حب في الثانوية

chapitre 56

في الليل جات دنيا مع خالتها وبنتها خاطر كانت قاعدة عندهم  تعدي في الامتحنات تاع الجامعة ، نسا قعدو وحدهم  في الشمبرة يوجدو في الجهاز تاع العروسة ، وحنا البنات قعدنا مع العروسة وحدنا حطينا الغنا مڨصرين . بقيت نشوف مع العروسة خايفة راح تموت . رحت قعدت بحداها قتلها وشبيك وداد خايفة .قاتلي ايه والله راني راح نموت بالخوف .قتلها معندك علاه تخافي بربي ان شاء الله يعدي كلش مليح . سمعتنا بنت عمو لكبير قالتلها ايه صح معندك علاه تخافي ادا راجلك يحبك راح يسايسك متخافيش . انا والله راجلي صبر معايا حتى تنحى عليا الخوف . قتلها حتى انا آدم صبر معايا الحمد الله ياربي . سمعت كوثر  قالت لاختها مفهمتش وش عجبو فيها السحارة هادي .  عرفتها قاعدة تهدر عليا بصح سكتت قولت خلي تهدر على روحها  . بقينا نتحاكاو سمعنا صوت لغنا لبرة والتصفار والعياط . طلت دنيا على التاقة قاتلي رجال لبرة  ديرين سهرة روعة  وبقات تتفرج شوي ، ناضوا لبنات كل  يتفرجو على تاقة غير انا محبيتش خفت لا يشوفني آدم والله يقتلني .هك شوي قاتلي دنيا اريج اجري تشوفي آدم  . نضت طليت لقيتوا يشطح  بقيت نتفرج عليه كيفاه يشطح مع عمو يا عمري عليه يهبل راني غير نزيد نعشق فيه حتى شطحتو سبيسيال كلش فيه مميز يخليك غير تخزري فيه . نطقت كوثر قالت شوفوا كيفاه يشطح يهبل . انا هبلت عقل ما قعد في راسي وانا نسمع فيها تكحل على راجلي . خزرت معاها قتلها اسمعي انتي متحشميش على روحك راكي تهدري على راجلي . ضحكت و قاتلي  راجلك ، ادا قعد راجلك مانتسماش كوثر . بقيت مشوكية راهي خرجتلي بيها ديراكت بلي تحوس عليه  قتلها والله . قاتلي والله نطلقك منو ولا ما نيش مرا . ديجا وش يقعد يدير مع نص مرا كيفك مريضة متقدرش حتى  ترضيه  في الفراش. ..انا سمعت هدرتها وليت نرجف تلحت ديراكت على شعرها طيحتها في الارض وقعدت فوقها . قتلها دوك تشوفي نص مرا وش دير فيك يا القحبة تكحليلي على راجلي قدامي .وحكمتلها راسها نخبط فيه في الارض ونسب فيها على طول صوتي ولبنات يبعدوا فيا عليها وهي تبكي وتقولهم بعدوها عليا راح تقتلني السحارة خطافة الرجال . وانا والله ما طلقتها نخبش فيها ونجبد في شعرها ملڨري هي طويلة عليا بصح والله ما قدرتلي . جاو النسا يجريو كي سمعو لعياط تاعنا ، بقاو يخزروا حايرين فينا   . حكمتني عجوزتي على يدي تبعد فيا عليها . قاتلي اريج اطلقيها . قتلها مانطلقهاش القحبة هادي ادا امها مربتهاش انا  نعاود نربيها ولا منسماش اريج تكحلي على راجلي وتقولي نطلقك منو . دزتني طحت في الارض ضريت في  مسلاني . شفتها وقفت وتسب فيا يا هاملة يا تاع الشارع يا المتوحشة تضربيني . وقفتلها حكمتها من شعرها قتلها نضربك ونزيد وتزيدي تهدري على راجلي ناكلك بسناني يا البايرة  يا ###. بقينا هي تعيط وانا نعيط ونسب على طول صوتي وهي تضرب وانا نضرب وكل عادو يفكو فينا بصح مقدرولناش لصقنا في بعضانا  وفي زهري لبرة نقصو الغنا ، مع دنيا ليل  صوتنا كامل خرج . كي سمعو الرجال لعياط طلعوا يجريو لدار دخلوا .سمعت آدم يعيط قالها يما وش كاين وش لعياط هدا ، مرت عمو ام كوثر كي سمعت صوتوا ناضت تعيط ارواح بعد علينا مرتك لي ناقصة تربية تضربلي في بنتي والله نشكي بيها . قتلها روحي عاودي ربي القحبة بنتك لي تهدرلي على راجلي . دخل بقا يخزر لقاني حاكمتها من شعرها ونخبش فيها . قالي اريج اطلقيها . قتلوا ما نطلقهاش حتى نربيها القحبة هادي . عيط عليا قالي اريج اطلقيها قتلك . انا تقول عليا ما سمعتوش بقيت نضرب فيها ، قدم جبدني من مسلاني وهزني  وانا لاصقة فيها ونضرب بيديا ورجليا ونسب فيها . وهو يقولي اقفلي فمك ، اسكتي . بسيف باه بعدني عليها وهي قعدت تبكي وتستت وامها تسب فيا .  حكمني من يدي ويكرر فيا للشمبرة وانا نسب فيها . حطلي يدو على فمي قفلهولي قالي اسكتي بهدلتي بيا اسكتي  . وصلني للشمبرة دزني دخلني وقفل الباب . طحت  في الارض حكمني من شعري ضربني بكف قالي يا الكلبة بهدلتي بيا بخصتي بيا تتعاركي متزوج بمافيا انا . تضربي وتسبي صوتك في الشارع نسمع فيه . قتلوا بعد عليا  تضربني علاجالها والله ما نقعد هنا دوك تديني لدارنا . وقفت دزيتو وفتت رحت هزيت التلفون راح نعيط لبابا ، خطفهولي من يدي وخبطوا مع الحيط كسروا . وحكمني من شعري قالي متحشميش تخسري في الهدرة قدام يما ونسا عمامي وش يقولوا متزوج بوحدة من الشارع . قتلوا القحبة تاع بنت عمك هي لي من الشارع تكحل عليك قدامي وتقولي نطلقك منوا تحبني نسكتلها كون نزيد نحكمها نفزدها سمعت . هز يدو وضربني على فمي قالي نهار نريبلك فمك على هدرتك الخامجة هادي . قتلوا قول بلي غضاتك كي ضربتها ومرمدتها في للارض . دزني طحت في الارض قالي نخرج خير ما نقتلك في الليلة الكلبة هادي . قتلوا روح روح عند حبيبة القلب رضيها واطلب منها السماح باه ترضى عليك . رجعلي طاح عليا بالكفوف وضرب قتلني يسيف باه طلقني قالي درك تنوضي توجدي الكابة تاعك غدوة على الصباح نديك لباباك متزديش دقيقة هنا بهدلتي بيا  في ديار الناس الكلبة هادي صوتك نسمع فيه في الشارع . انا نبكي قتلوا حتى انا منزيدش  دقيقة عندك . وقفت بسيف من الارض ورحت هزيت  الفاليزة  تاعي حطيت فيها قشي . بقا يخزر معايا من بعد خبط الباب و خرج . جاتني عجوزتي بقات تلوم فيا وش العملة لي درتيها وبهدلتي بينا ، وش يقولوا علينا الناس ، انا بقيت ساكتة مرجعتلهاش ، غير نبكي ديجا مسلاني قتلني بالوجاع كي طحت عليه وزيد غاضتني كيفاش ضربني علاجالها  . قتلها اعطيني التلفون نعيط لماما. مدتهولي بقيت نعيط مهزتش عليا . 
دخل لقاني حاطة تلفون على ودني ونعيط لماما قالي مع من قاعدة تهدري . مرجعتلوش . قاتلوا عجوزتي راهي تعيط ليماها مهزتش عليها . قالي راهم مسافرين لدار جدك واحد ما كاين في داركم  . اسمعي شوفي تكملي هاد نهارين معانا هنا ترونكيل نسمع بيك درتي حاجة اقسم بالله يا اريج واحد ما يفكك مني ، يكفينا الفضيحة لي درتيها ليوم فهمتي راني وصيتك . خزر مع عجوزتي قالها عينك عليها دير حاجة قوليلي . نطقت قتلوا ما نقعدش هنا نروح لدارنا . قالي رب# انتي ما تفهميش قتلك واحد ما كاين في داركم لازم تجهليني انتي ، كرهتيني . خبط  الباب وخرج . حتى عجوزتي خرجت قاتلي راني رايحة نرقد في الصالة حتى هي حسيتها تغششت مني كي تعاركت . خرجوا وخلاوني وحدي ، قعدت نبكي بالشهقة وقفت نحيت القندورة لي كنت لابستها ودرت نشوف في مسلاني قتلني بالوجاع ، لقيتو كامل ازرق  لبست بيجامة تريكو وشورط . رقدت في بلاصتي حطيت مخدة تحت مسلاني باه ينقص عليا لوجاع . ندمت لي جيت لهنا كون رحت قعدت عند ماما خير هاد العرس ما ربحت منو والوا غير الخلايع وتبهدايل . علابالي لافامي تاعو كامل يقعدو يهدرو على العركة تاع ليوم يبقاو حاكمينها حكاية يهدرو بيها عند الناس الكل . بصح لمهم بردت قلبي فيها باه المرة الجاية تخمم الف مرة قبل ما تدنى  لأدم .وحد الساعة وسمعت الباب تاع الشمبرة تفتح عرفتوا آدم لعبتها راقدة باه نشوف وش راح يدير . طل عليا شافني راقدة باسني على خدي وتمدد بجنبي حط يدو على عينيه وبقا يخمم ، انا بقيت نتقلب ونتوجع ظهري قتلني . خزر معايا قالي وشبيك . مرجعتلوش قالي راني نهدر معاك. قتلوا والوا ما تهدرش معايا  . قالي متقلبليش ز## ليل ليل لا نوض ليك . بقيت ساكتة . وحد نص ساعة وحنا ساكتين . قالي وش قاتلك حتى تعاركتي معاها .قتلوا روح سقسيها هيا.   وليت نبكي تفكرت كي قاتلي نص مرا وعايرتي بمرضي ، زعما صح انا منقدرش نرضيه في الفراش كيما قالت وهو يجي نهار ويكره مني ديجا غير قبيل قالي كرهتيني ، أصلا لوقتاه راح يقعد صابر  معايا . بقيت نخمم ودموعي يهبطوا وحدهم . حتى ثلاتة تاع الصباح وانا نخمم . سمعتو قالي اريج ارقدي ويزي من لبكا . حطيتوا رقد  . خزرت معاه قتلوا دومي . بقا ساكت. قدمت ليه وحطيت راسي على دراعو ودخلت في صدرو  نبكي  ما دار حتى ردة فعل بقا كيما راه .سكتت شوي من بعد قتلوا  وانا نبكي ،آدم  صح انا نص مرا ومانرضيكش في الفراش . حسيتوا جمد قالي وش هاد الهدرة لي راكي تقولي فيها . قتلوا هي قاتلي هكدا . طلعلي راسي بيدو  خزرت معاه قالي شكون لي قالك هكدا . قتلوا وانا نبكي بالشهقة كوثر قاتلي هكدا . قاتلي نطلقك منو وش يدير مع نص مرا مريضة متقدرش حتى ترضيه في الفراش . رجعت نبكي بالصوت قتلوا صح انا هكدا . بقا يخزر معايا ومن بعد تحضني وقالي ياعمري انتيا متبكيش حبي راهي غايرة منك ، اشش حبيبي يزي من لبكا . خلاص حبي . بقا يبوس فيا ويسكت فيا مقدرتش نسكت على خاطر صح أصعب حاجة واحد يعايرك بحاجة انت معندك حتى دخل فيها حاجة من عند ربي سبحانو . حكملي وجهي بيديه وقالي بطة حبي خلاص ماتبكيش ، راهي غايرة منك على هديك قاتلك هاد الهدرة . قتلوا بصح صح انا مريضة متقدرش حتى دير معايا علاقة وقت لي تحب انت . قالي اششش اسكتي باسني على فمي وخزر معايا قالي أنا نحبك  بكلك ، انساي هاد شئ هيا حبي ارقدي  ، جبدني ليه وزير عليا وقعد يمسحلي على شعري حتى رقدت بين يديه .
عند ادم لي بقا ليلة كاملة وهو يشوف مع اريج لي راقدة بين يديه حتى وهي راقدة دموعها يسيحوا  .اول مرة من لي عرفتها شافها بهاد الحالة ، الهدرة لي قالتهالها كوثر صح جرحتها قهرتها ، علابالو بيها بلي مرضها عاد عقدة في حياتها ساعات يشوفها تضغط على روحها غير باه ترضيه  وتحسسو  بلي هيا كيفها كيف باقي نسا حتى لوكان على حساب صحتها . بصح ماعلابالهاش بلي هو يحبها في كل حالتها ، أصلا هو حب روحها شخصيتها ضحكتها دلالها ، عمرو ما خمم من الجانب لي تخمم بيه هي . بصح ميقدرش يلومها على خاطر أي مرا في بلاصتها راح تخمم كيفها . باسها على راسها وقال كون تعرفي شحال نحبك ، راكي ساكنة في قلبي ، نحارب ونسمح في دنيا كامل علاجالك  عندي المهم نشوفك بين يديا ونشوف ضحكتك ، هاد لي يهمني . 
تقلبت بين يديه توجعت من مسلاني قلت اه . حسيت بيه باسني على رقبتي وقالي وشبيها بنتي . قتلوا وانا نبكي مسلاني يوجع فيها . قالي دوك ندير دوا لحبيبي ويروح عليك . لاح يدو طلعلي تريكو وبقا يشوف . قالي وشبيه ازرق هكدا . قتلوا كي  طحت في الارض قبيل . باسني وقالي يا عمري على كبيدة تاعي يوجع فيك بزاف .قتلوا ايه قالي خلاص دوك نديرلك الدوا . وقف بقا  يحوس على الدوا حتى لقا بوماد تاع الوجاعة. جابها ورجع قعد بجنبي في السرير دورني على كرشي ونحالي تريكو وبقا يدهنلي في ظهىي بالبومادة . كي كمل مسح يديه ورجع تمدد بجنبي وفتحلي يديه قالي ارواحي نرقد حبيبي عندي . دخلت في حضنو  باسلي راسي قالي كون تعرفي شحال نحبك نسمح في دنيا كامل علاجالك . قتلوا حتى نموت عليك . خزرت معاه قتلوا بصح ظهرت تعرف تشطح . ضحك وقالي والله وين شفتيني   قتلوا شفتك على التاقة . بستوا على فموا قتلوا كلش  فيك يخليني نزيد نعشق فيك اكثر .