل تاع عمرك لاكان ماعلابالكش . ضحكت وقتلها ماما تحكي صح . قاتلي ايه نحكي صح مستحيل نقبل نمدك لواحد قد باباك . وقفت قتلها ماما متهبلنيش آدم يحبني وانا نحبو وش دخلني في عمرو انا المهم هو يحبني . قاتلي درك راكي فرحانة ومن بعد تندمي وانا منوقفش نتفرج عليك حتى تندمي . قتلها شكون لي قالك راح نندم ،انا نحب آدم وهو يحبني ربي يخليك ما توقفيش في طريقنا . قاتلي راني نهدر في مصلحتك راكي في عمرك 18كي تتزوجي درك بعد 10سنين هو يوصل للربعينات وانتي مزالكي في العشرينات وش ديري هداك الوقت، راح  تندمي وتقولي ياريتني تزوجت بواحد من عمري . قتلها حيرتيني بالتخمام تاعك هدا ، آدم راح يجي يخطبني وانت بسيف عليك تقبلي على خاطر انا لي راح نتزوج بيه مش انتي . ضربتني بكف وقاتلي ديجا غير شفتيه رجعتي لصحانية لوجه تاعك . بصح معليش انا نتفاهم معاه جا قعدتي معاه ساعة لعبلك بمخك . هاد الخطبة مستحيل تصرى يا  لوكان نشوفك تموتي قدامي مانقبلش . قتلها ماعندو ما دخلك فيا انا راح نتزوج بآدم بسيف عليك ولا والله نهرب معاه . قاتلي صار هكدا معليش . خرجت من الشمبرة تاعي وقفلت عليا الباب بالمفتاح . بدلت قشي وتكيت في بلاصتي نبكي ماما عمرها ما وقفت معايا على حاجة انا حابتها ديما لازم توقف ضدي مفهمتش علاه . سمعت التلفون تاعي يصوني هزيت بلا حتى ما نشوف النميرو. قلت الوا ، سمعتوا قالي واش حوال البطة تاعي قتلوا  آدم  قالي ايه آدم وشبيه صوتك هكدا  . قتلوا والوا قالي اهدري وشبيك . قتلوا تعاركت مع ماما كيف العادة . قالي علاه حتى تعاركتو . قتلوا قتلها بلي حاب تجي تخطبني . تنهد وقالي ماقبلتش قتلوا ايه ، بصح  انا قتلها مادخلكش فيا تقبلي ولا والله نهرب معاه . عاد يضحك و قالي قولي والله قولتيلها كيف هك قتلوا والله . قالي مادارتلك والوا . ضحكت وقتلوا ضربتني بكف وغلقت عليا في الشمبرة ، قالي تستاهلي قتلوا يا علاه حتى نستاهل . قالي ايه كون جيت انا في بلاصتها والله نعطيك طراحة . وليت نبكي قالي يا عمري  ما تبكي ما والوا مش حق عليك تقوليلها هديك الهدرة . قتلوا بصح هيا ديما توقف ضدي ، ياك  علابالها بلي نحبك نورمالموا هيا لي توقف معايا . قالي يا عمري تحبيني ڨاع هكدا قتلوا  ايه نموت عليك .ضحك و قالي و انا نعشق فيك ومن بعد قالي ،  متكسريش راسك انا نتفاهم مع يماك بصح انتي مبقيتش تصححي وجهك معاها وش تقولك قوليلها ايه وانا ندبر راسي معاها . قتلوا كيما تحب . قالي واش قاعدة ديري قتلوا شربت دوايا وراح نرقد . قالي تعشيتي قتلوا لا قالي علاه متعشيتيش قتلوا ماما قافلة عليا مقدرتش حتى نروح الكوزينة نتعشى . سمعت الباب تاع الشمبرة قاعد يتفتح ، قتلوا وقيلا ماما جابتلي لعشا ، دخلت عليا  ماما  هازة بلاتو  تاع لعشا قاتلي مع من كنتي تهدري قتلها حتى واحد ، شافت التلفون فوق السرير راحت هزاتو لقات لابال مزالت تمشي قالت الوا شكون معايا سمعتوا قالها آدم معاك . انا حطيت يدي على قلبي وقلت ليوم تخلاص عليا مع ماما ندي طريحة تاع الكلاب . سمعتها قاتلوا غدوة نتلاقاك في البلاصة لفلانية قالها ok كوبات عليه . طيشت التلفون فوق السرير . خزرت معايا وقاتلي تحكي معاه في التلفون اه يا الكلبة  قتلها والله ليوم برك وين حكيت معاه . قاتلي معليش غدوة نتفاهم معاه . خرجت وخلاتني . انا غير شفتها خرجت قفلت لباب ورحت نجري  هزيت التلفون وعيطلوا . هز عليا وقالي ها بطة وش دارتلك يماك . قتلوا متقليش بطة . ضحك وقالي علاه والله طالعة عليك وليتي بطة تاع الصح . وقفت  رحت خزرت مع روحي في المراية وقتلوا يعني وليت سمينة بزاف . قالي ايه وليتي سمينة بزاف وضحك . قتلوا وانا راح نبكي يااا آدم راني نحكي صح وليت سمينة بزاف ندير رجيم . قالي لالا  راني نضحك معاك برك بالعكس وليتي حلوة سكر . حشمت سكتت . ضحك وقالي sûr خدودك ولا حمورة طماطم . ضحكت وبدلت الهدرة قتلوا غدوة صح رايح تتلاقى بماما قالي ايه لازم نتفاهم معاها . قتلوا خايفة قالي علاه خايفة ياك انا لي راح نهدر معاها ونقنعها تقبل قتلوا ان شاء الله تقبل برك . قالي ان شاء الله ، هيا انا نخليك تتعشاي وترقدي غدوة صباح نعيطلك قتلوا اوك تصبح على خير . قالي تصبحي على خير وكوبيت .