حب في الثانوية

chapitre 58

كملنا  كورتاج روعة وصلنا للصال ، فات عرس يهبل ، انا بدلت ربعة تصديرات على خاطر مزلت عروسة جديدة وزيد لافامي اول مرة يشوفوني بعد الزواج ، حتى 12 تاع الليل جا العريس خرج لعروسة وحنا ، وجدنا رواحنا باه نروحوا . عيطلي آدم قالي راني نستنى فيك باه نروحوا. قتلو ودنيا ويما  .قالي راهم مروحين مع خالتي . لبست العباية تاعي فوق الصواري ودرت الخمار وهبطت باه نخرج لآدم . انا وصلت وين الباب تاع الخرجة حسيت بيد جبدتني جيت نشوف لقيتوا كريم . انا تخلعت قتلوا اطلقني . قالي اريج اسمعيني .قتلوا معندك حتى هدرة معايا ، اطلق يدي  .دوك يشوفنا كاش واحد . قالي صاي راني طلقتك ، احكمي النميرو تاعي كي تلقاي فرصة عيطيلي عندي هدرة معاك  . قتلوا مانحكمش دوك نقول لآدم على الشي لي راك دير فيه . شاف مرا هبطت بعد عليا ودور وجهوا ، انا لقيتها فرصة خرجت ديراكت . لقيت آدم واقف مقابل الباب قالي علاه طولتي .قتلوا  حكمتني مرا بالهدرة ركبت في الطونوبيل قتلوا حابة نروح لداري . قالي  نعديوا تهزي قشك ونروحوا لدارنا . قتلوا ايه. فتنا على دار عمو هزيت قشي بالخف ورجعنا لدار . غير دخلت لداري  حسيت براحة كبيرة توحشتها .تنهدت قتلوا درك وين حسيت بالراحة كي رجعت لداري والفت بيها . تحضني وقالي حتى انا  والفت نرقد على زينك ونوض على زينك . قتلوا آدم بعد عليا .قالي علاه ، قتلوا ريحتك تزعف . بقا يخزر معايا قالي راكي تحكي صح وشبيها ريحتي . قتلوا زعفتلي قلبي افففف تعيف . بقا حاير قالي يا بنتي راكي تحكي صح .قتلوا والله نحكي صح روح دوش روح راني رايحة نتقيا من ريحتك . حسيتوا زعف راح للدوش بصح الله  غالب مش بيدي حاجة اقوى مني مانيش حاملة ريحتوا . بدلت قشي ودخلت في السرير تعبانة حابة غير نرقد .شفتوا خرج من الدوش و جا ديراكت دخل في بلاصتوا  ودارلي بضهرو . عرفتوا زعف . قدمت بستو على ظهروا قتلوا دومي رقدت . بقا  ساكت قتلوا دورلي نرقد عندك . قالي اريج خليني تعبان راح نرقد . قتلوا دومي دور برك حابة نرقد عندك . دارلي وفتحلي يديه قالي هيا اسيدي ارواحي ، دخلت في حضنو . قتلوا ما تزعفش  مني  ياك علابالك هادوا ليامات نكون مش مليحة . ضحك قالي هي تجيك وانا نكره حياتي . سكت شوي من بعد قالي بصح تبالي فات وقتها شوي ولالا . قتلوا ما نعرف نسيت ، ديجا هي كل مرة   تجيني   في وقت  مش منظمة . رقدنا فقت على الخمسة تاع الصباح قلبي داير عليا راح نتقيا ، نضت نجري من الفراش ، انا وصلت للباب تاع  الدوش تقييت في الارض مقدرتش نحكم روحي . لحقني آدم قالي ريجا وشبيك . قتلوا والوا تقييت برك . ورجعت نتقيا مسحلي على شعري قالي غير يطلع الضو برك نديك للطبيب راكي في السمانة كل يوم تتقياي . قتلوا نورمال موالفة تصرالي ، قالي ادا كملتي ارواحي اغسلي ، دخلني للدوش غسللي وجهي وفمي . كي قربلي شميت ريحتوا زعفتلي قلبي راح نرجع نتقيا . قتلوا آدم بعد عليا . بقا يخزر معايا قالي علاه ثاني . قتلوا ريحتك . قالي  وشبيها ريحتي ثاني ،انتي راح تجهليني بريحتك وريحتك لي يسمعك يقول عندي عام مدوشتش ياك غير قبل ما نرقد دوشت . قتلوا الله غالب مانيش حاملة ريحتك ، خرج وخلاني ، لحقتوا قالي ارجعي للشمبرة خليني نظف الحالة لي هنا . قتلوا خلي برك دوك انا نسيقها .قالي روحي من قدامي لا نجهل عليك على الصباح تاع ربي ، انتي مش قادرة توقفي وتقوليلي دوك نسيق . رجعت للشمبرة هزيت قرعة تاع الريحة عمرت روحي وقشي ودخلت الفراش. هك شوي وجا دخل في الفراش رقد قعدت نخزر فيه عيفاتوا وعايفة ريحتوا حابة غير يوصل الصباح باه ينوض من قدامي   . غير وصلت السبعة نوضتوا . قتلوا آدم نوض باه تروح تخدم ، بقيت نوض فيه نستنى غير وقتاه يخرج . قالي مانيش رايح الخدمة ليوم. اففف يا ربي مش راح نتهنى منو ليوم . وقفت من الفراش . قالي وين رايحة . قتلوا للدوش ، قالي علاه . قتلوا راح ندوش ، قالي تدوشي على سبعة تاع صباح . قتلوا ايه نورمال . خزر معايا قالي اريج والله سيريو وشبيك راكي تشوفي في روحك نورمال  .قتلوا وشبيا راني لاباس عليا . رجع رقد قالي روحي روحي من قدامي  صباح صباح . خليتوا وهزيت قشي دخلت للدوش قفلت الباب ونحيت قشي دخلت تحت الماء ، هك شوي وليت نشوف في كلش مضبب ويدور راح ندوخ جيت راح نحكم في لافابوا مقدرتش طحت دخت في الارض . 
عند ادم لي كان متكي في الفراش يخمم في اريج حيراتوا عندها سمانة حاسها مش نورمال . فاق من تخماموا  كي سمع صوت حاجة طاحت في الدوش ، قلبوا ضرب وقف من بلاصتوا ، عيط اريج ، ما سمع حتى صوت راح يجري للدوش طبطب في الباب ويعيط اريج افتحي . ما  كاين حتى صوت ، بقا يفتح في الباب لقاه مقفول . بقا يضرب فيه بكتفوا  حتى تفتح ويشوف فيها طايحة في الارض عريانة  قداموا  قدملها يجري قعد على ركابيه هزرلها راسها لقاها مجروح من لور كي طاحت في الارض . بقا يضرب في وجها ويفيق فيها والوا محبتش تفطن ، لبسها سوغتي دو بان وهو يرجف خايف عليها. . هزها بين يديه حطها في السرير وجاب قرعة تاع الريحة دار في يدو بقا يفطن فيها حتى فاقت فتحت عينيها .
فتحت عينيا لقيت آدم قاعد بجنبي قتلوا وش صرالي.  قالي دختي في الدوش . قتلو راسي يوجع فيا.  قالي راكي تجرحتي كي طحتي . قالي هيا نعاونك البسي قشك نديك للطبيب . قتلوا خلي برك .قالي وش لي خلي هادي راكي في حالة وجهك اصفر كي الحبة تاع القارص . راح للخزانة جبدلي قشي . وجا راح يلبسلي قتلوا آدم والله ما ني قادرة نتحرك . قالي هيا برك دوك نهز حبيبي  ، لبسلي وحطلي فاسمة على راسي ودارلي الخمار . هزني هبطنا ركبني في الطموبيل ، وركب يسوق قالي من بعد نتفاهموا ياك قتلك كي تدخلي للدوش خلي الباب مفتوح ، علاه ما تسمعيش الهدرة انتي اه علابالك قلبي قريب حبس وانا نسمع في صوت الطيحة ، قتلوا نسيت غلقتوا . وصلنا للسبيطار هزني دخلني ، جابولوا سرير حطني فيه قالهم داخت ،وهي عندها القلب . دخلوني للشمبرة دارولي السيروم . دخلت الطبيبة بقات تسقسي فيا قتلها كل يوم نتقيا . قاتلي نديرلك تحاليل ونشوفوا . دخل آدم قعد معايا . قالي درك لاباس . قتلوا ايه حكملي يدي باسها قالي خوفتيني عليك . قتلوا حابة نروح . قالي درك وين جينا اصبري شوي برك يخرجوا التحاليل تاعك ونروحوا . هك شوي ودخلت الطبيبة تبسمت معانا قالتلنا راهم خرجوا التحاليل . قالها آدم واش فيهم ، بقيت نشوف معاه كيفاه خايف عليا . قاتلوا الطبيبة مبروك عليكم راه جايكم بيبي في الطريق . بقيت نخزر معاها ضحكت قتلها صح .قاتلي ايه خزرت مع آدم نبكي ونضحك  .قتلوا آدم سمعتها راح نجيب بيبي . باسلي يدي قالي ايه سمعتها حبي مبروك علينا . قالتنا الطبيبة منيش حابة نقطعلكم فرحتكم بصح حملك راح يكون شوي صعيب مع مرضك وزيد  حسب  ما حكيتيلي على اعراض لي تجيك  حتى وحمك راح يكون صعيب ، donc لازم عليك تنتبهي لروحك وماكلتك بعدي على القلقة وتعب ، راح تكوني  في فترة راحة حتى توصلي لشهرك الرابع . كي تكون عندك اي اعراض وجاع ولا نزيف تجي ديراكت للسبيطار داكور قتلها ايه. خرجت خرج وراها آدم قالها حكيمة نسقسيك . قاتلوا تفضل. قالها ياك الحمل مراحش يأثر على صحتها  . قاتلوا شوف حنا منسبقوش الأحداث هو راح يكون صعيب بصح قادر ميأثرش على صحتها ديجا اهم حاجة هي نفسيتها سيرتو درك مع وقت لوحم ، كيما وصيتكم الراحة ، حتى علاقة الجنيسة بيناتكم نفضل تقللوا منها غير ادا طلبت هي . ادا فاتت الشهر الرابع راح نقولو بلي عدات الخطر لكبير . قالها ايه يعطيك الصحة دكتورة .قاتلوا بلا مزية هدا واجبي ، ربي يجيبلها الشفا .
عاود دخل آدم جاني قعد بحدايا وتحضني بقا يبوس فيا قالي يا عمري البطة تاعي راح تجيبلي بيبي . قتلوا فرحان . قالي متصوريش الفرحة لي راني حاس بيها ، راح تجيبلي صغير لي راح يكمل حبنا.قتلوا مش مصدقة بلي بعد تسع شهر راح يكون عندي بيبي نلعبو بيه ونربيه . ضحك وقالي مزلتي برك تقولي نلعبوا بيه ، لاه تحسابيه لعبة هدا . خزرت معاه قتلوا انت باينة غير يجي البيبي تنساني ديجا من درك راك دافع عليه ، باينة راح تعود تحبو اكثر مني . ضحك قالي حاجة باينة نحبوا اكثر منك هداك ولدي من صلبي . دموعي هبطوا قتلوا هكدا آدم تقولهالي في وجهي والله عرفتها راح تحبوا اكثر مني . عاد يضحك بالصوت قالي يا عمري على المدللة تاعي راكي غايرة من درك ، راكي انتي بنتي لوله واحد ما يدي بلاصتك في قلبي ، وهدا البيبي راني نحبوا غير كي عاد منك انتي . خزرت معاه وانا نلعب بصباعي قتلوا صح . باسني على فمي قالي لا نكدب . قتلوا يا دومي يزي . قالي هلكتيه دومي ما خليتي فيه والوا . ضحكت قتلوا هيا حابة نروح للدار . قالي اصبري حتى يفض السيروم .
غير فض السيروم روحني للدار حطني في السرير قالي نهبط نشريلك لغدا ونجي . قتلوا ما تنساش الشيبس . قالي درك وين فهمت حكاية الشيبس راكي تتوحمي عليها . قتلوا مانعرف . قدم راح يبوسني بعدت عليه.  قتلوا غير بعد عليا راني مش حاملاتك . ضحك وقالي ربي يفوت هاد ربعة شهر على خير .