حب في الثانوية

chapitre 50

فاتت سمانة ورجعت نقرا في الجامعة . كل يوم يديني ويجيبني هو ، على خاطر وليت نقرا وحدي . بعد ما شروق ودنيا وجلال سجلوا في الجامعة نورمال وانا سجلت في مدرسة عليا تسما بعاد عليا شوي . كنت نجيبها نهار كامل وانا وحدي . على خاطر آدم وصاني قالي منسحقش ديري صحبات في الجامعة.  حتى وحد نهار  في cour جات قعدت بحدايا طفلة تبان عاقلة ومتربية بقينا نحكيو على القراية ومنا . قاتلي وش رايك نعودو صحبات راني ديما نشوفك قاعدة وحدك . قتلها ايه . ملڨري آدم محذرني اني ندير صحبات في الجامعة بصح هاد الطفلة رتحتلها بانتلي عاقلة وزيد لوقتاه راح نقعد  غير وحدي لازم ندير صحبات كيفي كيف نتاجاتي.  قاتلي ديما نشوف واحد يوصلك الجامعة خطيبك . قتلها راجلي . قاتلي يا  متزوجة ما تبانش عليك ، بصح  دبرتيها على الأقل تهنيتي من تمرميدة تاع ترنسبور .قتلها ايه صح . قاتلي انتي تلبسي غير les robes قتلها ايه راجلي ميحبش نلبس السروال . قاتلي خسارة لاطاي تاعك يجي فيها السروال يهبل . ضحكت وقتلها زعما . قاتلي ايه والله كيما نقولك جربي وشوفي يجيك يهبل . انا على نيتي قتلها نروح  الدار ونجربوا  . كملنا نهار مع بعضانا وعطيتها النميرو تاعي والفيسبوك  والانستغرام . زيد فاتت سمانة اخرى وليت انا وياها صحبات نقراو مع بعضانا ونقعدوا مع بعضانا هي تحكيلي على دارهم وخاوتها . وانا على نيتي  نحكيلها على آدم وكيفاه حتى تزوجنا وكيفاه عايشين . قاتلي الصراحة اريج راجلك معقد بزاف ميخليكش تمشي وحدك خلاص هو لي يديك وهو لي يجيبك وكل دقيقة يعيط يسقسي وين راكي وش عملتي راه زايدلها  ميخليكش تتنفسي وحدك بلا بيه  .قتلها لا آدم مش معقد راه غير خايف عليا .   قاتلي ملا قوليلوا يخليك نهار نخرجوا نحوسوا انا وياك . قتلها مستحيل يخليني والله يقتلني . قاتلي شفتي كيفاه راني قتلك راجلك زايدلها بزاف .  البنات المتزوجات كل رجالاتهم يخليوهم يخرجوا يحوسوا مع صحباتهم غير انتي . هدرتها قعدتلي في راسي . بقات كل مرة تقولي راجلك معقد وراه حزار بزاف و راه كبير عليك هو عاش حياتو بكري ونتي راه غابنك والبنات لي في عمرك راهم يحوسوا ويلبسوا كيف ما يحبوا هم ، المهم كل مرة تخرجلي حاجة مش مليحة في أدم وانا نتبع فيها ونسمع في هدرتها  ونحكيلها اسراري .  حتى نهار قاتلي غدوة اريج ارواحي بالسروال والله يجيك يهبل. قتلها والله آدم يقتلني .قاتلي مزلتي برك في أدم تاعك . راكي مزلتي صغيرة البسي وتمتعي قبل ما تكبري ،شوفي البنات الكل يلبسوا السروال ويديرو المكياج  غير انتي . قتلها بصح راه ميخلنيش نخرج بيه من الدار . قاتلي ساهلة ماهلة خليه هو يروح يخدم وانتي البسي السروال وارواحي وحدك .قتلها نخاف يفيق . قاتلي معندو كيفاه يفيق  . بقيت نخمم و  قلت عندها الحق انا كيفي كيف اي طفلة نحب نلبس السروال وندير المكياج وهو معندوش الحق يمنعني نعيش عمري كيف لبنات الكل.
روحت لدار وانا نخمم في طريقة باه نقنعو يخليني نروح نقرى وحدي .
غدوة  صباح ناض على السبعة وبقا ينوض فيا كيما موالف باه نوجد روحي يوصلني نقرا. قتلوا ليوم معنديش قراية . قالي راكي سير قتلوا ايه قالولنا لبارح بلي ليوم مكانش قراية . قالي ملا ارجعي ارقدي ، راني رايح نخدم . قتلوا في أمان الله . باسني وخرج . ملڨري حسسني بتأنيب الضمير كي كذبت عليه . بصح قلت نورمال . فاتت ساعة وتأكدت بلي وصل الخدمة . عيطتلوا قتلوا آدم راهم بعتولي ايميل  من جامعة وقالولي بلي ليوم عندنا TP ولازم نروح  . قالي كيفاه تروحي اصبري نجي نوصلك . قتلوا مكلاه تشقى دوك نحكم تكسي برك .قالي اواه منتهناش عليك وحدك دوك نجي نوصلك خير . قتلوا مكلاه تشقى نورمال نروح وحدي معندوا ما يصرالي . تنهد و قالي روحي غير توصلي عيطي .قتلوا اوك نحبك باي . نضت نجري متحمسة . لبست السروال وليكات قصيرة ودرت الخمار تاع الفولار . ودرت مكياج لينار وغوجالافر . المهم تحفت روحي على آخر درجة . وهبطت راح نخرج شافتني عجوزتي قاتلي اريج وين رايحة بالحطة هادي قتلها رايحة نقرى.  قاتلي وادم خلاك تروحي بالسروال .كذبت عليها قتلها ايه خلاني نورمال .سكتت شوي ومنبعد قاتلي بصح راكي زايدتلها شوي المكياج واللبسة هادي رايحة بيها الجامعة . قتلها نورمال لبنات الكل يلبسوا هك .تنهدت وقاتلي مدام خلاك راجلك الله يسهل روحي بنتي . حكمت تكسي وصلني الجامعة . هبطت لقيت صاحبتي تستنى فيا . غير شافتني بقات تشكر فيا وراكي جيتي شابة وشفتي راني قتلك بالسروال خير وراكي غابنة روحك .وانا كي البهلولة نصدق فيها ونقولها عندك الحق .
قاتلي والله الحطة تاعك هادي تاع تحويسة اخطينا من القراية. قتلها بصح راني مقلتش لآدم . قاتلي وين راح يشوفك هيا نحوسوا شوي ونتغداو ونروحوا والله ما يفيق بيك .انا تبعتها قتلها ايه . خرجنا حوسنا وتغدينا وبقينا ندوروا في سونتر فيل.  صونا التلفون تاعي لقيتوا أدم . قتلوا حبي cv.قالي اريج وين راكي .قتلوا راني في الجامعة علاه .قالي والوا باه نقولك روحي وحدك انا عندي خدمة بزاف ليوم . قتلوا اوك مكانش مشكل ربي يعينك حبيبي. كوبا عليا ديراكت. توسوست كيفاه كوبا عليا ديراكت من بعد قلت بلاك عندو خدمة. كملنا الخمسة باه روحت للدار بقيت نستنى فيه حتى جا بصح يبان متغشش. قالي وش درتي ليوم . كدبت عليه قتلوا ما درت والوا قريت وروحت برك . قالي ايه راح بدل قشو وعاود خرج .
زيد كملت سمانة اخرى وانا نقولوا راني نقرى بصح انا نخليه يخرج يروح يخدم نلبس ونتحف روحي ونروح ندور ونحوس مع صاحبتي . ملڨري ساعات متعجبنيش كي يديرونجيها  واحد ويقولها اعطيني النميرو تقعد تهدر معاه نورمال وكي نقولها تقولي نورمال ما فيها والوا  .
نهار الخميس كملت نهار كامل وانا لبرة روحت على الخمسة كيف العادة . انا وصلت لقيت الطموبيل تاعو مڨارية . قلت ليوم تخلى عليا تفكرت وش راني لابسة . طبطبت فتحتلي عجوزتي الباب.  قتلها آدم وينو قاتلي راهو في الدار لفوق منعرف وشبيه يبان متقلق..قتلها.دنيا هنا قاتلي علاه قتلها قوليلها تعطيني غوب من عندها نلبسها كون يشوفني بالسروال والله يقتلني .قاتلي اسمعي انتي  قاعدة تخرجي بالسروال من وراه. قتلها ايه . قاتلي يا نندب عليك يا اريج انتي محوساتوا يباصي عليك باه يبرد قلبك .قاتلي ازربي روحي بدلي قبل ما يشوفك .
انا جيت راح ندخل للشمبرة تاع دنيا وادم يحكمني من شعري فوق الخمار وقالي ارواحي هنا يا القح** ليوم نباصي عليك  ليوم نقتلك يا الكلبة وحكمني يكركر فيا من شعري طلعني للدار الفوق وعجوزتي تجبد فيا . دخلني وقفل الباب على عجوزتي باه متدخلش . رماني في الهول ونحا السبة من السروال تاعو . قالي يا القح**تكدبي عليا كل يوم تقوليلي راني نقرا وانتي تروحي تع**، كل يوم نقول  بلاك ليوم برك دوك تتربى دوك تحبس . سمانة وانتي تكدبي عليا وش تحسابي فيا طحان راقد على وذنيا و معلاباليش مرتي  وش قاعدة  دير  و وين تروح . بصح صبرت و قلت دوك تفيق مع روحها ، دوك تحبس . وانتي وش ديري كل يوم تكدبي عليا في وجهي تلبسي لبسة تاع القح** تروحي دوري ولي يسوا ولي مايسواش يتفرج فيك.  ليوم نربيك ولا منسماش آدم . كان يهدر ويعيط على طول صوتو وجهو ولا احمر دم.
انا تبكشت من الخلعة ليوم وين فقت مع روحي وش كنت ندير . بصح نطقت ندافع على روحي قتلوا واش فيها كي نخرج نحي على خاطري البنات الكل تخرج وتلبس وش تحب غير انا حاب تدفني بالحياة ،ادا انت كبير وعشت حياتك بكري انا مزلت صغيرة وندير وش نحب .وياريتني ما نطقت ، شفتوا تحول ولا عبد اخر خاطي آدم راجلي لحنين لي يحبني ويدللني.  قالي انا حاب ندفنك بالحياة ، هادي هدرة جديدة شكون لي قالهالك صاحبتك لي ولاية كاملة تعرفها بلي قح** وانتي كي البهلولة تبعي فيها. . بصح معليش ليوم نعاود نربيك . هز السبة وشحطني بيها على رجلي فوق السروال عيطت ربي لي خلقني متوقعتوش راح يضربني بيها صح في بالي راه يخوف فيا برك . وقفت بعدت عليه نجري عاود حكمني ورماني في الارض وعاود شحطني بالسبتة  وليت نبكي بالصوت ونعيط على عجوزتي باه تفكني منو وهو والله ما حب يطلقني ضربني وحد الخمس خطرات بالسبتة على رجليا وليت نحس فيهم تقصو عليا. رما السبة من يدو وطابس عليا وحكمني من شعري ويضرب فيا بالكفوف ويقولي تكذبي عليا يا القح**وتقوليلي نروح نقرى ، تشوفي فيا طحان يا الكلبة.  نشوف فيه دخل في حالة هستيريا اول مرة نشوفوا في الحالة هادي . وانا نغطي في وجهي ونبعد فيه عليا وجهي تخدر من الكفوف . وجهي عاد كامل دم . سمعت عجوزتي فتحت الباب بالمفتاح الثاني لي عندها ودخلت تجري هي ودنيا  يبعدو فيه عليا وهو لاصق والله ما حب يطلقني يسب ويضرب . انا عدت نشوف في كلش مضبب ويدور دخت . وانا نسمع في عجوزتي تقولوا قتلت الطفلة الله لاتربحك.

فطنت لقيت روحي في السرير في الشمبرة تاعي وقشي مبدل ،كنت حاسة رجليا يحرقوا هزيت الجبة وخزرت مع رجليا كامل مطراسين بالزرق والاحمر والموف فوقهم بومادة بيضة .زيد مسيت وجهي لقيتو كامل منفوخ .وليت نبكي، دخلت عجوزتي شافتني قاتلي فطنتي . قتلها اعطيني تلفوني نعيط لبابا يجي يديني. قاتلي صلي على محمد وتفاهموا بالعقل. قتلها درك اعطيني تلفوني نعيط لبابا منزيدش نقعد عند ولدك الحڨار . دخل سمعني قالي تخليك تروحي تع**ولا راني حڨار . املا ايه راني حڨار والله ما راكي خارجتها من هنا  حتى نربيك .  هزيت البطات تاع الدوا الكل  كانو فوق التابل دو نوي ورميتهم عليه . وقتلوا والله ما نقعد عندك درك تعيط لبابا يجي يديني ونطلق منك . قالي اريج احشمي على روحك لا نجي نكمل عليك . قتلوا ما نحشمش يا الحڨار شفتني نحبك وليت تحڨر فيا وتضربني بالسبتة  والله ما نقعد عندك . شفتو تبسم وخرج. وخلاني نغلي وحدي كملت ليل كامل وانا نبكي وهو كل دقيقة يطل عليا ويخرج . على الربعة تاع الصباح سكت حسو عرفتوا رقد . خرجت بالعقل للصالة شفتوا راقد فوق البونكات .والتلفون تاعو محطوط فوق الطابلة . رحت نمشي بالعقل هزيت التلفون ورجعت للشمبرة عيطت لماما هزت عليا غير سمعتها قالت الوا وليت نبكي قتلها ماما ارواحي اديني آدم ضربني . قاتلي اه شومي علاه ضربك . قتلها من بعد نحكيلك المهم قولي لبابا يجي يديني من هنا منقعدش عندو .قاتلي غير يطلع الضو نكون عندك انا وباباك متخافيش.