حب في الثانوية

135

طلت عليا عجوزتي قاتلي آدم مزال ما روح . قتلها مزال راني من قبيل وانا نعيطلوا يصوني وميهزش عليا . قاتلي شوفتي غفات عيني وانا نستنى فيه حطيتوا جا وهو مزال برة . قتلها شفتي كيفاش راه يديرلي في الخلعة من خرج راهي الوحدة تاع الليل ومزال ما دخل ، موالفة نعيطلوا يهز عليا على الأقل يطمني .سمعت صوت المفتاح . خرجنا انا وعجوزتي للكلوار لقيناه داخل قاتلوا عجوزتي وين كنت انت من قبيل وحنا متحيرين عليك علاه متهزش على تلفونك . قالها راني جيت يما صاي . دخلت لشمبرتها قدمت عندو بستوا قتلوا صافا عمري . قالي لاباس وين راهي بنتي . قتلوا ها راني قدامك . تبسم قالي نهدر على بنتي تاع الصح مش انتي . قتلوا صار هكدا معليش اشفا عليها وبنتك راهي راقدة شابعة نوم . راح طل عليها باسها عاود خرج قتلوا نحطلك لعشا قالي لا تعشيت برة ، راح قعد في الصالة لحقتوا . قتلوا آدم وكيفاش راح نديروا دوك . قالي وش راح نديرو راهم يديرو في تحقيقات تاعهم ويبقا كلش مغلوق لافارماسي ولوزين وحتى دراهمي لي في لابونك مجمدين ، نبقاو نعيشوا بلي عندنا حتى يفرج ربي . قتلوا ان شاء الله بصح لازم توكل محامي هو على الأقل يقدر يزرب في التحقيق وادا راك شاك في واحد دارهالك مكرة اشكي بيه. ضحك قالي والله وشكون لي راح يخلصه المحامي يهديك ربي انا نقولك دراهمي مجمدين يعني يا ربي ادا عندنا باه نعيشو وكون نتبعو المحامي ڨاع دراهم يديهم . قتلوا بصح انا دراهمي مزالوا انا نخلصوا المحامي . قالي لا غير مكان لاه هدوك دراهم خليهم بالاك تشد بينا الدنيا اكثر من هكدا متدريش . قتلوا بعيد الشر ربي يجعلها اخر شدة . بصح متخافش راني عاملة حساب لكلشي انت قدم برك وانا وراك بربي ان شاء كلشي يتحل . تبسم قالي اهيه البطة الصغيرة تاعي كبرت وعادت حابة تحليلي مشاكلي . قتلوا باينة راح نرفد عليك ڨاع همومك انت راجلي وحبيبي كي متلقانيش في وقت الشدة وقتاش تلقاني .قالي على هديك هربتي شهر لدار باباك وسمحتي فيا و في بنتك . قتلوا صح انا غلطت كي روحت وخليت بنتي بصح حاجة فوق طاقتي متقدرش تحس بشي لي حسيت بيه فهداك الوقت الله غالب . قالي وقيلا هداك الوقت هزيتي يديك ودعيتي عليا حتى خرجت فيا دعوتك . قتلوا يا لطيف انا ندعي عليك بعكس انا ندعي اي حاجة تجي فيا ومتجيش فيك انت . ضحك قالي صاي راكي غلبتيني ارواحي عندي راني متوحشك موت .قتلوا في شومبرة آدم مش هنا . عاد يضحك بصوت قالي راح نعنقك برك انتي وين راح مخك ، اواه لازم نخاف على روحي منك تخمامك مسوفج . قتلوا يا والله ما تحشم . وقف قالي هيا هيا للشمبرة عندك الحق .
غدوة الصباح على العشرة صدموا علينا نسا عماموا ولافامي تاعوا زعما جاو يسقسوا وش صرا راكم تعرفوا في بلادنا حاجة ما تخفا . انا عدلت روحي وخرجت عندهم سلمت عليهم فوق القلب وقعدت بداو الهدرة مسكين وعين صباتوا محبوش يسكتوا لي يسمع هدرتهم يقول صح كانوا يحبولوا الخير هوما كانوا نهار كامل حاسدينوا . انا جبتهالهم من لخر قتلهم قل ما يصيبنا الا ما كتب الله لنا ، يعني لا راهي عين لا والوا ربي اي عبد يبتليه والله ادا أحب عبده ابتلاه وحنا رانا صابرين الحمد الله . نطقت مرت عمو الصغير مطلعة حاجبها باينة راهي تتمخزز بينا قاتلي بصح مش ساهلة من كنتوا عايشين الله الله تولوا عشا ليلة متسعوهوش ، انا من راي كون حتى يروح يبريكولي في كاش خدمة اخرى حتى يفرج ربي . قتلها شكون لي قالك عشا ليلة منسعوهوش الحمد الله عندنا الخير و البركة . سكتت جامي شفت عبادة كيما هادوا جايين يشمتوا ديراكت . في العشية روحت لداري وادم مسكين غير يجري من محامي لمحامي باه يشوفلوا القضية ، و المشكل ضهر صح عندو غلطات في الخدمة يعني لحكاية زادت كبرت اكثر وعاشات في المحاكم والشروعات . يعني لي شكا بيه كان علابالو بكلش في خدمة وش عندو وش معندوش هنا وين زاد تأكد بلي لي شكا بيه واحد يعرفوا ولا كان خدام عندو وهو كان علابالو بصح محبش يقولي شكون . من وراها بشهرين باه خرج الحكم غرامة مالية كبيرة وزادو قالوالوا الدولة صاي مبقاتش تمولك المشروع تاعك . بصح الحمد الله هكدا ولا اكثر كان قادر يباصي . عطاولوا مهلة تاع شهر قالولوا باه تخلص الغرامة تاعك . انا علاقتي بأدم رجعت كيما قبل يمكن لي صرا نساه في المشاكل لي بيناتنا ريتاج عاد عمرها قريب ستة شهر كبرت و بدات تحبوا روحها في باباها غير تشوفوا تلصق فيه حتى هو غير شوفها ينسى كلشي . في ليل سمعت الباب تفتح عرفتوا جا . حطيت ريتاج من حجري قتلها روحي لبابا روحي عند آدم . بدات تلاغي وتحبوا باه تروح عندو . غير شافها هزها في يدو يبوس فيها ويرميها لفوق وهيا تضحك وتلاغي قريب راح تنطق . قتلوا عندك طيحها قالي مطيحتكش انتي الدوبل تاعها سبعين مرة راح نطيح هادي الفلوسة وقفت بستوا قتلوا لاباس قالي لاباس وش درتي ليوم في الامتحان .قتلوا خدمت مليح بربي ان شاء الله نطلع العام . قالي صحيتي ،ياك صاي كملتي ليوم لخر .قتلوا ايه تهنيت . قعد قالي أيا الحمد الله على الأقل تعودي تفوتي نهار مع ريتاج كشما توالفك شوي ،هيا راني جعان ميت حطي لعشا . روحت وجدت في الكوزينة وعيطتلوا جا . قعدنا نتعشاو قتلوا شحال لايمت دراهم ليوم . قالي وصلوا للنص برك حتى طونوبيل تاعك لي شريتهالك كي بعتها طايح سومة راكي تعرفي السوق راه طايح وزيد كي مزروب مقدرتش نساوم فيها لي جا لول بعتهالوا ديراكت . قتلوا والباقي من راح تكملهم انت . قالي والله منعرف بالاك نتسلف من عند صحابي ، متكسريش راسك دوك نشوف مين نجيب . قتلوا ذهب لي عندي كون نبيعوا نضن يجيب السومة لي بقات . ضحك قالي وشنو تبيعي ذهبك باه تمديلي حقوا والله لا ربحت . قتلوا وش فيها خير من تروح تتسلف من عند الغريب ، ديجا ياك غير راه مخبي في الخزانة لا نلبسو لا والوا . قالي غير مكانلاه وبدلي علينا الموضوع قتلك دوك ندبر راسي . قتلوا مين دبر راسك آدم تروح تتسلف كيف كيف راح تبقى يسالوك الناس . قالي اريج انتي دوك علاه تكسري في راسك وفي راسي قتلك حكاية تاع تبيعي ذهبك انسايها كيفاش هادي ذهب دارهولك باباك من بعد انا نجي نبيعوا وندي حقوا . قتلوا راني سقسيت بابا وقالي بيعيه على روحك أصلا هادي هيا فائدة الذهب ،الحدايد لشدايد . خبط المغرف من يدو ووقف يعيط قالي كيفاش تروحي تسقسي باباك بلا ما تقوليلي لاه طلبتك انا ولا قتلك بيعيه . حتى انا وقفت قتلوا ما لا وش محوسني ندير وانا نشوف فيك راح تتسلف من عند الناس آدم ، انا مرتك وواجبي نوقف معاك بسيف عليك . قالي راني قتلك مدخليش ##روحك في مشاكلي متفهميش انتي تلهاي ببنتك و اخطي راسي . قتلوا منفهمش انا منقبلش راجلي يروح يتسلف من عند الناس ، علابالك هادوا لي راح تتسلف من عندهم من غدوة يذلوك بيهم وزعما في حسابك انت راح يبقاو يستناوك ، غير يفوتوا ايمات تلقاهم يطبطبوا عليك يحوسوا على حقهم ، يا سيدي احسبهم راك متسلفهم من عندي علاه مكبرها الحكاية. قالي لا اله الا الله يا بنت الناس افهمي ، دوك كي نبيعلك ذهبك باباك وش يقول عليا والناس وش يقولوا عليا حبيتي ضحكي عليا الناس انتي . قتلوا آدم وش دخلنا في الناس أصلا وين راح يسمعوا راك غير دير في سبايب وبابا والله هو أصلا لي قالي كون تبيعيه حتى يفرج ربي راهوا علابالو بيك وش تسوى ، دوك ترجع لخدمتك وترجعهولي نورمال ، خير ما تروح تتسلف من عند لي يسوى ولي ميسواش . سكت كشغل بدا يقتنع بالفكرة . قتلوا هيا قول ايه خلي من غدوة نروحوا نبيعوه وخلص عليك هاد الغرامة وخلي ترجع لخدمتك . تنهد قالي لعمال على ربي سبحانو . عنقني قالي عمري ننسا وقفتك معايا . ضحكت قتلوا يا عمري انا شحال عندي من آدم انا عندي غير انت حياتي ودنيتي كي منوقفش معاك مع من نوقف ديجا هادي شي ما يجي والوا قدام وقفاتك معايا . قالي مغلطتش كي قلت بلي غير انتي لي نديرك مرتي . ناضت ريتاج تبكي في بوسات تاعها وتهز في يديها لآدم زعما هزني . قتلوا هاد الطفلة نحسها متحبش كي تشوفنا مع بعض وتبدا تسمط علينا وتبكي . ضحك قالي اريج اخطي بنتي راني نقتلك علجالها راهي كبدتي هادي . قتلوا اممم صح بنتك جبتها وحدك بالبلوثوت .