حب في الثانوية

109

قتلوا  آدم نوض شوف شكون الباب  راه  يطبطب كمل راقد ما فطنش ، وليت لبست غوب وجيت خارجة باه نفتح باب ، لقيتوا  طلع راسوا شاف فيا قالي  اي اي حبسي وين رايحة قتلوا الباب من قبيل وهو يطبطب راح نفتح .قالي تتحركي نكسرلك رجلك من جبتيها هادي الباب يطبطب تروحي تفتحي .قتلوا ملا شكون راح يفتح انت من قبيل وانا نوض فيك محبيتش تنوض . قالي مدام انا ما فتتحتش انتي  علاه تلوحي في روحك ورايحة تفتحي . قتلوا منفتحوش نخلوهم هكدا قدام الباب . قالي ايه وتزيدي تتلاحي للباب تشوفي وش ندير فيك .قتلوا وش فيها كي نفتح الباب ديجا باينة يما هي لي جات . قالي يما مش يما انتي متفتحيش الباب وصاي كون يكسروه بالطبطيب متفتحيش  مفهوم .قتلوا ايه . وقف راح يفتح وانا وجدت روحي لبست .شوي جا عندي قالي يما تسقسي عليك قتلوا ايه اني جاية . خرجت عندهم شوي لافامي تاعهم مع ماما وخالاتي وعمتي ، سلمت عليهم وقعدت معاهم   حتا روحوا .رجعت تكسلت في السرير قالي واش راح ترجعي ترقدي قتلوا ايه تعبانة قالي ولغدا كيفاش منتغداوش ولا واش من نهارك لول راح تخليني للشر .قتلوا الكوزينة تعرفها روح طيب وحدك انا تعبانة وزيد مراكش تشوف في السخانة كيفاش ندخل الكوزينة نتحرق . قالي شوفي باه نتفاهمو العقلية هادي يدخل الرمضان غير نحيها انا في رمضان نحب كلش قدقد وزيد  يحكم فيا الدخان والقهوة تتحملي وتسكتي . قتلوا باينة راح نسوفري معاك وانا نقول يما علاه حابة نتزوجوا قبل الرمضان باه تتهنى منك وانا نحصل فيك . قالي راجلك تحصلي وتحملي وانتي غالقة فمك . قتلوا باينة نحمل حبيبي شكون عندي من غيرك . قالي على هادي الهدرة سمانة الجاية راح نفتح لافارمسي تاعك .  وقفت قتلوا قول والله . قالي والله وادا تحبي تخدمي فيها راهي تستنى فيك نجيبلك وحدة اونسيا تعلمك شهر وصاي . تحضنتوا يا عمري شحال نحبك . قالي وانا نموت عليك . بعدني عليه قالي بصح نحبك فحلة وقافزة واحد ما يفوتها عليك ادا مكونتيش واقفة على روحك راح يكلحوك . قتلوا لا تهنى هكداك متخافش عليا واحد ما يفوتها عليا . قالي نجربك ونشوفوا بصح ترجع القراية تولي القراية هي لولة نحبك ترجعي تقراي كيما قبل منسحقش أقل من 14 معدل. ضحكت قتلوا تحكي صح شكون راح يدي 14 في الجامعة راك تتمسخر . قالي انا كنت نديها كي كنت نقرى .بستوا على خدوا قتلوا علابالي أصلا انت مرفوع عليك القلم . شاف معايا تاع منيتك قالي علاه تشوفي فيا مهبول تقولي مرفوع عليك القلم .قتلوا لا خاطر انت مميز في كلشي يعني انت أصلا كنت القدوة تاعي في القراية سيرتوا كي نسمعك تهدر بالفرونسي ولا لونقلي نقول يا ريت نولي نهدر كيفك . تبسم قالي هادي برك بربي ان شاء الله نعلمك تولي تهدري كيفي وخير مني ادا كتب ربي . قتلوا ان شاء الله ، بصح قولي ادا كتب ربي وفتحنا لافارمسي ومشات الخدمة هدوك الدراهم وش نديرو بيهم . قالي دبري راسك فيهم هدوك تاوعك وش تحبي ديري بيهم ديري . قتلوا بصح في الحق كلشي تاعك . قالي وانا قتلك راهم تاوعك تصرفي فيهم كيما تبغي بصح متفسديش مالقري علابالي بيك مشحاحة بصح لازم نوصيك دراهم الحلال تاعبين عليهم منفسدوهمش في حوايج ماعندهم حتى معنى . قتلوا علابالي ديجا قررت نخبيهم يجي نهار ونحتاجوهم . قالي كيما تحبي . فاتت سمانة انا وياه غير في الدار نخرجوا ساعات لعشية نحوسوا ونرجعوا وفي هاد السمانة وجدنا  الفارماسي ديكوريتها بالاخضر والوردي ودرت الرخصة وحطلي فيها الدوا وزاد  بدا يدخل في الخدامين بصح شرط يكونوا غير بنات  وحدة فيهم كبيرة عندها خبرة باه تعلمني كيفاش نخدم . جا نهار الافتتاح صبحت فرحانة متحمسة اكثر منو لبست غوب ساتان والطالوا ودرت مكياج خفيف وهو  لبس كوستيم وكي عادة جا يهبل فات نهار هايل مشا كلش كيما خممنا . عاد كل يوم يوصلني الصباح وهو يروح يخدم نبقى مع الخدامين نتعلم منهم ملڨري قالي مداصريهمش عليك وخلي بيناتكم القدر بصح  انا من طبعي  نحب الجمايع والحكايات تصاحبت معاهم كاملين . يجي يروحني وقت الغدا ويرجعني وهكدا فاتوا ليمات روتين بديت نوالف بيه عاد وقتي ديما معمر وديما مشغولة بصح آدم هو اولويتي غير نروح للدار نطيبلوا الماكلة لي يبغيها في الليل نسهر معاه منرقدش حتى يرقد هو . بقاو نهارين على الرمضان قتلوا نروحوا نشريو مصروف خرجنا في العشية شرينا كلشي ورجعنا . في الصباح قتلوا منروحش ليوم راح نبقى في الدار ندير ميناج باه يدخل عليا رمضان والدار نقية هكدا والفت في دارنا . قالي حتى انا منيش قادر نروح ليوم رجع للشمبرة راح يرقد . قتلوا  منيتك راح ترجع ترقد هيا عاوني في الميناج . قالي تسمى انا قعدت حبيت نروبوزي تقوليلي عاوني في الميناج قتلوا وش فيها كي تعاوني حتى انا راني نتعب . قالي من الشهر لول بديتي تشكي مش قادرة على الخدمة حبسي واحد ما سيف عليك . قتلوا لا قادرة نورمال غير هدرت برك . بديت نسيق وهو يعاون فيا بصح كرهني بالتكعرير من بدا وهو نورمالمو راني راقد وكي حبيت نروبوزي تقوليلي عاوني وانا سمانة كاملة وانا نخدم ومنعرف واش . نحيتلوا الفرطوار في يدو بالناقص من لمعاونة هادي روح ارجع ارقد دوك نكمل وحدي قالي خلاص دوك  طار النعاس كمل معايا حتى خلصت كلشي الدار رجعت تشعل بالنقا . في الليل تعشينا ورقدنا ، رڨلت الرافاي على زوج تاع الصباح باه نوجد الصحور صونا بسيف باه فقت نضت الدنيا ضلمة وسكات انا نروح للكوزينة وحدي ونوجد الصحور وحدي امبوسيبل  ، دورت لآدم نوض فيه قتلوا آدم نوض تروح معايا للكوزينة نوجد الصحور ، ما فطنش عاودت حركتوا على دراعوا قتلوا آدم نوض تروح معايا للكوزينة نوجد الصحور . تقلب قالي اريج اخطي قسامي لليل ليل خليني نرقد . قتلوا نوض معايا منروحش وحدي للكوزينة .  ناض يعيط حتى في الليل مش مخليتني نرقد كيما الناس ، ضحكت عليه علابالي ميحبش شكون لي ينوضوا وهو راقد . ناض وهو مكشبر مشنف  رحنا للكوزينة هو قعد وانا بقيت نوجد في المسفوف وهو يقولي راح يأدن وانتيي مكملتيش عام ازحي خفي روحك  كلش تخدميه بالترياك .محبش يسكت حتى كملت تصحرنا هو خرج للبالكوا يتكيف وانا غسلت الماعن بالخف حتى ادن صلينا ورقدنا . في الصباح ناض وجهوا السيف ما يقصوش ، عرفتها ديراكت راه مرمضن على القهوة والدخان  خاطر هو عادتوا مع ينوض ديراكت يشرب قهوة ويتكيف قارو . مع دخل للدوش  عاود خرج قالي علاه ماحطيتيش البشكير باه راح نمسح بقشك.  شاري مشكلة على والوا على الصباح سكتت وعطيتوا البشكير دوش وكمل خرج وجديلي قشي خرجتهولو من الخزانة  .قالي علاه القمجة مش محددة.قتلوا لا راني حددتها لبارح في الليل .قالي نكدب عليك انا شوفي كيفاش مكمشة . بقيت نشوف معاها ما مكمشة ما والوا .قتلوا وين مكمشة راهي لاباس عليها . رمهالي على وجهي قالي احكمي حدديها ويزي من تفنين تاعك . عاودت حددتها على سعدي كملت،  لبسها من قالي وين راهم تقاشري ، كنت نلبس في حوايجي قتلوا شوف في القجر تاع الخزانة قالي كون لقيتهم راح نسقسي قسامك ارواحي شوفيهم . بلعتها وسكتت رحت شفتهم لقيتهم في نفس لبلاصة تاع ديما . ستغفرت ربي وكملت نوجد في روحي .وهو نسمع يهدر وحدو ويقول  حتى الصبات ومعرفتش تمسحو كون منقولهاش على الحاجة مديرهاش راح توليلي  مكسرة اليدين من التفنين تاعها . فزدلي صباحي بالتكعرير تاعوا مخلانيش حتى نلبس حوايجي بعقلي . سمعتو يعيطلي  قال هيا انتي عام باه توجدي روحك راح عليا الحال من قبيل وانتي دوري وش راكي ديري  .قتلوا بعقلك  راهي غير سبعة ونص.  جا عندي قالي على من راكي تقولي بعقلك  . خفت لا نهدر يشعل فيا. سكتت خبطني بصبعوا على راسي قالي اعدلي فمك خيرلك .