حب في الثانوية

chapitre 43

Flow vote and comments 😘😘❤️😘
في الليل عيطلي آدم قعدنا نحكيو قتلوا علاه قتلهم الفاتحة نديرها مع الخطبة يخي نورمالموا تجي مع العقد ، قالي هكا خير باه حتى كي نتلاقو ولاحاجة يكون كلش عند ربي بالحلال . قتلوا ايه عندك الحق . قعدنا نحكيو حتى طلعنا الصباح .
فاتت سمانة كاملة وحنا غير نوجدو على خاطر عرضنا  لافامي كل . كنت كل يوم نحكي مع آدم حتى والفتو كون مايعيطليش ومنحكيش معاه  تبانلي كاينة حاجة ناقصة في نهاري ، شريت غوب princess باه نلبسها كي يدخل يديرلي الخاتم في لون Doré.

جا نهار الجمعة لي هو نهار الفاتحة نضت على السبعة . دوشت وفطرت وقعدت نستنى في الحفافة تجيني باه توجدني ،وانا حاسة روحي راح نطير من الفرحة ليوم يولي آدم تاعي قدام ربي وعبادو ليوم يتحقق حلمي لي كنت نقول امبوسيبل يتحقق . الحمد الله ياربي ، على قد ما نحمد ربي وقليل لانو كتبلي نتزوج بحب عمري . لافامي تاعي كل جاو على الصباح دخلوا عندي بنات خالاتي وبنات عمي باركولي وقعدو معايا و  مع شروق . قعدنا مڨصرين حتى نطقت بنت خالتي هادي من بكري تكهرني مفهمتش علاه ملڨري ما درتلها والوا ، قاتلي والله يا اريج عندك وحد الزهر ديتي الباك وتخطبتي  في عام واحد . نطقتلها شروق قالتلها قولي على الأقل الله يبارك لا تعينيها . جاتني الحفافة بدات تمشطلي في شعري دارتلي بابليز وطلقتهولي قاتلي شعرك طويل خليه مطلوق خير  وحطتلي تاج ودارتلي مكياج كامل في Doréباه يجي مع لاغوب .كي كملتلي لبست لاغوب تاعي . شفت مع روحي في لمراية جيت كيف هادوك العارضات لي يحطوهم في المجلات . قاتلي الحفافة جيتي تهبلي الله يبارك عليك . قتلها يعيشك بصح شوفي لاغوب بانتلي مفضوحة  بزاف صدري ڨاع يبان . قاتلي بالعكس جاتك مليحة ديجا هيا لبستها كيف هك مع انتي سمينة عمرتيها بصح جاتك ما شاء الله  . بقيت نخزر مع روحي ،  ملڨري عجبتني روحي وجيت نهبل بصح لاغوب  حسيتها مفضوحة بزاف من فوق كيفاه نخرج قدامو هكدا . جاوني خالاتي وعماتي لي تشوفني تقولي جيتي لبة جيتي  تهبلي . عيطلي آدم قالي راكي واجدة  باه ورا صلاة الجمعة نجيو قتلوا ايه . قعدت نستنى في شومبرة تاعي غير انا وشروق باقي كل خرجوا باه يوجدوا رواحهم . قتلها شروق صح جيت شابة . ضحكت وقاتلي راكي سقسيتيني هاد السؤال تقريب 1000مرة والله راكي جيتي تهبلي . قتلها والله راني رايحة نموت من الستراس . قاتلي نورمال تفوت . مع فضت صلاة الجمعة سمعت لاصونات تاع الطوموبيلات . قتلها شروق راهم جاو . قفزت ديراكت رحت للتاقة باه نشوفهم . شفت النسا كل بالعبايات  هبطوا من الطموبيلات يزغرتوا بصح مهمونيش  ، بقيت نحوس غير عليه هو حتى شفتوا هبط من طموبيل تاعو هاداك الكور وهداك الزين  لابس كوستيم كحلة  وشعرو بالجال واللحية مطراسية المهم جاء تقول عليه تاع الافلام التركية بقيت نخزر معاه وقلت في قلبي هادا الكل عاد تاعي  انا وحدي   كان هاز البوكي تاع les fleursفي rouge . دخلوا للدار بقيت نسمع في الامام يقرى ويدعي ويهدر معاهم على الزواج .
كي كمل ناضوا الكل يزغرتوا . هكا شوي ودخلت ماما قاتلي مبروك على بنتي ليوم وين تهنيت عليك ربي يكمللكم لعمارة الدار ، تحضنتني تبكي من الفرحة ، وانا ديجا حاكمة البكية على شعرة قتلها ماما صاي راح تبكيني معاك . بعدت شوي وقاتلي عندك الحق ،راكي واجدة باه يجي آدم يخرجك تلبسوا لخواتم قتلها ايه واجدة بصح شوفي ماما لاغوب بانتلي مفضوحة بزاف من فوق خزرت معاها وقاتلي لا جاتك تهبل ، قتلها بصح كيفاه يشوفني هكدا نحشم . قاتلي علاه تحشمي صاي راه عاد راجلك قدام ربي وعبادو .