حب في الثانوية

chapitre 69

قعدت نستنى في أدم باه يجيب لعشا طول ، بقيت نستنى. حتى غفيت وليت نشوف في منام بلي راني واقفة في الصحرى ونغرق في الرمل عطشانة وكل ما نجي نتحرك رجليا يغرقوا اكثر في الرمل وليت نبكي وندور في راسي نحوس على واحد يخرجني حتى شفت آدم واقف بعيد عليا ويشوف معايا وهاز قرعة تاع ما في يدوا وليت نقولوا آدم ارواح خرجني من هنا ونبكي ونحاول فيه ، بصح هو دارلي بظهروا وراح وخلاني .فطن بيا المنام لقيت روحي نبكي صحصح ودموعي على خدي ، قعدت نستغفر ونقرى في المعودات ونخمم في هدا المنام في شفتوا . خزرت مع الساعة لقيتها العشرة تاع الليل ، وقفت بقيت نحوس على آدم ملقيتوش في الدار عرفتوا مزال مجاش تحيرت عليه .هزيت التلفون وبقيت نعيطلوا يصوني بصح ميهزش عليا . وليت بدلت قشي لبست جبة وهبطت عند عجوزتي لقيتها قاعدة في الصالة هي ودنيا سلمت عليهم وقتلها عيطلك آدم . قاتلي لا معيطليش علاه .قتلها من السبعة قالي نروح نشري لعشا من برة ونجي لدركا ماجاش ونعيطلوا التلفون يصوني بصح ميهزش عليا تحيرت عليه.  قاتلي انا من وقت لغدا مشفتوش هزت التلفون تاعها وعيطتلوا زوج خطرات في المرة الثالثة هز عليها قالها يما لاباس . قاتلوا لاباس تحيرنا عليك برك طولت برا قالها ربع ساعة ونوصل للدار وكوبا ديراكت . قتلها علاه انتي هز عليك وانا محبش يهز عليا.  ضحكت وقاتلي واش غرتي ديجا تلقايه غيرر مع صحابوا محبش يهز عليك قدامهم وانا كي عدت يماه هز عليا نورمال . فاتت نص ساعة شفتو فتح الباب ودخل وجهوا اصفر وعينيه حمر دم  ملامح تاع وجهوا تاع واحد مخلوع ولا مشوكي ،رحت عندوا تحضنتوا قتلوا وشبيك طولت هكدا تحيرت عليك وزيد علاه نعيطلك محبيتش تهز عليا . بعدني عليه ومهدرش معايا بقيت حايرة فيه  راح وخلاني كي عاد طالع في الدروج نطق وقالي الحقيني ، وكمل طلع للدار . قاتلي عجوزتي وشبيكم متعاركين انتي وادم . قتلها لا مش متعاركين ، قاتلي اطلعي شوفي وشبيه يبان متقلق . طلعت في الدروج وانا قلبي يرجف بالخوف منعرف علاه بصح حاسة حاجة مش مليحة راح تصرى ،فتحت الباب تاع الدار قابلني قاعد فوق الفوتاي تاع الهول حاط راسوا بين يديه قفلت الباب ونطقت قتلوا آدم وشبيك تبان مقلق صرات حاجة . طلع راسوا ووقف قدم عندي قالي اشششش نسقسيك  سؤال واحد وجاوبني بلا كدب ولا اقسم بالله نحرقك حية وواحد ما يسال عليك . قتلوا آدم وشبيك تحكي هكا خوفتني.  قالي قتلك اغلقي فمك وجاوبيني وش بينك وبين كريم ،انا سمعتوا قالي هكا قلبي طاح بين رجليا تعڨنت مقدرتش ننطق . حكمني من دراعي وبقا يحرك فيا قالي بالعياط  انطقي قولي وش كاين بيناتكم . انا في هديك دقيقة من الخوف قررت نحكيلوا كلش وش صرى . قتلوا وانا نبكي ، آدم اصبر نفهمك . مسح وجهوا بيديه وقالي صحا هيا فهميني راني نسمع فيك . قتلوا والله. مش كيما فاهم لحكاية . شفتوا جبد التلفون وبقا يوريلي في les photos ، صور تاعي مع كريم كي كنا في العرس . حكمني من وجهي وقالي تسما هادا les photos صح ،رجعت نبكي قتلوا آدم اصبر نفهمك .قالي معندك ما تفهميني اريج هادي اخرتها اريج هكا ديري فيا بعد ما كنت وين نمشي نقول مرتي غير هي لي ندير فيها كونفيونس نروح وين نروح بصح هي تبقى فيدال ليا خاطر تحبني ملڨري صغيرة بصح حبها ليا كبير . ضحك. وقالي بصح ظهرت غالط فيك غير دورت وجهي غدرتيني ومع من مع ولد عمي . انا رجعت نبكي ونلحف قتلوا يا آدم اصبر نفهمك والله ما كاين حاجة بيني وبينوا . ، رجع. حكمني على شعري على قوة جهدوا . قالي وهادوا لي فوطوا وش قولي علابالك شكون لي بعثهملي واحد من لافامي ، تخيلي لافامي تاعي يكونوا كل سمعوا مرتي كاين حاجة بينها وبين ولد عمي ،   كاين يحكي ويرجف وعينيه زادوا حماروا اكثر حسيتوا وجهوا راح يطرشق ،حكمتلوا يدوا قتلوا آدم اقسم بالله ما كاين حاجة بيناتنا والله تحب حتى نحلفلك على المصحف ، بعدلي يدي من بين يديه . حكم راسوا بين يديه ورجع قعد فوق الفوتاي قالي منيش مصدق راح نهبل ، قدمت ليه وقعدت في الارض بين رجليه وحكمتلوا وجهوا قتلوا آدم وراس ولدي لي في كرشي ما كاين والوا بيناتنا والله راهم غير حابين يفرقونا وهادي ما تكون غير كوثر لي بعثثهم باه تكرهك فيا ، بعدلي يدي وقالي نوضي من قدامي منيش حاب نشوف وجهك نوضي ، ودزني بيدوا طحت في الارض ، وقف والحاجة لي يلقاها قداموا يكسرها ويعيط حسيتوا مش فايق حتى وش راهوا يدير الدار قلبها مخلى فيها حتى حاجة تصلح ،انا كي شفتوا هكدا هبطت نجري عند عجوزتي ، لقيتها حتى هي راح تطلع ، قاتلي وش صرى وشبيه آدم وش هدا التكسار . بقيت ساكتة ولات طلعت عندوا لحقتها ووقفت في الباب تاع الخرجة خفت لا نقدملوا يطفر فيا كاش ضربة ، بقات عجوزتي تهدي  فيه وهو والوا غير يعيط يكسر عجوزتي ما فهمت والوا ولات دارتلي خزرت معايا .قاتلي وش صرى هادا حتى حالتوا راهي هكدا ، سكتت معرفتش وش نجاوبها ،شفت مع آدم خزر معايا ناض يعيط برا عليا من ليوم منزيدش نشوف وجهك في داري سينو نباصي عليك وطلاق بيناتنا . قاتلوا عجوزتي صلى على محمد واستغفر راك غير مقلق برك وش هاد الهدرة لي راك تهدر فيها.  خزر معايا قالي روحي من قدامي منيش حاب نشوف وجهك ، وضرب التلفزيون برجلوا جابوا مطيش في الارض . قاتلي عجوزتي اهبطي دوركا دوك انا نهدر معاه روحي .  هبطت. قعدت  الشمبرة تاع عجوزتي  نبكي وندامة قاتلتني يا ريتني حكيتلوا من قبل ياريت ،دخلت قعدت معايا دنيا حبت تفهم مني وش صرى محبيتش نقولها . بقيت غير ساكتة حتى  هبطت عجوزتي دخلت وقالت لدنيا اخرجي خلينا وحدنا . خرجت دنيا وقفلت الباب . قاتلي دوركا تقوليلي وش صرى بيناكم حتى راه يخمم في الطلاق قتلها والوا غير متفاهمناش برك ،قاتلي راكي تشوفي فيا نرضع في صبعي حتى تكدبي عليا ياك من لي تزوجتوا  وانتم تتعاركوا و جامي جبد على الطلاق بالصح المرة هادي راه معول يطلقك صح  ، قولي وش صرى خلي نشوف كيفاه نفريوا هاد المشكل قبل ما يكبر بيناتكم ، بقيت ساكتة ونبكي  .فهمتني بلي مش حابة نحكي . ولات قاتلي ارقدي دوركا وغدوة نحكوا . خليتها ما رقدت خرجت بالعقل وطلعت للدار مقدرتش نرقد بلا ما نطمن عليه حالتوا قبيل قعدت بين عينيا اول مرة نشوفوا في هديك الحالة . دخلت لقيتوا راقد في الصالة وحاط يدوا على عينيه ،قدمت بالعقل بستوا على يدوا وقعدت في الارض بحداه من نفسوا عرفتوا بلي مش راقد ، قتلوا آدم تعيش خليني نفهمك وش صرى والله انا مستحيل نخونك ولا نشوف في راجل آخر من غيرك ياك علابالك بيا نحبك ونموت عليك ومستحيل نعيش من غيرك ، بقا ساكت انا جيت راح نهدر سمعت التلفون تاعوا صونا  ومن بعد صوت تاع ميساج ، حرت زعما شكون لي راح يعيطلوا علي 2  تاع اليل شفتوا هز التلفون بقا يشوف معاه.قتلوا آدم شكون . ضحك وخزر معايا ودورلي التلفون شفت لافوطوا تاعي مع كريم في السبيطار كي جا يهدر معايا حكملي يدي . قالي كنتوا تتفاهموا كي نموت كيفاش تزوجوا ، في لحظة وحدة تبدل عاد تقول شيطان ضربني بكف جابني مطيشة في الارض ، طابس حكمني من شعري ووقفني ، زاد عاود ضربني جيت راح نطيح عاود حكمني من شعري  تالموا كنت حاسة بالخوف مع  الحمل مقدرتش نحكم روحي حسيت غير حاجة سخونة هبطت بين رجليا هبطت راسي عرفتوا (بول ) حاشكم هنا تمنيت الارض تنشق وتبلعني من الموقف لي تحطيت فيه ،غطيت وجهي بيديا ورجعت نبكي بالصوت  هو كي شافني هكداك قرب كان راح يهدر من بعد بطل و ديراكت هز المفاتح تاعوا والتلفون وخرج من الدار ، انا قعدت شحال وانا نبكي حتى عييت وليت وقفت رحت للدوش دوشت وخرجت نضفت الدار مليح ملڨري كنت في حالة بصح محبيتش نخلي الدار هكاك الزجاج في كل بلاصة ، كملت وهبطت عند عجوزتي دخلت لقيتها ناضت قاتلي وش تفاهمتوا ، حطيت راسي على حجرها نبكي قتلها لا متفاهمناش ، قاتلي قوليلي وش صرى بيناتكم ياك انا في مقام يماك قوليلي بلاك نقدر نلقااكم حل وتتفاهموا  بقيت ساكتة . قاتلوا معليش وقت لي تحبي تحكيلي ارواحي عندي . غفيت شوي وفطنت على صوت تاع الباب تفتح بالقوة شفت آدم دخل حكمني من شعري.  شعري ڨاع نتفهولي من الجبيد. قالي وين راه انتي لي قولتيلوا يروح . قتلوا اييي اطلق شعري  وجعتني على واه راك تهدر . ضربني على فمي قالي راكي علبالك على من راني نهدر قولي وين راه متخبي انطقي متهبلنيش لا ننحرك دوركا قولي . قتلوا والله ما عبالي على واه راك تهدر ، شاف التلفون تاعي هزو بقا يفركت فيه كي ملقى حتى حاجة هزو ورماه على الحيط كسرو طراف طراف . قالي من ليوم من هاد الدار متتحركيش ، ماراكي مرتي وانا ماني راجلك بيناتنا غير لي راه في كرشك غير تجبيه ورقة تاع الطلاق تكون بين يديك تعطيني ولدي وانتي مبقيتش نشوف وجهك . انا جمدت في بلاصتي متوقعتش راح يقولي هاد الهدرة بلا حتى ما يسمعني . قتلوا آدم تعيش خليني نفهمهم والله راك فاهم كلش بالغالط والله راه كان شارب مش في عقلوا تعيش خليني نحكيلك ربي يخليك خليني ، خرج يمشي وانا نلحق فيه وهو والله ما حبس ولا حكى معايا . قصت علينا عجوزتي قاتلي فهموني وش كاين بيناتكم دركا ، قالها يما  هادي مبقيتش نحب نشوف وجها قدامي تحكميها هنا عندك حتى تولد ويجي ولدي على خير تعطيهولي  ،تديها ترميها  في دار باباها معندي ما ندير بيها ، ديجا من غدوة  شوفيلي عروسة راح نعاود الزواج . قاتلوا عجوزتي آدم وش راك تقول هبلت . قالها علاه هبلت راح نعاود الزواج ياك الشرع حلل ربعة وانا هادي لي تزوجت بيها مساعدتنيش راح نعاود حياتي مع لي تهنيني . ديجا كون جيت نقدر  نطلقها درك راني طلقتها راني على وجه ولدي لي في كرشها مخليها في داري لدوركا . عندهم الحق لي قالولي اخطيك منها راهي تكسرلك راسك  في الباطل خليت لي تبغيني وتبعت قلبي الطحان لي غدرني . انا تصنمت في بلاصتي هدرتوا كامل حملتها وانا ساكتة علابالي متقلق بصح كي وصل قال نزوج نطقت وانا نبكي .قتلوا آدم تزوج عليا ، قالي ايه نزوج عليك ونجيبها خير منك ولا مانسمانش آدم وانتي دار باباك راهي تستنى فيك وادا تحبي تروحي من ليوم روحي ديري فيا مزية منيش حاب نشوف وجهك . قدمتلوا قتلوا زواج تحلم بيه والله نقتلها  ونشرب من دمها سمعت راني حلفت علابالك بيا مهبولة ونديرها تاع الصح ديجا ماعندي ما نخسر over dose من الدوا تاع القلب نلقى روحي ميتة وفي الدنيا لخرى وابقى فيها  انتا وحدك ابكي علينا في زوج . قالتنا عجوزتي وشبيكم هبلتوا واش هاد الهدرة لي راكم تهدروا فيها استغفروا مولاكم ، بقا يخزر معايا ومن بعد  خزر مع عجوزتي وقالها يما كيما قتلك من غدوة تشوفيلي عروسة في اقرب فرصة نحب نزوج. قتلوا جرب ديرها جرب برك والله نقتلها . خرج وخلاني قعدت في الفوتاي وحطيت يديا على وجهي نبكي ونفرغ في قلبي ، هدرتوا قتلتني بالحياة ، مخلانيش حتى نحكيلوا وش صرى ، هنا وين فهمت كي كان يقولي متخبيش عليا ، كون قتلوا من نهار لول راه مش حالنا هكدا ، كون حكيتلوا نهارها بعد رانا لاباس علينا ورانا نوجدوا لولدنا لي جاي كيف اي زوج متزوجين .  تعلمت درسي بطريقة قاسية بزاف انوا  جامي نزيد نخبي حاجة حتى يا لوكان تكون تافهة ، علابالي غير يهدى برك راح يعرف بلي أنا مستحيل نخونوا بصح حتى هو مستحيل يسامحني اني خبيت عليه .