حب في الثانوية

104

فاتوا يومين بالخف كملتهم في السبيطار من بعد قاتلي الطبيبة راكي تحسنتي بزاف تقدري تخرجي بصح يبقى العلاج الفزيائي كمليه في الدار ، خرجت للدار في الكرسي وبابا يسوق بيا ملڨري كنت في كرسي بصح خرجت فرحانة خاطر عطاني ربي حيات جديدة الحمد الله حابة نعيشها كل يوم بيوموا منخلي حتى حاجة تأثر عليا منا وجاي . وصلت للدار غير قعدت شوي جاو لافامي كامل والجيران حمدولي بالسلامة كي خرجت من السبيطار . في الليل  غير راحوا الناس لي كانوا عندي دخلت للشمبرة هزيت التلفون لقيت آدم قاعد يعيط هزيت عليه قالي حبيبي وش راكي . قتلوا لاباس وانت تنهد قالي الحمد الله قتلوا وشبيه صوتك هكدا قالي والوا غير شوي مشاكل في الخدمة . قتلوا أصبر نعيطلك كام . فتحت لاكام لقيتوا متكسل في الشمبرة قتلوا حبيبي علاه راك قالق هكدا . قالي والوا راني قتلك غير شوي مشاكل في الخدمة . قتلوا لا غير قولي راني نعرفك . قالي راني غير قالق كي مبقيتش نقدر نشوفك الاز . قتلوا صح كيفاش نولي نشوفك انا ضرك . قالي راني خممت فيها غدوة نجي نحكي مع باباك لازم نزوجوا انا مبقيتش حاب نبعد عليك . قتلوا حتى انا . قالي صاي غدوة نجي . قتلو ان شاء الله يقبل برك . قالي يقبل يقبل ان شاء الله راح نبقى ننسيستي عليه . قتلوا المهم هيا بيزو حبي غدوة ان شاء الله نعست راح نرقد . قالي باي حبي غدوة . غدوة ورا العصر قالي راني جاي ياك باباك في الدار قتلوا ايه قالي هيا ملا من بعد نعاودلك .غير كوبيت عيطت لماما جات عندي قاتلي انعم . قتلها آدم راه جاي قاتلي علاه . قتلها راح يهدر مع بابا باه يرجعني . قاتلي وش راح نقولك ربي يستر ويقدر لي فيها الخير .جا دخلوا بابا للصالة وقعد معاه وبقاو يحكيو نورمال يعني صواتهم عادي من بعد نسمع فيهم ولاو يعيطوا تخلعت نسمع في بابا .قالوا بنتي من نهار لي طلقتها صاي عمرها ما ترجع ليك كل واحد في طريقوا انت ما ستحفظتش عليها المرة لولة صاي . قالوا آدم كيفاش هادي ياك علابالك بلي انا نحبها وهيا تحبني متقدرش توقف في طريقنا مدام هيا حابة ترجعلي انت معندك حتى دخل . قالوا بابا ملا على هدرتك هادي نزيد نحلف عليك عمرها متزيد تكون ليك . قالوا آدم يا عمي زيد خمم كيفاش تقدر توقف في طريق بنتك . قالوا بابا هادي آخر هدرة عندي بنتي منزيد نمدها لحتى واحد يمرمدهالي راح تبقى عندي عايشة مدللة لي تطلبها تجي حتى لفمها. قالوا آدم انت مش راح تدمولها اخرتها عند دار راجلها . قالوا بابا منا لهداك الوقت يرحمها ربي اما انت ان شاء الله مبقيتش نشوفك في حياتها . قالوا آدم غدوة نزيدو نهدر مليح قالوا بابا معدنا حتى هدرة صاي معنديش بنات للزواج أيا طريق السلامة . بقيت ناكل في صوابعي خايفة لا تنوض بيناتهم متوقعتش بابا راح يهدر معاه هكدا كنت علابالي راح يرفض بصح باه يهدر هكدا الحق بقيت حايرة . غير عرفتوا خرج هزيت التلفون عيطتلوا  هز عليا قتلوا آدم تعيش متزعفش من بابا والله غير ما هدر هكدا من قلبوا .قالي علابالي علابالي انتي متكسريش راسك انا نتفاهم معاه وادا سقساك قوليلوا رايي من رايك واي  حاجة تقولها راني معاك . قتلوا بصح انا حابة نرجع عندك . قالي يا عمري علابالي بصح انا لي نقنعوا انتي اي حاجة يقولك عليها قوليلوا ايه باه ميزيدش يخشن راسوا . قتلوا ايه كيما تحب ، بصح كيفاش مبقيتش نزيد نشوفك دوكا . قالي ساهلة في اقرب وقت نتلاقاو قتلوا كيفاه .قالي انا ندبرها المهم راني موجدلك سربريز راح تعجبك بزاف . قتلوا صح وش هيا قالي كي نتلاقاو تشوفيها المهم انا نخليك من بعد في الليل راني نعيطلك هيا باي . كوبيت دخل بابا عندي قالي وش راهي دير الاميرة تاعي قتلوا قاعدة برك . قالي هيا نخرجك نحوس بيك وجدي روحك . وجدت روحي خرجني حوس بيا حتى الليل . من موراها عيطلي آدم قالي حاب نشوفك غدوة . قتلوا وكيفاش نديروا . قالي نورمال غدوة تجي عندك دنيا قوليلهم راني خارجة نتلاقا مع صحاباتي وارواحي عندي . قتلوا منعرف مشكيتش بابا يقبل . قالي شوفي كيفاه تحاوليه برك . قتلوا نشوف المهم غدوة ياك توريلي السوربريز تاعي . قالي ايه ان شاء الله تعجبك.قتلوا ان شاء الله أصلا اي حاجة من عندك تعجبني . كملنا حكينا حتا جبنا الصباح . مور العصر جات عندي دنيا . قعدت معايا شوي من بعد قالتي نخرجوا نحوسوا وتتلاقاي مع آدم . كي قلت لبابا نخرج مقبلش قالي لا راني نعرف قوالبكم علابالي علاه راكم خارجين . لغدوة من داك زاد جاه آدم عاودلوا نفس الهدرة . بقا هكدا كل يوم يجي يحكي معاه وبابا ميقبلش  . حتى نهار لي رتحت ورجعت نمشي نورمال ونتحرك عادي . طول الفترة هادي كاملة ما شفتش آدم نحكي معاه غير بالتلفون . بصح كي رجعت نمشي نورمال بقيت نحاول في بابا باه يخليني نخرج  حتى قالي روحي بصح مطوليش بزاف ساعة وترجعي . قتلوا ايه . روحت بالخف لبست قشي وعدلت روحي كملت خرجت لقيت للبنات يستناو فيا زعما على عينين بابا برك . غير وصلنا للسونتر فيل لقيت آدم يستنا فيا وين تفاهمنا نتلاقاو لبنات راحوا وانا ركبت معاه تحضني قالي لكبيدة توحشتك قتلوا حتى انا توحشتك . قالي كيفاه حتى قنعتيه قتلوا بقيت نحاول فيه حتى قبل بصح قالي ساعة وترجعي . قالي ملا نديماريو برك قبل ما يروح علينا الحال . قتلوا علاه حنا وين رايحين . قالي رايحين  هنا برك باه تشوفي الكادو تاعك . فرحت قتلوا صح . قالي ايه ان شاء الله يعجبك برك في الحق هما زوج كادوات .بقيت نستنى على نار باه نشوفهم حتى وصلنا لبلاصة تهبل جاية في سونتر فيا بصح في بلاصة راقية غير لي فيلا والحطة حبس . قالي وصلنا . قتلوا وين راه الكادو .ضحك قالي مقدرتيش تصبري اهبطي دوك تشوفيه . هبطنا مشينا شوي قتلوا وين رايحين قالي بطة اصبري رانا قريب نوصلوا  حتى قريب نوصلوا قالي غمضي عينيك قتلوا علاه . قالي علابالي راح تبقاي تسقسي فيا . وقف ورايا غمضلي عينيا بيديه وبقا يمشي فيا حتى حبس قالي صاي واحد زوج تلاتة  . بعد يديه  من عينيا بقيت نشوف ضحكت  قتلوا علاه جبتني للفارماسي راك تتمسخر آدم . قالي طلعي راسك اقراي الاسم . طلعت راسي بقيت نقرا مكتوبة صيدليات الاريج . خزرت معاه وانا حايرة . قالي هادي تاعك  بأسمك  وملكك ياك عندك دبلوم تاع فارماسي تحبي تخدمي فيها ولا  تكملي تقراي ومدخول تاعها راح يكون في الكونت تاعك وانا راح نمولهالك من لوزين تاعي   وادا مشات الخدمة فيها مليح راح نكمل الفروع تاعها في بلايص اخرين .  انا تخلعت عمري ما خممت فيها قتلوا لا مانقبلش بزاف . قالي علاش بزاف ملكي هو ملكك ورزقي هو رزقك ديجا هادي من دراهمك لي لميتهم من عام كامل ياك تشفاي كي محبتيش تحكيمهم قتلك انا ندبر راسي فيهم خممت نديرلك بيهم مشروع تستفادي منو ومنها تخدمي بالديبلوم تاعك . قتلوا بصح بزاف وزيد انا منعرفش لالا غير مكلاه . قالي لا بصح لا والوا انا ديجا راني كتبتوا بأسمك وساهل مع الوقت تتعلمي واصلا انتي راح توقفي على الخدامة برك دوك نحط معاك وحدة عندها خبرة تتعلمي منها . بقيت غير نشوف منيش مصدقة فرحانة خاطر عمري ما خممت في حاجة كيف هادي وزيد من فوق  بهدا الجاست أكدلي بلي راه  يوثق فيا  ، ضحك قالي مش راح تقوليلي مرسي حبيبي . تحضنتوا ودموع في عينيا قتلوا ربي يخليك ليا حبيبي . قالي ويخليك ليا راه مزال الكادوا الدوزيام بصح راني متأكد بلي راح يعجبك خير من هدا . قتلوا صح وش هو
.قالي هيا نروحوا نديك تشوفيه قبل ما يروح الحال .
مشينا شوي وحبسنا في معرض تاع طونوبيلات . خزرت معاه وانا نضحك قتلوا لا متقولهاش ياك مش لي في بالي  . ضحك قالي لي في بالك هيا بذات راح ندخلوا وتخيري لي تعجبك . قتلوا لا امبوسيبل بزاف آدم والله بزاف . قالي احسبيها الكادو تاع عرسنا ديجا غير استغلي الفرصة مدام الخدمة راهي ماشيتلي مليح وطاحولي منها صوارد كبار . هبطنا وانا فرحانة راح نموت نكدب لوكان نقول مفرحتش اي وحدة في بلاصتي راح تولي تبكي من الفرحة مهما تكون عايشة في الخير والعز بصح باه راجلك يديرلك هكدا ويخمم على مستقبلك ويدللك أكيد راح تفرحي بزاف . دخلنا بقيت نخير حتى جات عيني في وحدة بيضة تهبل تهبل هبلت عليها بقيت غير نشوف معاها شراهالي ديراكت كي كملنا .ضحكت قتلوا جا الكادو تاع العرس قبل العرس . قالي والله باباك عذبني مهما درت معاه محبش يقبل حرت معاه الخطرة الجاية كون ميقبلش نخطفك . قتلوا انت لي مخلتنيش نهدر معاه سينو راه قبل هادي شحال . قالي لا متهدريش انتي ،بلاك المرة الجاية نجيب جماعة معاهم امام كشما يقبل . قتلوا ان شاء الله . صونا التلفون تاعي هزيت لقيتوا بابا قالي وينك ياك قتلك ساعة .قتلو راني جاية . قالي مع شكون راكي قتلوا مع صحاباتي برك . قالي اممم مطوليش راني نستنا فيك . كوبيت . قالي آدم راه مزير عليك . قتلوا ايه من لي خرجت من السبيطار وهو هكدا حتى كي نبقا في الشمبرة تاعي يجي يطبطب عليا يقولي متبقايش وحدك ارواحي اقعدي معايا . قالي من حقو خايف عليك كون انا عندي طفلة كيفك هكدا  نحطها على رموش عينيا . ضحكت قتلوا راك ديما تهدر غير على لبنات مش حاب يكون عندك ولاد ذكورا . قالي حاب بصح انا نحب يكون عندي بنات زوج ولا ثلاثة نربيهم وندللهم . قتلوا ربي يرزقك ان شاء الله . قالي يرزقنا خاطر باينة راح نجيبهم منك ولا تحسابي راح نجيبهم وحدي . ضحكت قالي اضحكي اضحكي انتي لي جا معاك الضحك  وانا راني نعاني مع باباك .