حب في الثانوية

chapitre 42

في ليل كنت قاعدة في الشمبرة تاعي.  نكونيكتي مع شروق وجلال ، حتى نسمع في خويا يعيطلي من الصالة ، كي سمعتو تخلعت رميت التلفون ، قلت سير آدم حكى معاه . وقفت قابلت لمراية نشجع في روحي ، سمعتو عيطلي مرة أخرى خرجت نجري حتى وصلت الباب تاع الصالة تنفست مليح وانا راح نموت من الخلعة . دخلت قتلوا نعم محمد عيطلي ، قالي ايه ارواحي اقعدي عندي هدرة معاك . قعدت مقابلاتو وقتلوا غير الخير قالي اصبري حتى يجي بابا ونحكي . قلت  في قلبي خلاة عليا  زيد بابا ثاني ، حاسة قلبي راح يحبس وانا نستنى في بابا يجي  دقيقة ولات فيها ساعة . دخل بابا وقعد قدامي جبدني لحضنو قالي واش حوال بنتي قتلوا لباس . قالوا محمد باب علابالك  ليوم راهم خطبوني في اريج . قالوا بابا شكون هدا قالوا محمد راك تعرفو آدم صاحبي  ، بابا خزر مع ماما وتبسم ومن بعد قالوا يشرفنا يكون نسيبنا بصح الراي لول ولخر يكون لاريج . انا تمنيت للأرض تنشق وتبلعني من الحشمة . خزر معايا وقالي قولي رايك . انا حكمتني البكية من الحشمة وش راح نقولو وهم كل يخزرو معايا . شفت مع ماما تاع عاونيني .  فهمتني  ماما و قاتلوا السكوت علامات الرضا باينة راهي قابلة . ضحك بابا وقالي ملا ربي يتمم على خير . قال لمحمد قولوا يجي يخطب  مع عايلتوا حسب الاصول ونتفاهموا على الشروط ومن بعد ساهل . قالوا محمد ايه من بعد نقولوا . هاد الهدرة كاملة وانا قاعدة حاسة روحي غرقت في العرق من الحشمة . ناضت ماما راحت للكوزينة وسمعتها تعيطلي قلت وأخيرا راح نوض طلعلي السكر   من الحشمة. رحت عندها تحضنتني قاتلي مبروك على بنتي . حطيت معاها العشاء وقعدنا تعشينا وانا كليت غير زوج لقمات وقلتلهم بصحتكم قالي بابا كملي عشاك قتلوا لالا شبعت   ورحت لشمبرة تاعي ، نسمع فيهم يضحكو وماما  قالتلهم راهي حاشمة . هزيت التلفون لقيت آدم عيطلي ثلاث خطرات وما سمعتوش وليت عاودتلوا . هز عليا وقالي ها بطة من قبيل وانا نعيطلك مهزتيش . قتلوا ما سمعتوش كنت في الصالة مع بابا ومحمد . قالي صاي راني حكيت مع محمد . قتلوا ايه راه قال لبابا . قالي وباباك وش قال قتلوا قال يشرفنا يكون نسيبنا ، و راه قابل حسيتوا فرح . تنهد وقالي الحمد الله ياربي . سمانة الجاية  نجيب يما وعمامي ونجي نخطب ونتفاهموا على الشروط . قتلوا ايه حتى بابا قال هكدا قالي ايه لازم . بقينا نحكيوا شوي ومنبعد كوبينا .
فاتت سمانة وتفاهم مع خويا بلي بالخميس يجيب يماه وعماموا ويجي  .  ماما جابتها سمانة كاملة وهي توجد ليا ولضياف لي راح يجيو وانا حكمني الستراس تقول راح نعدي الباك ،  سمانة كاملة مش قادرة نرقد . نهار الاربعاء هبطت مع ماما وشروق شريت قفطان سامبل في الروز  على شكل تاع الحوتة كيما قاتلي شروق باه يبينلك لاطاي تاعك ههه.   ومكياج وصابوا  تاع الطالو  وdes cadeau للضياف .

ليلة لخميس بايتة نايضة . عيطلي آدم . قتلوا والله راح نموت بالخوف ، ضحك وقالي علاه خايفة قتلوا من لافامي تاعك تخيل ما نعجبهمش . قالي علاه حتى متعجبهمش وانت كيف لقمر ، ديجا  نقولك حاجة مدخلك في حتى واحد المهم انا نموت عليك ضحكت وقتلوا حتى انا . قتلوا حقا شكون لي راح يجي . قالي يما ودنيا وخالتي وبنتها وزوج نسا عمومي برك . قتلوا ايه مليح . بقينا  نحكيوا حتى ثلاتة تاع الصباح . من بعد هو رقد وانا قعدت نخمم ونتخيل كيفاه راح يكون نهار تاع غدوة .
غفيت على الستة تاع الصباح على السبعة ونص نسمع في لاصونات تاع الباب . فتح خويا لقاها شروق . دخلت ديراكت للشمبرة تاعي هزت عليا لغطا قاتلي نوضي نوضي راه راح الحال ، قتلها يابنتي علاه مبكرة على الصباح تاع ربي . قاتلي لازم نوجدوا الحالة من درك وياربي كان كفانا الوقت . نضت بدينا نوجدوا في الصالة وصينية تاع القاطو وسيقنا الدنيا مليح طلعناها تشعل . وصلت 11 قاتلي ماما لازم تروحي توجدي روحك . دخلت دوشت وجبدتلي شروق شعري وبلاكتهولي .من بعد دارتلي مكياج سامبل في الروز ، لبست القفطان لي جاني مع لاطاي قدقد وليت نبان فيه دبدوبة  ولبست الصابوا . خزرت مع روحي جيت نهبل ملڨري سمرة بصح طلع عليا لون الغوز تاع القفطان مع المكياج قريب معرفتش روحي.  بصح هكداك وبقيت موسوسة لا مانعجبهمش . على خاطر لافامي تاعو كل جايين بيض وملاح  في زين . على الوحدة عيطلي قالي رانا قريب نجيو راكي واجدة قتلوا واجدة بصح راح نموت بالخلعة . قالي كلمي روحك معندك علاه تتخلعي ان شاء الله يفوت كلش مليح قتلوا أن شاء الله .
على السعتين سمعت صوت تاع الطوموبيلات . طليت على التاقة لقيتهم هم جاو . خرجتلهم ماما  ومرت عمي على خاطر ماقلنا لحتى واحد من غير مرت عمي . دخلوهم لدار  النسا قعدو وحدهم ورجال وحدهم . انا معايا شروق غير تكلمي فيا وانا حاكمة روحي بالسيف .قعدو شوي هك ومن بعد سمعتهم يسقسيو في ماما عليا . جاتني ماما قاتلي راهم يسقسيو عليك . جيبي القهوة وارواحي . قتلها ماما خايفة قاتلي معندك علاه تخافي تصرفي على طبيعتك ، هيا بنتي الفحلة . راهم يستناو  فيك . هي راحتلهم وانا رحت الكوزينة مع شروق عطاتلي الصينية تاع القهوة ، هزيتها وقريت المعوذات. شوي ادعية ، ورحت للصالة مع دخلت لقيتهم ڨاع يخزرو معايا، قلت بسم الله وكملت دخلت حطيت الصينية فوق الطابلة ورحت نسلم عليهم بالوحدة من الكبيرة حتى الصغيرة كي كملت رحت قعدت بحدا ماما . اول وحدة نطقت هي خالتو لي شفتها في العرس ، قاتلي بسم الله ما شاء الله عليك قمر14 . تبسمت معها وقتلها يعيشك خالتي وهبطت راسي حاشمة . زيد قاتلي يماه  ما شاء الله على مرت ولدي تقول للقمر نوض نقعد في بلاصتك ربي يحفظك من العين  ، حسيتها فرحانة بيا صح . انا كي شفتها فرحانة باه كملت فرحتي على  خاطر كنت خايفة لا تكون مش قابلة قتلها ربي يخليك .  بصح نسا عمامو في زوج قعدو ساكتين ما قالوا حتى كلمة باين فيهم واعرين لقباحة تقطر من وجهم. قاتلي خالتو اسمها ياسمينة . هادي بنتي فلة راهي نتيجتكم في العمر  . خزرت مع بنتها باينة من وجها عاقلة قتلها متشرفين فلة . بقاو يحكيو مع ماما ومرت عمي وانا من نطلع راسي نلقاهم يخزرو معايا بصح نسا عمامو تقول عليهم جايين بسيف عليهم يقولوا كلمة ويسكتوا .
جات دنيا قعدت بجنبي هي وشروق وزيد جات بنت خالتو قعدت معانا بقينا نهدرو بالعقل على القراية . حتى نطقت مرت عمو  الصغير تعود في الربعينات . قاتلي اريج مش كبير عليك آدم شوي حنا حسبناك عمرك في العشرينات مش 18. انا حسيت لعرق البارد هبط عليا ما لقيت وش نجاوبها  حشمتني. نطقتلها خالتوا قتلها انا راجلي كبير عليا ب15 عام ورانا عايشين انا وياه كي الزبدة والعسل  وعشرتنا تاع 20 سنة . قتلها يماه ايه انا في عمرها كنت راني مزوجة وبداري . قلت في قلبي مزية جاوبوا في بلاصتي . جا خويا عيط لماما . راحت شوي ورجعت قتلنا صاي الرجال راهم تفاهموا و الخطبة والفاتحة السمانة الجاية . ناضوا يزغرتو ويباركولي وانا من الفرحة حسيت الدمعة راح تهبطلي . شوي وسمعت خويا عيطلي . خرجتلوا سلم عليا وتحضني وقالي مبروك عليك ، قتلوا يبارك فيك خويا لعزيز قالي  هيا معايا باه يشوفك  . مفقتش مع روحي قتلوا علاه حتى يشوفني ياك يعرفني . ضحك وقالي من حقو يشوفك هادي الشوفة الشرعية قتلوا ايه  دقيقة برك ندير الخمار ونجي، قعد يضحك عليا مفهمتش علاه . حطيت الخمار على راسي غطيت شعري ورقبتي ، ودخلت مع خويا للصالة لي كان قاعد فيها كان وحدوا .دخلت وانا مهبطة راسي وراح نموت من الحشمة تقول اول مرة راح يشوفني . دخلني خويا خرج وقال لآدم خمس دقايق برك .ضحك آدم  وقالوا ايه علابالي .

قعدت في الفوتاي مقابلاتو بقيت مهبطة راسي حاشمة قالي cv، قتلوا الحمد الله ، جاء قعد بحدايا قالي علابالك جيتي تهبلي . خزرت معاه وانا نلعب بصباعي كيف الصغار  قتلوا صح ، باسني على خدي وقالي ايه صح جيتي كيف العسلة . زاد قرب عندي وقالي علابالك دلالك هدا زاد هبلني عليك اكثر . قتلوا بعد دوك يجي محمد . قالي يجي على روحوا  راني نبوس في مرتي واحد ما يسالني قتلوا مزلت ما وليتش مرتك  . ضحك وقالي نهار تولي مرتي ما تلومينيش ، المهم  قوليلي  واش حابة يكون  شرطك انا تفاهمت مع باباك على تاج تاع دهب . قتلوا يا بزاف ديجا انا منحبش الدهب . قالي لازم الدهب ، قوليلي انتي وش حابة تزيدي ، قتلوا منحب نزيد والوا المهم انت . قالي يا عمري على البطة تاعي تموت عليا .ضحكت ، قالي  قوليلي تحبي دارك وحدك ولا مع يما بصح دارك وحدك ثاني . قتلوا مفهمتش . قالي يعني انا عندي زوج ديار وحدة بعيدة شوي وحدة بانيها فوق دار بابا . قتلوا لي مع يماك خير انا منحبش نقعد وحدي . قالي كيما يبغي حبيبي . سمعت صوت تاع المشي باقي ويقرب قتلوا بعد بعد راه جا محمد .قالي يجي على روحوا انا منبعدش . وهز يدو حطها ورا ظهري . قتلوا آدم تعيش حبيبي متحشمنيش قداموا بعد . قالي نبعد بصح بشرط .قتلوا واشنوا الشرط . قالي ازربي بوسيني وشاورلي على خدوا .بستوا على خدوا  بالخف وبعدت عليه  بصح بقات لطراس تاع الغوجالافغ في خدوا عاودت قدمت بقيت نمسحلوا فيها بيدي . قدم باسني على فمي بزربة قالي  راني نعشق فيك .ووقف رجع لبلاصتو مقابلني . دخل خويا قالوا صاي قالوا آدم ايه ، خزر آدم معايا وقالي قوليلهم باه نروحو هداك هو الوقت قتلوا ايه  كي جيت خارجة حطلي صوارد في يدي ، خزرت مع خويا حاشمة منو تبسم معايا وليت حكمتهم وخرجت . رحت قتلهم . كي جاو خارجين عطيتهم لي كادو تاعهم ، بقا الكادو تاع أدم .كي عاد خارج فات على الكوزينة عيطلوا دخل قتلوا هاك قالي واشنوا هدا قتلوا كادو تاعك وقاطوا ليك  . باسني على خشمي قالي نحبك ، قتلوا حتى انا ، قالي هيا من بعد نعيطلك ،وخرج كي جا راح يركب   في طموبيل طليت عليه على  درتلوا باي .رجعهالي وركب .