حب في الثانوية

chapitre 101

بقات ماما معايا باتت غدوة الصباح ناضت بكري  عاونتني بدلتلي من بعد قاتلي نروح نطل على الدار خليت باباك وحدوا مسكين . قتلها روحي . حطت يدها على خدي قاتلي بنتي وشبيك موجوعة. قتلها لا مش موجوعة . قاتلي ملا علاه عينيك حمورة هكدا وراكي حاكمة دموعك بسيف . قتلها ماما يخي قولتيلي كل صباح يجي علاه ما جاش ليوم . قاتلي شكون على من راكي تهدري . من بعد ضحكت قاتلي يعطيك الربح يا اريج على هادي راكي دمعي في عويناتك ، اصبري دوك يجي . قاتلي راني رايحة منطولش نطل على  الدار ومن بعد نرجع انا وباباك وخوك .  قتلها روحي . باستني قاتلي ادا حتجتي حاجة هاي القفلة رصي عليها تجيك الفرملية . هي خرجت ، وانا قعدت روحي بالسيف من بعد بقيت نحاول نحرك يدي بالعقل باه نهز المراية ، هزيتها بيد  ترجف بقيت نشوف مع روحي يا ويلي يجي يشوفني هكدا تقول عليا ميتة ولا خارجة من لقبر . بقيت نخمم كيفاه ندير حتى مكياج معنديش بففف. من بعد خطرتلي فكرة . رصيت على القفلة لي في سرير . شوي ودخلت عندي الفرملية .قاتلي صباح الخير سحقيتي حاجة . تبسمت معاها قتلها معليش نقصدك في حاجة .قاتلي ايه ادا قدرت عليها راني هنا اختي .قتلها تعيشي .سكتت من بعد قلتلها تقدري تجيبيلي ادا عندك مكياج غير شوي غوجلافغ برك ولا شوي فاغاجوا شوفي وجهي اصفر في حالة وراجلي شوي ويجي عندي منيش حباتوا يشوفني هكدا تقول عليا هاربة من غسالين . بقات تشوف معايا حايرة من بعد ضحكت قاتلي ايه نجيبلك ، دقيقة ويكونوا عندك  قتلها يعطيك الصحة حبيبتي . هيا راحت وانا فتحت الضفرة لي كانت ديرتهالي ماما في شعري فتحتوا ورجعتوا لورا ودرت لاماش من قدام وانا نتحسر على شعري كي كان وكي عاد ، بصح معليش نخرج نتهلا فيه حتى يرجع خير من قبل . عاودت دخلت الفرملية هازة المكياج في يدها وخلات الباب تاع الشمبرة مفتوح شوي . حطاتوا فوق الطابلة وقعدت بجنبي في السرير . قاتلي زهرك ليوم جبت معايا المكياج تاعي . قتلها الحمد الله . قاتلي خلي انا نديرلك شوي راني نعرف وزيد انتي ماتقدريش تحركي يديك بزاف قتلها ايه ديري فيا مزية ديجا يديا راهم يوجعوا فيا .قاتلي لازم خاطر عندك بزاف محركتهمش كي تخرجي ترجعي ديري علاج فزيائي ليديك ورجليك باه ترجعي كيما بكري . قتلها ايه علابالي . شافت مع شعري قاتلي لا ماتخليهوش هكدا خلي دوك نمشطهولك . دارتلي كوتشوفال وخلاتلي لاماش من قدام ودارتلي ببيونة حمرة تاع البيجامة  في شعري . كملت بدات تمكيجلي شوي وكملت قاتلي هاه الله يبارك جيتي كي الوردة قتلها صح عطاتني المراية قاتلي شوفي روحك وقوليلي . هزيت المراية بقيت نشوف دارتلي مكياج سامبل يبان طبيعي بصح حمرتلي خدودي وشواربي وكحلتلي عينيا وجهي رجعت فيه روح . قتلها زعما نعجبوا هكدا  ، كنت نهدر وانا نشوف مع روحي . سمعت صوتوا قالي تعجبيني حتى وانتي في اسوء حالتك . ضحكت الفرملية وانا  طيشت المراية من يدي شفتوا واقف متكي  على الكادر تاع الباب . قتلوا يا آدم جيت . قالي ايه جيت يا عمري .وقفت الفرملية خارجة قاتلي من بعد نجي عندك .قتلها مرسي بزاف . تبسمت معايا كي جات خارجة فاتت على آدم قالها يعطيك الصحة اختي . قاتلوا بلا مزية . ستناها خرجت وغلق الباب وجا عندي قدم باسني هزيت يديا تحضنتوا قتلوا توحشتك قد الدنيا  قالي وانا اكثر يا روحي . حط الورد والشيكولا من يدوا وقعد بجنبي في السرير قالي وش راهي الوردة تاعي قتلوا لاباس . قالي الحمد لله يا ربي . حط يدو على خدي قالي ما راكيش موجوعة . درتلوا براسي لا وقتلوا علاه ماجيتش لبارح كنت نستنى فيك تجي بصح انت ما جيتش . قالي علاه تستناي فيا توحشتيني . قتلوا ايه توحشتك قالي يا عمري حتى انا كنت متوحشك بزاف وحاب نقعد معاك  حبيت نجي عندك بصح كي شفت باباك وخوك معاك قلت خلي غدوة ونجي عندك .قتلوا ياك موالف تجي عندي نورمال.  قالي مش كيف كيف المهم راني جيت عندك وراح نبقى معاك حتى تكرهي مني ، قتلوا منكرهش منك انا . هز يدي باسها قالي ليوم وين رجعتلي روحي . قتلوا حتى انا . خزرت مع البواط تاع الشيكولا . تبسمت قتلوا قاتلي الفرملية بلي كل يوم تجيبلي الشيكولا.  قالي ايه كنت نصبر روحي ونقول ادا ناضت تاكلها . هزيت يدي باه نهزها لقيتوا سبقني هزها قالي وش راح تعملي قتلوا راح ناكل منها سخفت . قالي لا ريجا مزالك مريضة مزلتي ما كليتي حتى شئ وراح تاكلي الشيكولا راهي تضرك . قتلو نورمال هات برك  . قالي لا اصبري حتى نسقسي الطبيبة . قتلوا اففف يا دومي  هات برك والله سخفت . قالي اصبري برك تجي الطبيبة ونعطيك . من بعد  قدم عندي قالي علابالك شحال توحشت كلمة دومي من شواربك . تبسمت وبقيت ساكتة قالي متخلنيش نذوقهم . قتلو وانا حايرة وش ذوق قالي شواربك يا عمري.  شهقت قتلوا يا آدم احشم . قالي علاه نحشم نسيتي وش كان بيناتنا .قتلوا يا آدم يزي . ضحك  قالي ها راني ميزي يا الحشامة . . دخلت الطبيبة قاتلي اريج صفا .قتلها الحمد لله . قاتلوا مسيو آدم راك هنا صفا .قالها الحمد الله . قدمت عندي قاتلي راح نشوفوا القدرة تاع رجليك باه نحددو نوع العلاج الفزيائي لي تحتاجيه .آدم وقف وهي قدمت هزت الغطا على رجليا وطلعتلي الرجل تاع البيجامة . خلعتني قتلها هبطي وش راكي تعملي قاتلي وشبيكي تخلعتي راني قتلك راح نشوف حالة رجليك . مديت يدي  نحاول نهبط البيجامة  على رجليا حاشمة بحالة رجليا قدام آدم قتلها خلي من بعد وارجعي . قاتلي اريج خلي نشوفهم دورك وشبيك خايفة . قتلها منيش خايفة بصح خلي حتى من بعد . قدملي آدم قالي بطة حبي خليها تشوف رجليك وشبيك خايفة مش راح توجعك .طلعت وجهي ليه وانا حمرة طماطم وعينيا مدمعين  قتلوا لا خلي برك مش لازم تشوفني . تنهد قالها راح نشقيوك معانا شوي برك وارجعيلها .قاتلوا صاي راني فهمتها شوي ونرجعلها . غير خرجت  قعد فوق الكرسي مقابلني قالي ريجا علاه راكي حاشمة مني علابالك راكي حيرتيني انا آدم تحشمي مني . قتلوا مش حاشمة منك بصح منيش حاباتك تشوفني بحالتي هكدا .قالي لاه وشبيها حالتك ، راكي كيف الوردة وريحتك كيما المسك انتي في عيني اجمل مرا في الدنيا كاملة . قتلوا بصح انا نحبك تشوفني بأحلى صورة باه نحس روحي بلي نليق بيك ، شوف انت كيفاش وانا كيفاش .قالي يا ريجا يا عمري لي يحبك يحبك بخنونتك هكدا يقولوا وانا في عيني نشوف فيك اجمل واحلى وحدة متزيديش تقولي هاد الهدرة خاطر تاع الصح راح تزعفيني منك . درتلوا براسي ايه قتلوا قدم عندي نقولك حاجة . قدملي قالي هيا قولي . بستوا على خدو قتلوا نحبك انا . قالي وانا نموت عليك ، هيا انا نروح نعيط للطبيبة باه تجي تشوفك .قتلوا ايه عيطلها . جات الطبيبة  شافتني قاتلي ماكسيموم تاع شهرين وترجعي نورمال بصح لازماتك علاج فزيائي مكثف سيرتوا على رجليك. قتلها ان شاء الله . وصلت الثلاثة قالي ريجا انا نروح وغدوة نرجع عندك . قتلوا بصح مزال الحال زيد اقعد معايا ، ديجا علاه متباتش معايا انا مزلت متوحشاتك . قالي ريجا ادا نسيتي رانا مطلقين كيفاش راح نبات معاك . قتلوا مهاني زيد  ابقا معايا شوي برك تعيش مش حابة نبقى وحدي . قالي ريجا علابالك راكي تطلقي في دلالك عليا وانا راني حاكم روحي بسيف باه مانبوسكش و....... استغفر الله يا ربي  خليني ساكت خير  . ضحكت قتلوا وش كنت راح تقولي. ضحك  قالي راكي تبروفوكي فيا من بعد تقوليلي احشم . رجعت نضحك قتلوا صاي صاي متقولش راني سكتت .  باسني على جبيني قالي حبيبي انتي . وقف قالي انا نروح .جبد من الجيب تاعو تلفون قالي من بعد نحكي معاك كام كي نعيطلك هزي عليا . قتلوا ان شاء الله . قالي هيا تهلاي في روحك دوك نعيط لماماك باه تجي تبقى معاك متبقايش وحدك. بقيت ساكتة قالي هيا بطة ماديريش شنوفة خليني نروح وانا متهني عليك عمري . قتلوا مزعفتش غير كنت حباتك تزيد تقعد معايا. قالي نوعدك المرة الجاية نطول معاك وديجا رانى موجدلك سربريز هايل.. قتلوا صح قالي ايه غير ترجع صحتك لباس تشوفيها .قتلوا واش هيا قولي .قالي اسمها سربريز اصبري شوي وتشوفيها ، هيا انا راني رايح من بعد نعيطلك . دخلت الفرملية دارتلي السيروم كي عادت خارجة عطالها آدم دراهم .محبتش تحكمهم بصح هو قالها احكميهم  برك هدوا حق تعبك معاها ،بصح نوصيك  تهلايلي فيها برك اختي  راهي قدامك متخليهاش وحدها حتى تجي يماها .قاتلوا ان شاء الله . هيا بقات معايا وهو خرج .