حب في الثانوية

136

لبنات لي تقرى تصويت على النجمة طلعولي لقصة ❤️❤️❤️

ليوم حنة دنيا لي في دار بعد ما خطبها  لي جا لآدم في المسجد وقبلت بيه مطولوش بزاف وليوم حنتها غدوة عرسها  يجيبولها لعطية تاعها للصال من  بعد يدوها ربي يهنيها ، واقفة مع بنت خالتها وبنات عمها نوجدو في لاتاي و الحلاوات و القهوة للسهرية بعد ما عشينا الناس ، راح نموت بالتعب  عندي نهارين مرقدتش من خدمة تاع القاطو مع القراية وميموار  ووزيد كنت نعاون في دنيا باه تلم جهازها ليوم وين داوه كرهت حابة غير نحط راسي ونرقد حتى سمانة كاملة .ومن هدا كامل عذابي مع ريتاج هاد الطفلة خرجتلي عدوة ديراكت هبلتني ما خلات حتى عقل في راسي القباحة  صوفة طايرة لرض متحكمهاش نهار كامل وهيا تجري وتفسد وتكسر   ،بصح اكثر حاجة معدبتني بيها هيا كي تنكرني قدام الناس كامل . نسمع في صوتها تبكي على طول صوتها وتزيد تلحن في البكية حتى لي مسمعش يسمع . خرجت نجري عندها خاطر خليتها تلعب مع ولاد لافامي في الهول . كي خرجت لقيتها تبكي خاطر حابة تدخل تقعد عند دنيا وهيا ادا دخلت عندها راح تهبلها معاها  . هبطت عندها قتلها طبوزة ماما علاه راكي تبكي هكدا ، ياك قتلك عمتو ليوم عروسة ومتقدريش تبقاي معاها . قاتلي لا نبقى مع عموتي انا .ورجعت تبكي اكثر من لول قتلها ياريتاج علاه راكي ديريلي هكدا اسكتي راكي بهدلتي بيا شوفي النسا كيفاش يتفرجو فينا  هيا نهزك ونعطيك تلعبي بالتلفون .  بقيت غير نلحلح بيها كشما تسكت وهيا غير كلمت لا في فمها بهدلت بيا وخلاص . النسا كل وحدة تسكت فيها وهيا فحمت وحلفت لا تسكت انا بقيت في نص حوايجي معاها يا ربي بنتي ومحبتش تسكت عندي  وزيد نسا لي تشوفها تبكي تقولي سكتي بنتك راهي مش مليح ليها لبكا بزاف ياك انتي يماها هزيها وسكتيها . خليتها تبكي ودخلت للشمبرة تاع دنيا لقيتها مزال مع الحفافة تمكيلها قاتلي جيبيها برك عندي دوك نحكمها في حجري قتلها لا صاي دوك نسكتها انتي كملي وجدي روحك برك . شافت عينيا مغرغرين بالدموع قاتلي اريج وش كاين وشبيك تبكي قتلها والوا وين راه تلفوني برك من قبيل راني نحوس عليه . كان عندها مدتهولي . حكمتوا عليها وخرجت طلعت لداري لفوق وريتاج مزال فاحمة تبكي مش تقول  نحكمها نضربها نعوقها دوك . طلعت لدار لفوق وعيطت لادم . هز عليا قالي وي . قتلوا آدم ارواح هز عليا بنتك لا نقتلها ليوم ارواح اديها عليا . قالي وشبيك وش بيها ريتاج . نضت نعيط قتلوا بنتك هبلتني ارواح اديها عليا راهي محبتش تسكت . قالي وين نديها انتي هبلتي البرد يقطع برة باه تبات مريضة شوفي كي ديري سكتيها .  رجعت نبكي قتلوا ميهمنيش ارواح اديها عليا راهي بهدلت بيا محبتش تسكت ضحكت عليا الناس حتى عادوا يقوليلي بنتك متسكتش عندك .قالي قولي ليما تحكمها برك راه برد برة تمرض.  قتلوا شكون لي راه لاتي بيها يما راهي مع النسا يا ربي توقف على حنة دنيا وانا والله راح نطيح من وقفتي آدم ارواح اديها ولا والله نطلعها للدار ونقعد في الدار لفوق . سمعتوا قالي خلاص صاي دوك نجي نديها لبسيلها الفيستة تاعها . كوبيت وهبطت الفيسة تاعها لقيتها قاعدة في حجر مرا من معارفهم وتشهق بالبكا بصح بدات تسكت عند المرأ .  زادت غاضني الحال اكثر انا محبتش تسكت عندي وسكتت عند البرانية . لبستلها فيستتها وهزيتها في يدي خرجت قدام الباب كانو دايرين خيمة زايدة على النسا باه ميبانوش ادا فتحو الباب بقيت نستنى فيه حتى شفتوا جا . قدم ديراكت حكمها عليا قالي وشبيها وش دارت وش صرالها حتى بكات هكدا شوفي وجها راح يطرشق من لبكا . قتلوا منعرف عليها احكمها حتى نكمل متزيدش تجيبها عندي . جيت داخلة حكمني من يدي قالي وشبيك انتي علاه راكي تبكي ثاني . قتلوا والوا . قالي كيفاش والوا علاه راكي تبكي  . كملت في البكا حتى قدمني ليه وعنقني قالي يا عمري انا دوك نسكتك انتي ولا بنتك علاش لبكا هدا كامل. قتلوا بهدلت بيا قدام الناس حتى نسا قريب يضحكو عليا.  قالي يا روحي متكبريهاش هكدا  لولاد الصغار كل هكدا في العراس يعودوا يبكوا . قتلوا بصح محبتش تسكت عندي . قالي خلاص هيا امسحي دموعك من بعد ونحكو  . مسحت دموعي وبعدت عليه شاف معايا قالي يا عمري على الحنينة تاعي اي حاجة تبكيها . ضحكت قالي والله ليوم راكي  زلة اكثر من اللازم  ملڨري  راكي تعبانة بزاف . قتلوا بزاف حابة غير نعنقك ونرقد  وشاورتلوا على ريتاج وقتلوا وهاد السوسة  نرموها في كاش بلاصة ونبقاو غير انا وياك.وهيا كي عرفتني نهدر عليها عنقاتوا وتعملي هاك وهاك بحواجبها تزكر فيا وهو ميت بالضحك قالي شوفي ضرتك كيفاش راهي معنقتني . قتلوا متزيدش عليا آدم والله أصلا انت لي دللتها وانا حصلت فيها متخاف حتى من واحد قالي خلاص دوك انا نتفاهم معاها  مش هكا طبوزة .دارتلوا براسها ايه . قالها هيا ديري بوسة لماما . دارتلوا براسها لا قاتلوا نو. قتلها معليش اشفاي عليها  . قالي ملا هيا راني رايح كشما تسحقو عيطولي. قتلوا ايه باي تهلا فيها ومتقعدش في البرد قالي علابالي . قتلوا استنا كملت قفلتلوا الفاست تاعو قتلوا ياك تعشيت قالي ايه تعشيت وانتي قتلوا من بعد وناكل انا راني حابة غير نرقد . قالي صاي ملا غير يكملوا اطلعي لدار لفوق وارقدي  غير مكان لاه تقوليلي نسهر معاهم كيما لبارح راكي رايحة دوخي من تعب . بستوا على خدوا قتلوا علابالي هيا باي . هما راحوا وانا دخلت كملت مع النسا نسربي ونز ونحط ومسلاني قريب يتكسر عليا من وراها  دخلت دنيا باه يديرولها الحنة فاتت هايلة كلشي بالطبع ربي يهنيها حتى هيا تستاهل ملڨرب تمنيت يكون مكتوبها مع محمد خويا بصح مكتبش ربي حتى هو راح يخطب وحدة تعرف عليها ربي يسهللهم للزوج . قريب الوحدة تاع الليل باه راحوا الجيران واللافامي بداو يتعبوا كل وحدة حكمت بلاصة وقعدت وطبعا الشغل كل طاح على ضهري بصفتي كنتهم ومرت وليدهم لازم لي انا لي نهمبر على جدهم .ما جيت نفرز الكوزينة صاي حبست رجليا حسيتهم تقصوا عليا . نسمع فيهم بلي جاعوا وحابيت يطيبوه حاجة  يكملوا يسهروا بيها نحيت الطابلية من مسلاني رميتها والله ما نزيد نمس حاجة . جيت طالعة . لاقاتني مرت عمو في هول قاتلي رانا رايحين نطيبوا كسرة . قتلها روحي راني كملت فرزتها قاتلي ارواحي حتى انتي معانا باه نكملوا بلخف كي نتعانوا .كنت راح نقولها علاش معاونتونيش كي كنت وحدي نغسل  . بصح كي شفت عجوزتي سكتت ودخلت معاهم هما يعجنوا وانا نطيبلهم لمزيا ما كاش السخانة . بقينا هكدا حتى سمعت صوت آدم يهدر ويسقسي عليا . من عيطلي ريجا خرجت عندو . قالي مزالكي نايضة لدوك راكي راح دوخي من السهر .قتلوا كنت نعاون فيهم . قالي شدي ريتاج طلعيها ترقد في بلاصتها لفوق دوك نجي .حكمتها عليه قالي ياالله اطلعي احكمي بلاصتك متزيديش تهبطي . انا طلعت وهو خرج . حكمت بلاصتي بعد ما حطيت ريتاج في سريرها ودوشت من التعب . سمعتوا دخل قتلوا دومي جيت  . قالي جيت. دخل عندي لشمبرة درتلوا بيدي ارواح . قعد بجنبي في السرير رميت روحي في حضنوا. قتلوا يا على ديك الراحة ، سمانة سمانة يا عبادة الله مقدرتش نرقد مع راجلي . ضحك قتلوا والله غير توحشت نرقد في حضنك وتخربلي في شعري ،كل ليلة كل ما  نجي نطلع يحكموني ويقوللولي باتي معانا نسهرو ، قريب راح  ننطق ونقولهم راني حابة نرقد عند راجلي . قالي وراجلك لي راكي تهدري عليه حاب يشوفك كيف ما شافك قبيل بهديك اللبسة والمكياج . قتلوا يا آدم والله ما راني قادرة ليلة بصح وعد غدوة نفوتوها كيف ليلة عرسنا وش رايك . جا راح يهدر سمعت صوت ريتاج تبكي قتلوا ادا خلاتنا الضرة تاعي . ضحك قالي نجيبها ونجي. قتلوا خليها ثم راك ولفتها ترقد غير بيناتنا راهي كبرت . قالي وين كبرت الطفلة راهي غير عام ونص  . قتلوا لا راهي توالف والله ديجا اي حاجة تشوفها تهزها ودير كيفها . ضحك قالي الليلة برك مسكينة راهي تخاف وحدها . قتلوا روح روح ليها أصلا انت تموت عليها واريج بالبحر عليها باينة خاطر حبيبتك هديك وانا عدوتكم . قطعلي الهدرة اريج راهي زوج تاع ليل مش وقت الكاسيطة تاعك تاع كل يوم خلي غدوة الصباح وعاوديها ، ديجا ارقدي ياك راكي تعبانة عينيك راهم يتغمضو . درتلوا بصبعي لا قتلوا حتى تجي باه نرقد عندك . تبسم وراح جاب ريتاج هيا في جنب وانا في جنب وهو في وسطنا اجمل رقدة .